1-2. (a) Ndawa chani ntsiku zino wanthu azinji viwashupa kuthemba wanthu waudindo? (b) Ko tipfunzire chani munkhani ino?

 WANTHU azinji ntsiku zino viwashupa kuthemba wanthu omwe anamaudindo. Iwo achawona kuti maboma na malamulo yawo achaikhira kumbuyo wanthu olemera ndipo achathandizalini mokwana wanthu osauka. Baibolo ichalewa mobveka bwino kuti: ‘Munthu wapweteka munthu munzake pakumutonga.’ (Mla. 8:9) Ndipo azitsogoleri anango wavipembedzo achachita vinthu voipa maninge. Vimwevi vachitisa kuti wanthu azinji vimbawashupe kuthemba Mulungu. Ndipomwapa munthu akabvuma kupfunzira nase Baibolo, tikhala na basa ikulu yomuthandiza kuti ambathembe Yahova na wanthu omwe ankumuimira pano padziko yapasi.

² Koma sikuti opfunzira Baibolo okha ndiwo achadekana kupfunzira kuthemba Yahova na gulu yake. Olo isepano omwe takhala mu choonadi kwa magole yazinji tichadekana kupitiriza kukhulupirira kuti Yahova nthawe zose achachita vinthu munjira yabwino. Nthawe na nthawe tingambagumane na vinthu vochitisa kuti timbashupike kuthemba Yahova. Munkhani ino tikambirane vinthu vitatu vomwe vingayese chikhulupiriro chathu: (1) tikambawerenga nkhani zinango za m’Baibolo, (2) tikambatambira malangizo yoperekewa na gulu ya Yahova, na (3) tikadzagumana na mabvuto kutsogolo.

3. Ko nkhani zinango za m’Baibolo zingatikangise tani kuthemba Yahova?

 ³ Tikambawerenga Baibolo, tingadabwe na momwe Yahova adachitira vinthu na wanthu anango na vinthu vinango vadachita.  Mwakulinganiza, mu bukhu ya Numeri tichawerenga kuti Yahova adapha Muizirayeli munango ndawa yakuti angatema nkhuni pa Satade. Mu bukhu yachiwiri ya Samueli tichapfunzira kuti magole yazinji patsogolo pake, Yahova adakhululukira Mpfumu Davide podiya kuti adachita chigololo na Bateseba na kupha mwamuna wake. (Num. 15:32, 35; 2 Sam. 12:9, 13) Panango tingadzibvunze kuti, ‘ndawa chani Yahova adakhululukira Davide yemwe adapha munthu na kuchita chigololo, koma nkupha munthu yemwe adachita chimo yowoneka ninge ing’ono?’ Kuti tigumane mdawiro wa mbvunzo moyu, naboni tikambirane vinthu vitatu vomwe tichadekana kumbakumbukira nthawe zose tikambawerenga Baibolo.

4. Ko pa Genesis 18:20, 21 na pa Deuteronomo 10:17 pankutitsimikizira tani kuti Yahova aweruza mwachilungamo?

⁴ Baibolo ifotokozeratulini vinthu vose pankhani yomwe idachitika. Mwakulinganiza, tinkudziwa bwino kuti Davide adalapa na moyo wose pa vomwe adachita. (Sal. 51:2-4) Koma ko tinkudziwa kuti munthu yemwe adaphwanya lamulo ya Satade wenze tani? Ko iye ambadzilinga na vomwe adachita? Ko iye wenze kale na chizolowezi chophwanya malamulo ya Yahova? Ko wanthu anango adayesako kumuchenjeza koma iye nkulamba? Baibolo ilewalini. Podiya viri tene timbatsimikize kuti Yahova ‘angachitelini vinthu viribe chilungamo.’ (Deut. 32:4) Iye achasaina vinthu pakutengera nkhani yose, osati potengera vomwe wanthu ankulewa panango vilivose vomwe vikangisa wanthu kuweruza mwachilungamo. (Lewengani Genesis 18:20, 21; Deuteronomo 10:17.) Kuti timbakwanise kutsimikizira kuti Yahova nthawe zose aweruza bwino, tichadekana kudziwa vizinji va iye na malamulo yake. Olo kuti tiwerenge nkhani yomwe tinkukwanisalini kugumana midawiro yake manjeuno, tinkudziwa bwino kuti Mulungu wathu ‘ni wachilungamo mu njira zake zose.’—Sal. 145:17.

5. Ko uchimo utikangisa tani kuwona vinthu mwachilungamo? (Onani pomwe bokosi yakuti: “ Uchimo utikangisa kuwona vinthu mwachilungamo.”)

⁵ Uchimo utikangisa kuwona vinthu mwachilungamo. Mulungu adatikonza muchifaniziro chake, ndipomwapa tichada kumbawona wanthu ankuchitiriwa vinthu mwachilungamo.  (Gen. 1:26) Koma pakuti ndise ochimwa, nthawe zinango tingakwaniselini kuweruza nkhani mwachilungamo podiya tiwone kuti tinkuidziwa nkhani yose. Mwakulinganiza, ndoganizani momwe vidamuwawira Yona padawona kuti Yahova wasaina kuti andowakhululukira wanthu wa ku Nineve. (Yona 3:10–4:1) Koma onani maphindu yadabwera ndawa yowachitira chifundo. Anineve oposha 120.000 omwe adalapa adapulumuka. Ndipo pamapeto pake, vidawonekera kuti Yona ndiye wenze na maganizo yophonyeka, osati Yahova.

6. Ndawa chani Yahova ni wosachichimizika kutifotokozera ndawa yake wasaina kuchita vinthu?

⁶ Yahova akasaina kuchita vinthu, sikuti ni wochichimizika kufotokozera wanthu. Ni shuwadi kuti Yahova angapasa mpata atumiki wake kuti afotokozeko maganizo yawo pa vinthu vomwe iye adachita panango pa vomwe angafuna kuchita. (Gen. 18:25; Yona 4:2, 3) Ndipo nthawe zinango angafotokozeratu ndawa yake wasaina kuchita vinthu. (Yona 4:10, 11) Podiya kuti viri teno, sikuti Yahova ni wochichimizika kutifotokozera. Pakuti iye ni Mulengi wathu, adikhiralini kubvumiziwa na munthu pa vomwe ankufuna kuchita.—Yes. 40:13, 14; 55:9.

7. Ko tingashupike kuthemba mbani, ndipo ndawa chani?

⁷ Isepano ndise otsimikiza kuti Yahova nthawe zose achita vinthu mwachilungamo. Koma vomwe vingatishupe ni kukhulupirira wanthu omwe ankumuimira. Vingatishupe kukhulupirira kuti peno wanthu omwe anamaudindo mugulu ya Yahova ankuchita vinthu mobverana na malangizo ya Yahova, panango akundochita va mumsolo mwawo. Panango vimwevi ndivo vangaganizambo wanthu wa munthawe za m’Baibolo. Ndoganizirani vitsanzo vatatomola  mundime 3. Azibale wake wa munthu yemwe ambatema nkhuni pa Satade panango vidawashupa kukhulupirira kuti peno Mose wayambadi wabvunza Yahova akanati wagemula kuti iye aphewe. Ndipo azishamwali wa Uriya Mhiti yemwe nkazi wake adachita chigololo na Davide, panango adaganiza kuti Davide wapulumuka pachilango cha kuphewa ndawa ya udindo wake ninge Mpfumu. Pamwapa mpfundo ni yakuti tingakwaniselini kuthemba Yahova peno tinkukangira kuthemba wanthu omwe ankumuimira.

8. Ko vomwe vinkuchitika ntsiku zino vinkulingana tani na vomwe vinkutomolewa pa Machitidwe 16:4, 5 ndipo ko mpingu wachikhrisitu uchafamba tani ntsiku zino?

⁸ Ntsiku zino Yahova ankuphatisa basa ‘kapolo wokhulupirika na wanzeru’ pakutsogolera gulu yake. (Mat. 24:45) Ninge mwevenzere na bungwe yotonga yoyambirira munthawe za kalekale, kapolo wokhulupirika moyu achanyang’anira wanthu wa Yahova padziko yose na kupereka malangizo kwa akulu mmipingu. (Lewengani Machitidwe 16:4, 5.) Akulu akandotambira malangizo mwaya, achayapereka kumipingu. Tingawonese kuti tinkutsimikiza kuti Yahova ni wachilungamo peno tibvera malangizo ya gulu yomwe akulu achatipasa.

9. Ko tingashupike maninge kubvera malangizo ya akulu panthawe iponi, ndipo ndawa chani?

⁹ Nthawe zinango tingashupike kubverana na vomwe akulu asaina kuchita. Mwakulinganiza, mipingu na madera yazinji yakonzewa pomwe. Nthawe zinango akulu akumbira ofalisa kuti ayende mumpingu unango kuti mipando yambaphatisiwe basa mwakukwana. Peno tauziwa kuti tiyende mpingu unango, vingatishupe kuti tisiyane na azishamwali na azibale wathu. Ko Mulungu ndiye achatsogolera  akulu pakutiuza mpingu wati tiyende? Neye. Ndipomwapa tingashupike kuwabvera. Koma Yahova achawathemba akulu mwawa ndipo isepano timbawathembembo. *

10. Mobverana na Aheberi 13:17, ndawa chani tichadekana kubvera akulu?

¹⁰ Ndawa chani tichadekana kubverana vomwe akulu asankhula podiya kuti ndivolini vatingafuna? Ndawa yakuti tikachita vimwevi tithandizira kuti tikhale pantendere. (Aef. 4:2, 3) Mpingu wose uphindula peno wanthu wose ni wodzichepesa ndipo ankubvera vomwe akulu alinganiza. (Lewengani Aheberi 13:17.) Ndipo phindu ikulu ni yakuti tingawonese kuti tinkuthemba Yahova na akulu womwe adawapasa udindo wotinyang’anira.—Mac. 20:28.

11. Nchani chingatithandize kuti timbabvere malangizo yochoka kwa akulu?

¹¹ Chomwe chingatithandize kuthemba akulu ni kudziwa kuti iwo achapemphera maninge akambasaina vochita pa nkhani za mumpingu. Iwo achaganizira soti mpfundo za m’Baibolo na kuwerenga mosamala mabukhu yoperekewa na gulu ya Yahova. Cholinga chawo ni kufuna kukondweresa Yahova na kuchita vose vangakwanise kuti asamalire wanthu wake. Amuna wokhulupirika mwawa achadziwa kuti Yahova achawonesesa momwe iwo ankusamalirira wanthu wake. (1 Pet. 5:2, 3) Onani kuti olo tinkukhala mudziko yogawikana na nkhani za ndale, kusalulana khaindi na vipembedzo, ise ndise obverana pakutumikira Mulungu chaiye. Vimwevi vidakakwanisikalini adakati Yahova ankudalisalini gulu yake.

12. Ko akulu achaganizira mosamala vinthu viponi kuti atsimikizire peno munthu yemwe adachita chimo walapadi?

¹² Yahova awathemba akulu ndipo adawapasa udindo ukulu wowonesesa kuti mpingu ni wochena. Peno Mkhrisitu wachita chimo ikulu, Yahova achada kuti akulu asaine peno munthu muyo apitirize kukhala mumpingu panango neye. Iwo ali soti na udindo wowonesesa kuti peno munthu yemwe wachita chimo ankudziringa na vomwe wachita. Panango iye angalewe kuti walapa, koma ko iye ankuipidwa na vomwe adachita? Ko watsimikizadi kuti adzachitelini pomwe chimo mweyo? Peno kubverana na zishamwali woipa ndiko kudachitisa kuti iye afikane pakuchita chimo, ko iye ni wokonzeka kuleka kubverana nawo? Akulu achapemphera kwa Yahova, kufagafaga Malemba na kuwonesesa peno munthu muyo ankudziringa na vomwe adachita. Akulu akachita vose vimwevi achasaina kuti peno iye angapitirize kukhala mumpingu. Nthawe zinango angafikane pakuchosewa.—1 Akor. 5:11-13.

13. Ko tingabve tani peno yemwe wachosewa ni shamwali panango m’bale wathu?

¹³ Manje tani peno tinkushupika kuthemba akulu? Peno yemwe wachosewa ni m’bale wathulini olo shamwali wathu, panango tingadawikize kuti achita bwino kumuchosa. Koma panango vingatiwawe maninge peno wachosewa ni shamwali panango m’bale wathu. Tingayambe kuwona kuti akulu alibe kuyamba aidziwa nkhani ndipo alibe kutewedza malangizo ya Yahova. Ko nchani chingatithandize kuti timbaganize bwino pa vomwe akulu asaina kuchita?

14. Nchani chingatithandize kuthemba akulu peno iwo achosa shamwali panango m’bale wathu?

¹⁴ Tingachite bwino kukumbukira kuti kuchosa munthu ni makonzedwe ya Yahova  ndipo viphindulisa mpingu wose kuphatanidzapo munthu yemwe adachita chimo. Peno munthu yemwe adachita chimo ankulapalini ndipo ankupitiriza kukhala mumpingu, angachitise kuti anango atengerembo. (Agal. 5:9) Kuthimizira pamwapa, iye angazindikirelini kuti vomwe adachita ni chimo ikulu ndipo angayeseselini kuti achinje khalidwe yake kuti Yahova ayambe pomwe kukondwa naye. (Mla. 8:11) Ndipomwapa timbakhale otsimikiza kuti peno akulu adafika pakumuchosa munthu, adayamba adziwa vose ndipo adautengera siriyasi udindo wawo. Akulu achadziwa kuti ninge mwevenzere munthawe ya Aizirayeli, iwo ‘ankuweruziralini munthu, koma ankuweruzira Yahova.’—2 Mbiri 19:6, 7.

15. Ndawa chani tichadekana kuthemba maninge malangizo ya Yahova manjeuno?

¹⁵ Pakuti mapeto ya dziko yoipa ino yafendera maninge, ino ndiyo nthawe yotsimikizira kuti Yahova achita vachilungamo nthawe zose. Ndawa chani? Ndawa yakuti nkati mwa chisautso chikulu panango tingadzatambire malangizo yomwe yangadzawoneke ninge yosathandiza na yosabveka. Ni vodziwikiratu kuti Yahova adzayankhulelini nase sitiriti. Koma ambadzapereke malangizo pakuphatisa basa wanthu womuimira. Imwiyi ni nthawelini yombadzakaikira vomwe akulu ankuchita nkumbabvunza kuti, ‘ko malangizo mwaya yachokeradi kwa Yahova, panango akulu akundochitambo vamunsolo mwawo?’ Ko imwepo mudzathembe malangizo ya Yahova panthawe yoshupa mweyi? Mdawiro wa mbvunzo moyu ungathembe pa vomwe muchachita mukatambira malangizo ya Yahova manjeuno. Peno imwepo mukhulupirira malangizo ya Yahova manjeuno ndipo mubvera mwakankulumize, tinashuwa kuti mudzachite chibodzibodzi nkati mwa chisautso chikulu.—Luka 16:10.

16. Ko ni vinthu viponi vomwe vingadzatikangise kuthemba Yahova kutsogolo uku?

¹⁶ Tichadekana soti kuganizira momwe tidzachitire vinthu Yahova akadzaweruza wanthu mudziko yoipa ino. Pakali pano tinashungu yakuti wanthu womwe atumikiralini Yahova na azibale wathu omwe ni Mbonilini ayambe kutumikira mapeto yakanati yafika. Koma pa Arumagedo Yahova adzaphatise basa Yesu kuti asaine kuti wanthu mwawa viwamalire tani. (Mat. 25:31-​33; 2 Ates. 1:​7-9) Udzakhalelini udindo wathu wosaina kuti Yahova achitire chifundo mbani ndipo acheneke mbani. (Mat. 25:34, 41, 46) Ko tidzaleke kutumikira Yahova ndawa yowona kuti alibe kuweruza wanthu ninge momwe tingafunira? Tingachite bwino kuyesesa kumbathemba maninge Yahova manjeuno kuti tidzakwanise kumuthemba maninge kutsogolo.

17. Ko tidzaphindule tani Yahova akadzati waweruza dongosolo ino ya vinthu?

 ¹⁷ Ndoganizani momwe tidzabvere mudziko inyowani pakuwona momwe Yahova waweruzira. Vipembedzo vabodza, malonda na vinthu vandale kudzakhale kulibe, ndipo Yahova adzachose vinthu vose vomwe vakhala vikuboneresa wanthu kuchokera kalekale. Tidzakhale na moyo wabwino ndawa tidzachoserewe matenda, tidzaleke kukalamba ndipo tidzafelini. Satana na viwanda vake adzafungiriwe kwa magole 1.000 ndipo voipa vose vomwe vidabwera ndawa ya kusabvera kwawo vidzachosewe. (Chiv. 20:2, 3) Panthawe mweyi tidzakondwe maninge pakuwona kuti tidachita bwino kutsimikizira kuti Yahova achita vinthu vachilungamo nthawe zose.

18. Mobverana na Numeri 11:4-6 na 21:5, ko tinkupfunzira chani pa vomwe Aizirayeli adachita?

¹⁸ Ko mudziko inyowani mungadzachitike vinthu vomwe vingadzatikangise kuthemba Yahova? Ndoganizani vomwe vidachitikira Aizirayeli padandoti achosewa manjemanje pa ukapolo ku Iguputo. Anango adayamba kudandaula ndawa yakuti adasiya ntsomba na chakudya chomwe angachikonda ndipo adayamba kunyoza mana yomwe Yahova angawapasa. (Lewengani Numeri 11:4-6; 21:5.) Ko isepano tingadzachitembo chibodzibodzi chisautso chikulu chikadzamala? Tinkudziwalini kuti padzakhale basa ikulu tani pakukonza dziko ino pang’onopang’ono kuti ikhale paradaiso. Ni vodziwikiratu kuti padzakhale basa ikulu ndipo kumayambiriro panango tidzakhale na vinthu vochepa. Ko tidzakhale okhutira na vinthu vomwe Yahova adzatipase panthawe mweyo? Vomwe tinkudziwa ni vakuti, peno titembeja vomwe Yahova ankutipasa manjeuno, ndiye kuti tidzachite chibodzibodzi kutsogolo uku.

19. Ko mungafotokoze tani mwachigwato mpfundo zikuluzikulu za munkhani ino?

¹⁹ Yahova nthawe zose achita vinthu mwachilungamo. Tichadekana kumbatsimikizira vimwevi. Tichadekana soti kumbathemba wanthu omwe Yahova wawaikha kuti ambapereke malangizo. Ayi kuyebwa mawu yomwe Yahova adauza mneneri Yesaya kuti: ‘Mudzakhale wamphanvu mukakhala wosagunduzika na wachikhulupiriro.’—Yes. 30:15.