NKHANI YOPFUNZIRA 3
Vomwe tinkupfunzira kuchokera pa misozi yomwe Yesu adagwesa
‘Yesu adagwesa misozi.’—YOH. 11:35.
NYIMBO NA. 17 “Ndikufuna”
VOMWE TIPFUNZIRE *
1-3. Ko ni mabvuto yaponi yomwe yangachitise atumiki wa Yahova kugwesa misozi?
NI NTHAWE iponi yomwe imwepo mudalira? Nthawe zinango tigwesa misozi ndawa ya kukondwa. Koma nthawe zizinji tilira ndawa yakuti tinkuwawiwa mumtima. Mwakulinganiza, tingafikane pakulira ndawa yakuti taferewa. Mulongo. Lorilei, wa ku Estados Unidos adanemba kuti: ‘Nthawe zinango mtima wangu utayika maninge nikaganizira mwana wangu yemwe adanifera ndipo palibe chinthu chomwe chikwanisa kunikhazika moyo pasi. Vikakhala tene nidziwalini kuti peno mtima wangu ukwanise pomwe kukhala m’malo.’ *
2 Koma pali soti vinthu vinango vomwe vitichitisa kugwesa misozi. Hiromi, yemwe ni mpainiya wa ku Japani adalewa kuti: ‘Nthawe zinango nikhala wokwinyirira maninge peno wanthu womwe nikuwalalikira ankubveseralini. Nthawe zinango nipemphera kwa Yahova uku ninkugwesa misozi nkumuuza kuti anithandize kugumana munthu yemwe ankufuna kupfunzira choonadi.’
3 Ko imwepo nthawe zinango mukhalambo wokwinyirira ninge alongo mwawa? Ni vosachita kubvunza. (1 Pet. 5:9) Tichada ‘kumbatumikira Yahova tiri okondwa.’ Koma nthawe zinango tilira ndawa yoferewa munzathu wapamoyo panango ndawa ya mabvuto yomwe yankuchitisa kuti tishupike kukhala okhulupirika kwa Mulungu. (Sal. 6:6; 100:2) Manje tingachite tani peno ndise wopanizikiza ndawa ya mabvuto ninge mwaya?
4. Ko tipfunzire chani munkhani ino?
4 Tingapfunzire vizinji pa chitsanzo cha Yesu. Nthawe zinango iye ambakhala wokwinyirira maninge mpakana ‘kugwesa misozi.’ (Yoh. 11:35; Luka 19:41; 22:44; Aheb. 5:7) Naboni tikambirane vomwe vidamuchitikira. Tikambakambirana, tiwone vomwe tinkupfunzira kwa Yesu na kwa Ababa wake Yahova. Tiwone soti vatingachite tikagumana na mabvuto yomwe yankutichitisa kugwesa misozi.
YESU ADALIRA NDAWA YOKONDA AZISHAMWALI WAKE
Limbikisani wanthu wachisoni, ninge momwe Yesu adachitira (Onani ndime 5-9) *
5. Ko nkhani yogumanika pa Yohane 11:32-36 inkutipfunzisa chani va Yesu?
5 Munthawe yozizira ya gole ya 32 EC, Lazaro yemwe wenze shamwali wabwino wa Yesu adadwala mpakana kumwalira. (Yoh. 11:3, 14) Iye wenze na azilongosi wake awiri, Malita na Mariya ndipo Yesu angawakonda maninge. Azikazi mwawa enze okwinyirira maninge ndawa yoluza m’bale wawo. Lazaro padamwalira, Yesu adachita ulendo woyenda ku Betaniya komwe Mariya na Malita angakhala. Malita padabva kuti Yesu ankubwera, adayenderatu kuti akamuchunguzire. Ndoganizani mwewenzere wokwinyirira pakulewa mawu yakuti: ‘Ambuya, adakati mwenze kuno, sembe m’bale wangu alibe kumwalira.’ (Yoh. 11:21) Yesu padawona kuti Mariya na wanthu anango ankulira, iyembo ‘adagwesa misozi.’—Lewengani Yohane 11:32-36.
6. Ndawa chani Yesu adafikana polira panthawe mwiyi?
6 Ndawa chani Yesu adalira panthawe mwiyi? Bukhu ya Estudo Perspicaz das Escrituras inkudawira kuti: ‘Impfa ya Lazaro yomwe idabweresa chisoni chikulu kwa azilongosi wake, idachitisa kuti Yesu ‘awawiwe mtima mpakana kugwesa misozi.’’ * Vinkuwoneka kuti Yesu adayamba kuganizira momwe shamwali wake Lazaro angabvera pomwe matenda yadafika pokula, achimbawona kuti basi nkufa kuno. Chinthu chinango chomwe chidachitisa kuti Yesu agwese misozi, ni kuwona momwe Malita na Mariya ankukhalira okwinyirira maninge ndawa ya kufa kwa m’bale wawo. Peno imwepo mudaferewa shamwali panango munthu wa m’banja mwanu, ni vosachita kubvunza kuti ndimwembo wokwinyirira. Onani vinthu vitatu vomwe tinkupfunzirapo kuchokera pankhani mwiyi.
7. Ko tinkupfunzira chani va Yahova kuchokera pa misozi yomwe Yesu adagwesa padaferewa shamwali wake?
7Yahova achabvesa momwe imwepo munkubvera. Yesu achita ‘vinthu ndendende’ ninge Ababa wake. (Aheb. 1:3) Yesu padalira, adawonesa momwe Ababa wake achabvera. (Yoh. 14:9) Peno imwepo mudaluza munthu wapamoyo, khalani wotsimikiza kuti sikuti Yahova akundodziwa chabe kuti ndimwe wokwinyirira, koma iye vinkumuwawambo. Iye ni wofunisisa kupolesa mtima wanu wophwanyika.—Sal. 34:18; 147:3.
8. Ndawa chani tingakhake otsimikiza kuti Yesu adzamukise anzathu omwe adafa?
8Yesu anashungu yomukisa anzanu omwe adafa. Kanthawe pang’ono Yesu akanati kulira, adatsimikizira Malita kuti: ‘M’bale wako adzamuke.’ Malita adakhulupirira Yesu. (Yoh. 11:23-27) Pakuti Malita wenze mtumiki wokhulupirika wa Yahova, ni vosachita kubvunza kuti ambadziwa kuti ntsiku zakumbuyo mneneri Eliya na Elisa adamukisako wanthu. (1 Maf. 17:17-24; 2 Maf. 4:32-37) Ndipo vinkuwoneka kuti wenze adabvako va wanthu womwe Yesu adamukisa. (Luka 7:11-15; 8:41, 42, 49-56) Imwepombo mungakhale wotsimikiza kuti anzanu omwe adafa adzamukisiwe. Manje tinkupfunzira chani pa misozi yomwe Yesu adagwesa panthawe yomwe angalimbikisa azishamwali wake omwe angalira? Tinkupfunzira kuti iye ni wofunisisa kumukisa wanthu.
9. Ninge Yesu, ko tingathandize tani wanthu oferewa? Perekani chitsanzo.
9Mungathandizembo wanthu omwe anachisoni. Sikuti Yesu adondolira na Malita pabodzi na Mariya, koma adawatetekera na kuwakhazika moyo pasi. Tingachitembo chibodzibodzi kwa wanthu omwe anachisoni. Dan yemwe ni nkulu wa ku Austrália adati: ‘Panidaferewa nkazi wangu, nimbafuna chithandizo. Ndipo abale na alongo nthawe zose enze okonzeka kunibvesera. Iwo ambanipasa mpata wofotokoza momwe ninkubvera ndipo ambakhala odekha olo nikayamba kulira. Iwo mpaka ambafika pakunithandiza kutsuka karo yangu, kunigulira vinthu na kuniphikira peno nekha ninkukwanisalini. Ndipo iwo ambapemphera nane pafupipafupi. Vimbachita kuwonekeratu kuti abale mwawa ni azishamwali omwe ‘adabadwiradi kuti adzanithandize panthawe ya mabvuto.’’—Miy. 17:17.
YESU ADAGWESA MISOZI NDAWA YOCHITIRA CHIFUNDO WANTHU OMWE AMBAWALALIKIRA
10. Fotokozani nkhani yomwe ili pa Luka 19:36-40.
10 Yesu adayenda ku Yerusalemu mu gole ya 33 EC pa Nisani 9. Padasala pang’ono kufika, wanthu azinji adamuthamingira ndipo ambatenga vovala vawo nkumbayanza munsewu pakuzindikira kuti iye ni Mpfumu yawo. Imwiyi yenze nthawe yokomedza maninge. (Lewengani Luka 19:36-40.) Koma wopfunzira wake ambadziwalini kuti nchani chati chichitike patsogolo pake. ‘Yesu padafika pafupi, adawona thaundi ya Yerusalemu ndipo adayamba kuililira.’ Adakali na misozi m’maso, adafotokozeratu vinthu voipa vomwe vichitikire wanthu wa mu Yerusalemu.—Luka 19:41-44.
11. Ndawa chani Yesu adalilira wanthu wa mu Yerusalemu?
11 Yesu wenze wokwinyirira ndawa ambadziwiratu kuti Ayuda azinji abveserelini ntontholo wa Ufumu. Vimwevi vidakachitisa kuti thaundi ya Yerusalemu ichenekewe ndipo Myuda yemwe adakapulumuka adakatengewa mwa baifosi. (Luka 21:20-24) Vokwinyiririsa ni vakuti ninge momwe Yesu adafotokozera, wanthu azinji adamulamba. Ko wanthu wa mudera yanu achachita chani akabva ntontholo wa Ufumu? Peno mukuyesesa kulalikira koma obvesera ni ang’onong’ono, ko mungapfunzire chani pa misozi yomwe Yesu adagwesa? Onani pomwe vinthu vitatu vomwe tinkupfunzirapo.
12. Ko tingapfunzire chani va Yahova kuchokera pa misozi yomwe Yesu adagwesa ndawa ya wanthu anzake?
12Yahova achawaikhira nzeru wanthu. Misozi ya Yesu yankutikumbusa kuti Yahova achaganizira wanthu. ‘Iye afunalini kuti padzagumanike munthu wochenekewa, koma afuna kuti wose afike pakulapa.’ (2 Pet. 3:9) Ntsiku zino tingawonese kuti tikonda wanthu tikambachita khama kuti tiwafike pamoyo na ntontholo wabwino.—Mat. 22:39.
Mumbachinje nthawe yolalikira, ninge momwe Yesu adachitira (Onani ndime 13-14) *
13-14. Ko Yesu adawonesa tani chifundo kwa wanthu, ndipo isepano tingakulise tani khalidwe mwiyi?
13Yesu wenze wakhama pa basa yolalikira. Iye adawonesa kuti achawakondadi wanthu mwa kupitiriza kuwalalikira pa mpata uliwose womwe wagumanika. (Luka 19:47, 48) Ndawa chani Yesu angalimbikira kuwapfunzisa? Ni ndawa yakuti ambawabvera chifundo. Wanthu ambakonda kubvesera Yesu na atumi wake mpakana iwo ‘ambachita kusowa mpata wa kudya.’ (Maliko 3:20) Ndipo munthu munango padafuna kuti Yesu akacheze naye usiku, Yesu adayendadi na moyo wose. (Yoh. 3:1, 2) Wanthu azinji omwe angabvesera Yesu alibe kudzakhala opfunzira wake. Koma vidakwanisika kuti iwo abve ndawa yakuti adawalalikira. Ntsiku zino, isembo tinkufunisisa kuti aliyese abve ntontholo wabwino. (Mac. 10:42) Pakufuna kukwanirisa cholinga chathu mwichi, tingafunikane kuchinja njira zolalikirira.
14Khalani okonzeka kuchinja vinthu. Peno tingambondolalikira nthawe ibodzi na ibodzi, tingakwaniselini kugumana wanthu wofuna kubva ntontholo wabwino. Mpainiya munango dzina yake Matilda adati: ‘Inepano na mwamuna wangu tiyesesa kufonera wanthu pa nthawe zosiyanasiyana. Machibesebese tiyenda kukalalikira muyi na muyi, koma ikafika masikati yomwe ni nthawe yakuti wanthu azinji akhala kuti achoka m’makhomo nkumbafambafamba munsewu, tilalikira pakuphatisa basa tumachelufu. Dzuwa ikapendeka tibwerera pomwe m’mamiyi ndipo tiwagumana wanthu.’ M’malo mwa kuikha nthawe yokomera isepano, tingachite bwino kulalikira panthawe yomwe tingawagumane wanthu. Tikachita teno Yahova adzatidalise maninge.
YESU ADAGWESA MISOZI PAKUFUNA KULEMEKEZA DZINA YA ABABA WAKE
Mumbapemphere kwa Yahova mukapanikizika, ninge momwe Yesu adachitira (Onani ndime 15-17) *
15. Ko lemba ya Luka 22:39-44 inkufotokoza kuti nchani chidachitika usiku womalizira wa moyo wa Yesu?
15 Usiku wa pa Nisani 14, 33 EC, Yesu adayenda m’munda wa Getsemane. Kumuku iye adagwigwirira Yahova mpemphero. (Lewengani Luka 22:39-44.) Panthawe yoshupa mwiyi, Yesu ‘adapereka mapemphero yogwigwirira . . . uku ankulira na kugwesa misozi.’ (Aheb. 5:7) Ko Yesu adapemphera chani usiku womalizira moyu akanati wafa? Iye adakumbira mphanvu kuti akwanise kupitiriza kukhala wokhulupirika kwa Yahova na kuchita chifuniro chake. Yahova adabva kugwigwirira kwa Mwana wake ndipo adatumiza mngelo kuti akamulimbikise.
16. Ndawa chani Yesu wenze wokwinyirira maninge pangapemphera m’munda wa Getsemane?
16 Ni vosachita kubvunza kuti Yesu adalira maninge pangapemphera m’munda wa Getsemane ndawa yowawiwa mtima akaganizira kuti aphewe ninge chigananga. Iye wenze pomwe na nkhawa akaganizira kuti anaudindo wolemekeza dzina ya Ababa wake. Peno imwepo munkugumana na mabvuto yoyesa chikhulupiriro chanu, ko mungapfunzire chani misozi yomwe Yesu adagwesa? Onani vinthu vinango vitatu vomwe tinkupfunzirapo.
17. Ko tinkupfunzira chani va Yahova tikaganizira momwe adadawirira mapemphero yogwigwirira ya Yesu?
17Yahova achabvesera mapemphero yanu yogwigwirira. Yahova adabvesera kugwigwirira kwa Yesu. Ndawa chani? Ndawa yakuti cholinga chikulu cha Yesu chenze chakuti apitirize kukhala wokhulupirika kwa Ababa wake, na kulemekeza dzina yake. Peno cholinga chanu nkufuna kupitiriza kukhala wokhulupirika kwa Yahova na kulemekeza dzina yake, iye adzadawire mapemphero yanu yokumbira thandizo.—Sal. 145:18, 19.
18. Ndawa chani tingalewe kuti Yesu ni shamwali wachifundo na wotibvesa?
18Yesu achabvesa momwe imwepo munkubvera. Vikhala vokomedza maninge peno shamwali wathu ankutibvesa tikakhala wokwinyirira, makamaka peno iye adagumanambo na mabvuto ninga yathu. Shamwali moyu ni Yesu. Iye achadziwa momwe munthu achabvera akakhala wofoka na pomwe ankufuna thandizo. Iye adziwa bwino vofoka vathu ndipo adzawonesese kuti watithandiza ‘panthawe yabwino.’ (Aheb. 4:15, 16) Ninge momwe Yesu adatambirira thandizo yochokera kwa mngelo m’munda wa Getsemane, isembo timbatambire thandizo yomwe Yahova ankutipasa. Viribe basa peno watithandiza pophatisa basa bukhu, vidiyo, nkhani, chilimbikiso cha akulu akambatichita ulendo wa ubusa panango peno wachita kuphatisa basa shamwali wathu.
19. Ko mungagumane tani mphanvu mukagumana na mabvuto yokukangisani kukhala wokhulupirika kwa Mulungu? Perekani chitsanzo.
19Yahova adzakupaseni ‘ntendere wake.’ Ko Yahova adzatilimbise tani? Tikapemphera tingatambire ‘ntendere wa Mulungu womwe uposha kuganiza mwamphanvu kulikose.’ (Afil. 4:6, 7) Ntendere wa Yahova uchitisa kuti mtima wathu ukhale m’malo na kutithandiza kuganiza bwino. Vimwivi ndivo vidachitikira mulongo wathu dzina yake Luz. Iye adati: ‘Nthawe zizinji nidzibva kuti nili nekhanekha. Maganizo mwaya yanichitisa kumbawona kuti Yahova anikondalini. Koma maganizo mwaya yakanibwerera, nthawe mweyo nimuuziratu Yahova momwe ninkubvera. Pemphero inithandiza kuti nimbaganize bwino.’ Vomwe vidachitikira mulongo moyu vinkuwoneseratu kuti tingakhale na ntendere wa mumtima tikapemphera.
20. Ko tapfunzira chani pa misozi yomwe Yesu adagwesa?
20 Vakhala vothandiza maninge kudziwa vomwe tinkupfunzirapo pa misozi yomwe Yesu adagwesa. Takumbusiwa kuti tichadekana kuthandiza abale wathu womwe anachisoni nakuti timbakhale otsimikiza kuti Yahova na Yesu adzatithandize tikaferewa. Talimbikisiwa kuti timbakhale wachifundo tikambapfunzisa wanthu ndawa yakuti Yahova na Yesu achawonesa khalidwe mweyi. Vakhala volimbikisa pomwe kudziwa kuti Yahova na Mwana wake wapamoyo achabvesa bwinobwino momwe tinkubvera, adziwa bwino vofoka vathu ndipo ni wofunisisa kutithandiza kupirira. Naboni tose tipitirize kuphatisa basa vomwe tapfunzira pakudikhira nthawe yomwe Yahova adzakwanirise polomisi yake ya ‘kudzapukusa misozi yose m’maso mwathu’!—Chiv. 21:4.
NYIMBO NA. 120 Tikhale Ofatsa Ngati Khristu
^ ndi. 5 Baibolo ifotokoza kuti nthawe zinango Yesu ambakhala wokwinyirira maninge mpakana kugwesa misozi. Munkhani ino tikambirane vochitika vitatu vomwe vidachitisa kuti Yesu agwese misozi na kuwona vomwe tinkupfunzirapo.
^ ndi. 1 Madzina yanango yachinjiwa.
^ ndi. 57 MAWU YOFOTOKOZERA MAFOTO: Yesu adalimbikisa Mariya na Malita. Isembo tingachite chibodzibodzi pakulimbikisa wanthu womwe adaferewa.
^ ndi. 59 MAWU YOFOTOKOZERA MAFOTO: Mofunisisa, Yesu adayenda kwa Nikodemo kukamupfunzisa usiku. Isembo tingachite bwino kumbapfunzira na wanthu pa nthawe yomwe ni yabwino kwa iwo.
^ ndi. 61 MAWU YOFOTOKOZERA MAFOTO: Yesu adakumbira mphanvu kuti akwanise kukhala wokhulupirika kwa Yahova. Isembo timbachite chibodzibodzi tikambagumana na mayesero.
