1. Ko tingamale tani nthawe tili na Yahova?

TIKONDA kumala nthawe tinamunthu yemwe atibvesa. Mwamuna na nkazi wake peno abverana akonda kumala nthawe itali ali pabodzi. Alumbwana na atsikana akonda kumala nthawe ali na azishamwali wawo. Ndipo tikonda kumala nthawe tili pabodzi na abale na alongo wathu. Koma chofunika maninge ni kumala nthawe tili na Mulungu wathu. Tingachite vimwivi mwa kupemphera kwa iye, kuwerenga Mawu yake na kuganizira makhalidwe yake yabwino na cholinga chake. Inde, nthawe yomwe timala tili na Yahova iyendalini papezi.—Sal. 139:17.

2. Ko nthawe zinango vitishupa kuchita chani?

² Podiya kuti vitikomedza kupemphera na kupfunzira Baibolo, nthawe zinango vikhala voshupa. Kupanikizika kungatichitise kusowa nthawe yakuti titumikire Yahova. Basa yathu, maudindo ya m’banja na vochita vinango vingatichitise kukhala wopanikizika mpaka kuwona kuti tilibe nthawe yopemphera, kupfunzira na kuganizira vatawerenga.

3. Ko nchani pomwe chingatidyere nthawe?

³ Pali pomwe chinthu chinango chomwe chingatidyere nthawe. Tikaleka kusamala, vinthu vabwinobwino vingatichitise kukhala opanikizika maninge mpakana kusowa nthawe yofenderera Yahova. Mwakulinganiza, nkuphonyalini kupatula nthawe kuti tichite vokondweresa. Koma olo vokondweresa vabwinobwino vingatipanikize mpakana kukhala na nthawe yochepa yotumikirira Yahova. Ndipomwapa timbagawe bwino  nthawe kuti vokondweresa visambakhale pamalo yoyamba.—Miy. 25:27; 1 Tim. 4:8.

4. Ko tifuna tikambirane chani manje?

⁴ Munkhani ino tikambirane kuti ndawa chani tichadekana kuzindikira vofunika maninge pamoyo wathu. Tikambirane pomwe vatingachite kuti timbamale nthawe tili na Yahova na kuwona momwe tingaphindulire tikambaphatisa basa nthawe yathu mwanzeru tene.

5. Ko kuganizira malangizo ya pa Aefeso 5:15-17 kungathandize tani alumbwana na atsikana kusankhula moyo wabwino?

⁵Sankhulani kukhala na moyo waphindu. Alumbwana anashungu yofuna kudziwa njira yabwino yophatisira basa moyo wawo. Ndipomwapa maticha na azibale womwe ni Mbonilini angawalimbikise kuti ayende ku univerisidade kuti adzagumane basa ya kobiri zizinji. Mapfunziro yatene yangawatengere nthawe izinji. Koma azibereki na anango mumpingu angalimbikise alumbwana na atsikana kuti aphatise basa moyo wawo pa kutumikira Yahova. Manje nchani chingathandize wachilumbwana kusankhula vinthu mwanzeru? Iye angaphindule maninge peno angawerenge lemba ya Aefeso 5:15-17 na kuiganizira maninge. (Lewengani.) Wachilumbwana akamaliza kuwerenga mavesi mwaya, angafunike kudzibvunza kuti: ‘Ko ‘chifuniro cha Yahova’ ni chani? Ko iye angakondwere nikasankha kuchita chani? Ko nikasaina kuchita vimwivi, ndiye kuti ninkuphatisa basa bwino nthawe yangu?’ Ayi kuyebwa kuti ‘ntsiku zatiri zino ni zoipa’ ndipo dziko yotongewa na Satana ino imale manjemanje. Ndipomwapa vingakhale bwino kuti pamoyo wathu tisankhule kuchita vinthu vomwe vingakondwerese Yahova.

6. Ko Mariya adasankhula kuchita chani, ndipo ndawa chani munkuwona kuti adasankhula mwanzeru?

⁶Zindikirani vofunika maninge. Nthawe zinango olo pakati pa vinthu viwiri vabwino tingafunike kusankhula mwanzeru kuti tiphatise bwino basa nthawe yathu. Tinkuwona vimwivi tikaganizira vomwe vidachitika Yesu padayenda kumuyi kwa Mariya na Malita. Malita adakondwa maninge kuwona kuti Yesu wabwera ndipo adayamba kumukonzera chakudya chizinji. Koma Mariya adakhala pafupi na Yesu nkumbabvesera vomwe angapfunzisa. Podiya kuti vomwe Malita adachita venzelini vophonyeka, Yesu adalewa kuti Mariya ‘wasankhula chinthu chabwino maninge.’ (Luka 10:38-42) Nkuyenda kwa nthawe, panango Mariya adafika pakuyebwa chakudya chomwe chidadyewa ntsiku mweire, koma tinashuwa kuti alibe kuyebwa vomwe adapfunzira kwa Yesu. Ninga momwe Mariya adamalira nthawe yake ali na Yesu, isembo tingamale nthawe yathu tili na Yahova. Ko tingachite chani kuti tiphindule maninge panthawe yomwe tina Yahova?

7. Ndawa chani tifunika kupemphera, kupfunzira na kuganizira vatapfunzira?

⁷Dziwani kuti pemphero, kupfunzira na kuganizira vatapfunzira ni mbali ya kupemphera kwathu. Tikambapemphera, tikhala kuti tinkuyankhula na Ababa wathu wakudzulu womwe atikonda maninge. (Sal. 5:7) Tikambapfunzira Baibolo tikakhala kuti ‘tinkumudziwa bwino Mulungu’ yemwe ni wanzeru kuposha munthu aliyese. (Miy. 2:1-5) Tikambaganizira vatapfunzira, tikwanisa kuwona makhalidwe yabwino ya Yahova na vinthu vabwino vomwe ankufuna kudzachitira isepano na wanthu wose. Imwiyi ni njira  yabwino maninge yophatisira basa nthawe yathu. Manje tingachite tani kuti timbaphindule maninge panthawe mwiyi?

8. Ko tinkupfunzira chani kuchokera pa momwe Yesu adaphatisira basa nthawe yake muchipululu?

⁸Peno ni vokwanisika, khalani pamalo yalibe zungo. Ganizirani chitsanzo cha Yesu. Akanati kuyamba utumiki wake pano padziko yapasi, adamala ntsiku 40 ali muchipululu. (Luka 4:1, 2) Pamalo yalibe zungo mwaya, Yesu adakwanisa kupemphera kwa Yahova na kuganizira vomwe Ababa wake mwawa ankufuna kuti iye achite. Vimwivi ndivo vidakonzekeresa Yesu pa mayesero yomwe yenze yadafendera. Ko mungaphindule tani na chitsanzo chake? Peno pamuyi panu mulipo wanthu azinji, nthawe zinango vingakushupeni kugumana malo yalibe zungo. Vikakhala tene, mungachite bwino kufutukako kuti mukhale pamalo ya zii. Vimwivi ndivo vomwe Julie amchita kuti akwanise kumala nthawe ankuyankhula na Yahova mpemphero. Iye na mwamuna wake ankukhala mukanyumba kang’ono ku França ndipo ni voshupa kuti akhale pamalo yalibe vosokoneza. Julie adati: ‘Niyenda kumalo yosungirako vinyama ntsiku zose. Kumoku nikwanisa kukhala nekha ndipo nzeru zangu zose zikhala pa kuyankhula na Yahova.’

9. Ko Yesu adakwanisa tani kupatula nthawe yolimbisa ushamwali wake na Yahova podiya kuti wenze wopanikizika?

⁹ Yesu wenze wopanikizika maninge pamoyo wake. Pangachita utumiki wake padziko pano, ambandokhalira kulondolewa na chigulu cha wanthu ndipo pangafunika nthawe kuti akwanise kuwaikhira nzeru. Nthawe inango, ‘wanthu wose wa mu thaundi adadzala pansuwo’ kuti amuwone. Olo kuti venze tene, iye adapatula nthawe yoyankhula na Yahova mpemphero. Iye adamuka dzuwa ikanati kuchoka ‘nkuyenda kwayekha’ kuti akacheze na Ababa wake.—Maliko 1:32-35.

10-11. Mobverana na Mateyu 26:40, 41, ko Yesu adalimbikisa opfunzira wake kuti achite chani, koma iwo adachita chani?

¹⁰ Usiku womalizira wa moyo wake padziko pano, Yesu adasankhula pomwe malo yabwino kuti apemphere na kuganizira. Malo mwaya adayagumana m’munda wa Getsemane. (Mat. 26:36) Panthawe mwiyi, Yesu adapfunzisa wopfunzira wake chinthu chofunika maninge pankhani ya pemphero.

¹¹ Wonani vomwe vidachitika. Vinkuwoneka kuti Yesu na wopfunzira wake adafika m’munda wa Getsemane nthawe yajula kale pakati pa usiku. Iye adawauza kuti ‘khalani maso’ ndipo iye adayenda kukapemphera. (Mat. 26:37-39) Koma pomwe iye angapemphera, wose adayamba kugona. Iye padawagumana  kuti agona, adawalimbikisa kuti ‘akhale maso na kupemphera mosalekedza.’ (Lewengani Mateyu 26:40, 41.) Yesu adazindikira kuti opfunzira wake asokonezeka maganizo ndipo ni woneta. Ndipomwapa adayankhula mowabvesa kuti ‘thupi ni yofoka.’ Yesu adayenda pomwe maulendo yawiri kukapemphera, koma akabwerera ambawagumana ankugona m’malo mwakuti apemphere.—Mat. 26:42-45.

12. Ko tingachite tani peno ndise woneta panango wokwinyirira maninge ndipo tilibe shungu yopemphera?

¹²Sankhulani nthawe yabwino. Nthawe zinango tingasokonezeke maganizo panango kuneta maninge mpaka kukanga kupemphera. Peno imwepo mukubvambo tene, dziwani kuti ndimwelini mwekha. Manje mungachite chani? Anango omwe achakonda kupemphera kumaulo, adaona kuti vikhala bwino kupemphera kukanati kudokeratu kuchitira kuti angakangire ndawa ya tulo. Anango adawona kuti achapemphera bwino peno ali khazikike panango ali imirire, osati ali gone. Manje tani peno munankhawa panango okwinyirira ndipo mulibe shungu yopemphera? Muuzeni Yahova momwe munkubvera, ndipo mumbatsimikizire kuti Ababa wathu wachifundo ankukubvani.—Sal. 139:4.

13. Ko foni ingatisokoneze tani tikambapemphera, kupfunzira patekha panano tikakhala pamisonkhano?

¹³Mukambapfunzira, ayi kubvuma kusokonezewa na vinthu vinango. Sikuti pemphero yokha ndiyo ingatithandize kulimbisa ushamwali wathu na Yahova. Kupfunzira Mawu ya Mulungu na kugumanika pamisonkhano kungatithandize pomwe kuti timufenderere. Ko pali chamungachite kuti muphatise bwino basa nthawe yanu mukakhala pamisonkhano ya mpingu? Dzibvunzeni kuti: ‘Nchani chomwe chinisokoneza nikakhala pamisonkhano panango nikafuna kupfunzira panekha?’ Peno foni yanu yalira misonkhano ili nkati panango mwabwera mensaje, ko munkuwona kuti vingakhale bwino kudawira? Ntsiku zino ni wanthu azinji omwe anamafoni. Alangizi anango adati kundokhala na foni pafupi kungakukangise kuikhira nzeru vomwe vinkuchitika pamalo mwayo. Munthu munango wopfunzira momwe nzeru zichaphatira basa adati: ‘Peno maganizo yako yali kunango, ungakwaniselini kuikhira nzeru bwinobwino pa vomwe unkuchita.’  Tikakhala pamisonkhano yadera panango yachigawo, tiuziwa mobwerezabwereza kuti peno tabweresa foni tiyikonze kuti ileke kusokoneza anango. Ko tingachitelini bwino kumbaikonzambo kuti ileke kusokoneza isepano tikambapemphera, kupfunzira patekha panango tikakhala pamisonkhano?

14. Mobverana na Afilipi 4:6, 7, ko Yahova angatithandize tani kuikhira nzeru?

¹⁴Mukumbireni Yahova kuti akuthandizeni kuikhira nzeru. Mukazindikira kuti maganizo yanu yankufambafamba misonkhano ili nkati, mupempheni Yahova kuti akuthandizeni. Peno munankhawa panango wokwinyirira, vingakhale voshupa kuti muikhire nzeru pa Mawu ya Mulungu, koma ni vofunika maninge kuti mumbabvesere. Mupempheni kuti akupaseni ntendere womwe sikuti undoteteza mtima wanu chabe, koma na ‘maganizo’ kubodzi.—Lewengani Afilipi 4:6, 7.

15. Ko ni phindu yoyamba iponi yatingagumane tikambamala nthawe tili na Yahova?

¹⁵ Mukambapatula nthawe yoyankhula na Yahova, kupfunzira na kuganizira va iye, mudzaphindule maninge. Mungaphindule tani? Phindu yoyamba ni yakuti mudzasankhule vochita mwanzeru. Baibolo ititsimikizira kuti ‘wofamba na munthu wanzeru adzakhale wanzeru.’ (Miy. 13:20) Ndipomwapa mukambamala nthawe muli na Yahova yemwe ni wanzeru maninge, mudzakhalembo wanzeru. Mudzadziwe momwe mungamukondweresere na momwe mungapewere kuchita vinthu vomukalipisa.

16. Ko kumala nthawe tili na Yahova kungatithandize tani kuti timbapfunzise bwino?

¹⁶ Phindu yachiwiri ni yakuti mudzakwanise kumbapfunzisa bwino. Tikambapfunzisa munthu Baibolo, cholinga chathu chikulu ni kumuthandiza kukhala pa ushamwali na Yahova. Tikambapatula nthawe yoyankhula na Yahova na kupfunzira va iye tidzamukonde maninge ndipo tidzakhale okonzeka kuthandiza wopfunzira kuti ayambembo kumukonda. Ganizirani chitsanzo cha Yesu. Iye ambapfunzisa opfunzira wake mwachikondi ndipo vidathandiza kuti iwo ayambe kukondambo Yahova.—Yoh. 17:25, 26.

17. Ndawa chani tifunika kupemphera na kupfunzira kuti tilimbise chikhulupiriro chathu?

¹⁷ Phindu yachitatu ni yakuti, chikhulupiriro chanu chidzalimbe. Ganizirani vomwe vinchitika mukapempha Yahova kuti akupaseni malangizo, kukuthandizani panango kukukhazikani moyo pasi. Mukambawona momwe iye ankudawirira, chikhulupiriro chanu chilimba maninge. (1 Yoh. 5:15) Ko nchani pomwe chingatithandize kulimbisa chikhulupiriro chathu? Ni pfunziro ya patekha. Kumbukirani  kuti ‘munthu akhala na chikhulupiriro ndawa ya vomwe adabva.’ (Aro. 10:17) Koma kuti tikulise chikhulupiriro chathu tifunika kuchita vizinji osati kundopfunzira chabe vinthu. Manje tingachite pomwe chani?

18. Fotokozani phindu yoganizira vatapfunzira.

¹⁸ Tifunikana kuganizira vomwe tinkupfunzira. Ganizirani vomwe vidachitikira wonemba Salimo 77. Iye wenze wokwinyirira ndawa Aizirayeli anzake enze adasiyiwa na Yahova. Vimwivi vimbamusowesa tulo. (Vesi 2-8) Manje iye adachita chani? Adauza Yahova kuti: ‘Nidzaganizire basa zanu zose ndipo nidzaganizire pomwe vochita vanu.’ (Vesi 12) Ni vodziwikiratu kuti ambadziwa momwe Yahova adapulumusira wanthu wake kumbuyo, koma ndawa ya nkhawa adabvunza kuti: ‘Ko Mulungu wayebwa kukhala wokoma mtima, panango watsekereza chifundo chake mwaukali?’ (Vesi 9) Wamasalimo adayamba kuganizira basa za Yahova na chifundo chomwe adawonesa wanthu wake kumbuyo. (Vesi 11) Ko iye adaphindula tani? Wamasalimo adakhala wotsimikiza kuti Yahova alibe kuwasiya wanthu wake. (Vesi 15) Imwepombo chikhulupiriro chanu chingalimbe maninge mukambaganizira vomwe Yahova adachitira wanthu wake kalekale na vomwe wakuchitirani imwepo pamwekha.

19. Ko tiphindula pomwe tani tikambamala nthawe tili na Yahova?

¹⁹ Phindu yachinayi na ikulu maninge ni yakuti, mudzayambe kukonda maninge Yahova. Pa makhalidwe yose, chikondi ndicho chingakuthandizeni kubvera Yahova, kuchita vose vamungakwanise kuti mumukondwerese na kupirira mayesero yaliyose. (Mat. 22:37-39; 1 Akor. 13:4, 7; 1 Yoh. 5:3) Palibe pomwe chinthu chofunika maninge kuposha kukhala pa ushamwali na Yahova.—Sal. 63:1-8.

20. Ko mwatsimikiza kumbaigawa tani nthawe yanu kuti mumbakwanise kupemphera, kupfunzira na kuganizira?

²⁰ Kumbukirani kuti kupemphera, kupfunzira na kuganizira vatapfunzira ni mbali ya kupemphera kwathu. Ninga Yesu, mbayesesani kugumana malo yalibe zungo kuti mupfale na Yahova. Osabvuma kuti vinthu vinango vikusokonezeni. Mupempheni Yahova kuti akuthandizeni kuikhira nzeru pa vinthu vauzimu. Mukambayesesa kuphatisa bwino basa nthawe yanu manjeuno, Yahova adzadalise khama yanu ndipo adzakupaseni moyo wosapera mudziko inyowani.—Maliko 4:24.