1-2. (a) Ko atumi atatu wa Yesu adalamuliwa kuchita chani, ndipo iwo adachita chani? (b) Ko tikambirane chani munkhani ino?

PAUDANDOTI wachitika Pasika wa mu 32 EC, mtumi Petulo, Yakobo na Yohane adawona masomphenya yodabwisa maninge. Vinkuwoneka kuti masomphenya mwaya adayawona pa phiri ya Herimoni pomwe Yesu adasandulika pamaso pawo. ‘Nkhope yake idagaka ninge dzuwa, ndipo vovala vake vidagaka maninge.’ (Mat. 17:1-4) Chakumapeto kwa masomphenya mwaya, atumi adabva mawu ya Mulungu yakuti: ‘Uyu ni Mwana wangu wapamoyo yemwe ninkukondwera naye. Mumbamubvere.’ (Mat. 17:5) Vomwe atumi mwawa angachita pamoyo wawo vidawoneseratu kuti ambabveradi Yesu. Isembo tichadekana kutewedzera chitsanzo chawo.

² Munkhani yapita tidakambirana kuti pali vinthu vinango vomwe tichadekana kuleka kuchita kuti tiwonese kuti tikubveradi Yesu. Munkhani ino tikambirane vinthu viwiri vomwe Yesu adatiuza kuti timbachite.

3. Mobverana na Mateyu 7:13, 14, ko tichadekana kuchita chani?

³ Lewengani Mateyu 7:13, 14. Wonani kuti Yesu adafotokoza njira ziwiri zosiyana, zomwe ni nsewu ‘ukulu’ na nsewu ‘wopapatidza.’ Palibe nsewu wachitatu. Isepano tichadekana kusalula tekha nsewu wati tifambemo. Imwiyi ni nkhani ikulu ndawa kugumana moyo wosapera kunkuthemba watingasalule.

4. Ko mungafotokozeko chani va nsewu ‘ukulu’?

⁴ Nthawe zose timbaganizire kusiyana komwe kulipo pakati pa misewu yawiri mwaya. Wanthu azinji ankufamba mu nsewu ‘ukulu’ ndawa yakuti ni wosashupa kufambamo. Vobvesa ntsisi ni vakuti wanthu azinji ali munsewu moyu ndawa yakundowona kuti ndimo muli chigulu cha wanthu. Koma iwo ankudziwalini kuti yemwe ankuchitisa kuti wanthu azinji ambafambe  mumu ni Satana Ndyerekezi ndipo nsewu moyu unkutsogolera wanthu kuti akaphewe.—1 Akor. 6:9, 10; 1 Yoh. 5:19.

5. Ko anango adachita chani kuti agumane nsewu ‘wopanikiza’ kuti ayambe kufambamo?

⁵ Mosiyana na nsewu ‘ukulu,’ nsewu unango uyu ni ‘wopanikiza,’ ndipo omwe ankuugumana ni wochepa. Ndawa chani? Nivochitisa chidwi kuti muvesi yapatsogolo yake, Yesu adachenjeza wopfunzira wake kuti ambasamale na aneneri wabodza. (Mat. 7:15) Wanthu achafotokoza kuti panamatchetchi yazinji maninge yomwe yachati yachapfunzisa chaivo. Ndawa ya kuwanda kwa vipembedzo padziko pano, wanthu azinji asokonezeka ndipo ankukwanisalini kugumana njira yotsogolera kumoyo. Koma njira yakumoyo mwiyi ni vokwanisika kuigumana. Yesu adati: ‘Mukambasunga mawu yangu nthawe zose, ndiye kuti ndimwedi wopfunzira wangu. Mudzadziwe choonadi ndipo choonadi chidzakumasuleni.’ (Yoh. 8:31, 32) Tinkukutembejani ndawa yakuti munkuteweralini chigulu cha wanthu, koma m’malo mwake mudafagafaga choonadi. Mudapfunzira Mawu ya Mulungu nkuona vomwe achada kuti timbachite ndipo mudabvesera vipfunziso va Yesu. Mudapfunzira kuti Yahova achada kuti timbapewe vipfunziso vabodza vachipembedzo na kuleka kuchita nawo maphwando yomwe yadayambira kuvipembedzo vabodza. Mudapfunzira soti kuchita vomwe Yahova achada. Mudawona pomwe kuti ni voshupa kusiya kuchita voipa nkuyamba kuchita vinthu vokondweresa Yahova. (Mat. 10:34-36) Yenzelini nkhani ing’ono kuti imwepo muchinje vinthu pamoyo wanu. Podiya kuti venze tene, mudalimbikira ndawa yokonda Ababa wanu wakudzulu ndipo muchada kuwakondweresa. Ndipo dziwani kuti iye ankukondwa namwe maninge.—Miy. 27:11.

6. Mobverana na Salimo 119:9, 10, 45, 133, nchani chingatithandize kuti tipitirize kufamba munsewu wopanikiza?

⁶ Pakuti tidayamba kale kufamba mu nsewu wopanikiza, ko nchani chingatithandize kupitiriza kufambamo? Wonani chitsanzo ichi. M’madziko yanango munamisewu ya m’mbalim’mbali mwa mapiri ndipo ni yokhotchererewa na visimbi vomwe viteteza diraiva na karo yake. Visimbi vimwivi vithandiza kuti diraiva akambafambisa karo yake aleke kutaya nsewu nkugwera kuphompho. Palibe diraiva yemwe angalewe kuti visimbi vimwivi vinkuniphera ufulu. Malamulo ya Yahova yogumanika m’Baibolo yali ninge visimbi vimwivi. Malamulo mwaya yachatithandiza kuti tipitirize kufamba munsewu wopanikiza.—Lewengani Salimo 119:9, 10, 45, 133.

7. Ko alumbwana muchadekana kumbauwona tani nsewu wopanikiza?

⁷ Alumbwana, ko imwepo nthawe zinango muwona kuti malamulo ya Yahova yankukupanikizani? Satana afuna kuti imwepo mumbaganize tene. Iye achada kuti imwepo mumbachitembo vomwe wanthu womwe ankufamba munsewu ukulu ankuchita ndawa yakuti iwo ankuwoneka ninge ankukondwa na moyo. Iye angaphatise basa anzanu wakushikola na vinthu vamungawone pa interneti nkukuchitisani kuwona ninge munkuluza. Vomwe Satana ankufuna ni kukuchtisani kuganiza kuti malamulo ya Yahova yankukukangisani kukondwa na moyo. * Koma kumbukirani kuti Satana ankufunalini kuti wanthu mwawa adziwe kuti nsewu moyu uwafikise kuponi. Koma Yahova wakudziwisani kuti mukambafamba mu nsewu wopanikiza mudzagumane moyo.—Sal. 37:29; Yes. 35:5, 6; 65:21-23.

8. Ko imwepo alumbwana na atsikana munkupfunzira chani pa chitsanzo cha Olaf?

 ⁸ Onani vomwe mungapfunzire kwa m’bale munango dzina yake Olaf. * Anzake wa kushikola ambamuchichimiza kuti achite chigololo. Iye padawafotokozera kuti atewedza mpfundo za m’Baibolo za makhalidwe yabwino, azitsikana anango pashikola mwapo adayamba kumuchichimiza maninge kuti agone naye. Koma Olaf adapitiriza kukhala wolimba pakuchita chabwino. Koma sikuti ni chiyeso chimwichi chokha chomwe Olaf adagumana nacho. Iye adati: ‘Maticha yangu yadayesesa kuninyengerera kuti niyende ku univerisidade ndipo adati nikabvuma vichitise kuti wanthu adzanilemekeze. Iwo adati nikandolamba, nidzakhalelini wokondwa pamoyo wangu.’ Ko nchani chidathandiza Olaf kukhala wolimba paviyeso vimwivi? Iye adati: ‘Nenze pa ubale wabwino  maninge na abale na alongo mumpingu ndipo nimbawawona ninge wanthu wa m’banja yangu. Nimbapfunzira pomwe Baibolo mwakhama. Paningachita khama kupfunzira, nidazindikira kuti chimwichi ni chonadi, ndipo mapeto yake nidatsimikiza kutumikira Yahova.’

9. Ko omwe ankufuna kufamba munsewu wopanikiza achadekana kuchita chani?

⁹ Satana ankufuna kuti imwepo muleke kufamba pa nsewu woyenda kumoyo. Iye ankufuna muti muyambembo kufamba pansewu ukulu ‘wotsogolera wanthu kukachenekewa.’ (Mat. 7:13) Olo kuti viri teno, isepano tichadekana kufamba pansewu wopanikiza womwe ni wotetezeka na kupitiriza kubvera Yesu. Naboni manje tikambirane chinthu chinango chomwe Yesu adati timbachite.

10. Mobverana na Mateyu 5:23, 24, ko Yesu adati tichadekana kuchita chani?

¹⁰ Lewengani Mateyu 5:23, 24. Pamwapa Yesu ambafotokoza chinthu chodekana maninge kwa Ayuda omwe ambamubvesera. Ganizirani va munthu yemwe ali ku kachisi ndipo wakonzeka kale kupereka ntsembe yake kwa wantsembe. Peno panthawe mwiyi angakumbukire kuti anachifukwa na m’bale wake, ambafunika kusiya ntsembe ‘nkuyamba wachoka.’ Ndawa chani? Ndawa yakuti wazindikira kuti panachinthu chadikana maninge kuposha kupereka ntsembe. Yesu adabvekesa bwino kuti: ‘Chakuyamba khazikisa ntendere na m’bale wako.’

11. Fotokozani khama yomwe Yakobo adachita kuti akhazikise ntendere na Esau.

¹¹ Chitsanzo cha Yakobo chingatipfunzise vizinji pankhani yokhazikisa ntendere. Padati wachoka kumuyi kwawo nkukakhala magole 20 kunango, Mulungu pakuphatisa basa mngelo adalamula Yakobo kuti abwerere kwawo. (Gen. 31:11, 13, 38) Koma penze bvuto ibodzi. Nkulu wake Esau angada kumupha. (Gen. 27:41) Yakobo ‘ambachita mantha ndipo wenze na nkhawa ikulu’ pakuganiza kuti m’bale wake angabwere kudzamuchita nkhondo. (Gen. 32:7) Manje Yakobo adachita chani kuti akhazikise ntendere na m’bale wake? Chakuyamba, iye adapemphera mochokera pasi pa moyo nkumukumbira Yahova kuti amuthandize. Patsogolo pake, adatumiza mphaso kwa Esau. (Gen. 32:9-15) Pamapeto pake padati agumana maso na maso, Yakobo adagwada pamaso pa Esau pakumuwonesa ulemu. Iye adagwadira Esau osati kabodzi panango kawiri basi, koma mpakana ka 7! Pakuchita vinthu mwaulemu na modzichepesa tene, Yakobo adawonesa kuti ambafuna kukhazikisa ntendere na m’bale wake.—Gen. 33:3, 4.

12. Ko tinkupfunzira chani pa chitsanzo cha Yakobo?

¹² Tingapfunzirepo kanthu pa momwe Yakobo adakonzekerera kukagumana na Esau na vomwe adachita padagumana naye. Modzichepesa, Yakobo adakumbira Yahova kuti amuthandize. Patsogolo pake adachita vinthu mobverana na pemphero yake mwa kuchita vose vangakwanise kuti akondwerese m’bale wake. Padati agumana, Yakobo alibe kufuna kugegedzana na Esau pakufuna kuti adziwike wophonya na yemwe analazau. Koma cholinga cha Yakobo chenze chakuti akhazikise ntendere na m’bale wake. Ko tingatewedzere tani chitsanzo cha Yakobo?

13-14. Ko tichadekana kuchita chani peno takhumudwisa m’bale panango mulongo wathu?

¹³ Peno tinkufuna kufamba pa nsewu wakumoyo, tichadekana kukhala pantendere na abale wathu. (Aro. 12:18) Ko tingachite tani peno tazindikira kuti tachita vinthu vokhumudwisa Mkhrisitu munzathu? Tichadekana kupemphera kwa Yahova mochokera  pasi pa mtima ninge momwe Yakobo adachitira. Tingamukumbire kuti adalise vomwe tinkuyesesa kuchita kuti tikhale pa ntendere na m’bale wathu.

¹⁴ Tichadekana soti kupatula nthanwe kuti tidziunguze. Tingadzibvunze mibvunzo ninge yakuti: ‘Ko ndine wokonzeka kudzichepesa nkufotokoza kuti ndine wophonya, kuti nikhazikise ntendere? Ko Yahova angabve tani peno ningayambe ndine kukhazikisa ntendere na m’bale panango mulongo wangu?’ Midawiro yathu yangatithandize kuti tibvere Yesu na kudzichepesa nkufenderera munzathu wataphonyera kuti tikhazikise ntendere. Tikachita teno, ndiye kuti tinkutewedzera chitsanzo cha Yakobo.

15. Ko kuphatisa basa mpfundo ya pa Aefeso 4:2, 3 kungatithandize tani kukhazikisa ntendere na m’bale wathu?

¹⁵ Ndoganizani vomwe vidakachitika adakati Yakobo adadzikuza padagumana na m’bale wake. Macheza yawo yadakamalalini bwino. Tikayenda kukakambirana na m’bale panango mulongo yemwe tinaye chifukwa, tichadekana kukhala wodzichepesa. (Lewengani Aefeso 4:2, 3.) Lemba ya Miyambo 18:19 ilewa kuti: ‘M’bale yemwe waphonyerewa aposha thaundi yolimba, ndipo panamikangano yomwe yali ninge muti wofungira pansuwo wa ntsanja yokhalamo.’ Tikamupepesa munthu yemwe tamuphonyera, vingakhale vosashupa kuti tikhale pantendere.

16. Ko timbakumbukire kuti chofunika maninge nchani, ndipo ndawa chani?

¹⁶ Tichadekana soti kukhala wosamala tikambaganizira vati tikayankhule na momwe tikayankhulire. Tikakonzekera bwino tingathandize munthu wataphonyera kuti atikhululukire na kuyamba soti kubvana ninge kale. Pakuyamba panango iye angayankhule vinthu vomwe vingatiwawe. Vikakhala teno panango tingayambe kudziikhira kumbuyo nkumbalewa kuti tinalazau pa vomwe tidachita. Koma vimwivi vingathandizelini kuti tikhazikise ntendere. Dziwani kuti kukhazikisa ntendere ni kofunika maninge kuposha kufuna kuti adziwike wophonya na yemwe analazau.—1 Akor. 6:7.

17. Ko mungapfunzire chani pa chitsanzo cha Gilbert?

¹⁷ M’bale munango dzina yake Gilbert adayesesa mwakhama kuti akhazikise ntendere. Iye adati: ‘Nthawe inango nidayambana na munthu wa m’banja mwathu. Kwa magole yawiri ningayesesa kukambirana naye mwantendere kuti timbabvane ninge kale.’ Ko Gilbert  adachita pomwe chani? Iye adati: ‘Nthawe zose nikafuna kukambirana naye, nimbayamba napemphera nkudzikonzekeresa kuti peno anganiyankhule kuipa, osati nikalipe. Ningadekana kukhala wokonzeka kukhululuka. Nidawona kuti cholinga changu chimbakhale kukhazikisa ntendere, osati kufuna kuti adziwike wophonya na walazau.’ Ko vimwivi vidamuphindulisa tani? Gilbert adati: ‘Manjeuno ninantendere ndawa ninkubvana na wanthu wa m’banja mwangu.’

18-19. Peno takhumudwisa munthu, ko tichadekana kukhala wotsimikiza kuchita chani, ndipo ndawa chani?

¹⁸ Ko muchadekana kukhala wotsimikiza kuchita chani mukazindikira kuti mwakhumudwisa Mkhrisitu munzanu? Tewedzani malangizo ya Yesu ya kukhazikisa ntendere. Muuzeni Yahova vomwe vakuchitikirani, ndipo mukumbireni kuti akupaseni mzimu wake kuti mukwanise kukhazikisa ntendere. Mukachita vimwivi mudzakhale wokondwa ndipo mudzawonese kuti munkubveradi Yesu.—Mat. 5:9.

¹⁹ Ndise wotembeja Yahova ndawa watipasa malangizo yachikondi pophatisa basa Yesu Khrisitu yemwe ni ‘msolo wa mpingu.’ (Aef. 5:23) Naboni tose tikhale wotsimikiza ‘kumubvera’ ninge momwe adachitira mtumi Petulo, Yakobo na Yohane. (Mat. 17:5) Tapfunzira momwe tingakhazikisire ntendere na Mkhrisitu munzathu peno tamukhumudwisa. Tikambachita vimwivi na kupitiriza kufamba pansewu wopanikiza wotsogolera kumoyo, tidzatambire madaliso yazinji manjeuno na chimwemwe chosapera kutsogolo.