NKHANI YOPFUNZIRA 1
‘Ofagafaga Yahova adzasowelini chilichose chabwino.’
LEMBA YATHU YA GOLE YA 2022: ‘Ofagafaga Yahova adzasowelini chilichose chabwino.’—SALIMO 34:10.
NYIMBO NA. 4 “Yehova Ndi M’busa Wanga”
VOMWE TIPFUNZIRE *
Davide angawona kuti ‘ankusowalini chinthu’ olo panthawe zoshupa (Onani ndime 1-3) *
1. Ko Davide wenze pabvuto ikulu iponi?
DAVIDE ambathawa kuti apulumuse moyo wake. Sauli yemwe wenze mpfumu yamphanvu ya Izirayeli wenze wotsimikiza kuti amuphe. Pomwe Davide angafaga chakudya, adafika ku thaundi ya Nobu. Modzichepesa, kumuku adondokumbira mapau yashanu basi. (1 Sam. 21:1, 3) Patsogolo pake, iye pabodzi na masocha yake adayenda kukabishala kumphako. (1 Sam. 22:1) Ko nchani chidachitika kuti Davide agumanike pabvuto ikulu tene?
2. Ko Sauli angadziikha tani pangozi? (1 Samueli 23:16, 17)
2 Sauli ambamuchitira djerasi Davide ndawa wenze wodziwika ndipo adawina nkhondo zizinji. Sauli ambadziwa kuti kusabvera kwake kwachitisa kuti Yahova amulambe ndipo wasalula Davide kuti adzakhale pampando. (Lewengani 1 Samueli 23:16, 17.) Koma panthawe mwiyi Sauli wenze adakali mpfumu ya Izirayeli ndipo wenze na masocha yazinji na anango womwe enze kusaidi yake. Ndipomwapa Davide ambafunika kuthawa kuti apulumuse moyo wake. Yahova wenze naye cholinga Davide. Ko Sauli ambawona kuti angakangise cholinga cha Yahova? (Yes 55:11) Baibolo ifotokozalini, koma chomwe tinkudziwa ni chakuti Sauli angaikha moyo wake pangozi. Viri teno ndawa yakuti wanthu wopikisana na Yahova awinalini.
3. Ko Davide angabva tani podiya kuti wenze panthamu?
3 Davide wenzelini munthu wodziwonesera. Iye alibe kuchita kudzisankha kuti akhale mpfumu ya Izirayeli, koma Yahova ndiye adamupasa udindo moyu. (1 Sam. 16:1, 12, 13) Sauli ambamuzonda Davide ndipo ambandofuna kumupha basi. Koma Davide alibe kuimba mulandu Yahova, olo kuti adafika pakumbabishala kumphako na kumbasowa chakudya. M’malo mwake, panthawe mwiyi iye adaimba nyimbo yabwino maninge yotamanda Yahova ndipo mawu yake ndiyo yatatenga kuti yakhale msolo wa nkhani yathu. Mawu yake ni yakuti: ‘Ofagafaga Yahova adzasowelini chilichose chabwino.’—Sal. 34:10.
4. Ko tikambirane mibvunzo yaponi, ndipo ndawa chani ni yodikana maninge?
4 Ntsiku zino, atumiki wa Yahova azinji ankusowa kobiri yokwana na vinthu vinango pamoyo. * Vimwivi vachitikira atumiki wa Yahova azinji makamaka panthawe ya nthenda ya koronaviru. Ndipo tinashuwa kuti pa ‘chisautso chikulu’ chomwe chinkufendera, vinthu vidzashupiretu. (Mat. 24:21) Ndipomwapa naboni tikambirane mibvunzo yanayi aya: Ko Davide ‘alibe kusowa chinthu chabwino’ mwanjira yanyi? Ndawa chani tichadekana kupfunzira kukhala okhutira? Ndawa chani tingakhale wotsimikiza kuti Yahova adzatisamalire? Ndipo tingadzikonzekerese tani manjeuno pa vinthu vakutsogolo?
‘NIDZASOWELINI KANTHU’
5-6. Ko bukhu ya Salimo 23:1-6 inkutithandiza tani kubvesa vomwe Davide angathandauza padati atumiki wa Mulungu ‘adzasowelini chilichose chabwino’?
5 Ko Davide angatanthauza chani padati atumiki wa Yahova ‘adzasowelini chilichose chabwino’? Tingabvese bwinobwino tikakambirana msolo 23 wa bukhu ya Salimo womwe unampfundo ibodzibodzi yomwe adaifotokozera m’mawu yanango. (Lewengani Salimo 23:1-6.) Davide ankuyamba Salimo mwiyi na mawu yakuti: ‘Yahova ni nyakabusa wangu. Nidzasowelini chinthu.’ Mavesi yanango ya mu Salimo mwiyi yankufotokoza madaliso yomwe adatambira ndawa yobvuma kuti Yahova akhale nyakabusa wake. Yahova angatsogolera Davide ‘mu tunjira twachilungamo’ ndipo angamuthandiza panthawe yabwino na yoshupa. Iye angadziwa kuti podiya kuti ali m’malo ya Yahova ‘yodyeserako vipfuwo,’ angalekeretulini kugumana na mabvuto. Nthawe zinango iye angakhala wokwinyirira akambafamba ‘m‘malo ya mdima wandiweyani,’ ndipo malo mwaya yambashotalini wanthu womuzonda. Koma pakuti Davide wenze na Yahova ninge nyakabusa wake, iye ‘ambagopalini chinthu.’
6 Apa manje taugumana mdawiro wa mbvunzo wathu wakuti: Ko Davide ‘alibe kusowa chilichose chabwino’ mwanjira yanyi? Iye wenze na vose vomuthandiza kukhala pa ushamwali wolimba na Yahova. Iye angathembalini vinthu vakuthupi kuti akhale wokondwa. Davide angakondwa na vose vomwe Yahova angamupasa. Chofunika maninge kwa iye chenze madaliso yomwe Yahova angamupasa na momwe angamutetezera.
7. Mobverana na Luka 21:20-24, ko Akhrisitu womwe angakhala ku Yuda adagumana na vuto yanyi?
7 Mawu ya Davide yankutithandiza kuti tisambawone kuti vinthu vakuthupi ndivo vodikana maninge. Tinaufulu wokhala na vilivose vatinkufuna, koma osati vimbakhale vodikana maninge pamoyo wathu. Ndipo Akhrisitu woyambirira womwe angakhala ku Yuda adafika pa kuibvesa bwino mpfundo mwiyi. (Lewengani Luka 21:20-24.) Yesu adawachenjeza kuti idzafike nthawe yomwe thaundi ya Yerusalemu ‘idzazunguliriwe na masocha yokonzekera nkhondo.’ Pakuwona kuti vimwevi vayamba kuchitika, iwo angadekana ‘kuthawira kumapiri.’ Peno iwo adakathawadi adakapulumusa moyo wawo. Magole yazinji patsogolo pake, Ntsanja ya ulonda idafotokoza kuti: ‘Iwo adasiya maminda na nyumba zawo, osati kusiya alongedza katundu m’manyumba neye. Iwo enze wotsimikiza kuti Yahova awasamalire ndipo adaikha kutumikira Mulungu pamalo yoyamba. Palibe chinthu chomwe angawona kuti ni chodekana maninge kuposha kutumikira Yahova.’
8. Ko tinkupfunzirapo chani pa vomwe vidachitikira Akhrisitu womwe angakhala ku Yuda?
8 Ko tinkupfunzira chani kuchokera kwa Akhrisitu woyambirira wa ku Yuda? Ntsanja ya ulonda ile idalewa pomwe kuti: ‘Kutsogolo tingadzagumane na mabvuto yomwe yadzawonese peno tichawona kuti vinthu vakuthupi ndivo vodekana maninge. Ko tidzakonde maninge vinthu vakuthupi, panango tidzawone kuti chaphindu maninge ni kupulumusiwa na Mulungu ndawa ya kukhulupirika kwathu? Kupulumuka kwathu kungadzachitise kuti tiluze vinthu vinango nkukhala osowa. Viribe basa kuti vinthu vidzakhale tani panthawe mwiyo, tingadzachite bwino kutewedzera Akhrisitu woyambirira womwe adathawa ku Yuda.’ *
9. Ko imwepo mwalimbikisiwa tani na malangizo yomwe mtumi Paulo adapereka kwa Aheberi?
9 Ko munkukwanisa kuwona mwevenzere voshupa kwa Akhrisitu mwawa kuti asiye vinthu vose nkuthawa? Pangadekana chikhulupiriro kuti atsimikize kuti Yahova akawasamalire komwe ankuyenda. Koma pali soti chinthu chinango chomwe chidawathandiza. Pekwenze kukali magole 5 kuti masocha yachiroma yazungulire thaundi ya Yerusalemu, mtumi Paulo adapereka malangizo yakuti: ‘Moyo wanu osati ukhale wokonda kobiri, koma mumbakhale wokhutira na vinthu vamunavo panthawe mweyo, pakuti Mulungu adati: ‘Nidzakusiyelini ne kukutayani olo pang’ono.’ Ndipomwapa tikhale wolimba moyo nkulewa kuti: ‘Yahova ndiye wonithandiza, nidzagopelini chinthu. Ko munthu anganichite chani?’’ (Aheb. 13:5, 6) Ni vodziwikiratu kuti wanthu womwe adayatengera siriyasi malangizo ya Paulo Aroma akanati kuzungulira thaundi, alibe kushupika maninge padakhala na vinthu ving’onong’ono kumalo yadathawira. Iwo enze wotsimikiza kuti Yahova adzawasamalire. Malangizo ya Paulo mwaya yankuwonesa kuti isembo tingatsimikizire kuti Yahova adzatisamalire.
‘TIKHALE WOKHUTIRA NA VINTHU VIMWEVI’
10. Ko Paulo adatiululirako ‘chintsintsi’ chiponi?
10 Malangizo yolingana na mwaya Paulo adayapereka pomwe kwa Timoteyo ndipo isembo tingaphindule nayo. Iye adanemba kuti: ‘Pokhala na chakudya, vovala na pogona, tikhale wokhutira na vinthu vimwevi.’ (1 Tim. 6:8) Ko vimwevi vinkutanthauza kuti osati timbayesese kukhala na chakudya chabwino, malo yabwino yogona panango kugula vovala vabwino kuti timbavale? Neye ndivolini. Pamwapa Paulo ambandotsindika kuti timbakhale wokhutira na vinthu vatinavo. (Afil. 4:12) Chimwichi ndicho ‘chintsintsi’ chomwe paulo adapfunzira. Chofunika pamoyo wathu ni ushamwali wathu na Mulungu, osati vinthu vakuthupi vatingakhale navo.—Hab. 3:17, 18.
Aizirayeli ‘alibe kusowa chinthu’ pa magole 40 yadakhala mu chipululu. Ko isembo tinkukhutira na vomwe tinavo manjeuno? (Onani ndime 11) *
11. Ko mawu yomwe Mose adauza Aizirayeli yankutipfunzisa chani pankhani yokhala wokhutira?
11 Panakusiyana kukulu pa vinthu vomwe tichawona kuti tichadikana na momwe Yahova achawonera. Wonani vomwe Mose adauza Aizirayeli padamala magole 40 muchipululu. Iye adati: ‘Yahova Mulungu wanu wakudalisani pa chilichose chomwe djanja yanu ikuchita. Iye ankudziwa va kufamba kwanu pakugwata muchipululu chimwichi. Yahova Mulungu wanu wakhala namwe kwa magole 40 mwaya ndipo mulibe kusowa chinthu.’ (Deut. 2:7) Kwa magole 40 Yahova ambawapasa mana Aizirayeli kuti ambadye. Yahova ambawonesesa kuti vovala vawo osati visakale. Ndipomwapa iwo ambapitiriza kuvala vovala vadachoka navo ku Iguputo. (Deut. 8:3, 4) Podiya kuti anango panthawe mwiyi adakawona kuti anavinthu ving’onong’ono, Mose adawatsimikizira kuti anavose vodikana. Yahova angakondwe maninge isembo tikapfunzira kukhala wokhutira. Iye achada kuti timbakhale wotembeja olo pa vinthu ving’ong’ono vomwe watipasa ndipo achada kuti timbatsimikize kuti ni mphaso yochokera kwa iye.
KHALANI WOTSIMIKIZA KUTI YAHOVA ADZAKUSAMALIRENI
12. Nchani chinkuwonesa kuti Davide angathemba maninge Yahova osati kudzithemba yekha?
12 Davide angadziwa kuti Yahova ni wokhulupirika ndipo asamalira na moyo wose wanthu womwe amukonda. Podiya kuti moyo wake wenze pangozi panthawe yomwe angakonza nyimbo ya mu Salimo 34, na maso yachikhulupiriro adakwanisa kuwona ‘mngelo wa Yahova’ ankumanga ‘nsasa’ wozungulira iye. (Sal. 34:7) Panango pamwapa Davide ambalinganiza mngelo wa Yahova na nsocha yemwe ali pa nsasa kunkhondo ali maso kudikhirira wanthu wowazonda. Podiya kuti Davide wenze mwamuna wamphanvu, nsocha wodziwa nkhondo ndipo wenze adasaluliwa na Yahova kudzakhala mpfumu, iye ambathembalini chibemba panango buya yake kuti adzipulumuse kwa wanthu wowazonda. (1 Sam. 16:13; 24:12) Davide angathemba maninge Mulungu achimbatsimikiza kuti mngelo wa Yahova ‘apulumusa wanthu womugopa.’ Ntsiku zino tingadikhirelini kuti Mulungu ambatipulumuse modabwisa. Koma tinkudziwa kuti munthu wothemba Yahova adzabonerelini mpaka kalekale.
Nkati mwa chisautso chikulu, panango Gogi wa Magogi adzatingenere m’manyumba. Koma cholimbikisa nchakuti Yesu na angelo adzawone vomwe vinkuchitika ndipo adzatipulumuse (Onani nkhani yopfunzira 1, ndime 13)
13. Ko akadzati Gogi wa Magogi watiukira, ndawa chani tidzawoneke ninge wosashupa kugonjesewa, koma ndise wotsimikiza chani? (Onani foto ya pakhava.)
13 Manjemanje, tidzagumane na viyeso vomwe vidzawonese kuti peno titsimikizadi kuti Yahova angatiteteze. Gogi wa Magogi womwe ni mgwirizano wa madziko akadzati waukira atumiki wa Mulungu, moyo wathu udzakhale pangozi. Panthawe mwiyi tidzafunike kutsimikiza kuti Yahova atipulumuse. Wanthu wotizonda adzawone ninge ndise wosatetezeka na wosashupa kugonjesa. (Ezek. 38:10-12) Pakuti tidzakhale tilibe vitsulo vomenyera nkhondo, iwo adzawone kuti angashupikelini kutigonjesa. Iwo adzadziwelini kuti na maso yathu yachikhulupiriro tinkukwanisa kuwona magulu ya angelo womwe azungulira wanthu wa Mulungu kuti awateteze. Iwo adzakwaniselini kudziwa kuti tina angelo ndawa yakuti akhulupiriralini Mulungu. Ndipomwapa iwo adzadabwe maninge magulu ya angelo yakadzabwera kudzatipulumusa.—Chiv. 19:11, 14, 15.
YAMBANI KUKONZEKERA VAKUTSOGOLO
14. Nchani chatingachite manjeuno pakukonzekera vakutsogolo?
14 Nchani chatingachite manjeuno pakukonzekera vakutsogolo? Chinthu choyamba chomwe nchodekana maninge nchakuti timbaviwone bwino vinthu vakuthupi tichimbadziwa kuti ntsiku ni ibodzi tidzavisiye. Tichadekana soti kukhala okhutira nkumbakondwa ndawa yokhala pa ushamwali na Yahova, osati ndawa ya vinthu vatinavo. Tikambamudziwa bwino Mulungu wathu, tingakhale otsimikiza kuti adzatiteteze Gogi wa Magogi akadzatiukira.
15. Ko Yahova wenze adamuchitira kale vinthu viponi Davide vomwe vidamutsimikizira kuti adzamusiyelini?
15 Onani chinthu chinango chomwe chidathandiza Davide chomwe chingatithandizembo kukonzekera mayesero. Davide adati: ‘Lawani ndipo wonani kuti Yahova ni wabwino. Wodala ni munthu yemwe athawira kwa iye.’ (Sal. 34:8) Mawu mwaya yankuwoneseratu kuti ndawa chani Davide angawona kuti achadekana kuthandiziwa na Yahova. Davide nthawe zose angathemba Yahova ndipo Mulungu wake moyu alibe kumusiya. Pewenze mulumbwana, Davide adagumana na Mfilisiti munango dzina yake Goliyati ndipo adamuuza mosowa mantha kuti: ‘Lero Yahova apereke moyo wako m’manja mwangu.’ (1 Sam. 17:46) Patsogolo pake Davide adayamba kutumikira mpfumu Sauli yemwe adayesesa mobwerezabwereza kuti amuphe. Koma ‘Yahova wenze na’ Davide. (1 Sam. 18:12) Pakuti Davide wenze adawona kale momwe Yahova adamuthandizira kumbuyo, iye wenze wotsimikiza kuti Yahova amusiyelini pamabvuto yomwe ankugumana nayo.
16. Ko ni njira ziponi ‘zatingalawidzire’ ubwino wa Yahova?
16 Tikambabvuma kuti Yahova atitsogolere manjeuno, tingakhale wotsimikiza kuti adzatipulumuse kutsogolo. Vifuna chikhulupiriro kuti tikwanise kuthemba Yahova na kukumbira abwana wathu kuti atibvumize kukagumanika pa nsonkhano wadera, wachigawo panango kuti timbagumanike pamisonkhano yose ya mpingu na kumbamala nthawe itali tikulalikira. Nthawe zinango abwana angalambe vatawakumbira ndipo tingaluze basa. Manje vikadzakhala teno tidzakhulupirire kuti Yahova adzatisiyelini panango kutitaya nkumbatithandiza kugumana vosowa pamoyo? (Aheb. 13:5) Wanthu azinji omwe ali mu utumiki wa nthawe zose adachita kuwona okha momwe Yahova adawathandizira panthawe yomwe enze adasoweratu pophata. Yahova ni wokhulupirika.
17. Ko lemba ya gole ya 2022 ni iponi, ndipo ndawa chani ni ya panthawe yake?
17 Pakuti Yahova ali kusaidi yathu, palibe chifukwa chogopera vinthu vomwe vinkubwera kutsogolo. Tikambaikha vinthu va Ufumu pamalo yoyamba pamoyo wathu, Mulungu wathu adzatisiyelini. Pakufuna kutikumbusa ubwino wodzikonzekeresa pa mabvuto yakutsogolo na kudikana kokhulupirira kuti Yahova adzatisiyelini, Bungwe Yotonga yasankhula lemba ya Salimo 34:10 kuti ikhale lemba ya gole yathu ya 2022. Lemba mwiyi inkulewa kuti: ‘Ofagafaga Yahova adzasowelini chilichose chabwino.’
NYIMBO NA. 38 Mulungu Adzakulimbitsa
^ ndi. 5 Lemba yathu ya gole ya 2022 yachokera pa Salimo 34:10 yomwe inkulewa kuti: ‘Ofagafaga Yahova adzasowelini chilichose chabwino.’ Atumiki wa Yahova azinji wokhulupirika anakobiri yochepa ndipo alibe vinthu vizinji. Manje pamwapa tingalewe kuti iwo ‘ankusowa chilichose chabwino’? Ndipo ko kubvesa bwino vesi mwiyi kungatithandize tani kukonzekera vinthu voshupa vomwe vinkubwera kutsogolo?
^ ndi. 4 Wonani “Mafunso Ochokera Kwa Owerenga” mu Nsanja ya Olonda ya 15 Setembro, 2014.
