NKHANI YOPFUNZIRA 43
Ayi kufoka!
‘Ayi kuti tileke kuchita vabwino.’—AGAL. 6:9.
NYIMBO NA. 68 Tizifesa Mbewu za Ufumu
VOMWE TIPFUNZIRE *
1. Ndawa chani ndise wokondwa kudziwika kuti Mboni za Yahova?
NI MWAYI ukulu maninge kukhala wa Mboni za Yahova. Isepano tidziwika na dzina ya Mulungu ndipo tinkuchita vinthu mobverana na dzina mwiyi mwa kulalikira na kupfunzisa wanthu. Tichakondwa kuthandiza munthu yemwe ‘anamaganizo yabwino yomuthandiza kudzagumana moyo wosapera’ kuti akhale wokhulupirira. (Mac. 13:48) Tichitambo ninge Yesu yemwe ‘adakondwa mwa mzimu’ pomwe wopfunzira wake adabwera na lipoti yabwino kuchokera mu mboni.—Luka 10:1, 17, 21.
2. Ko tingawonese tani kuti tinkuitengera siriyasi basa yolalikira?
2 Tichaitengera siriyasi basa yathu yolalikira. Mtumi Paulo adalimbikisa Timoteyo kuti: ‘Nthawe zose umbakhale wosamala na vomwe uchachita na kupfunzisa.’ Ndipo adalewa pomwe kuti: ‘Ukambachita vimwivi, udzadzipulumuse wekha na wanthu wokubvera.’ (1 Tim. 4:16) Basa yathu ni yopulumusa wanthu azinji. Tichadekana kukhala tcheru na vomwe tichachita ndawa yakuti ndise nzika za Ufumu wa Mulungu. Nthawe zose tichada kumbachita vinthu volemekeza Yahova na vobverana na ntontholo womwe tichalalikira. (Afil. 1:27) Tingawonese kuti tinkusamala na vomwe tichapfunzisa mwa kukonzekera bwino na kukumbira Yahova kuti atitsogolere tikanati tayenda kukapfunzisa anango.
3. Ko wanthu wose angachite chidwi na ntontholo wa Ufumu? Perekani chitsanzo.
3 Nthawe zinango tingambachite khama kulalikira, koma wanthu wa mudera yathu nkukhala alibe chidwi. Ganizirani vomwe vidachitikira m’bale Georg Lindal yemwe angalalikira yekhayekha ku Islândia m’magole ya 1929 mpakana 1947. Iye adagawira mabukhu yazinji maninge, koma palibe olo m’bodzi yemwe adapfunzirako choonadi. Iye adanemba kuti: ‘Wanthu azinji angaipidwa na ntontholo wabwino ndipo enze alibe chidwi.’ Olo pomwe amishonale wopfunzisiwa bwino adabwera ku Islândia, padapita magole 9 pakalibe aliyese wobatizika. *
4. Ti tingambabve tani vikakhala kuti wanthu ankulamba ntontholo wabwino?
4 Tichabvalini bwino peno wanthu ankubvumalini ntontholo wathu. Ndipo tichabva ninge Paulo yemwe adabva ‘chisoni na kuwawiwa moyo’ ndawa yakuti Ayuda adalamba kubvuma kuti Yesu ni Mesiya wopolomisiwa. (Aro. 9:1-3) Vingachitike kuti imwepo munkuyesesa kuti mumbapfunzise bwino. Ndipo mwakhala munkumupempherera wopfunzira wanu koma iye ankupitalini patsogolo. Ko vimwevi vinkuwonesa kuti muchadekana kuima kupfunzira naye? Ndipo tani peno mukanati mwathandizako munthu kufika pa kubatizika? Ko mungaganize kuti Yahova ankudalisalini khama yanu mu mboni? Mu nkhani ino, tidawire mibvunzo yawiri aya: (1) Nchani chingawonese kuti utumiki wathu unkufamba bwino? (2) Timbadikhire chani tikambalalikira wanthu?
NCHANI CHIGAWONESE KUTI UTUMIKI WATHU UNKUFAMBA BWINO?
5. Ndawa chani basa yomwe tinkuchitira Yahova sikuti nthawe zose ichafamba ninge momwe tingadikhirira?
5 Pakulewa va munthu yemwe ankuchita vofuna va Mulungu, Baibolo ichati: ‘Vochita vake vose vidzamufambire bwino.’ (Sal. 1:3) Koma vimwevi vinkuthandauzalini kuti vose vomwe tinkuchitira Yahova vidzafambe ninge momwe tinkufunira. Ndawa ya uchimo, moyo wathu na wa anango ni ‘wodzala na mabvuto.’ (Yobu 14:1) Wanthu womwe achatizonda angafike pakulambiza basa yathu yolalikira muyi na muyi. (1 Akor. 16:9; 1 Ates. 2:18) Ko Yahova achaiwona tani basa yomwe tinkumuchitira? Wonani mpfundo zinango za m’Baibolo zomwe zingatithandize kugumana m’dawiro wa mbvunzo moyu.
Yahova achakondwa na khama yathu, viribe basa peno tinkulalikira muyi na muyi, pakunemba kalata panango pafoni (Onani ndime 6)
6. Ko Yahova achaiwona tani basa yomwe tinkumuchitira?
6 Yahova achawona khama yathu na kupirira kwathu. M’maso mwa Yahova, basa yathu ichakhala yokwanira kwa iye, viribe basa peno wanthu ankubvuma panango kulamba. Paulo adanemba kuti: ‘Mulungu ni wolungama maninge ndipo angayebwelini basa na chikondi chomwe mudawonesa pa dzina yake mwa kutumikira wochena ndipo munkupitiriza kuwatumikira.’ (Aheb. 6:10) Yahova achawona chikondi na khama yathu podiya kuti wanthu ankubveseralini. Panango vomwe Paulo adanembera Akorinto vingaphatembo basa kwa imwepo. Iye adanemba kuti: ‘Vomwe munkuchita pa basa ya Ambuya vinkuyendalini pachabe,’ viribe basa peno vinthu vinkuchitikalini ninge momwe mungafunira.—1 Akor. 15:58.
7. Ko tinkupfunzira chani pa momwe mtumi Paulo angawonera utumiki wake?
7 Mtumi Paulo wenze m’mishonale wakhama yemwe adakhazikisa mipingu yanyowani m’mathaundi yazinji. Koma pomwe wanthu ambamulewa kuti adziwalini kupfunzisa, iye alibe kudziikhira kumbuyo nkumbatomola wanthu womwe iye wathandiza kuti akhale Akhrisitu. Koma iye adandofotokoza kuti ‘naphata basa izinji.’ (2 Akor. 11:23) Ninge Paulo, dziwani kuti Yahova achawona kuti khama na kupirira kwanu ndivo vodikana maninge.
8. Ko tichadekana kukumbukira chani tikambachita utumiki wathu?
8 Utumiki wathu uchalemekeza Yahova. Yesu adatumiza wopfunzira wake wokwana 70 kuti akalalikire ntontholo wa Ufumu. Ndipo padati amaliza kulalikira, ‘adabwera wokondwa maninge.’ Ko iwo angakondwa ndawa chani? Iwo adati: ‘Olo viwanda vatibvera pakuphatisa basa dzina yanu.’ Koma Yesu adawalangiza kuti: ‘Ayi kukondwa ndawa yakuti viwanda vakubverani, koma ndawa yakuti madzina yanu yanembewa kudzulu.’ (Luka 10:17-20) Yesu angadziwa kuti sikuti nthawe zose vimbawafambire tene mu umboni. Ndipo tinkudziwalini kuti pa wanthu womwe wopfunzira wa Yesu adalalikira, ni angasi womwe adadzakhala wopfunzira. Wopfunzira wa Yesu angadekanalini kukondwa ndawa ya vomwe achita, koma chodekana maninge chenze kudziwa kuti khama yawo yakondweresa Yahova.
9. Mobverana na Agalatiya 6:7-9, ko tidzagumane chani tikapirira pa utumiki wathu?
9 Tikapirira pa utumiki wathu, tidzatambire moyo wosapera. Pomwe tinkuchita khama pakubzala mbewu za Ufumu, tingawonese kuti ‘tinkufesera mzimu’ wa Mulungu mwa kubvuma kuti utitsogolere. Tichadekanalini ‘kufoka’ panango ‘kuneta’ ndawa yakuti Yahova ankupolomisa kudzatipasa moyo wosapera viribe basa peno tiribe kuthandizako munthu kuti adzipereke kwa iye.—Lewengani Agalatiya 6:7-9.
TIMBADIKHIRE CHANI TIKAMBALALIKIRA WANTHU?
10. Ndawa chani wanthu anango achabvuma tikambawalalikira koma anango alamba?
10 Kuti munthu abvesere ntontholo wabwino, vichathemba mtima wake. Yesu adawonesa kuti vimwevi ni shuwadi pakupereka fanizo ya wofesa mbewu yemwe adafesa mbewu zake pa dothi yosiyanasiyana, ndipo ibodzi yomwe idagwera pa dothi yabwino ndiyo yokha idabereka vipaso. (Luka 8:5-8) Yesu adalewa kuti dothi yosiyanasiyana mweyi inkuimira mitima ya wanthu womwe achachita vinthu vosiyanasiyana akabva ‘mawu ya Mulungu.’ (Luka 8:11-15) Ninge wowaza mbewu, tingakwaniselini kuchitisa kuti basa yathu ibale vipaso, ndawa vimwevi vichathemba mtima wa munthu yemwe ankubvesera. Udindo wathu ni kupitiriza kuwaza ntontholo wa Ufumu. Ninge momwe Paulo adafotokozera, ‘aliyese adzatambire mobverana na basa yake,’ osati mobverana na votsatirapo va basa yake.—1 Akor. 3:8.
Podiya kuti Nowa adalalikira kwa magole yazinji, palibe olo m’bodzi yemwe adangena muchingalawa koma wa m’banja yake basi. Podiya venze teno, Nowa adabvera Mulungu! (Onani ndime 11)
11. Ndawa chani tingalewe kuti Nowa wenze ‘mulaliki wachilungamo’? (Onani foto ya pakhava.)
11 Mboni za Yahova zoyambirira zidagumanambo na wanthu wosabvesera. Mwakulinganiza, Nowa wenze ‘mulaliki wachilungamo’ kwa magole yazinji. (2 Pet. 2:5) Ni vosachita kubvunza kuti iye ambadikhira kuti wanthu ambabvume akambawalalikira. Koma Yahova alibe kumuuza vomwe vidzachitike. M’malo mwake, padamuuza kuti amange chingalawa, adandomuuza kuti: ‘Udzangene muchingalawa iwepo, nkazi wako na azikazi wa wana wako.’ (Gen. 6:18) Koma padawona saizi ya chingalawa chadamuuza kuti amange, panango Nowa adazindikira kuti anango adzabveserelini. (Gen. 6:15) Ndipo ndivo vidachitikadi. Palibe olo m’bodzi yemwe adabveserako pomwe Nowa angalalikira. (Gen. 7:7) Ko Yahova adawona kuti Nowa alibe kulalikira mokwana? Ne pang’ono. M’maso mwa Yahova, Nowa wenze wakhama polalikira ndawa yakuti adachita mokhulupirika vose vomwe iye adamuuza.—Gen. 6:22.
12. Ko mneneri Yeremiya adagumana tani chimwemwe pa utumiki wake podiya kuti angatsutsiwa?
12 Mneneri Yeremiya adalalikirambo kwa magole yazinji podiya kuti angatsutsiwa maninge. Iye vidamuwawa maninge padawona kuti ‘wanthu ankumutsutsa na kumuikha mudjeri’ pomwe iye angakwanirisa utumiki wake. (Yer. 20:8, 9) Koma Yeremiya alibe kufoka. Ko nchani chidamuthandiza kupirira mabvuto mwaya na kugumana chimwemwe pa utumiki wake? Iye angaikhira nzeru pa vinthu vofunika maninge. Chakuyamba, ntontholo womwe Yeremiya angalalikira ungapereka ‘tsogolo na chidikhiro.’ (Yer. 29:11) Chachiwiri, Yahova wenze adasalula Yeremiya kuti akalengeze va dzina yake kwa wanthu. (Yer. 15:16) Isembo tichalalikira ntontholo wopasa chidikhiro wanthu ndipo tichadziwika na dzina ya Yahova ninge Mboni zake. Tikambaikhira nzeru pa vinthu vodikana viwiri vimwevi, tidzagumane chimwemwe viribe basa peno wanthu abvume panango alambe.
13. Ko mwapfunzira chani pa fanizo ya Yesu yogumanika pa Maliko 4:26-29?
13 Kukula mwauzimu kuchitika pang’onopang’ono. Yesu adabvekesa vimwevi pomwe adafotokoza va fanizo ya wowaza mbewu yemwe achagona. (Lewengani Maliko 4:26-29.) Iye akawaza mbewu, izo zikula pang’onopang’ono ndipo palibe chomwe iye angachite kuti zikule kamangu. Imwepo mungawonelini kamangu momwe wopfunzira wanu ankukulira ndawa yakuti vimwevi vichitika pang’onopang’ono. Ninge mwaviriri kuti mulimi angakwaniselini kuchichimiza mbewu zake kuti zikule panthawe yomwe iye ankufuna, isembo tingakwaniselini kuchichimiza wopfunzira Baibolo kuti apite patsogolo panthawe yomwe isepano tinkufuna. Ndipomwapa ayi kufoka panango kuchita ulesi mukawona kuti vomwe mungadikhira vinkuchitikalini. Ninge mulimi, tichadekana kukhala wodekha pakupfunzisa wanthu.—Yak. 5:7, 8.
14. Ni chitsanzo chiponi chomwe chinkuwonesa kuti phindu ya basa yathu yolalikira ingawonekere pang’onopang’ono?
14 M’madera yanango, basa yolalikira ichawoneka kuti inkupitalini patsogolo kwa magole yazinji. Wonani chitsanzo cha mulongo Gladys na Ruby wa mimba ibodzi womwe mu 1959 adatumiziwa kukachita upainiya wokhazikika mu thaundi inango yaku Canadá mu provinsiya ya Quebec. * Ndawa ya vomwe wanthu wa tchetchi ya Katolika angachita m’muyi moyu, wanthu ambafunalini kubva ntontholo wabwino. Gladys adalewa kuti: ‘Kwa magole yawiri timbalalikira muyi na muyi kwa maola 8 pantsiku, koma ne m’bodzi yemwe adatibveserako. Anango ambabwera pansuwo kumbachita ninge atetekere basi nkufunga. Koma tiribe kufoka.’ Nkupita kwa nthawe, wanthu adachinja kaganizidwe ndipo adayamba kubvesera. Manje kuthaundi mweyi kunamipingu yatatu.—Yes. 60:22.
15. Ko lemba ya 1 Akorinto 3:6, 7 inkutipfunzisa chani pa basa yathu yopfunzisa wanthu?
15 Basa yopfunzisa wanthu ifuna wanthu azinji. Ninge momwe tidafotokozera kale, mpingu wose ungathandize munthu kuti afikane pakubatizika. (Lewengani 1 Akorinto 3:6, 7.) Mwakulinganiza, m’bale angasiye kapepa panango gazini kwa munthu wachidwi. Koma iye ankuwona kuti akwaniselini kukachitisa ulendo wobwereza ndipo ankukumbira wofalisa munango kuti akachitise. Wofalisa moyu ankuyamba kupfunzira naye Baibolo. Patsogolo pake ankutengambo abale na alongo wosiyanasiyana ku pfunziro mweyi. Wofalisa aliyese ankulimbikisa pfunziro mweyi mu njira zosiyanasiyana. M’bale panango mulongo yemwe wayendako kwa pfunziro mweyi ankuthiriza mbewu ya choonadi. Wofalisa wose mwawa angadzakondwe kuwona kuti iye wafikana pakubatizika.—Yoh. 4:35-38.
16. Ndawa chani mungagumane chimwemwe podiya kuti munkukwanisalini kuchita vizinji ndawa ya nsinkhu panango matenda?
16 Manje tani peno imwepo munkukwanisalini kuchita vizinji ndawa ya nsinkhu panango matenda? Imwepo mungapitirize kukondwa pa basa mweyi yokolola. Wonani vomwe Mpfumu Davide adachita panthawe yomwe iye na masocha yake adapulumusa mabanja yawo kwa Aamaleki. Masocha yokwana 200 yalibe kukwanisa kamenya nkhondo ndawa yoneta, ndipomwapa yadasalirira kuti yanyang’anire katundu. Padati awina, Davide adati masocha yomwe yadayenda na yomwe yadasala yatambire vinthu volingana pa vomwe adatenga kwa Aamaleki. (1 Sam. 30:21-25) Nchibodzibodzimbo na basa yathu yolalikira padziko yose. Tose tikondwera pabodzi peno munthu wachita vose vangakwanise nkuyamba kufamba panjira ya kumoyo wosapera.
17. Ko tinkutembeja Yahova pa chinthu chiponi?
17 Tichatembeja Yahova munjira yomwe iye achawonera basa yathu. Iye adziwa kuti tingakwaniselini kuchichimiza munthu kuti ayambe kumutumikira. Podiya viri tene, iye awona khama yathu na volinga vathu ndipo adzatidalise. Ndipo iye ankutipfunzisa momwe tingagumanire chimwemwe pabasa ikulu mweyi yokolola. (Yoh. 14:12) Tingakhale na chitsimikizo chakuti Mulungu adzapitirize kukondwa nase tikaleka kufoka.
NYIMBO NA. 67 “Lalikira Mawu”
^ ndi. 5 Tikhala wokondwa wanthu akakhala kuti abvesera ntontholo wathu, koma tikwinyirira akakhala kuti alamba. Ko mungachite tani peno munthu yemwe munkupfunzira naye Baibolo ankupitalini patsogolo? Ndipo mungachite chani peno mukanati mwathandizako munthu mpakana kufika pakubatizika? Ko mungaganize kuti palibe chamunkuchita pa basa yopfunzisa wanthu? Munkhani ino tikambirane vomwe tingachite kuti timbakhale wokondwa mu umboni podiya kuti wanthu anango ankulamba.
^ ndi. 14 Kuti mubve mbiri ya moyo wa Gladys, wonani Nsanja ya Olonda ya 1 Setembro 2002, pa msolo wakuti “Sindingasinthe Kanthu!”
