NKHANI YOPFUNZIRA 4
Ndawa chani tichagumanika pa chikumbuso?
‘Pitirizani kuchita vimwevi pakunikumbukira.’—LUKA 22:19.
NYIMBO NA. 20 Mudapereka Mwana wanu wapamoyo
VOMWE TIPFUNZIRE *
1-2. (a) Ko tikumbukira munzathu yemwe adafa makamaka ikafika nthawe iponi? (b) Ko Yesu adakhazikisa chani usiku wakuti mangwana yake afe?
OLO papite nthawe kuchokera pomwe anzathu adamwalira, tiwakumbukira nthawe zose makamaka ikafika data yomwe adafa.
2 Gole iliyose tichasonkhana kuti tikumbukire impfa ya Yesu Khrisitu yemwe timukonda maninge. (1Pe 1:8) Tisonkhana kuti timukumbukire ndawa yakuti adapereka moyo wake kuti atiwombole ku uchimo na impfa. (Mat. 20:28) Ndipo Yesu adakhazikisa vakuti opfunzira wake ambakumbukire impfa yake. Usiku wakuti mangwana yake afe, Yesu adakonza makonzedwe ya chakudya cha maulo ndipo adalamula kuti: ‘Pitirizani kuchita vimwevi pakunikumbukira.’ *—Luka 22:19.
3. Ko tipfunzire chani munkhani ino?
3 Pa wanthu omwe achagumanika pa Chikumbuso chokumbukira impfa ya Khrisitu, ni wochepa omwe anachidikhiro chodzayenda kudzulu. Koma wanthu azinji omwe anachidikhiro cha padziko yapasi achagumanika basi. Munkhani ino tikambirane kuti ndawa chani magulu yawiri mwaya yachakhala na shungu yogumanika pa Chikumbuso gole iliyose. Tiwone soti momwe tichaphindulira tikagumanikapo. Koma naboni tiyambe tawona kuti ndawa chani odzozewa achagumanikapo.
NDAWA CHANI ODZOZEWA ACHAGUMANIKAPO?
4. Ndawa chani odzozewa achadya nkate na kumwa vinyu pa Chikumbuso?
4 Gole iliyose, odzozewa achagumanika pa Chikumbuso kuti adye vizindikiro. Koma ndawa chani iwo ndiwo achadekana kudya nkate na kumwa vinyu? Kuti tigumane mdawiro, naboni tikumbukire vomwe vidachitika usiku womalizira wa moyo wa Yesu padziko yapasi. Paudapita Pasika, Yesu adakhazikisa nsinda wodziwika kuti Chakudya cha Maulo cha Ambuya. Iye adapasa atumi wake 11 okhulupirika nkate kuti adye na vinyu kuti amwe. Pamwapo Yesu adawafotokozera mapangano yawiri yodzikwika kuti pangano inyowani na panango ya Ufumu. * (Luka 22:19, 20, 28-30) Mapangano mwaya yadafungula njira kwa atumi na wanthu anango kuti akakhale mafumu na wantsembe kudzulu. (Chv 5:10; 14:1) Odzozewa okhalira, * omwe ali m’mapangano yawiri mwaya ndiwo achadya nkate na kumwa vinyu pa Chikumbuso.
5. Ko odzozewa achatsimikizira chani pankhani ya chidikhiro chomwe adapasiwa?
5 Chifukwa chinango chomwe odzozewa achagumanikira pa Chikumbuso ni chakuti ambakumbukire va chidikhiro chawo. Yahova adapereka chidikhiro chabwino maninge kwa wa 144.000 chakuti akakhale na moyo wosafa na wosadzongeka kudzulu nkumbakatonga pabodzi na Yesu. Ndipo chokomedza maninge nchakuti akakhale pabodzi na Yahova Mulungu. (1Ak 15:51-53; 1Yo 3:2) Odzozewa achatsimikiza na moyo wose kuti adapasiwa mwayi wodzayenda kudzulu. Koma kuti abvumiziwedi kuyenda kudzulu, iwo achadekana kukhala okhulupirika mpakana impfa. (2 Tim. 4:7, 8) Vimwivi vipereka mwayi kwa odzozewa kuti akondwe na chidikhiro chawo chodzayenda kudzulu. (Tito 2:13) Manje tani pakulewa va ‘wankhosa zinango’? (Yoh 10:16) Ko ni vifukwa viponi vomwe iwo achagumanikira pa Chikumbuso?
NDAWA CHANI WANKHOSA ZINANGO ACHAGUMANIKAMBO?
6. Ndawa chani wankhosa zinango achagumanika pa Chikumbuso gole iliyose?
6 Wankhosa zinango achagumanika pa Chikumbuso, osati kuti adyembo nkate na kumwa vinyu, koma kuti andonyang’anira basi. Mu 1938, wanthu wachidikhiro chodzakhala padziko yapasi adachemerewa koyamba kuti adzagumanike pa Chikumbuso. Nsanja ya Olonda ya 1 Março, 1938 idalewa kuti: ‘Ni vabwino maninge kuti wankhosa zinango ambagumanike pa Chikumbuso na kuwona vomwe vinkuchitika. . . . Viri teno ndawa imweyi ni nthawe yokomedzambo kwa iwo.’ Ninge mwaviriri kuti wanthu ochemerewa pa phwando ya ukwati achakhala okondwa, wankhosa zinango achakhalambo okondwa kugumanika pa Chikumbuso kuti anyang’anire.
7. Ndawa chani wankhosa zinango achadikhira mwachidwi kudzabvesera nkhani ya pa Chikumbuso?
7 Wankhosa zinango achakondwambo na chidikhiro chawo. Iwo achadikhira mwachidwi kudzabva nkhani ya pa Chikumbuso yomwe ifotokoza va Yesu Khrisitu na mafumu yokwana 144.000 na vomwe adzachitire wanthu okhulupirika kwa magole 1.000. Motsogolerewa na Yesu Khrisitu, mafumu yakudzulu mwaya yadzathandizire kukonza dziko yapasi kuti ikhale paradaiso na kuthandiza wanthu wobvera kuti akhale wangwiro. Wanthu azinji wogumanika pa Chikumbuso kuti andonyang’anira achakhala na mwayi woganizira momwe vidzakhalire vokomedza maulosi yazinji yakadzakwanirisika, kuphatanidzapo maulosi ya pa Yesaya 35:5, 6; 65:21-23; na pa Chivumbulutso 21:3, 4. Mwa kuyesesa kuganizira ali mudziko inyowani pabodzi na azinzawo, iwo achalimbisa chidikhiro chawo chakutsogolo ndipo achakhala otsimikiza kuti adzalekelini kutumikira Yahova.—Mat. 24:13; Agal. 6:9.
8. Ni chifukwa chinango chiponi chomwe wankhosa zinango achagumanikira pa Chikumbuso?
8 Onani chifukwa chinango chomwe wankhosa zinango achagumanikira pachikumbuso. Iwo achada kuwonesa kuti achakonda maninge odzozewa ndipo ni wofunisisa kuwathandiza. Mawu ya Mulungu yadaleweratu kalekale kuti padzakhale kubvana pakati pa odzozewa na omwe adzakhale padziko yapasi. Ndawa chani viri tene? Naboni tindokambiranako vitsanzo ving’onong’ono.
9. Mobverana na ulosi wogumanika pa Zekariya 8:23, ko wankhosa zinango achabva tani akakhala pabodzi na odzozewa?
9 Lewengani Zekariya 8:23. Ulosi moyu unkufotokoza kubvana komwe kulipo pakati pa wankhosa zinango na abale na alongo wawo wodzozewa. Mawu yakuti ‘Myuda’ na yakuti ‘wanthu imwe’ yankufotokoza va gulu ya odzozewa. (Aro. 2:28, 29) ‘Amuna 10 ochokera muviseweredwe va wanthu wamakhaindi yose’ ankuimira wankhosa zinango. Iwo ‘achayesesa’ kukhala wokhulupirika ninge odzozewa na kumbatumikirira pabodzi Yahova. Ndipomwapa ikafika maulo ya ntsiku ya Chikumbuso, iwo achawonesa kuti anawo pabodzi odzozewa mwa kugumanikapo.
10. Ko Yahova wachita chani kuti akwanirise ulosi wogumanika pa Ezekieli 37:15-19, 24, 25?
10 Lewengani Ezekieli 37:15-19, 24, 25. Pakufuna kukwanirisa ulosi moyu, Yahova waunganidza pabodzi wodzozewa na wankhosa zinango nkuwachitisa kukhala pa mbverano womwe ungadzongekelini. Ulosi moyu unkufotokoza va ndodo ziwiri. Wanthu omwe anachidikhiro chodzayenda kudzulu ali ninga ndodo ‘ya Yuda’ (dzinza yomwe mungasaluliwa mafumu ya Izirayeli) ndipo wanthu wachidikhiro chodzayenda kudzulu ali ninge ndodo ‘ya Efuraimu.’ * Yahova waunganidza magulu yawiri mwaya kuti yakhale ‘ndodo ibodzi.’ Vimwevi vinkutanthauza kuti wose ankutumikira mobverana motsogolerewa na Yesu Khrisitu. Gole iliyose wodzozewa na wankhosa zinango achagumanika pa Chikumbuso, osati ninge magulu yawiri yosiyana, koma ninga ‘gulu ibodzi’ yotsogolerewa na ‘nyakabusa m’bodzi.’—Yoh. 10:16.
11. Ko ‘nkhosa’ zofotokozewa pa Mateyu 25:31-36, 40 zinkuthandiza tani abale wa Khrisitu?
11 Lewengani Mateyu 25:31-36, 40. ‘Nkhosa’ zomwe Yesu adazifotokoza pamwapa zinkuimira wanthu wolungama wa munthawe yamapeto omwe anachidikhiro cha padziko yapasi, ndipo iwo ni wankhosa zinango. Iwo ankuthandiza mokhulupirika abale wa Khrisitu omwe adakali pano padziko yapasi pa basa yofunika maninge yolalikira na kupfunzisa wanthu.—Mat. 24:14; 28:19, 20.
12-13. Ko wankhosa zinango achathandiza abale wa Khrisitu munjira zinango ziponi?
12 Gole iliyose kukandosala masondo yang’onong’ono kuti Chikumbuso chichitike, wankhosa zinango achathandiza abale wa Khrisitu pakuchita khama kuchemerera wanthu wachidwi kuti adzagumanike pa Chikumbuso. (Onani bokosi yakuti “ Ko imwepo munkukonzekera Chikumbuso chomwe chafendera?”) Iwo achayesesa soti kuchita vose vangakwanise pakuthandizira kuti chikumbuso chichitike podiya kuti mumpingu mwawo mulibe munthu yemwe angadye vizindikiro. Wankhosa zinango viwakomedza maninge kuthandiza abale wa Khrisitu mwanjira mweyi. Wankhosa zinango achadziwa kuti Yesu akawona vomwe iwo ankuchitira abale wake wodzozewa, achawona ninga kuti ankuchitira iye.—Mat. 25:37-40.
13 Ni vifukwa vinango viponi vomwe tichagumanikira pa Chikumbuso podiya kuti ndise osiyana chidikhiro?
NDAWA CHANI TOSE TICHAGUMANIKAPO?
14. Ko Yahova na Yesu adawonesa tani kuti atikonda maninge?
14Kuti tiwonese kutembeja pa chikondi chomwe Yahova na Yesu adatiwonesa. Yahova wakhala ankutiwonesa chikondi chake munjira zosiyanasiyana. Koma njira ikulu maninge ni kupereka Mwana wake kuti adzabonere na kutifera. (Yoh. 3:16) Nayembo Yesu adawonesa kuti atikonda maninge pakubvuma kubwera kudzatifera. (Yoh. 15:13) Palibe chatingachite kuti tibwezere pa vomwe Yahova na Yesu adatichitira. Koma tingawonese kutembeja kwathu pa momwe tichachitira vinthu ntsiku na ntsiku. (Akol. 3:15) Ndipo tichagumanika pa Chikumbuso kuti tiwonese kutembeja pa chikondi chomwe adatiwonesa nakuti tiwonesembo kuti tiwakonda.
15. Ndawa chani odzozewa na wankhosa zinango achatembeja maninge ntsembe ya dipo?
15Kuti tiwonese kutembeja mphaso ya dipo. (Mat. 20:28) Odzozewa achatembeja maninge ntsembe ya dipo ndawa ichitisa kuti chidikhiro chawo chodzayenda kudzulu chikhale chokwanisika. Pakuti achakhulupirira ntsembe ya dipo, Yahova awawona kuti ni wolungama mpakana awachemera kuti wana wake. (Aro. 5:1; 8:15-17, 23) Wankhosa zinango achatembejambo ntsembe ya dipo ndawa iwathandiza kuti ambakwanise kuima pamaso pa Mulungu, kumuchitira utumiki wopatulika na kukhala na chidikhiro ‘chodzabula bwinobwino pa chisautso chikulu.’ (Chiv. 7:13-15) Njira ibodzi yomwe odzozewa na wankhosa zinango achawonesera kuti akutembeja ntsembe ya dipo ni kugumanika pa Chikumbuso gole iliyose.
16. Ni chifukwa chinango chiponi chomwe tichagumanikira pa Chikumbuso?
16 Tigumanika pomwe pa Chikumbuso ndawa yobvera Yesu. Peno chidikhiro chathu ni chakudzulu panango padziko yapasi, tose tichayesesa kubvera lamulo yomwe Yesu adapereka usiku wadakhazikisa nsinda wa Chikumbuso. Iye adati: ‘Pitirizani kuchita vimwevi pakunikumbukira.’—1 Akor. 11:23, 24.
MOMWE TOSE TICHAPHINDULIRA TIKAGUMANIKAPO
17. Ko Chikumbuso chitithandiza tani kufenderera Yahova?
17Tifenderera Yahova. (Yak. 4:8) Ninga mwatapfunzirira, Chikumbuso chitithandiza kuganizira chidikhiro chomwe Yahova adatipasa na chikondi chikulu chomwe adatiwonesa. (Yer. 29:11; 1 Yoh. 4:8-10) Tikambaganizira va chidikhiro chathu chotsimikizika cha kutsogolo na chikondi chosapera chomwe Yahova adatiwonesa, tiyamba kumukonda maninge ndipo ushamwali wathu na iye ulimba maninge.—Aro. 8:38, 39.
18. Ko kuganizira chikondi chomwe Yesu adatiwonesa kungatilimbikise kuchita chani?
18Tilimbikisiwa kutewedzera chitsanzo cha Yesu. (1 Pet. 2:21) Ntsiku ya Chikumbuso ikambafendera, tiyikhira nzeru maninge pa nkhani za m’Baibolo zofotokoza vomwe vidachitikira Yesu muntsiku zomalizira za moyo wake padziko yapasi, momwe iye adafera na momwe adamukisiriwa. Ndipo maulo ya ntsiku ya Chikumbuso kukambiwa nkhani yomwe itikumbusa chikondi chomwe Yesu adatiwonesa. (Aef. 5:2; 1 Yoh. 3:16) Tikambawerenga na kuganizira momwe Yesu adadziperekera na moyo wose kuti atiwombole, tikhala wotsimikiza kupitiriza ‘kufamba ninga momwe iye adafambira.’—1 Yoh. 2:6.
19. Ko tingachite chani kuti tipitirize kukhala m’chikondi cha Mulungu?
19Tikhala otsimikiza kupitiriza kukhala m’chikondi cha Mulungu. (Yuda 20, 21) Tingawonese kuti tinkukhala m’chikondi cha Mulungu peno tinkuyesesa kuchita vose vatingakwanise kuti timubvere, kuchenesa dzina yake na kukondweresa mtima wake. (Miy. 27:11; Mat. 6:9; 1 Yoh. 5:3) Kugumanika pa chikumbuso kutithandiza kuti vochita vathu va ntsiku na ntsiku vimbakhale ninga tinkuuza Yahova kuti: ‘Ninkufuna kupitiriza kukhala m’chikondi chanu mpakana kalekale!’
20. Ko ni tinavifukwa vobveka viponi vogumanikira pa Chikumbuso?
20 Peno chidikhiro chathu nchodzayenda kudzulu panango kudzakhala padziko pano, tose tinavifukwa vobveka vogumanikira pa Chikumbuso. Gole iliyose tikambaungana pantsiku mwiyi tikumbukira impfa ya Yesu yemwe tichamukonda maninge. Ndipo chofunika maninge, tikumbukira chikondi chomwe Yahova adatiwonesa pakupereka Mwana wake kuti atiwombole. Gole ino Chikumbuso chidzachitike kumaulo pa Chishanu, 15 Abril, 2022. Isepano tikonda maninge Yahova na Mwana wake, ndipomwapa kwa ise palibe pomwe chofunika maninge kuposha kudzagumanika pa Chikumbuso.
NYIMBO NA. 16 Tamandani Yehova Chifukwa cha Mwana Wake Wodzozedwa
^ ndi. 5 Peno chidikhiro chathu ni chakudzulu panango padziko yapasi, tose tichakhala wofunisisa kugumanika pa Chikumbuso gole iliyose. Nkhani ino ifotokoze vifukwa va m’Malemba vofotokoza ndawa yake tichadekana kugumanika pa Chikumbuso gole iliyose na momwe tichaphindulira tikagumanikapo.
^ ndi. 2 Baibolo ya Inglês yakuti Today’s English Version inkufotokoza mawu mwaya kuti: ‘Chitani vimwivi pakunikumbukira.’ Ndipo Baibolo yakuti The Jerusalem Bible inkufotokoza kuti: ‘Mumbachite vimwivi kuti muwonese kuti munkunikumbukira.’
^ ndi. 4 Kuti mudziwe vizinji pankhani ya pangano inyowani na ya Ufumu, onani nkhani yakuti “Mudzakhala ‘Ufumu wa Ansembe’” mu Nsanja ya Olonda ya 15 Outubro, 2014, tsa. 15-17.
^ ndi. 4 MATHANDAUZO YA MAWU YANANGO: Odzozewa okhalira ni Akhrisitu odzozewa omwe adakali pano padziko yapasi.
^ ndi. 10 Kuti mudziwe vizinji pankhani ya ulosi wa ndodo ziwiri wogumanika pa Ezekieli 37, onani bukhu yakuti A Adoração Pura de Jeová É Restaurada!, tsa. 130-135, ndi. 3-17.
