MUNTHAWE za m’Baibolo, mwamuna ambapereka kobiri za malowolo vikakhala kuti wakuchimuna na wakuchikazi abverana navo vakuti wana alowolane. Malipiro mwaya yambaphatanidzapo kupereka vinthu vantengo wapatali, vinyama panango kobiri. Nthawe zinango wakuchikazi ambauza mwamuna kuti andowaphatira basa, ninga mwavidakhalira na Yakobo yemwe adaphata basa kwa magole 7 kuti alowole Rakele. (Gen. 29:17, 18, 20) Koma ko ndawa chani angalipira pakulowola nkazi?

Munthu munango wopfunzira Baibolo wodziwika kuti Carol Meyers adanemba kuti: ‘Wakuchikazi angalipirisa mwamuna ndawa yowona kuti mwana wawo nkazi akachoka asiye kumbawathandiza pa basa ya ulimi womwe wenze wofunika kuti agumane vosowa.’ Kulipira pakulowola nkazi kungathandiza pomwe kuti pakhale kubverana pakati pa wakuchikazi na wakuchimuna. Ndipo vimbathandiza kuti ambathandizane mwakukwana peno anango agwerewa na mabvuto. Kulipira pakulowola nkazi kungatsimikizira pomwe kuti nkazi wachoka m’manja mwa ababa wake ndipo manje ambasamaliriwe na mwamuna wake.

Kulipira malowolo kumbatanthauzalini kuti nkazi ni malonda yomwe munthu akafuna angayagulise. Bukhu yakuti Ancient Israel—Its Life and Institutions ilewa kuti: ‘Lamulo mweyi yakuti mwamuna ambapereke kobiri panango vinthu vinango ku banja yakuchikazi munthawe ya Aizirayeli, ingawonesa ninge nkazi waguliwa. Koma olo viri teno malipiro mwayo yambayendalini kwa nkazi, koma kwa wanthu wa m’banja mwake.’

Ntsiku zino, m’madziko yanango adakapitiriza kumbalipirisa mwamuna akafuna kulowola nkazi. Peno azibereki wachikhrisitu ankufuna kuti mwamuna awapase malowolo, ‘ambakhaleko oganizira anango’ pankhani mwiyi ndipo osati ambatchadje monyanyira. (Afil. 4:5; 1 Akor. 10:32, 33) Akachita teno, angawoneselini kuti ni ‘wokonda kobiri’ panango wadyera. (2 Tim. 3:2) Kuthimizira pamwapa, peno azibereki wachikhrisitu anganyanyirelini pakukumbira kobriri, mwamuna angachichimizikelini kuchinja madata ya ukwati pakufuna kuti ayambe wagumana kobiri yose yomwe wauziwa. Ndipo vingathandize pomwe kuti mwamuna moyu osati adzachichimizike kusiya upainiya kuti akwanise kugumana kobiri yomwe inkufuniwa na wakubanja ya kuchikazi.

M’madziko yanango muliretu malamulo ya momwe mwamuna angaperekere kobiri za malowolo. Vikakhala tene, azibereki wachikhrisitu achabvera malamulo mwayo. Ndawa chani? Ndawa yakuti Mawu ya Mulungu yafotokoza kuti Akhrisitu achadekana ‘kumbagonjera olamulira akulu-akulu’ peno malamulo yawo yankutsutsanalini na malamulo ya Mulungu.—Aro. 13:1; Mac. 5:29.