GOLE iliyose, nkhosa zodekana maninge zinkubwezeresewa mumpingu wachikhrisitu. Ndoganizirani ‘chimwemwe chikulu chomwe chichakhalako kudzulu’ munthu akabwerera. (Luka 15:7, 10) Peno imwepo mudabwezeresewa, khalani wotsimikiza kuti Yesu, angelo na Yahova ni wokondwa maninge kukuwonani kuti mwabwerera pomwe mu chonadi. Koma pamunkukonza pomwe ushamwali wanu na Yahova, panamabvuto yomwe mungagumane nayo. Ko ni mabvuto yaponi yamungagumane nayo ndipo nchani chingakuthandizeni?

Azinji akabwerera mumpingu, alimbana na maganizo yodziwona kuti alibe na basa. Panango imwepo mungabvese momwe Mpfumu Davide adabvera. Podiya kuti iye adakhululukiriwa machimo yake, adalewa kuti: ‘Vophonya vangu vaniwandira.’ (Sal. 40:12; 65:3) Munthu akabwerera kwa Yahova, angambadziimbe mulandu ndipo angambachite manyazi kwa magole yazinji. Isabelle adakhala kunja kwa magole yoposha 20. * Iye adati: ‘Vimbanishupa kukhulupirira kuti Yahova adanikhululukiradi.’ Imwepo mukafoka, vingachitise kuti ushamwali wanu na Yahova usokonezeke pomwe. (Miy. 24:10) Ayi kubvuma kuti vimwevi vikuchitikireni.

Anango achita ulesi nkumbawona kuti palibe changachite kuti akonze pomwe ushamwali wawo na Yahova. Padati wabwezeresewa, Antoine adati: ‘Nenze nidayebweratu vose vomwe nidachitira Yahova nikanati nachoka.’ Ndawa yokhala na maganizo ninge mwaya, azinji achazeza kuchita vose vangakwanise pakutumikira Yahova.

Tilinganize kuti munthu munango nyumba yake yadzongeka na chimphepo. Iye angambachite ulesi kuikonza pomwe akaganizira kuti vitenge nthawe ndipo ni basa ikulu. Nchibodzibodzimbo, ushamwali wanu na Yahova ukadzongeka ndawa ya chimo ikulu, mungawone kuti kukonza pomwe ushamwali wanu na Yahova ni basa ikulu. Koma thandizo ilipo.

 Yahova ankutichemera kuti: ‘Bwerani manje wanthu imwe, naboni tikambirane.’ (Yes. 1:18) Imwepo mwakhala munkuyesesa kale ‘kukambirana naye.’ Yahova achakukondani ndawa ya khama yanu yomwe munkuchita. Ndoganizani: Pakuti imwepo mudabwerera kwa Yahova, iye angakuphatiseni basa ninge chitsanzo chowonesera kuti Satana ni wabodza.—Miy. 27:11.

Pakuchita vimwevi, mudzakhale kuti munkufenderera kwa Yahova ndipo iye ankupolomisa kuti adzakufendererenimbo. (Yak. 4:8) Podiya kuti wanthu akuwoneni kuti mwabwerera kwa Yahova, vichadekanalini kundomalira mwapo. Imwepo muchadekana kulimbisa ushamwali wanu na Mulungu yemwe ni Ababa wanu Yahova. Ko mungachite tani vimwevi?

Yesesani kukhala na volinga. Dziwani kuti uzimu wanu ungakhale wolimba mukambadziwa va Yahova na mapolomisi yake yakutsogolo. Koma manje muchadekana kukhala soti na ndandanda yabwino yauzimu. Mwakulinganiza, muchadekana kumbalalikira nthawe zose, ayi kumbashota kumisonkhano na kumbacheza na abale na alongo wanu. Onankoni volinga vomwe mungakhale navo.

Mumbayankhule na Yahova nthawe zose. Ababa wanu achabvesa kuti mukambadziimba maninge mulandu, vingakhale voshupa kuti muchite pemphero. (Aro. 8:26) Koma podiya viri tene, ‘pitirizani kupemphera’ kwa iye ndipo mumbamuuze Yahova kuti munkufuna kukhala naye paushamwali wolimba. (Aro. 12:12) Andrej ankukumbukira kuti: ‘Nimbadziimba mulandu maninge. Koma nikapemphera, maganizo mwaya yambanichokera ndipo nimbakhala na ntendere wa m’maganizo.’ Peno imwepo munkudziwalini kuti mungalewe chani mpemphero, ganizirani va mapemphero ya Mpfumu Davide yemwe wenze adalapa yogumanika pa Masalimo 51 na 65.

Mbapfunzirani Baibolo nthawe zose. Vimwevi vidzachitise kuti mukhale na chikhulupiriro cholimba ndipo chikondi chanu kwa Yahova chidzakule. (Sal. 19:7-11) Felipe adalewa kuti: ‘Kusaikha ndandanda yauzimu pamalo yoyamba, kudachitisa kuti nifoke na kuchita vinthu vokalipisa Yahova. Ninkufunalini kuti vimwevi vidzanichitikire pomwe. Ndipomwapa nidasaina kuti pasambagumanike chinthu chonikangisa kupfunzira panekha.’ Imwepo mungachitembo chibodzibodzi, peno imwepo munkufuna malangizo ya momwe mungagumanire nkhani zomwe mungapfunzire pamwekha, tani kubvunza shamwali wanu wolimba mwauzimu kuti akuthandizeni?

Limbisani pomwe ushamwali wanu na abale na alongo wanu. Anango womwe adabwerera mumpingu achaganiza kuti anzawo ankukondwalini nawo. Larissa adati: ‘Nimbachita manyazi maninge. Nimbawona kuti nidakalipisa mpingu wose. Maganizo mwaya nidakhala nayo kwa nthawe itali.’ Khalani wotsimikiza kuti akulu na Akhrisitu anango wolimba mwauzimu ni wokonzeka kuti akuthandizeni kukonza soti ushamwali wanu na Yahova. (Onani bokosi yakuti: “ Ko akulu angachite chani?”) Iwo ni wokondwa ndawa yakuti mudabwerera ndipo ankufuna kuti vinthu vikufambireni bwino.—Miy. 17:17.

Ko nchani chingakuthandizeni muti mukhale pomwe pa ushamwali na mpingu? Mumbagumanike pamisonkhano na kulalikira nawo nthawe zose. Ko vimwevi vidzakuthandizeni tani? Felix adati: ‘Mpingu wose ungadikhira kale kuti nibwerere. Nidadzibva kuti natambiriwa. Iwo adanithandiza kuti nimbadzibve kuti nabwerera pomwe m’banja yauzimu, kudzibva kuti Yahova adanikhululukira na kunithandiza kupita patsogolo.’—Wonani bokosi yakuti: “ Ko imwepo mungachite chani?”

Satana apitirize kukubwereserani ‘mabvuto’ yazinji kuti akukangiseni kukonza pomwe ushamwali wanu na Yahova. (Luka 4:13) Khalani wotsimikiza kupitiriza kukonza pomwe nyumba yanu yauzimu yomwe ni ushamwali wanu na Yahova.

Pakulewa va nkhosa zake, Yahova ankupolomisa kuti: ‘Nkhosa zosokera nidzazifagefage, zomwazika nidzazibweze, yothyoka mwendo nidzaimange ndipo yodwala nidzailimbise.’ (Ezek. 34:16) Yahova wathandiza wanthu azinji kuti akonze pomwe ushamwali wawo na iye. Tsimikizani kuti Yahova ankufuna kukuthandizani kuti ushamwali wanu na iye upitirize kukhala wolimba.