1. Ndawa chani Yesu adakumbira Yahova kuti anyang’anire wapfunzira wake?

USIKU womalizira wa moyo wa Yesu ninge munthu padziko yapasi, iye adaganizira va mabvuto yomwe wopfunzira wake agumane nayo. Ndawa yakuti angakonda azishamwali wake, Yesu adakumbira Ababa wake kuti ‘awanyang’anire kwa woipa.’ (Yoh. 17:14, 15) Yesu adadziwa kuti akandobwerera kudzulu, Satana Ndyerekezi apitirize kumenya nkhondo mwaukali na wale womwe angada kutumikira Yahova. Ndipomwapa, wanthu wa Yahova achadekana kutetezewa.

2. Ko tingatsimikize tani kuti Yahova adzatidawire mapemphero yathu?

² Yahova adadawira pemphero ya Yesu ndawa yakuti angakonda Mwana wake. Tikachita vose vatingakwanise kuti tikondwerese Yahova, iye adzatikondembo, ndipo adzatetekere mapemphero yathu yokumbira chitetezo. Ninga Msolo wa banja, Yahova adzapitirize kusamalira mwachikondi wana wake. Kuleka kuchita vimwevi, mbiri yake na dzina yake vingaipe!

3. Ndawa chani tichadekana chitetezo cha Yahova ntsiku zino?

³ Tichada chitetezo cha Yahova kuposha kale yose. Satana ni ‘wokalipa maninge’ ndawa yakuti adathamingisiwa kudzulu. (Chiv. 12:12) Iye ankutsogolera wanthu kuti ambatidzudze pakuwona ninge ‘ankuchita utumiki wopatulika kwa Mulungu.’ (Yoh. 16:2) Anango womwe achakhulupiriralini Mulungu, achatidzudza ndawa yakuti ndise wosiyana na wanthu wa kudziko. Koma mulimose mwavingakhalire, tingachitelini mantha ne pang’ono. Ndawa chani? Ndawa ya Mawu ya Mulungu yomwe yachati: ‘Koma Ambuya ni wokhulupirika ndipo adzakulimbiseni  na kukutetezani kwa woipa maninge.’ (2 Ates. 3:3) Ko Yahova achatiteteza tani? Naboni tikambirane njira ziwiri.

4. Mobverana na Aefeso 6:13-17, nchani chomwe Yahova wapereka kuti chititeteze?

⁴ Yahova watipasa vitsulo vose vankhondo kuti vititeteze ku viyeso va Satana. (Lewengani Aefeso 6:13-17.) Vitsulo vauzimu mwevi ni volimba ndipo ni vothandiza. Koma vingatithandize pokha-pokha tikambaviphatisa basa. Ko chitsulo chilichose chichaimira chani? Naboni tikambirane chilichose pachokha.

5. Ko bande ya choonadi ni chani, ndipo tingaivale tani?

⁵ Bande ya choonadi, inkuimira mpfundo za choonadi zogumanika m’Mawu ya Mulungu Baibolo. Ndawa chani tichadekana kuvala bande mweyi? Ndawa yakuti Satana ‘ni baba wa bodza.’ (Yoh. 8:44) Kwa magole yazinji, iye wakhala ankuphatisa basa mabodza yake kuti ‘asokerese wanthu padziko yose yapasi.’ (Chiv. 12:9) Koma choonadi chogumanika m’Baibolo chichatiteteza kuti tileke kunamiziwa. Ko tingavale tani bande yophiphirisa? Tingachite vimwevi mwa kupfunzira choonadi cha Yahova, kumutumikira mu ‘mzimu na choonadi’ na kuchita chilichose mwachilungamo.—Yoh. 4:24; Aef. 4:25; Aheb. 13:18.

6. Ko chodzitetezera pachifuwa chachilungamo ni chani?

⁶ Chodzitetezera pachifuwa chachilungamo, chinkuimira mpfundo zachilungamo za Yahova. Ndawa chani tichadekana kuvala chodzitetezera? Chodzitetezera chaicho chingatete nsocha kuti aleke kuboolewa, ndipo chodzitetezera chachilungamo chichateteza mtima wathu wophiphirisa kumakhalidwe yaliyose yoipa ya dziko iyi. (Miy. 4:23) Yahova achada kuti timbamutumikire na moyo wathu wose. (Mat. 22:36, 37) Koma Satana achayesesa kugawanisa moyo wathu kuti umbakonde vinthu vakudziko vomwe Yahova achavizonda. (Yak. 4:4; 1 Yoh. 2:15, 16) Iye akawona kuti ankutikangira pa mbali mweyi, achayesesa kuti tiphwanye mpfundo za Yahova.

7. Ko tingavale tani chodzitetezera pachifuwa chachilungamo?

⁷ Tingavale chodzitetezera pachifuwa chachilungamo mwa kubvuma mpfundo zabwino za Yahova pa nkhani ya chabwino na choipa nkumbaziphatisira basa. (Sal. 97:10) Anango angawone kuti mpfundo za Yahova ni zopanikiza. Koma kuleka kuphatisira basa mpfundo za m’Baibolo pamoyo wathu, kuli ninge nsocha yemwe wavula chodzitetezera pachifuwa ndawa yakuti chinkumulemera. Kuchita vimwevi nkusowa nzeru! Koma kwa wale womwe achakondadi Yahova, achawonalini kuti malamulo yake ni ‘yolemera’ koma yopepuka.—1 Yoh. 5:3.

8. Ko kukhala na mabutsu yokonzekera ntontholo wabwino wa ntendere kuchathandauza chani?

⁸ Paulo ankutilimbikisa soti kuti tikhale na mabutsu yokonzekera ntontholo wabwino wa ntendere. M’mawu yanango tingalewe kuti, tichadekana nthawe zose kukhala okonzeka kulalikira ntontholo wabwino wa Ufumu. Tikambauza anango mawu ya m’Baibolo, chikhulupiriro chathu chidzalimbe. Ni volimbikisa maninge kuwona momwe wanthu wa Yahova padziko yose yapasi ankuphatisira basa mwayi uliwose pakulalikira ntontholo wabwino kubasa, kushikola, kogulisira vinthu, muyi na muyi, kokagula vinthu, akambazungira azibale wosakhulupirira, akambacheza na wodziwika olo pomwe ali kumuyi osafamba-famba. Tikaleka kulalikira Ndawa ya mantha, tidzakhake ninge nsocha  yemwe wavula butsu nkhondo iri nkati ndipo angadizelini kuboolewa kuphazi. Ngozi yake ni yakuti, angadizelini kuphewa ndipo vingakhale voshupa kuti atewedze malangizo ya nkulu wa masocha.

9. Ndawa chani tichadekana kutakula chishango chikulu chachikhulupiriro?

⁹ Chishango chikulu chachikhulupiriro chinkuimira kukhulupirira kwathu Yahova. Tichatsimikizira kuti iye adzakwanirise mapolomimsi yake yose. Chikhulupiriro chimwechi chidzatithandize ‘kuvika mikondo yose yogaka moto.’ Ndawa chani tichadekana kutakula chishango chikulu mwechi? Ndawa yakuti chingatiteteze ku vipfunziso vabodza va wanthu wa mpatuko na womwe achatsutsa vomwe tichakhulupirira. Tikaleka kukhala na chikhulupiriro, tingakhalelini wolimba anango akambatichichimiza kuti tileke kutewedza mpfundo za Yahova. Koma nthawe zose tikambalamba kuchita vinthu vomwe Yahova achadalini, peno ni kushikola panango kubasa, chikhulupiriro chathu chingatiteteze. (1 Pet. 3:15) Nthawe zose tikambalamba basa ya mali zizinji koma ingatidyere nthawe yatidakachitira vinthu vauzimu, chikhulupiriro chathu chingatiteteze. (Aheb. 13:5, 6) Ndipo nthawe zose tikambayesesa kutumikira Yahova  podiya kuti tinkutsutsiwa, tidzatetezewe na chishango chathu.—1 Ates. 2:2.

10. Ko heti yachipulumuso ni chani, ndipo tingaivale tani?

¹⁰ Heti yachipulumuso ni chidikhiro chomwe Yahova achatipasa. Chidikhiro chimwechi ni chakuti iye adzadalise womwe ankuchita vomwe iye achada, ndipo podi afe, iye adzawamukise. (1 Ates. 5:8; 1 Tim. 4:10; Tito 1:1, 2) Ninge momwe heti chaiyo ichatetezera msolo wa nsocha, chidikhiro chathu chichateteza kaganizidwe kathu. Munjira yanyi? Chidikhiro mwechi chichatichitisa kuganizira va mapolomisi ndipo chichatithandiza kuwona mabvuto munjira yabwino. Ko tingaivale tani? Tingachite vimwevi mwa kuganiza momwe Mulungu achaganizira. Mwakulinganiza, ise tinkudikhira mwa Yahova, osati pa chuma chosathembeka.—Sal. 26:2; 104:34; 1 Tim. 6:17.

11. Ko chibemba cha mzimu ni chani, ndipo ndawa chani tichadekana kuchiphatisa basa?

¹¹ Chibemba cha mzimu ni Mawu ya Mulungu, Baibolo. Mawu mwaya ni yamphanvu mwakuti yachakwanisa kumasula wanthu kuvipfunziso vabodza na makhalidwe yoipa. (2 Akor. 10:4, 5; 2 Tim. 3:16, 17; Aheb. 4:12) Tichapfunzira kuphatisa bwino basa mawu mwaya mwa kupfunzira patekha na thereni yomwe Mulungu achatipasa pakuphatisira basa gulu yake. (2 Tim. 2:15) Kuingizira ka kuphatisa basa vitsulo va nkhondo, Yahova watipasa njira inango yodzitetezera. Ni iponi?

12. Ko tichadekana soti chani, ndipo ndawa chani?

¹² Nsocha wanzeru achadziwa kuti angakwaniselini kulimbana na adani yekha, koma achadekana thandizo ya masocha yanzake. Nchibodzi-bodzimbo, tingakwaniselini kulimbana na Satana na viwanda vake tiri tekha, tichadekana thandizo ya abale na alongo wathu. Yahova ‘adatipasa abale’ wa padziko yose yapasi kuti atithandize.—1 Pet. 2:17.

13. Mobverana na Aheberi 10:24, 25, ko tichaphindula tani tikambagumanika pamisonkhano?

¹³ Njira ibodzi yotambirira thandizo ni kugumanika pamisonkhano. (Lewengani Aheberi 10:24, 25.) Tose tichakhala wokwinyirira nthawe zinango, koma misonkhano yachatilimbikisa. Tingalimbikisiwe na ndemanga za abale na alongo, nkhani zochokera m’Baibolo, vitsanzo, macheza yomwe tichakhala nayo misonkhano yakanati yayamba na yakapera. Vose vimwevi vingatichitise kukhala otsimikiza kupitiriza kutumikira Yahova. (1 Ates. 5:14) Kuthimizira mwapa, misonkhano yachatipasa mwayi wokhala wokondwa ndawa yothandiza anango. (Mac. 20:35; Aro. 1:11, 12) Misonkhano yathu yachatithandiza soti munjira inango. Iyo yachatithimizira buya yoyankhula na kutikonzekeresa mu umboni. Mwakulingazina, tichapfunzira momwe tingaphatisire basa vitsulo vopfunzisira mofika pamoyo. Ndipomwapa timbakonzekere bwino misonkhano, ndipo mbatetekerani mosamala pomwe misonkhano inkufamba. Misonkhano ikapera, phatisirani basa vomwe mwapfunzira, mukachita vimwevi mudzakhale ‘nsocha wabwino wa Yesu Khrisitu.’—2 Tim. 2:3.

14. Ko ni chithandizo chinango chiponi chatinacho?

¹⁴ Tinachithandizo cha mamidyau yazinji ya angelo. Kumbukirani vomwe mngelo m’bodzi angachite. (Yes. 37:36) Manje ganizirani vomwe gulu yankhondo ya angelo ingachite. Palibe munthu olo chiwanda chomwe chingalimbane na mphanvu za Yahova. Yahova akakhala kusaidi yathu, tingakhale wamphanvu kuposha adani wathu podi awande tani. (Ower. 6:16) Tichatsimikizira kuti vimwevi ni chaivo. Mbakumbukirani vomwe pomwe munkuchitiriwa vinthu voipa n anzanu  wakubasa, anzanu wakushikola, panango azibale omwe ni mbonilini. Dziwani kuti mulirini mwekha pankhondo mweyi ndipo tewedzani malangizo ya Yahova.

15. Mobverana na Yesaya 54:15, 17, ndawa chani wanthu wa Yahova adzaimelini?

¹⁵ Mudziko yomwe inkutongewa na Satana, panavifukwa vizinji vakuti timbazonderewe. Tingeneralini mu nkhani zandale ndipo tiyendalini kunkhondo. Tichalengeza dzina ya Mulungu na Ufumu wake ndiwo wokha wati udzabwerese ntendere ndipo tichabvera mpfundo zake zolungama. Tichafotokoza pachena kuti maboma ya wanthu ni yabodza na yankhanza. (Yoh. 8:44) Ndipo tichalengeza kuti manje-manje dziko ya Satana ichenekewe. Koma Satana na viwanda vake angakwaniselini kuimisa basa yathu yolalikira. M’malo mwake, tidzatamande Yahova munjira iliyose yatingakwanise. Podiya kuti Satana ni wamphanvu, angakwaniselini kuimisa basa yathu yofaga-faga wanthu wa moyo wabwino padziko yose. Vimwevi vinkukwanisika ndawa ya chitetezo cha Yahova.—Lewengani Yesaya 54:15, 17.

16. Ko Yahova adzateteze tani wanthu wake pachisautso chikulu?

¹⁶ Ko kutsogolo kudzakhale bodza iponi? Chisautso chikulu chikambadzachitika, Yahova adzatiteteze modabwisa munjira ziwiri. Yakuyamba, adzapulumuse atumiki wake wokhulupirika panthawe yomwe mafumu ya yadziko yapasi yadzadzonge Babulo Nkulu yemwe ni vipembedzo vose vabodza. (Chiv. 17:16-18; 18:2, 4) Patsogolo pake, adzapulumuse wanthu wake akambadzadzonga Satana na viwanda vake pa Arumagedo.—Chiv. 7:9, 10; 16:14, 16.

17. Ko tichaphindula tani tikapitiriza kukhala paushamwali na Yahova?

¹⁷ Tikapitiriza kukhala pa ushamwali na Yahova, palibe chomwe Satana angachite kuti atidzonge mpakana kale-kale. Koma iye ndiye wati adzadzongewe mpakana kale-kale. (Aro. 16:20) Ndipomwapa, valani vitsulo vose vankhondo ndipo ayi kuvula ne chibodzi! Ayi kuyesa kumenya mwekha nkhondo. Thandizani abale na alongo wanu, ndipo tewedzani malangizo ya Yahova. Mukachita vimwevi, khalani wotsimikizira kuti Ababa wanu wakudzulu adzapakupaseni mphanvu na kukutetezani.—Yes. 41:10.