Wanthu anango omwe achalewenga kankulumize nkhani mweyi adapereka mbvunzo moyu. Koma chaivo ni vakuti mavesi mwaya yankusimba va wanthu awiri omwe wose enze na dzina yakuti Mefiboseti, ndipo kukambirana nkhani mweyi kutithandize maninge.

Sauli yemwe wenze Mpfumu ya Izirayeli wenze na wana wachimuna 7 na wachikazi awiri. Mwana mwamuna woyamba wa Sauli wenze Yonatani. Patsogolo pake mpfumu mweyi idadzakhala na mwana dzina yake Mefiboseti, wobadwira kwa m’khaziba Rizipa. Chochitisa chidwi ni chakuti Yonatani wenzembo na mwana dzina yake Mefiboseti. Kutanthauza kuti Mpfumu Sauli wenze na mwana Mefiboseti na mdzukulu wake Mefiboseti pomwe.

Chidachitika nchakuti Mpfumu Sauli adayamba kuukira Agibeoni omwe angakhala pabodzi na Aizirayeli ndipo ambafuna kuwapheratu wose. Ndipo vinkuwoneka kuti Agibeoni azinji adaphewa. Kumoku kwenze kuphonya. Ndawa chani? Kwenze kuphonya ndawa yakuti munthawe ya Yoswa, Aizirayeli adachita pangano ya ntendere na Agibeoni.—Yos. 9:3-27.

Pangano mweyi yenze idakali kuphata basa munthawe ya Mpfumu Sauli. Ndipomwapa kupha Agibeoni kwenze kuphwanya pangano. Kuipa mtima moku kudachitisa kuti ‘nyumba ya Sauli ikhale na mulandu wa magazi.’ (2 Sam. 21:1) Pamapeto pake, Davide adadzakhala mpfumu. Agibeoni omwe adapulumuka adayenda kukafotokozera Davide voipa vomwe Sauli adawachitira. Davide adawabvunza vomwe angachitire wanthu wa m’banja ya Sauli kuti Yahova ayambe pomwe kudalisa Aizirayeli. M’malo mokumbira kobiri, Agibeoni adakumbira kuti wana 7 wa Sauli omwe ‘adachitambo chiwembu’ amanikiwe pamuti nkuphewa. (Num. 35:30, 31) Davide adachitadi vomwe iwo adamukumbira.—2 Sam. 21:2-6.

Koma Sauli na Yonatani adaphewa kunkhondo ndipo panthawe mweyi kwenze kulibe. Koma Mefiboseti wenze adakali na moyo. Iye adapulumuka pankhondo ndipo alibe kuthandizako ambuya wake pakupha Agibeoni. Ndipo Davide wenze adachita pangano na Yonatani yakuti adzasamalire wana wake kuphatanidzapo Mefiboseti. (1 Sam. 18:1; 20:42) Nkhani mweyi ilewa kuti: ‘Mpfumu Davide adachitira chifundo Mefiboseti, mwana wa Yonatani yemwe wenze mwana wa Sauli ndawa ya panango yomwe adachita pamaso pa Yahova.’—2 Sam. 21:7.

Davide adalemekeza nkumbiro wa Agibeoni. Iye adamanika wana awiri wa Sauli ndipo m’bodzi pamwapa wenze Mefiboseti na azizukulu ashanu wa Sauli. (2 Sam. 21:8, 9) Vomwe Davide adachita panthawe mweyi vidamalisa mulandu wa magazi.

Sikuti pamwapa Mulungu adachita vinthu vilibe chilungamo neye. Pale lamulo yake yenze yobveka bwino yakuti: ‘Mwana osati ambaphewe ndawa ya vophonya va ababa wake.’ (Deut. 24:16) Adakati wana awiri na azizukulu wa Sauli wale enzelini wophonya, sembe Yahova alibe kubvumiza kuti iwo aphewe. Lamulo yake ingalewa pomwe kuti: ‘Munthu ambaphewe ndawa ya vomwe iye waphonyesa.’ Vinkuwoneka kuti wana 7 omwe adaphewa wale adathandiza Sauli pakupha Agibeoni. Vimwevi vinkuwonesa kuti iwo adadziphesa wokha.

Vimwevi vinkuwonesa kuti munthu peno wayankhula panango kuchita vinthu voipa, ndiye kuti anamulandu podiya kuti ambadziikhire kumbuyo. Panamwambo unango wanzeru wakuti: ‘Salaza njira ya phazi yako, ndipo njira zako zose zidzakhazikike.’—Miy. 4:24-27; Aef. 5:15.