1. Ko tingambadzibvunze mbvunzo uponi nthawe zinango?

KO IMWEPO nthawe zinango muchita mantha mukaganizira vinthu vopasa mantha vomwe vichitike manjemanje vomwe ni kudzongewa kwa matchetchi yabodza, kuukira kwa Gogi wa Magogi na nkhondo ya Arumagedo? Panango mudzibvunza kuti: ‘Ko vinthu vimwevi vikambadzachitika, nidzakwanise kukhala wolimba ine?’ Peno imwepo mudaganizako kale tene, ndiye kuti mawu ya Yesu ya mu lemba yomwe yatakula msolo wa nkhani ino yakuthandizeni maninge. Yesu adauza wopfunzira wake kuti: ‘Mitima yanu yasashupike. Khulupirirani.’ (Yoh. 14:1) Chikhulupiriro cholimba chidzatithandize kugwebana na mabvuto ya kutsogolo.

2. Ko tingalimbise tani chikhulupiriro chathu, ndipo tikambirane chani munkhani ino?

² Kuti tidzakwanise kukhala wolimba pa mayesero yakutsogolo, tichadekana kuwona mwatichachitira vinthu na mayesero ya ntsiku zino. Tikateno, tingakwanise kuwona mbali zomwe tingafunikane kulimbisa chikhulupiriro chathu. Nthawe iliyose yomwe tinkupirira chiyeso, chikhulupiriro chathu chilimba maninge. Vimwevi ndivo vati vidzatithandize kupirira mayesero yakutsogolo. Munkhani ino tikambirane mayesero 4 yomwe wopfunzira wa Yesu adagumana nayo yomwe yadawonesa kuti chikhulupiriro chawo chingadikana kukhala cholimba. Tikambirane vomwe tingachite tikagumana na mayesero yabodzibodzi ntsiku zino na kuwona momwe vimwevi vingatikonzekeresere ku mayesero yakutsogolo.

3. Mobverana na Mateyu 6:30, 33, ko Yesu adabvekesa mpfundo iponi pankhani ya chikhulupiriro?

³ Ni vachibadwa kuti msolo wa banja umbadzibve kuti unaudindo wogumanira banja yake vakudya, vovala na kuwonesesa kuti nkazi na wana anathanzi yabwino. Koma nthawe zinango  vikhala voshupa ntsiku zomalizira zino. Abale wathu anango adaluza basa. Ndipo olo kuti ankuyesesa mwakhama vinkukwanisikalini kugumana inango. Anango adasiya basa ndawa yenze yosabverana na mpfundo za m’Baibolo. Vikakhala tene, tichadekana kukhala na chikhulupiriro champhanvu kuti titsimikizire kuti Yahova adzasamalire banja yathu. Pa ulaliki wake wa paphiri, Yesu adawatsimikizira wopfunzira wake kuti Yahova ni wokonzeka kutithandiza. (Lewengani Mateyu 6:30, 33.) Tikakhala wotsimikiza kuti Yahova adzatisiyelini, maganizo yathu yadzakhale pa kuikha Ufumu pamalo yoyamba basi. Tikambawona momwe Yahova ankutithandizira kugumana vofunika pamoyo, tidzakhale wotsimikiza kuti iye ni chaiyedi ndipo chikhulupiriro chathu chidzakhale cholimba.

4-5. Nchani chidathandiza banja inango peenze na nkhawa kuti agumane tani vofunika pamoyo?

⁴ Wonani momwe banja ya a Castro ku Venezuela idawonera momwe Yahova adawathandizira panthawe yomwe enze na nkhawa kuti agumane tani vofunika pamoyo. Panthawe inango iwo adakhala na moyo wosafuna vizinji mwa kumbaphata basa kumunda. Patsogolo pake vigananga vidabwera kudzachita chipiringu mpakana adathawira kudziko inango. Miguel yemwe ni baba adati: ‘Kuti tigumane vofunika tikuthemba kulima mukamunda kang’ono katidakagumana mudziko ino. Ntsiku iliyose kukandochena, tiyamba na pemphero nkukumbira Yahova kuti atipase vofunika va ntsiku mweyo.’ Banja mweyi inkugumana na mabvuto yazinji, koma ndawa yokhulupirira kuti Ababa wathu wachikondi ambawasamalire ntsiku iliyose, banja ya a Castro igumanika pamisonkhano sondo iliyose na kulalikira. Iwo aikha Ufumu pamalo yoyamba ndipo Yahova awapasa vomwe ankusowa.

⁵ Podiya kuti Miguel na nkazi wake Yurai adagumana na mabvuto mwaya, iwo angaikhira nzeru pa momwe Yahova ankuwasamalirira. Nthawe zinango Yahova angaphatisira basa abale na alongo kuti agumane vofunika pamoyo panango kuthandiza Miguel kuti agumaneko kabasa. Nthawe zinango Yahova angaphatisira basa chithandizo chochokera ku ofesi ya nthambi kuti athandize abale osowa mwawa. Yahova alibe kuwasiya ne pang’ono. Ndipo iwo adakwanisa kuwona momwe mabanja yawo yadakhalira yolimba muchikhulupiriro. Yoselin yemwe ni mwana wawo nkazi woyamba padamaliza kufotokoza momwe Yahova adawathandizira, adati: ‘Vingachita kuwonekeratu kuti Yahova ndiye ankutithandiza. Yahova ni shamwali wangu chaiye yemwe nichamuthemba pamoyo wangu.’ Ndipo adalewa pomwe kuti: ‘Mayesero yomwe tidagumana nayo yadatikonzekeresa ku mayesero yakuluyakulu yakutsogolo.’

6. Ko mungalimbise tani chikhulupiriro chanu mukambagumana na bvuto yosowa kobiri?

⁶ Ko imwepo munkugumana na bvuto yosowa kobiri? Peno nteno, tinashuwa kuti vinkukuwawani. Olo kuti munkugumana na vinthu voshupa, mungaphatisire basa nthawe mweyi kuti mulimbise chikhulupiriro chanu. Mbapempherani mwakhama ndipo mbalewengani mawu ya Yesu yogumanika pa Mateyu 6:25-34  na kuyaganizira. Ganizirani vitsanzo va ntsiku zino vomwe vinkutsimikiziradi kuti Yahova achasamalira womwe ankuikhira nzeru pa kumutumikira. (1 Akor. 15:58) Mukateno, mudzatsimikizire kuti Yahova adzakusamalireni ninge momwe adasamalirambo anango. Iye adziwa vomwe munkusowa na momwe angakupasireni. Mukambawona momwe Yahova ankukuthandizirani, chikhulupiriro chanu chilimba maninge ndipo mudzakwanise kupirira viyeso vikuluvikulu kutsogolo.—Hab. 3:17, 18.

7. Mobverana na Mateyu 8:23-26, ko ‘chimphepo chikulu’ chidayesa tani chikhulupiriro cha wopfunzira wa Yesu?

⁷ Yesu na wopfunzira wake padagumana na chimphepo chikulu panyanja, Yesu adaphatisira basa chochitika mwecho pakuwathandiza kuwona mbali zomwe angafunika kuthimizira chikhulupiriro chawo. (Lewengani Mateyu 8:23-26.) Chimphepo pachidawindula madzi mpakana kungena mu barko, Yesu wenze gone. Pomwe wopfunzira wake adamugunduza nkumukumbira kuti awapulumuse, iye adawalangiza mwachikondi kuti: ‘Wachikhulupiriro chochepa imwe, ndawa chani munkuchita mantha?’ Wopfunzira wamantha mwawa angadekana kuzindikira kuti Yahova ni wokonzeka kuteteza Yesu pabodzi na iwo. Ko imwepo munkukwanisa kuwona momwe tingaphatisire basa pfunziro mweyi? Chikhulupiriro cholimba chingatithandize kupirira ‘chimphepo chikulu’ panango mavuto yanango.

8-9. Ko chikhulupiriro cha Anel chidayesewa tani, ndipo nchani chidamuthandiza?

⁸ Wonani momwe mulongo Anel waku Porto Rico adagumanira na bvuto ikulu yoyesa chikhulupiriro. Iye adagumana na ‘chimphepo’ chaicho. Mu 2017, chimphepo chochemerewa Hurricane Maria chidadzonga nyumba ya Anel. Chimphepo chimwechi chidachitisa kuti Anel aluze basa. Iye adati: ‘Panthawe yoshupa mweyi nenze na nkhawa maninge. Koma nidapfunzira kuthemba Yahova mwa kupemphera kwa iye na kusaya kubvuma kuti nkhawa inisowese chochita.’

⁹ Anel adafotokoza kuti kubvera ndiko kudamuthandiza kuti apirire mayesero. Iye adati: ‘Kutewedza malangizo ya gulu ndiko kudanithandiza kuti mtima wangu udekhe. Nidawona momwe Yahova adanilimbikisira pakuphatisa basa abale na alongo kuti anipase vosowa.’ Iye adalewa pomwe kuti: ‘Yahova adanipasa vizinji kuposha vomwe ningadikhira, ndipo chikhulupiriro changu chidalimba maninge.’

10. Ko mungachite chani peno munkugumana na ‘chimphepo chikulu’?

¹⁰ Ko imwepo munkugumana na ‘chimphepo chikulu’ pamoyo wanu? Chimphepo chimwechi chingaphatanidzepo mabvuto yobwera ndawa ya matsoka yachilengedwe. Panango chimphepo chimwechi chingakhale matenda yakulu yomwe yangakuchitiseni kukhala wopanikizika mpakana kusowa chochita. Nthawe zinango mungakhale na nkhawa, koma ayi kubvuma kuti nkhawa yanu ikukangiseni kuthemba Yahova. Mbapempherani mochokera pasi pa mtima kuti mumufenderere. Limbisani chikhulupiriro chanu pakuganizira nthawe yomwe Yahova adakuthandizani ntsiku zakumbuyo. (Sal. 77:11, 12) Khalani wotsimikiza kuti Yahova adzakusiyenilini.  Iye adzakhale namwe manjeuno mpakana kalekale.

11. Ndawa chani nthawe zose tichadekana kubvera wanthu womwe ankutsogolera?

¹¹ Nchani pomwe chinango chomwe chingakuthandizeni kuti mupirire mayesero? Ninge momwe Anel adafotokozera, muchadekana kubvera. Pfunzirani kuthemba wanthu womwe Yahova na Yesu awathemba. Nthawe zinango wanthu womwe ankutsogolera angapereke malangizo yomwe tinkuwona ninga yathandizelini. Olo viri teno, Yahova angatidalise peno ndise wobvera. Tinkudziwa kuti kubvera kupulumusa moyo tikawona vomwe viri m’Mawu yake na vomwe vachitikira atumiki wokhulupirika. (Eks. 14:1-4; 2 Mbiri 20:17) Mumbaganizire vitsanzo vimwevi. Mukachita teno mudzakhale wotsimikiza maninge kubvera makonzedwe ya gulu manjewuno na kutsogolo. (Aheb. 13:17) Ndipomwapa palibe chifukwa chogopera chimphepo chikulu chomwe chinkubwera manjemanje.—Miy. 3:25.

12. Ko lemba ya Luka 18:1-8 inkuwonesa tani kuti pali kubverana pakati pa kukhala na chikhulupiriro na kupirira vinthu viribe chilungamo?

¹² Yesu angadziwa kuti chikhulupiriro cha wopfunzira wake chingakhale pabvuto akachitiriwa vinthu viribe chilungamo. Pakufuna kuwathandiza momwe angapiririre, Yesu adapereka fanizo yomwe idanembewa m’bukhu ya Luka. Yesu adafotokoza fanizo ya nkazi wamasiye yemwe adapitiriza kulirira woweruza wosalungama. Iye wenze wotsimikiza kuti khama yake imuphindulise. Vimwevi vidachitisa kuti woweruza ule amuthandize. Ko pamwapa tinkupfunzirapo chani? Sikuti Yahova ni wosalungama. Ndipomwapa Yesu adalewa kuti: ‘Ko Mulungu adzawoneseselini kuti chilungamo chachitika kwa wale womwe amukuwirira usiku na masikati?’ (Lewengani Luka 18:1-8.) Patsogolo pake Yesu adalewa pomwe kuti: ‘Ko Mwana wa munthu akadzafika adzagumanedi chikhulupiriro padziko yapasi?’ Tikachitiriwa vinthu viribe chilungamo, tichadekana kuwonesa kuti ndise wodekha nakuti tinachikhulupiriro ndipo ndise wolimbikira ninge nkazi wamasiye moyu. Tikakhala na chikhulupiriro chatene, tingakhale wotsimikiza kuti Yahova adzatisamalire manjeuno olo kutsogolo. Tichadekana pomwe kukhulupirira kuti pemphero inamphanvu. Nthawe zinango pangachitike vinthu vomwe tingavidikhiralini tikapemphera.

13. Ko pemphero idathandiza tani banja inango pomwe idachitiriwa vinthu viribe chilungamo?

¹³ Wonani vomwe vidachitikira mulongo Vero wa ku República Democrática de Congo. Vero pabodzi na mwamuna wake na mwana wawo nkazi wamagole 15 vidawashupa pomwe masocha yadachita nkhondo m’muyi mwawo. Vinthu vidachinjiratu pomwe masocha yadawaphata nkuwauza kuti ankufuna kuwapha. Vero padayamba kulira, mwana wake adamukhazika moyo pasi mwa kuchita pemphero mokuwa na kubwerezerabwerezera dzina ya Yahova mpemphero mweyo. Padamaliza kupemphera, nkulu wa masocha adamubvunza kuti:  ‘Iwe mtsikana, ni mbani adakupfunzisa kupemphera?’ Iye adadawira kuti: ‘Amayi ndiwo adanipfunzisa pakuphatisa basa pemphero yachitsanzo yogumanika pa Mateyu 6:9-13.’ Pamwapo nkulu wa masocha adati: ‘Iwepo mtsikana na azibereki wako mose mungayende, ndipo Yahova Mulungu wako akutetezeni.’

14. Nchani chingayese chikhulupiriro chathu, ndipo nchani chingatithandize kupirira?

¹⁴ Vomwe vidachitikira banja mweyi vinkuwoneseratu kuti pemphero inamphanvu maninge. Koma ko mungachite chani peno mapemphero yanu yankudawiriwalini mwakankulumize panango modabwisa? Pitirizani kupemphera ninge momwe adachitira nkazi wamasiye wa muchitsanzo cha Yesu uku muli wotsimikiza kuti Mulungu wathu adzakudawireni panthawe yake. Pitirizani kukumbira Yahova kuti akupaseni mzimu wakuchena. (Afil. 4:13) Kumbukirani kuti Yahova akudaliseni manjemanje mpakana kukuyebwesani mabvuto yomwe mudagumana nayo kalekale. Mukambapirira mabvuto mokhulupirika mothandiziwa na Yahova, mudzakhale wolimba ku viyeso va kutsogolo.—1 Pet. 1:6, 7.

15. Mobverana na Mateyu 17:19, 20, ko wopfunzira wa Yesu adagumana na bvuto yanyi?

¹⁵ Yesu adauza wopfunzira wake kuti chikhulupiriro chingawathandize kupirira vofokesa. (Lewengani Mateyu 17:19, 20.) Nthawe inango, iwo alibe kukwanisa kuchosa chiwanda podiya kuti kumbuyo enze adakwanisako kale kuchosa. Manje bvuto yenze chani? Yesu adawauza kuti ambafunika kuthimizira chikhulupiriro. Iye adawauza kuti akandokhala na chikhulupiriro chokwana, angakwanise kugwebana na mabvuto yomwe yali ninge phiri. Ntsiku zino isembo tinkugumana na mabvuto yomwe yali ninge phiri.

16. Ko chikhulupiriro chidathandiza tani Geydi pomwe mwamuna wake adaphewa?

¹⁶ Wonani vomwe vidachitikira mulongo Geydi wa ku Guatemala. Mwamuna wake Edi adaphewa pomwe angachokera kumisonkhano. Ko chikhulupiriro cha Geydi chidamuthandiza tani kugwebana na bvuto ikulu mweyi? Iye adati: ‘Pemphero ndiyo idanithandiza kutulira Yahova nkhawa zangu ndipo nidakhala na ntendere wa muntima. Nidawona kuti Yahova ankunithandiza pophatisira basa wanthu wa m’banja mwangu na abale na alongo kumpingu. Kukhala wotangwanika pakutumikira Yahova kudanithandiza kuti nichepeseko chisoni chenenze nacho na kugwebana na nkhawa za ntsiku iliyose payokha osaganizira va mangwana. Pinidagumana na vimwevi, nidapfunzira kuti viribe basa kuti nigumane na bvuto yanyi, nidzakwanise kupirira mothandiziwa na Yahova, Yesu, angelo na gulu yake.’

17. Ko tingachite tani tikagumana na mabvuto yomwe ili ninge phiri?

¹⁷ Ko imwepo ndimwe wokwinyirira ndawa yakuti mudaferewa munthu wapamoyo? Peno nteno, patulani nthawe yakuti mulimbise chikhulupiriro chanu chakuti wakufa adzamukisiwe  pakuwerenga nkhani za m’Baibolo za wanthu womwe adamukisiwa. Ko ndimwe wokwinyirira ndawa yakuti munthu wa m’banja yanu adachosewa mumpingu? Peno nteno, pfunzirani kuti muchite kutsimikiza mwekha kuti njira yomwe Yahova achapfunzisira wanthu ni yabwino nthawe zose. Viribe basa kuti munkugumana na mabvuto yanyi, yawoneni kuti ni mwayi wolimbisira chikhulupiriro chanu. Muuzeni vose Yahova. Ayi kumbadzipatula ndipo khalani pafupi na abale na alongo wanu. (Miy. 18:1) Mbaphatani nawo basa zomwe zingakuthandizeni kuti mupirire, podiya kuti mungachite vimwevo munamisozi. (Sal. 126:5, 6) Pitirizani kugumanika pamisonkhano nthawe zose, kulalikira na kulewenga Baibolo. Ganizirani madaliso yomwe Yahova wakusungirani. Mukambawona momwe Yahova ankukuthandizirani, chikhulupiriro chanu chidzalimbe maninge.

18. Peno chikhulupiriro chanu chayamba kuchepa, ko mungachite chani?

¹⁸ Peno mabvuto yomwe mudagumana nayo kalekale panango manjeuno yafokesa chikhulupiriro chanu, ayi kubwerera m’mbuyo. Wonani kuti moyu ni mwayi wanu wolimbisa chikhulupiriro chanu. Chitani pemphero ninge yomwe wopfunzira wa Yesu adaichita yakuti: ‘Tithimizireni chikhulupiriro.’ (Luka 17:5) Kuthimizira mwapa, ganizirani vitsanzo vatakambirana munkhani ino. Ninge Miguel na Yurai, mumbaganizire momwe Yahova adakuthandizani kumbuyo. Ninge mwana nkazi wa Vero na Anel, pempherani kwa Yahova mochokera pasi pa moyo makamaka peno munkugumana na bvuto ikulu. Ndipo ninge Geydi, tsimikizani kuti Yahova angaphatisire basa wanthu wa m’banja mwanu na azishamwali wanu kuti akuthandizeni. Mukambabvuma kuti Yahova akuthandizeni pa mabvuto yamunkugumana nayo manjeuno, mungakhale wotsimikiza kuti adzakuthandizeni kutsogolo.

19. Ko Yesu wenze wotsimikiza chani, ndipo ko imwepo mungakhalembo wotsimikizira chani?

¹⁹ Yesu adafotokoza mbali zomwe zidawonesa kuti wopfunzira wake enze na chikhulupiriro chochepa. Koma iye angakaikiralini kuti Yahova adzawathandize pamabvuto yakutsogolo. (Yoh. 14:1; 16:33) Iye wenze wotsimikiza kuti chikhulupiriro chidzawathandize kupulumuka pachisautso chikulu. (Chiv. 7:9, 14) Ko imwepo mudzakhalembo pagulu mweyi? Mothandiziwa na Yahova yemwe ni wabwino mtima, mungadzakhalembo mugulu mweyi mukambagumanirapo mwayi pa bvuto iliyose kuti mulimbise chikhulupiriro chanu.—Aheb. 10:39.