1. Ndawa chani wanthu azinji asokonezeka?

PANA vipembedzo vizinji ntsiku zino vomwe vilewa kuti ni vachikhrisitu ndipo vinkutumikira Mulungu munjira yomwe iye achada. Ndipomwapa ni vosadabwisa kuwona kuti wanthu azinji asokonezeka. Iwo abvunza kuti: ‘Ko panachipembedzo chibodzi chaicho, panango vose vikondweresa Mulungu?’ Isepano wa Mboni za Yahova ndise wotsimikiza kuti vomwe tichapfunzisa ni choonadi nakuti njira yomwe tinkutumikirira Mulungu inkumukondweresa iye. Ko nchani chomwe chinkutitsimikizira? Naboni tiwone.

2. Mobverana na 1 Atesalonika 1:5, ndawa chani mtumi Paulo wenze wotsimikiza kuti wachigumana choonadi?

² Mtumi Paulo wenze wotsimikiza mwamphanvu kuti wachigumana choonadi. (Lewengani 1 Atesalonika 1:5.) Sikuti iye ambatsimikiza ndawa ya kundokomedzewa. Paulo ambapfunzira mwakhama Mawu ya Mulungu. Iye ambakhulupirira kuti ‘Malemba yose ni youziriwa na Mulungu.’ (2 Tim. 3:16) Ko iye adapfunzira chani? M’mabukhu yomwe iye adanemba, Paulo adawonesa kuti angatsimikizira kuti Yesu ni Mesiya podiya kuti atsogoleri wachipembedzo chachiyuda ambatsimikiziralini vimwevi. Atsogoleri wachinyengo mwawa ambauza wanthu kuti vomwe angapfunzisa pankhani ya Mulungu ni vazedi, koma vochita vawo venze voipa. (Tito 1:16) Koma Paulo wenze wosiyana na wanthu mwawa. Iye ambachitalini kusalula m’Mawu ya Mulungu kuti ivi nikhulupirire, ivi neye. Iye wenze wokonzeka kupfunzisa na kuchita ‘chifuniro cha Mulungu.’—Mac. 20:27.

3. Kuti titsimikizire kuti tachigumana choonadi, ko tichadekana kugumana midawiro ya mibvunzo yathu yose? (Onani bokosi yakuti: “ Basa na maganizo ya Yahova ‘ni vizinji na vosawerengeka.’”)

 ³ Anango achaganiza kuti, chipembedzo chaicho chichadekana kukhala chokonzeka kudawira mbvunzo uliwose podiya kuti udawiriwalini sitiriti m’Baibolo. Koma vimwevi nivobveka? Onani chitsanzo cha Paulo. Iye adalimbikisa wokhulupirira anzake kuti ‘ambatsimikizire vinthu vose,’ koma iye adalewa pomwe kuti penze vinthu vizinji vomwe ambavibvesesalini. (1 Ates. 5:21) Iye adanemba kuti: ‘Tinkudziwa moperewera,’ ndipo adalewa pomwe kuti ‘nthawe ino tinkukwanisalini kuwona bwinobwino ndawa tinkuphatisa basa girazi yosawoneka bwino.’ (1 Akor. 13:9, 12) Paulo angakwanisalini kudziwa vose, ndipo isembo tingakwaniselini. Koma Paulo angadziwa bwinobwino va cholinga cha Mulungu. Iye wenze wotsimikiza na moyo wose kuti wachigumana choonadi.

4. Ko tingachite chani kuti timbatsimikize maninge kuti tachigumana choonadi, ndipo tikambirane chani pankhani ya Akhrisitu chaiwo?

⁴ Chinthu chibodzi chomwe chingatitsimikizire kuti tachigumana choonadi, ni kulinganiza njira yomwe Yesu adasiya ya momwe tingatumikirire Mulungu na vomwe Mboni za Yahova zinkuchita ntsiku zino. Munkhani ino, tiwone kuti Akhrisitu chaiwo (1) apewa kutumikira mafano, (2) alemekeza dzina ya Yahova (3) akonda choonadi ndipo (4) akondana maninge.

5. Tinkupfunzira chani kwa Yesu pankhani ya njira chaiyo yotumikirira Mulungu, ndipo tingaphatise tani basa vomwe iye adapfunzisa?

⁵ Ndawa ya kukonda kwake maninge Mulungu, Yesu angatumikira Yahova yekha basi, pewenze kudzulu na pomwe adabwera padziko yapasi pano. (Luka 4:8) Iye adapfunzisa  wopfunzira wake kuti ambachitembo chibodzibodzi. Yesu olo wopfunzira wake alibe kuphatisira basa mafano pakutumikira Mulungu. Pakuti Mulungu ni mzimu, palibe chomwe munthu angakonze chomwe chingakhale na ulemerero woimira Yahova. (Yes. 46:5) Koma tani pankhani yokonza mafano yoimira wanthu woyera mtima basi nkumbayapempherera? Lamulo yoyamba pa malamulo khumi, Yahova adalewa kuti: ‘Ayi kudzikonzera chifaniziro chilichose cha chinthu cha kudzulu panango cha padziko yapasi . . . Ayi kumbavigwadira.’ (Eks. 20:4, 5) Mawu mwaya ni yobveka bwino kwa wanthu womwe achada kukondweresa Mulungu.

6. Ko Mboni za Yahova zinkutewedzera chitsanzo chiponi pakutumikira Yahova ntsiku zino?

⁶ Wanthu wopfunzira mbiri yakale, alewa kuti Akhrisitu woyambirira angandotumikira Mulungu yekha basi. Mwakulinganiza, bukhu inango ilewa kuti Akhrisitu woyambirira ‘ambawona kuti vilirini bwino’ kuikha mafano m’malo yotumikirira Mulungu. Ntsiku zino, Mboni za Yahova zinkutewedzera chitsanzo cha Akhrisitu woyambirira mwawa. Tipempheralini kwa mafano yoimira ‘wanthu woyera mtima,’ kwa angelo olo kwa Yesu. Tigwadiralini bandera panango chifaniziro chilichose choimira dziko yathu. Vilibe basa vomwe wanthu angatiwuze kuti tichite, ndise wotsimikiza kubvera mawu ya Yesu yakuti: ‘Ni Yahova Mulungu wako yekha yemwe uchadekana kumutumikira.’—Mat. 4:10.

7. Ko pali kusiyana kuponi pakati pa Mboni za Yahova na matchetchi yanango?

⁷ Wanthu azinji achakonda kutewedzera azitsogoleri wodziwika. Azinji achawakonda monyanyira mpakana andokhala ninge mulungu wawo. Wanthu achayenda ku matchetchi yawo, kugula mabukhu yawo ndipo achapereka kobiri zizinji zomwe zichitisa kuti azibusa mwawa alemere. Iwo achakhulupirira chilichose chomwe azitsogoleri mwawa angafotokoze. Peno iwo adabwisiwa na wanthu mwawa womwe achapfunzisa vabodza, kuli tani achiwona Yesu ankuwapfunzisa? Mosiyana na wanthu mwawa, atumiki chaiwo wa Mulungu atewedzeralini wanthu. Podiya kuti tichalemekeza wanthu womwe ankutsogolera, tichatewedza malangizo ya Yesu yobveka bwino yakuti: ‘Mose ndimwe abale.’ (Mat. 23:8-10) Tichagwadiralini munthu, peno akhale mtsogoleri wachipembedzo panango wa ndale. Ndipo tithandiziralini pankhani zandale. M’malo mwake tichapitiriza kukhala wosiyana na dziko. Vimwevi vitichitisa kukhala wosiyana maninge na matchetchi yosiyanasiyana yomwe yachati ni yachikhrisitu.—Yoh. 18:36.

8. Ko tinkudziwa tani kuti Yahova achada kuti dzina yake ilemekezewe nakuti idziwike kwa wose?

⁸ Panthawe inango, Yesu adapemphera kuti: ‘Ababa, lemekezani dzina yanu.’ Yahova adadawira pemphero mweyi mwa kuyankhula mawu yokuwa kuchokera kudzulu, yopolomisa kuti adzalemekeze dzina yake. (Yoh. 12:28) Pa utumiki wake, Yesu adalemekeza dzina ya Ababa wake. (Yoh. 17:26) Ndipomwapa, nivobveka kuti Akhrisitu chaiwo ambawone kuti ni mwayi wawo kulemekeza dzina ya Mulungu na kuidziwikisa kwa wanthu anango.

9. Ko Akhrisitu woyambirira adawonesa tani kuti ambalemekeza dzina ya Mulungu?

⁹ Mu nthawe yoyambirira, paudandoti mpingu wachikhrisitu wakhazikisiwa, Yahova ‘adacheukira wanthu wodziwika na dzina yake.’ (Mac. 15:14) Akhrisitu woyambirira mwawa enze wokondwa kuphatisa basa dzina  ya Mulungu na kuidziwikisa kwa wanthu anango. Iwo angaphatisa basa dzina ya Mulungu pakulalikira na mu vonemba vawo. * Vomwe iwo ambachita vimbawoneseratu kuti ambafuna kudziwika na dzina ya Mulungu.—Mac. 2:14, 21.

10. Ko nchani chinkutsimikizira kuti Mboni za Yahova ni wanthu wodziwika na dzina ya Yahova?

¹⁰ Ko Mboni za Yahova ni wanthu wodziwika na dzina ya Yahova? Ganizirani vochitika ivi: Ntsiku zino, atsogoleri wavipembedzo achita vose vangakwanise kuti asokoneze dzina ya Mulungu. Iwo adachosa dzina mwiyi m’ma Baibolo yawo. Mpaka adafika pakulambiza kuti osati imbaphatisiwe basa m’matchetchi yawo. * Ko alipo angatsutse kuti Mboni za Yahova ndizo zokha zinkulemekeza dzina ya Yahova na kuidziwikisa? Tichadziwikisa dzina ya Mulungu mweyi kuposha gulu iliyose yachipembedzo. Vimwevi vinkuchita kuwoneseratu kuti tinkuchita vinthu mobverana na dzina yathu yakuti Mboni za Yahova. (Yes. 43:10-12) Baibulo la dziko Latsopano la Malemba Opatulika yadindiwa makopiya yoposha 240 midyau, yomwe inadzina ya Yahova m’malo yomwe wotsumbudzulira anango adachosa. Tichakonza mabukhu yofotokoza va dzina ya Yahova muviseweredwe voposha 1.000.

11. Ko Akhrisitu woyambirira adawonesa tani kuti ambakonda choonadi?

¹¹ Yesu angakonda choonadi cholewa va Mulungu na volinga vake. Yesu ambachita vinthu vobverana na choonadi ndipo ambauzambo wanthu anango. (Yoh. 18:37) Wopfunzira chaiwo wa Yesu ambakondambo maninge choonadi. (Yoh. 4:23, 24) Ndipo mtumi Petulo adati chipembedzo chachikhrisitu ni ‘njira ya choonadi.’ (2 Pet. 2:2) Ndawa ya kukonda maninge choonadi, adalamba kutengera miyambo, chikhalidwe na nzeru za atsogoleri wachipembedzo zomwe ni zosabverana na choonadi. (Akol. 2:8) Ntsiku zinombo, Akhrisitu chaiwo achayesesa ‘kufamba mu choonadi’ mwa kuyesesa kuti vikhulupiriro na vochita pamoyo wawo vimbabverane na Mawu ya Yahova.—3 Yoh. 3, 4.

12. Ko nchani chichachitika peno womwe ankutsogolera awona kuti pankufunika kubvekesa mpfundo inango, ndipo ndawa chani iwo achita vimwivi?

¹² Wanthu wa Mulungu ntsiku zino adziyesalini kuti achabvesesa vinthu vose bwinobwino pankhani ya choonadi. Nthawe zinango iwo achaphonyesa vinthu ninge pankhani ya kabvesesedwe na momwe gulu ichadekana kufambira. Vimwevi vitidabwisalini. Ndawa Malemba yafotokoza kuti wanthu adzabvese mawu yake panthawe yabwino. (Akol. 1:9, 10) Yahova achaulula choonadi pang’onopang’ono, ndipo tichadekana kukhala woleza moyo pomwe luju a choonadi inkugakiragakira. (Miy. 4:18) Womwe achatsogolera akawona kuti pankufunika kuchinja pa kabvesesedwe kathu, iwo azezalini kuchita vimwevi. Matchetchi yazinji yachachinja vinthu na cholinga chakuti akondwerese wanthu wawo panango dziko. Koma gulu ya Yahova ichinja vinthu na cholinga chakuti tikhale pafupi maninge na Mulungu na kutewedza chitsanzo cha Yesu cha momwe tingatumikirire Mulungu. (Yak. 4:4) Peno tachinja vinthu, sikuti tichita vimwivi ndawa yakuti maganizo ya wanthu yachinja mudziko, koma ndawa yakuti tinkubvesa bwinobwino Malemba. Tichakonda choonadi.—1 Ates. 2:3, 4.

13. Ni khalidwe yodikana iponi yomwe Akhrisitu chaiwo afunika kuwonesa, ndipo nchani chinkutsimikizira kuti Mboni za Yahova ndizo zinkuiwonesa ntsiku zino?

¹³ Pamakhalidwe yose yomwe Akhrisitu woyambirira enze nayo, iwo ambadziwika maninge na chikondi. Yesu adati: ‘Wose adzadziwe kuti ndimwe wopfunzira wangu peno munkukondana.’ (Yoh. 13:34, 35) Ntsiku zino, Mboni za Yahova zichakondana ndipo zichabverana. Ndise wosiyana na gulu iliyose yachipembedzo ndawa yakuti, podiya kuti ndise wochokera m’madziko na vikhalidwe vosiyanasiyana, ndise banja ibodzi. Tichawona chikondi chaicho mwechi tikakhala pamisonkhano ya mpingu, yadera na yachigawo. Vimwivi vitichitisa kutsimikiza kuti Yahova achaibvuma njira yomwe tinkumutumikirira.

14. Mobverana na Akolose 3:12-14, ni njira yodekana iponi yomwe tingawonesere chikondi kwa anzathu?

¹⁴ Malemba yachatilimbikisa kuti ‘timbakondane maninge.’ (1 Pet. 4:8) Njira ibodzi yowonesera chikondi mwichi ni kukhululukira anango na kuyebwa vomwe atiphonyera. Tichadekana kuyesesa kukhala wopasa na kuwonesa khalidwe yabwino olo kwa wale womwe adatichitira vinthu voipa. (Lewengani Akolose 3:12-14.) Tikambawonesa chikondi, vichatsimikizira kuti ndisedi Akhrisitu chaiwo.

15. Ko titewedzera Akhrisitu woyambirira munjira zinango ziponi?

¹⁵ Tichatewedza chitsanzo cha Akhrisitu  woyambirira mu njira soti zinango. Mwakulinganiza, mugulu yathu tirimbo na wonyang’anira madera, akulu na atumiki wothandiza ninge mwevenzere munthawe yakale. (Afil. 1:1; Tito 1:5) Titewedzera Akhrisitu wakale pankhani ya momwe tichawonera nkhani ya kugonana, ukwati, vomwe Baibolo ichanena pankhani ya magazi na kuteteza mpingu mwa kupewa kubverana na wanthu wosalapa mumpingu.—Mac. 15:28, 29; 1 Akor. 5:11-13; 6:9, 10; Aheb. 13:4.

16. Ko tinkupfunzira chani na vomwe vinkugumanika pa Aefeso 4:4-6?

¹⁶ Yesu adati wanthu anango adzanene kuti ni wopfunzira wake, koma adzakhalelini wopfunzira chaiwo. (Mat. 7:21-23) Malemba yadachenjezeratu kuti muntsiku zomalizira, wanthu ‘ambadzawoneke ninge kuti ankutumikira Mulungu.’ (2 Tim. 3:1, 5) Koma Baibolo ichatiuza kuti pana ‘chikhulupiriro chibodzi’ chomwe Mulungu achabverana nacho.—Lewengani Aefeso 4:4-6.

17. Ko ni mbani ankutewedzera Yesu ntsiku zino na kumbakhulupirira vinthu volingana?

¹⁷ Ko ni mbani womwe ankukhulupirira vinthu volingana ntsiku zino? Takambirana kale vizindikiro. Takambirana momwe tingatumikirire Mulungu pakutewedzera chitsanzo chomwe Yesu adatisiyira na cha Akhrisitu woyambirira. M’dawiro wa mbvunzo moyu ni wakuti ni Mboni za Yahova basi. Ni mwayi ukulu kukhala mugulu ya Mboni za Yahova, kudziwa bwino Yahova na volinga vake. Naboni tipitirize kuphata choonadi na chitsimikizo champhanvu.