NKHANI YOPFUNZIRA 11
Momwe tingagumanire mphanvu kuchokera m’Malemba
‘Mulungu . . . achatipasa mphanvu kuti tipirire.’—ARO. 15:5.
NYIMBO NA. 94 Timayamikira Mulungu Potipatsa Mawu Ake
VOMWE TIPFUNZIRE *
1. Ko wanthu wa Yahova ankugumana na mayesero yaponi?
KO IMWEPO munkugumana na chiyeso choshupa? Panango munzanu wa mumpingu adakukalipisani. (Yak. 3:2) Panango anzanu wakubasa, wakushikola achakunyozani ndawa yakuti munkutumikira Yahova. (1 Pet. 4:3, 4) Vingachitike kuti wa m’banja yanu ankukuyesani kuti muyime kuyenda kumisonkhano panango kuwuza anango va chikhulupiriro chanu. (Mat. 10:35, 36) Bvuto ikakukulirani, panango mungawone kuti viribwino kundoleka kutumikira Yahova. Koma khalani na chitsimikizo kuti pa bvuto iliyose yamungagumane nayo, Yahova adzakupaseni nzeru kuti mukwanise kupirira.
2. Ko lemba ya Aroma 15:4, yafotokoza kuti nchani chidzatichikire tikambalewenga Baibolo?
2 M’Mawu yake, Yahova adaikha vitsanzo vowonesa momwe munthu wochimwa angapiririre mabvuto. Ndawa chani? Ndawa achada kuti tipfunzire na chitsanzo chawo. Ndipo vimwevi ndivo vomwe Yahova adauzira mtumi Paulo kunemba. (Lewengani Aroma 15:4.) Kulewenga nkhani zimwezi kuchatikhazika moyo pasi na kutipasa chidikhiro. Ndipomwapa, kuti tiphindule tichadekana kuchita vizinji osati kundolewenga Baibolo. Tichadekana kubvuma kuti Malemba yaumbe kakumbukidwe kathu na kutifika pamoyo. Nchani chomwe tingachite tikagumana na mabvuto yoshupa kupirira? Tingachite vinthu vinayi ivi: (1) Kupemphera, (2) Kulinganiza, (3) Kuganizira, na (4) Kuphatisira basa. Naboni tikambirane chibodzi na chibodzi na kuwona vomwe vinkuphatanidzapo. * Tingaphatisire basa njira zimwezi pakupfunzira vochitika va pamoyo wa Mpfumu Davide na mtumi Paulo.
1. PEMPHERO
Mukalibe mwalewenga Baibolo, kumbirani Yahova kuti akuthandizeni kuwona momwe mungaphindulire na vomwe munkulewenga (Onani ndime 3)
3. Mukalibe mwalewenga Baibolo, muchadekana kuchita chani ndipo ndawa chani?
3 (1) Pemphero. Mukalibe mwalewenga Baibolo, kumbirani Yahova kuti akuthandizeni kuwona momwe mungaphindulire na vomwe munkulewenga. Mwakulinganiza, mukakhala kuti munkufaga-faga malangizo ya momwe mungapiririre bvuto, kumbirani Yahova kuti akuthandizeni kugumana mpfundo m’Mawu yake zomwe zingakutsogolereni.—Afil. 4:6, 7; Yak. 1:5.
2. KULINGANIZA
Yesererani kuganizira kuti munkuwona munthu yemwe munkulewenga nkhani yake (Onani ndime 4)
4. Nchani chamungachite kuti kulewenga Baibolo kumbakhale kofika pamoyo?
4 (2) Kulinganiza. Yahova adatipasa buya yokwanisa kulinganiza vinthu mumsolo mwathu. Kuti nkhani yomwe munkulewenga m’Baibolo ikhale yofika pamoyo, yesererani kuganizira kuti munkuwona munthu yemwe munkulewenga nkhani yake. Yesani kuwona vinthu ninge iye ndipo ganizirani momwe adabvera.
3. KUGANIZIRA
Kumbukani mosamala pa vomwe mwalewenga na kuwona momwe mungaviphatisire basa (Onani ndime 5)
5. Ko kuganizira nkuchita chani, ndipo mungaganizire tani?
5 (3) Kuganizira. Kuganizira ni kukumbuka mosamala pa vomwe mwalewenga na kuwona momwe mungaviphatisire basa. Vimwevi vichathandiza kuti mukwanise kubveranisa na kubvesesa nkhani zamwalewenga. Kulewenga Baibolo koma ne kuganizira, kuli ninge kuphika muliwo koma osaikha munyu na vinango vokomesera. Kuti mukwanise kuganizira, mungachite mibvunzo ninge: ‘Ko nchani chidamuthandiza kuti apirire pa bvuto mweyi? Ko Yahova adamuthandiza tani? Ko ningaphatise tani basa nkhani yanapfunzira iyi kuti nipirire pamabvuto yangu?’
4. KUPHATISIRA BASA
Tikambapfunzira na kuviphatisa basa, tidzasalule bwino vinthu, tidzakhale na ntendere ndipo chikhulupiriro chathu chidzalimbe (Onani ndime 6)
6. Ndawa chani tichadekana kuphatisira basa vomwe tapfunzira?
6 (4) Kuphatisira basa. Yesu adati tikambaleka kuphatisira basa vomwe tapfunzira, vikhala ninge munthu yemwe ankumanga nyumba yake panchenga. Iye achaphata basa mwakhama, koma vimuthandizalini. Ndawa chani? Ndawa yakuti madzi na chimphepo vikandofika, nyumba idzalimbelini. (Mat. 7:24-27) Nchibodzibodzimbo, tikambapemphera, kulinganiza, kuganizira koma ne kuphatisira basa vatapfunzira, khama yathu idzakhale ilibe na basa. Tikambagumana na mabvuto panango kudzudziwa, chikhulupiriro chathu chichachepa. Koma tikambapfunzira na kuviphatisa basa, tidzasalule bwino vinthu, tidzakhale na ntendere ndipo chikhulupiriro chathu chidzalimbe. (Yes. 48:17, 18) Pakuphatisira basa njira zinayi zatakambirana izi, naboni tiwone vomwe tingapfunzire na moyo wa Mpfumu Davide.
KO MUNKUPFUNZIRA CHANI KWA MPFUMU DAVIDE?
7. Ni nkhani iponi ya m’Baibolo yomwe tikambirane manje-manjepa?
7 Ko imwepo mudakalipisiwa na shamwali wanu panango munthu wa m’banja mwanu? Peno viriteno, muphindule na nkhani ya Abisalomu yemwe wenze mwana wa Mpfumu Davide. Iye adakalipisa ababa wake ndipo angada kuwatengera ufumu.—2 Sam. 15:5-14, 31; 18:6-14.
8. Ko mungachite tani kuti Yahova akuthandizeni?
8 (1) Pemphero. Mudakali na nkhani mweyo munsolo, muuzeni Yahova mpemphero momwe munkubvera ndawa ya vomwe vakuchitikirani. (Sal. 6:6-9) Lewerantuni vikushupa. Patsogolo pake kumbirani Yahova kuti akuthandizeni kugumana mpfundo zomwe zingakuthandizeni pakugwebana na mabvuto yanu.
9. Ko mwachigwato mungalewe kuti nchani chikuchitika pakati pa Davide na Abisalomu?
9 (2) Kulinganiza. Ganizirani momwe venzere panthawe mweyo, ndipo yesani kulinganiza momwe Mpfumu Davide adabvera. Mwana wake Abisalomu, kwa magole yazinji ankuphata basa mwakhama kuti wanthu ambamukonde. (2 Sam. 15:7) Pomwe Abisalomu ankuwona kuti nthawe iri bwino manje, ankutuma wanthu kuti akakanzire ku Izirayeli kose na kukonzekeresa wanthu kuti akamutambire ninge mpfumu. Mpakana wafika pakunyengerera Ahitofeli yemwe ni shamwali wa Davide kuti akhale nawo pabodzi pakupanduka moku. Abisalomu ambalengeza kuti iye ni mpfumu ndipo adayesesa kuti amuphate na kumupha Davide panthawe yomwe iye angadwala. (Sal. 41:1-9) Davide pawazindikira vimwevi ankuchoka mu Yerusalemu. Masocha ya Abisalomu yankumeyana na masocha ya Davide ndipo Abisalomu ankuphewa.
10. Ko Mpfumu Davide adakakumbuka chani?
10 Patsogolo pake, yesani kuganizira momwe Davide ankukhalira na chikhulupiriro pa vose vomwe vinkumuchitikira. Iye angakonda Abisalomu ndipo angathemba Ahitofeli. Koma ndawa ya vimwevi ankuwathembalini soti. Iwo akalipa ndipo ankufuna kumupha. Davide ankukhulupiriralini soti azishamwali wake pakuganizira kuti ayamba kuthandiza Abisalomu. Iye adakaganizira va moyo wake ndipo akundofuna kuthawa kuyenda kudziko inango kwa yekha-yekha. Ndipo adakowana kuti palibe ne chibodzi chomwe chinkumufambira. Koma Davide alibe kuganizako tene. M’malo mwake adapirira chiyeso. Ndawa chani adakwanisa kuchita vimwevi?
11. Nchani chomwe Davide adachita panthawe yoshupa?
11 (3) Kuganizira. Ko ni mpfundo ziponi zomwe mungapfunzire pa nkhani mweyi? Dawirani mbvunzo wakuti ‘ko nchani chomwe Davide adachita kuti adzithandize?’ Davide alibe kukhala na nkhawa pa vomwe vidamuchitikira, panango kusalula vinthu osaganiza. Iye adakakhala na mantha panango kunjenjemera, koma m’malo mwake adakumbira thandizo kwa Yahova. Iye adakumbira soti shamwali wake kuti amuthandize. Ndipo iye mwakankulumize adachita vomwe adasaina. Podiya kuti wenze wokalipa m’moyo mwake, Davide alibe kukhala wokalipa mpakana kale-kale. Iye adapitiriza kuthemba Yahova na azishamwali wake.
12. Ko Yahova adachita chani pakuteteza Davide?
12 Ko Yahova adamuthandiza tani Davide? Mwa kufaga-faga, imwepo mudzawone momwe Yahova adapasira mphanvu Davide kuti akwanise kupirira. (Sal. 3:1-8; wonani mawu yapadzulu) Yahova adadalisa vosalula va Davide ndipo adathandiza soti azishamwali wake pomwe angamenyera nkhondo kuti amuteteze ninge mpfumu yawo.
13. Ko mungatewedzere tani Davide peno munthu munango wakukalipisani? (Mateyu 18:15-17)
13 (4) Kuphatisira basa. Dzibvunzeni kuti ‘ningatewedzere tani Davide?’ Muchadekana kuchita vinthu mwakankulumize kuti mukonze bvuto yanu. Mobverana na momwe vinthu viriri, mungaphatise basa malangizo ya Yesu yogumanika pa Mateyu msolo wa 18. (Lewengani Mateyu 18:15-17.) Koma ayi kuti mumbasalule vinthu muli kalipe. Imwepo mungapemphere kwa Yahova kuti akupaseni mtima woderekha na nzeru kuti mukwanise kupirira chilichose. Ayi kuleka kukhulupirira azishamwali wanu. M’malo mwake, tichadekana kubvuma thandizo yawo. (Miy. 17:17) Ni vodekana maninge kutewedza malangizo yomwe Yahova ankutipasa pakuphatisa basa Mawu yake.—Miy. 3:5, 6.
KO MUNKUPFUNZIRA CHANI NA PAULO?
14. Ni panthawe iponi pomwe 2 Timoteyo 1:12-16; 4:6-11, 17-22 ingakulimbikiseni?
14 Ko wanthu wa m’banja mwanu ankukutsutsani? Panango munkukhala mudziko yomwe basa ya wanthu wa Yahova ni yolambiziwa? Peno nteno, mungalimbikisiwe na kulewenga 2 Timoteyo 1:12-16 na 4:6-11, 17-22. * Paulo adanemba mbali mweyi ya Malemba pewenze mudjeri.
15. Ko mungamuuze chani Yahova mpemphero?
15 (1) Pemphero. Mukalibe mwawerenga nkhani iliyose, muuzeni Yahova bvuto yanu na momwe munkubvera. Lewerantuni bvuto yanu. Patsogolo pake, kumbirani Yahova kuti akuthandizeni kuganizira mpfundo zomwe zinkufotokoza za khaindi ya mayesero yomwe Paulo adagumana nayo ndipo wonani kuti mungachite tani kuti mupirire bvuto yamwagumana nayo.
16. Ko mungafotokoze tani mwachigwato vomwe vidachitikira Paulo?
16 (2) Kulinganiza. Linganizani vochitika va Paulo kuti ndimwe. Iye adamangiwa nkuikhiwa mudjeri ku Roma. Iye wenzekale mudjeri, koma ulendo uno ankuchita kudziwiratu kuti aphewe. Anzake anango amuthawa ndipo iye waneta na mabvuto.—2 Tim. 1:15.
17. Ko Paulo adakakumbuka chani?
17 Paulo adakaganizira vomwe vidamuchitikira kale-kale nkumbati, nidakati nilibe kusalula moyo moyu sembe nili bwino. Iye adakakalipira maninge amuna wa ku dera ya Ásia womwe adamuthawa. Ndipo adakaleka kuthemba azishamwali wake anango. Koma Paulo alibe kuchitako ne chibodzi pa vinthu vimwevi. Ndawa chani iye ambatsimikizira kuti azishamwali wake adakamukhulupirira nakuti Yahova angamudalise?
18. Nchani chomwe Paulo adachita panthawe yoshupa?
18 (3) Kuganizira. Dawirani mbvunzo wakuti, ‘ko Paulo adadzithandiza tani?’ Podiya kuti wenze pangozi ya impfa, Paulo ambatsimikizira kuti vimwevi vinkubweresa ulemelero kwa Yahova. Ndipo iye adapitiriza kukumbukira momwe angalimbikisire anango. Iye adathemba Yahova mwa kupemphera mosalekedza. (2 Tim. 1:3) M’malo mwakuti ambondoganizira kuti anzangu adanithawa, iye adafotokokoza momwe angatembejera chithandizo chomwe azishamwali wake angamupasa. Kuyingizira mwapa, Paulo adapitiriza kupfunzira Mawu ya Mulungu. (2 Tim. 3:16, 17; 4:13) Chinthu chodekana maninge nchakuti iye wenze na chitsimikizo chakuti Yahova na Yesu angamukonda. Iwo alibe kumusiya koma adamudalisa ndawa ya kukhulupirika pa basa yake.
19. Ko Yahova adamuthandiza tani Paulo?
19 Yahova wenze adamuuziratu Paulo kuti adzadzudziwe ndawa yokhala Mkhrisitu. (Mac. 21:11-13) Ko Yahova adamuthandiza tani Paulo? Iye adadawira mapemphero ya Paulo ndipo nthawe zose ambamupasa mphanvu. (2 Tim. 4:17) Paulo wenze adatsimikiziriwa kuti adzapasiwe mphoto yomwe adaiphatira basa kuti aigumane. Yahova adachitisa soti kuti azishamwali wa Paulo amuthandize.
20. Poganizira Aroma 8:38, 39, tingatewedzere tani Paulo?
20 (4) Kuphatisira basa. Dzibvunzeni kuti: ‘Ko ningamutewedzere tani Paulo?’ Ninge Paulo, ni vosachita kubvunza kuti nasembo tingadzudziwe ndawa ya chikhulupiriro chathu. (Maliko 10:29, 30) Kuti tipitirize kukhala wokhulupirika pamabvuto, tichadekana kupemphera kwa Yahova na kumbapfunzira mawu yake nthawe zose. Ndipo nthawe zose timbakumbukire kuti chinthu chodekana maninge ni kubweresa ulemelero kwa Yahova. Tingakhale na chitsimikizo chakuti Yahova adzatisiyelini ne pang’ono, ndipo palibe chilichose ne munthu aliyese yemwe angachitise kuti Yahova aleke kutikonda.—Lewengani Aroma 8:38, 39; Aheb. 13:5, 6.
PFUNZIRANI KUCHOKERA KWA WANTHU ANANGO WA M’BAIBOLO
21. Nchani chidathandiza Aya na Hector kuti agwebane na mabvuto yawo?
21 Viribe basa momwe vinthu viriri pamoyo wathu, tingagumane mphanvu na vitsanzo va m’Baibolo. Mwakulinganiza, Aya yemwe ni mpainiya ku Japão, adalewa kuti nkhani ya Yona idamuthandiza kuti asambagope kulalikira wanthu. Hector yemwe ni mulumbwana wa ku Indonêsia ndipo azibereki wake achatumikiralini Yahova, adalimbikisiwa na chitsanzo cha Rute kuti apfunzire va Yahova na kumutumikira.
22. Ko mungachite tani kuti mumbaphindule mwakukwana na mavidiyo na mbali yakuti ‘Tsanzirani Chikhulupiriro Chawo’?
22 Nkuponi kwamungagumane vitsanzo va m’Baibolo vomwe vingakulimbikiseni? Mungavigumane m’mavidiyo yathu, madirama na mbali yakuti ‘Tsanzirani Chikhulupiriro Chawo.’ Vimwevi vichathandiza kuti nkhani za m’Baibolo zitifike pamoyo. * Mukanati kunyang’anira, kubvesera panango kulewenga nkhani zimwezi, mukumbireni Yahova kuti mugumane mpfundo zomwe mungaziphatise basa. Ganizirani kuti vimbachitikira imwepo. Ganizirani vomwe atumiki wa Yahova wapamoyo mwawa adachita na momwe iye adawathandizira kugwebana na mabvuto yawo. Patsogolo pake, phatisirani basa vomwe mwapfunzira mobverana na mabvuto yanu. Tembejani Yahova ndawa ya thandizo yomwe wakupasani. Ndipo wonesani kuti muchatembeja thandizo mweyo pakulimbikisambo anango.
23. Mobverana na Yesaya 41:10, 13, nkhani chomwe Yahova ankutipolomisa?
23 Moyo mudziko ya Satana iyi ni woshupa ndipo nthawe zinango tingambasowe chochita. (2 Tim. 3:1) Koma tichadekanalini kuchita mantha panango kukhala na nkhawa. Yahova achadziwa vomwe tidzagumane navo. Pomwe tinkufuna thandizo, Yahova adzatiphate na djanja yake yamakulu. (Lewengani Yesaya 41:10, 13.) Tikambakhala wotsimikiza kuti Yahova adzatithandize, tidzagumane mphanvu kuchokera m’Malemba kuti tigwebane na bvuto iliyose yatingagumane nayo.
NYIMBO NA. 96 Buku la Mulungu Ndi Chuma
^ ndi. 5 Nkhani zizinji za m’Baibolo zichawonesa kuti Yahova achakonda atumiki wake ndipo adzawathandize kuti apirire bvuto iliyose. Munkhani ino, tikambirane momwe mungachitire pfunziro ya pamwekha kuti muphindule na vomwe munkulewenga.
^ ndi. 2 Njira zopfunzirira zatafotokoza pano, ni maganizo chabe. Njira zinango zopfunzirira Baibolo mungazigumane mu Guia de Pesquisa das Testemunhas de Jeová pa msolo wakuti ‘Baibolo’ koma pakamsolo kakuti ‘kulewenga na kubvesesa Baibolo.’
^ ndi. 14 Ayi kulewenga mavesi mwaya nkati mwa pfunziro ya Ntsanja ya ulonda.
^ ndi. 22 Wonani mbali yakuti ‘Tsanzirani Chikhulupiriro Chawo—Amuna ndi Akazi Otchulidwa m’Baibulo’ pa jw.org. (Yendani pakuti ZIMENE BAIBULO LIMAPHUNZITSA > KUKHULUPIRIRA MULUNGU.)
