YAHOVA wenze adabvumiza mu Chilamulo chake kuti njiwa panango nkhangaiwa zimbaperekewe ntsembe. Mbalami ziwiri mwizi zitomolerewa pabodzi m’Chilamulo akambalewa vopereka ntsembe. Ndipo munthu ambachita kusankha kuti apereke ziponi. (Lev. 1:14; 12:8; 14:30) Ndawa chani tingalewe kuti lamulo mweyi yenze yothandiza? Yenze yothandiza ndawa yakuti njiwa zenze na nthawe yake yogumanika. Ndawa chani zimbasowasowa?

Njiwa zimbagumanika ku Izirayeli m’minyezi yotentha basi. Gole iliyose ukafika mwezi wa Outubro, zimbabwera ku Izirayeli kuchokera m’madera yakutali. Yakafika mainza zimbathawa nkudzabwera pomwe nthawe yotentha. (Nymbo 2:11, 12; Yer. 8:7) Vimwevi vinkutanthauza kuti venze voshupa maninge kuti Aizirayeli apereke ntsembe za njiwa munthawe ya mainza.

Koma nkhangaiwa zimbagumanika mu Izirayeli gole yose. Ndipo ubwino wenze wakuti zenze mbalami zomwe ambakwanisa kuziweta. (Linganizani na Yohane 2:14, 16.) Bukhu yakuti Bible Plants and Animals idalewa kuti ‘mudziko ya Palestina, wanthu wa m’mathaundi na wa m’mamiyi ambaweta nkhangaiwa. Munthu aliyese ambakhala na kakhola koweteramo nkhangaiwa.’—Linganizani na Yesaya 60:8.

Yahova adawonesa chikondi pakubvumiza kuti Aizirayeli ambapereke ntsembe nkhangaiwa panango njiwa ndawa yakuti njiwa zikasowa ambapereka nkhangaiwa.