1-2. Ndawa chani tigumanika pa Chikumbuso gole iliyose?

 MAGOLE yoposha 2000 kumbuyo, Yesu adapereka moyo wake kuti atifere pofuna kutiwombola kuti tidzagumane moyo wosapera. Usiku wakuti mangwana yake afe, Yesu adalamula opfunzira wake kuti ambakumbukire chikondi chomwe iye wawawonesa pakuchita mwambo wosashupa wophatisa basa mkate na vinyu basi.—1 Akor. 11:23-26.

² Tibvera lamulo ya Yesu mweyi ndawa yakuti timukonda maninge. (Yoh. 14:15) Masondo yanganani Chikumbuso chikanati kuchitika na pomwe chapita, tikufuna kudzaganizira maninge vomwe iye adatichitira na kupemphera maninge podziwa kuti impfa yake idatiwombola. Tinkufuna pomwe kudzathimizira nthawe yolalikira kuti tidzakwanise kuchemerera wanthu azinji kuti adzagumanikembo pa Chikumbuso. Ndipo tinkufunalini kuti padzagumanike chinthu chotikangisa kugumanikapo.

3. Ko tipfunzire chani munkhani ino?

³ Munkhani ino, tikambirane vinthu vitatu vomwe atumiki wa Yahova achachita pofuna kuti agumanike pa nsinda wokumbukira impfa ya Yesu: (1) kuphatisa basa vinthu vomwe Yesu adalewa, (2) kuchemera anango kuti adzagumanike pa Chikumbuso na (3) kugumanika pa Chikumbuso podiya kuti vinthu ni voshupa pamoyo wawo.

4. Ko tikumbusiwa chani gole iliyose pa Chikumbuso, ndipo nchani chingachitike tikaleka kuchita khama? (Luka 22:19, 20)

⁴ Gole iliyose pa Chikumbuso, tibvesera nkhani ya m’Baibolo yomwe idawira mobveka bwino mibvunzo yathu yazinji. Tifotokozerewa chifukwa chake wanthu ise tichadekana kuwombolewa  na momwe impfa ya munthu m’bodzi idakwanisira kuwombola wanthu azinji. Tikumbusiwa kuti ko mkate na vinyu uimira chani ndipo ni mbani yemwe achadekana kudya na kumwa vizindikiro vimwevi. (Lewengani Luka 22:19, 20.) Tikumbusiwa pomwe madaliso yazinji yomwe wanthu wodzakhala padziko yapasi pano adzatambire. (Yes. 35:5, 6; 65:17, 21-23) Tichadekana kuyesesa kuti osati tidzaluze mwayi moyu. Wanthu azinji adziwalini vimwevi, ndipomwapa abvesalini kuti impfa ya Yesu idatiwombola. Ndipo iwo akumbukiralini impfa ya Yesu mobverana na vomwe iye adalamula. Ndawa chani vili tene?

5. Ko padandoti atumi wose afa, wanthu adayamba kumbaikumbukira tani impfa ya Yesu?

⁵ Kanthawe pang’ono padandoti atumi wose wa Yesu afa, Akhrisitu wonama adayamba kungena mu mpingu. (Mat. 13:24-27, 37-39) Iwo ‘adayamba kuyankhula vinthu vosokoneza kuti apatuse wopfunzira.’ (Mac. 20:29, 30) ‘Chinthu chinango chosokoneza’ chomwe angayankhula nchakuti thupi ya Yesu ingakwaniselini ‘kubisa machimo ya wanthu azinji’ ninge momwe Baibolo ichafotokozera, koma mpofunika kupitiriza kumbapereka ntsembe basi. (Aheb. 9:27, 28) Ntsiku zino wanthu azinji akhulupirirambo bodza mweyi. Iwo asonkhana pabodzi sondo iliyose ndipo nthawe zinango asonkhana ntsiku iliyose ‘nkumbapereka ntsembe ya Missa.’ b Wanthu wa m’matchetchi yanango achita Chikumbuso mwa apo na apo ndawa yokhulupirira maninge vomwe wanthu achalewa kuti wanthu angakwaniselini kukhululukiriwa machimo yawo ndawa ya impfa ya Yesu basi. Wanthu anango akaikira maninge mpakana kudzibvunza kuti: ‘Apa nishuwadi kuti impfa ya Yesu ingachitise kuti machimo yangu yakhululukiriwe?’ Ndawa chani iwo adzibvunza tene? Abvunza tene ndawa yonamiziwa na wanthu kuti impfa ya Yesu ingachitiselini kuti machimo yathu yakhululukiriwe. Ko manje opfunzira chaiwo wa Yesu aiwona tani nkhani mweyi?

6. Ko kagulu ka opfunzira Baibolo kadazindikira chani mu 1872?

⁶ Koma nkuyenda kwa nthawe, wanthu ang’onong’ono womwe angapfunzira Baibolo potsogolerewa na Charles Taze Russell adayamba kumbapfunzira mwakhama Malemba. Iwo ambafuna kudziwa chaivo pa nkhani ya ntsembe ya Yesu na vomwe achadekana kuchita poikumbukira. Kudzafika mu 1872, iwo adagumana malemba yotsimikizira kuti impfa ya Yesu idawomboladi wanthu wose. Iwo padagumana malemba mwaya alibe kundokhala chete, koma adayamba kukonza nkhani nkumbaziikha m’mabukhu, m’majornali na m’magazini. Ndipo adayamba pomwe kutewedzera chitsanzo cha Akhrisitu oyambirira, nkumbachita kabodzi Chikumbuso pagole.

7. Ko vomwe opfunzira Baibolo oyambirira adagumana vinkutiphindulisa tani ntsiku zino?

⁷ Vomwe Akhrisitu mwawa adagumana vinkutiphindulisa maninge ntsiku zino. Ndawa chani tinkulewa tene? Ni ndawa yakuti Yahova watithandiza kudziwa chaivo pankhani ya ntsembe ya Yesu na maphindu yomwe tidzagumane ndawa yotifera. (1 Yoh. 2:1, 2) Tadziwa pomwe kuti wanthu ang’onong’ono adzayende kudzulu nkukakhala na moyo wosafa, koma wanthu azinji maninge adzakhale pano padziko yapasi na moyo wosapera. Tikhala paushamwali wabwino na Yahova ndawa yozindikira momwe iye achatikondera na momwe tichaphindulira patekha ndawa ya ntsembe ya  Yesu Khrisitu. (1 Pet. 3:18; 1 Yoh. 4:9) Ndipomwapa titewedzera abale wathu okhulupirika wakalekale, ndipo tichemerera wanthu azinji kuti adzakhale nase pa Chikumbuso chomwe tichichita mobverana na vomwe Yesu adalewa.

8. Ko atumiki wa Yahova achita chani kuti achemerere wanthu anango ku Chikumbuso? (Onani foto.)

⁸ Kundochokera kalekale, atumiki wa Yahova akhala akuchemerera wanthu azinji ku Chikumbuso. Kumayambiriro kwa 1881, mu Ntsanja ya ulonda mudabula chilengezo chakuti abale na alongo wa ku Estados Unidos achadekana kudzagumana pabodzi mu nyumba ya m’bale ku Allegheny, Pennsylvania, kuti achite Chikumbuso. Patsogolo pake, mpingu uliwose umbachita pawokha Chikumbuso. Mu Março 1940, ofalisa adauziwa kuti angambachemerere munthu aliyese yemwe wawonesa chidwi mu dera yawo kuti abwere ku Chikumbuso. Mu 1960, Beteli idayamba kudinda tumapepa tochemerera wanthu ku Chikumbuso nkututumiza ku mipingu. Kundochokera pamwapo, takhala tinkugawira wanthu tumapepa tochemerera ku Chikumbuso tuzinji maninge. Koma ndawa chani tichita khama ikulu tene kuchemerera wanthu?

9-10. Ko tichemerera mbani ku Chikumbuso, ndipo aphindula tani akabwera? (Yohane 3:16)

⁹ Chinthu chibodzi chomwe chitichitisa kuchemerera wanthu azinji ku Chikumbuso, nkufuna kuti iwo akadzabwera koyamba adzabve vomwe Yahova na Yesu adatichitira tose. (Lewengani Yohane 3:16.) Cholinga chathu nchakuti iwo akabwera ku Chikumbuso, vomwe apfunzira viwachitise kufuna  kudziwa vizinji mpakana kukhala atumiki wa Yahova. Koma pali pomwe anango womwe achaphindula akabwera.

¹⁰ Tichemerera pomwe wanthu womwe adasiya kutumikira Yahova. Tichita vimwevi pofuna kuwatsimikizira kuti Yahova adakali kuwakonda. Anango abweradi ndipo tikondwa maninge akachita tene. Kugumanika pa Chikumbuso kuwathandiza kuti ayambe kukumbukira momwe iwo angakondwera kalekale pakutumikira Yahova. Ndoganizani vomwe vidachitikira Monica. c Iye adabwezeresewa mkati mwa nthenda ya koronaviru. Padandoti wagumanika pa Chikumbuso cha 2021, iye adalewa kuti: “Inepano Chikumbuso chimwichi nidzachiyebwelini. Papita magole 20 kuchokera pomwe nidaima kutumikira Yahova ndipo kalekale nimbachemererambo wanthu ku Chikumbuso. Nimbawachemerera ndawa yotembeja maninge vomwe Yahova na Yesu adanichitira.” (Sal. 103:1-4) Peno wanthu abwere panango neye tilekalini kuchemerera wanthu ku Chikumbuso, ndawa yodziwa kuti Yahova atembeja maninge akambawona khama yathu.

11. Ko Yahova atidalisa tani tikambayesesa kuchemerera wanthu ku Chikumbuso? (Hagai 2:7)

¹¹ Yahova adalisa maninge tikambayesesa kuchemerera wanthu ku Chikumbuso. Mu 2021 podiya kuti vinthu venze voshupa ndawa ya matenda ya koronaviru, tidakwanisa kuchemerera wanthu wokwana 21 367 603. Namba mwiyi ni ukulu maninge ndipo Mboni za Yahova padziko yose yapasi zingenapo kawiri! Koma sikuti Yahova andokomedzewa na kuwanda kwa wanthu chabe neye. Iye akomedzewa maninge na munthu aliyese yemwe wabwera. (Luka 15:7; 1 Tim. 2:3, 4) Tinkutsimikiza kuti Yahova atithandiza kuti tigumane wanthu wachidwi panthawe yomwe tikuwachemerera ku Chikumbuso.—Lewengani Hagai 2:7.

12. Ko ni mabvuto yaponi yomwe yangachitise kuti vikhale voshupa kuchita Chikumbuso? (Onani foto.)

¹² Yesu adaleweratu kuti mu ntsiku zomalizira, tidzagumane na mabvuto yosiyanasiyana ninge kutsutsiwa m’banja, kudzudziwa, nkhondo, matenda na mabvuto yanango. (Mat. 10:36; Maliko 13:9; Luka 21:10, 11) Mabvuto mwaya nthawe zinango yachitisa kuti tishupike kukumbukira impfa ya Yesu. Ko abale na alongo wathu achita tani kuti apirire mabvuto mwaya ndipo Yahova awathandiza tani?

13. Ko Yahova adamudalisa tani Artem ndawa ya kulimba ntima kwake nkuchita Chikumbuso podiya kuti wenze mudjeri?

¹³ Kuikhiwa mudjeri. Abale wathu womwe adamangiwa ndawa ya chikhulupiriro chawo, achita vose vangakwanise kuti akumbukire impfa ya Yesu. Onani chitsanzo cha Artem. Chikumbuso cha 2020 chidachitika iye alikale m’djeri ya 17 metro ndipo panthawe mwiyi mwenze wanthu 5. Podiya kuti wenze mudjeri, iye adakwanisa kugumana vizindikiro va pa Chikumbuso na kukonzekera nkhani kuti adzikambire yekha. Koma anzake wa mudjeri ambapepa achimbamunyoza maninge. Ko manje iye adachita chani? Iye adawakumbira kuti peno vingakwanisike ayambe aimako vimwevo kwa ora ibodzi basi. Artem adadabwa kuwona kuti anzake wale abvuma ndipo alibe kumunyoza panango kupepa panthawe yomwe iye ambachita Chikumbuso. Artem adalewa kuti: “Nidasaina vakuti  niwasimbireko va Chikumbuso.” Podiya kuti iwo adalamba kufotokozerewa, padawona kuti Artem wamaliza kuchita Chikumbuso adayamba kumuchita mibvunzo yazinji.

14. Ko padachitiwa makonzedwe yaponi kuti Chikumbuso chichitike podiya kuti kudabwera matenda ya koronaviru?

¹⁴ Matenda ya koronaviru. Payadandoyamba matenda ya koronaviru, Mboni za Yahova zilibe kukwanisa pomwe kuchita Chikumbuso maso na maso. Koma sikuti matenda mwaya yadawakangisa kuchita Chikumbuso. d Mipingu yomwe yali m’dera yomwe ina intaneti yamphanvu yadakwanisa kuchita Chikumbuso pa vidiyokonferensiya. Manje tani kwa wale omwe ali m’madera yomwe kulibe intaneti? M’madziko yazinji kudachitiwa makonzedwe yakuti Chikumbuso chichitikire pa radio panango kuchita kunyang’anira pa televizau. Ndipo kuthimizira pamwapa, maofesi ya nthambi yadatepa nkhani mu viyankhulo voposha 500 kuti wanthu womwe ali kutali maninge akwanise kuchita Chikumbuso basi. Ndipo abale okhulupirika adatenga nkhani zimwezi nkukapasa anzawo omwe alibe.

15. Ko imwepo mwapfunzira chani pa vomwe vidachitikira wopfunzira Baibolo munango dzina yake Sue?

¹⁵ Kutsutsiwa na wanthu wa m’banja. Kwa anango, vuto ikulu yochitisa kuti vikhale voshupa kuchita Chikumbuso, ni kutsutsiwa na wanthu wa m’banja mwawo. Ndoganizani vomwe vidachitikira wopfunzira Baibolo munango dzina yake Sue. Mu 2021 pa ntsiku yakuti Chikumbuso chichitike mangwana yake, Sue adauza munthu yemwe angamupfunzisa Baibolo kuti adzakwaniselini kuchita Chikumbuso ndawa yotsutsiwa na wanthu wa m’banja mwake. Mulongo yemwe angamupfunzisa Baibolo adamuwerengera lemba ya Luka 22:44. Patsogolo pake adamuuza kuti tikagumana na mabvuto, timbatewedzere chitsanzo cha Yesu nkupemphera kwa Yahova uku tili wotsimikiza kuti atithandize. Mangwana yake, Sue adakonzekera mkate na vinyu ndipo adanyang’anira pologalama ya Kupemphera kwa machibese pa jw.org. Ndipo pakufika maulo pewenze yekhayekha mnyumba, adakwanisa kuchita Chikumbuso mochita kufonerana na anzake. Padandoti wamaliza, Sue adanembera mulongo yemwe angamupfunzisa Baibolo kuti: “Imwepo mudanilimbikisa maninge dzulo. Nidachita vose vaningakwanise kuti nichite Chikumbuso ndipo Yahova adadalisa. Nikusowa kuti nitembeje tani ndawa yowona kuti nidakwanisa kuchita Chikumbuso!” Ko imwepo muwona kuti Yahova angakuthandizenimbo muchigumana na bvuto ninge mweyi?

16. Ndawa chani ndise otsimikiza kuti Yahova adzatidalise tikadzayesesa kugumanika pa Chikumbuso? (Aroma 8:31, 32)

¹⁶ Yahova akondwa maninge akambationa tikuchita khama kuti tikwanise kukumbukira impfa ya Yesu. Tinashuwa kuti iye apitirize kutidalisa tikambatembeja vomwe adatichitira. (Lewengani Aroma 8:31, 32.) Ndipomwapa, naboni tose tidzayesese kugumanika pa Chikumbuso cha gole ino ndipo tidzayesese pomwe kuchemerera wanthu azinji kuti adzabwerembo.