NKHANI YOPFUNZIRA 38
Mbakondani maninge Yahova na abale na alongo wanu
‘Ine ninkukwera kwa Ababa wangu na kwa Ababa wanu.’—YOH. 20:17.
NYIMBO NA. 3 Ndinu Mphamvu Zathu, Chiyembekezo Chathu Komanso Timakudalirani
VOMWE TIPFUNZIRE *
1. Ko atumiki wokhulupirika wa Yahova achawona kuti Yahova ni mbani wawo?
BANJA ya atumiki wa Yahova inkuphatanidzapo Yesu, yemwe ni ‘woyamba kubadwa mu chilengedwe chose’ na mamidyau ya angelo. (Akol. 1:15; Sal. 103:20) Pomwe Yesu wenze padziko yapasi, adathandiza wanthu kuti ambawone kuti Yahova ni Baba wawo. Pakuyankhula na wopfunzira wake, Yesu adati Yahova ni ‘Baba wangu ndipo ni Baba wanu.’ (Yoh. 20:17) Ndipo pomwe ise tidapereka moyo wathu kwa Yahova na kubatiziwa, tidadzakhala mbali ya banja yake yachikondi ya abale na alongo.—Maliko 10:29, 30.
2. Ko tipfunzire chani munkhani ino?
2 Anango achashupika kuwona kuti Yahova ni Baba wachikondi. Panango anango ankudziwalini momwe angawonesere chikondi kwa abale na alongo. Munkhani ino, tipfunzire momwe Yesu ankutithandizira kuwona Yahova ninge Baba wachikondi na momwe tingakhalire naye pafupi. Ndipo tiwone njira zomwe tingatewedzerere Yahova pa momwe tichachitira vinthu na abale na alongo wathu.
YAHOVA ACHADA KUTI MUKHALE NAYE PAFUPI
3. Ko pemphero yachitsanzo itithandiza tani kukhala pafupi na Yahova?
3 Yahova ni Baba wachikondi. Yesu achada kuti timbawone Yahova ninge munthu wosashupa kumufenderera, osati ninge munthu waudindo woshupa kufikika. Vimwevi vidawonekera panthawe yomwe Yesu angapfunzisa wopfunzira wake kupemphera. Mu pemphero yake yachitsanzo mugumanika mawu yakuti: ‘Ababa wathu.’ (Mat. 6:9) Yesu adakafuna adakatiuza kuti timbachemere Yahova kuti ‘Nkulu maninge,’ ‘Mulengi’ panango kuti ‘Mpfumu yamuyaya.’ Viri teno ndawa Malemba yachachemera Yahova na madzina yaudindo mwaya. (Gen. 49:25; Yes. 40:28; 1 Tim. 1:17) Koma Yesu adatipfunzisa kuti timbachemere Yahova kuti ‘Ababa.’
4. Ko tichadziwa tani kuti Yahova achada kuti tikhale naye pafupi?
4 Ko imwepo vikushupani kuwona kuti Yahova ni Baba wachikondi? Azinji ise vitishupa. Peno tidakulira mu banja ilibe chikondi vingatishupe kubvesa kuti Yahova achatikonda. Koma ni volimbikisa kudziwa kuti Yahova achabvesa momwe tinkubvera. Iye achada kukhala nase pafupi. Ndipomwapa m’Mawu yake ankutilimbikisa kuti: ‘Fendererani Mulungu, ndipo iye adzakufendererenimbo.’ (Yak. 4:8) Yahova achatikonda ndipo ni Baba wabwino kuposha baba aliyese watingakhale naye.
5. Mobverana na Luka 10:22, ko Yesu angatithandize tani kukhala pafupi na Yahova?
5 Yesu angatithandize kukhala pafupi na Yahova. Iye achamudziwa bwino Yahova ndipo adawonesa makhalidwe yake ndendende, mpaka iye adalewa kuti: ‘Yemwe wawona ine, wawonambo Ababa.’ (Yoh. 14:9) Ninge nkulu wathu, Yesu adatipfunzisa momwe tingalemekezere na kubvera Ababa wathu, momwe tingapewere kuchita vinthu vomukalipisa na momwe tingakhalire wobvumizika kwa iye. Ndipo vochita va Yesu ali padziko yapasi vidawoneseratu kuti Yahova ni wabwino ndipo atikonda maninge. (Lewengani Luka 10:22.) Naboni tikambirane vitsanzo vinango.
Baba wachikondi Yahova adalimbikisa Mwana wake pakutumiza mngelo (Onani ndime 6) *
6. Perekani vitsanzo va momwe Yahova adabveserera Yesu.
6 Yahova achabvesera wana wake. Onani momwe Yahova adabveserera Mwana wake woyamba kubadwa. Yahova adabva mapemphero yazinji yochitiwa na Mwana wake ali padziko yapasi. (Luka 5:16) Iye adabva Yesu ankupemphera kuti asalule bwino pa nkhani zikuluzikulu, ninge kusalula wopfunzira wake 12. (Luka 6:12, 13) Komasoti Yahova adabva Yesu pomwe angapemphera anankhawa. Akalibe wafa, Yesu adapemphera mochokera pasi pa moyo kwa Ababa wake pa chiyeso chomwe wenze adasala pang’ono kugumana nacho. Yahova alibe kundomubva Yesu ankupemphera, koma adafika pakutumiza mngelo kuti alimbikise Mwana wake wapamoyo.—Luka 22:41-44.
7. Ko tichabva tani tikadziwa kuti Yahova achabvesera mapemphero yathu?
7 Ntsiku zino, Yahova ankupitiriza kubvesera mapemphero ya atumiki wake, ndipo achawadawira panthawe yabwino komasoti munjira yabwino. (Sal. 116:1, 2) Onani chitsanzo cha mulongo munango wa ku Índia. Iye wenze na nkhawa ikulu ndipo adamufotokozera Yahova mpemphero. Iye adanemba kuti: ‘Pologalama ya JW Broadcasting® ya Maio 2019 yomwe idafotokoza momwe tingapiririre nkhawa, idafika panthawe yabwino kwa ine. Moyu wenze mdawiro wa mapemphero yangu.’
8. Ni njira ziponi zomwe Yahova adawonesera chikondi kwa Yesu?
8 Yahova achatikonda ndipo achatisamalira, ninga momwe angakondera na kusamalira Yesu pakuchita utumiki wake padziko yapasi. (Yoh. 5:20) Iye adathandiza Yesu kuti akhale na chikhulupiriro cholimba, adamulimbikisa pewenze na nkhawa ndipo ambawonesesa kuti anavose vofunika kuti akhale na moyo. Ndipo Yahova adauza Mwana wake kuti amukonda ndipo ankukondwera naye. (Mat. 3:16, 17) Ndawa yakuti nthawe zose iye ambathemba Ababa wake wakudzulu, Yesu alibe kudzibvako kuti ali yekha.—Yoh. 8:16.
9. Nchani chomwe chinkutsimikizira kuti Yahova achatikondadi?
9 Ninge Yesu, isembo tawona momwe Yahova watiwonesera chikondi munjira zosiyanasiyana. Ganizani pang’ono: Yahova adatifendeza kwa iye ndipo watipasa chikondi mwa kutipasa banja yauzimu kuti tikhale wokondwa na kutilimbikisa tikakhala na nkhawa. (Yoh. 6:44) Yahova watipasa pomwe chakudya chizinji chauzimu ndipo ankutisamalira pa vosowa vathu vakuthupi va ntsiku na ntsiku. (Mat. 6:31, 32) Tikambaganizira vomwe Yahova watichitira, chikondimbo chathu kwa iye chikula.
CHITIRANI VINTHU BANJA YANU YAUZIMU NINGE MOMWE YAHOVA ACHACHITIRA
10. Ko tingapfunzire chani munjira yomwe Yahova achachitira vinthu na bale na alongo wathu?
10 Yahova achakonda abale na alongo wathu. Koma kwa ise vingakhale voshupa nthawe zinango kuwawonesa chikondi. Vitishupa teneuyu ndawa yakuti tidachokera muvikhalidwe vosiyanasiyana ndipo tidakula mosiyana. Ndipo tose tiphonyesa, vomwe vichitisa kuti anango abve kuwawa. Koma tingakwanise kumbakonda maninge banja yathu yauzimu. Tingachite tani? Mwa kutewedzera Ababa wathu pakuwonesa chikondi kwa abale na alongo wathu. (Aef. 5:1, 2; 1 Yoh. 4:19) Naboni tiwone vomwe tingapfunzire pa chitsanzo cha Yahova.
11. Ko Yesu adawonesa tani ‘chifundo chikulu’ cha Yahova?
11 Yahova achawonesa ‘chifundo chikulu.’ (Luka 1:78) Munthu wachifundo vimuwawa akambawona wanthu akubonera ndipo achawona njira zomwe angathandizire. Munjira yomwe Yesu angachitira vinthu na wanthu, vidawoneseratu momwe Yahova achabverambo. (Yoh. 5:19) Panthawe inango Yesu padawona gulu ikulu ya wanthu, ‘adawabvera chifundo, ndawa enze okuluzika na wotaika ninge nkhosa ziribe nyakabusa.’ (Mat. 9:36) Chifundo chidamuchitisa Yesu kuchita vizinji osati kundobva chabe. Iye adapolesa wodwala ndipo adakhazika moyo pasi wanthu ‘wophata basa yonetesa.’—Mat. 11:28-30; 14:14.
Tewedzerani Yahova mwa kukhala wachifundo chikulu na wopasa kwa abale na alongo wanu (Onani ndime 12-14) *
12. Perekani chitsanzo cha momwe tingawonesere chifundo.
12 Kuti tikwanise kuwonesa chifundo kwa abale na alongo wathu, tichadekana kudziwa mabvuto yomwe ankugumana nayo. Mwakulinganiza, vingachitike kuti mulongo ankugumana na bvuto ya umoyo. Panango iye akhaliralini kumbandoyankhula va bvuto yake, koma angatembeje pachigumanika munthu wobwera kudzamuthandiza. Ko iye ankukwanisa kusamalira vosowa vakuthupi va banja yake? Ko tingamuthandizeko mwa kumuphikira chakudya panango kuchenesa pamuyi? Panango vingachitike kuti m’bale adaluza basa. Ko tingamuthandizeko na kakobiri kufikira nthawe yomwe adzagumane basa inango?
13-14. Ko tingakhale tani wopasa ninge Yahova?
13 Yahova ni wopasa. (Mat. 5:45) Tichadekanalini kudikhira kuti abale na alongo wathu achite kukumbira thandizo ndiye kuti tiwonese chifundo. Ninge Yahova, isepano tingayambe kuchita vimwevi. Iye achachitisa kuti dzuwa igake ntsiku iliyose podiya kuti tilibe kumukumbira. Ndipo dzuwa ichachita vizinji kwa wanthu wose, mpakana kwa wanthu womwe achatembejalini. Ko muchatsimikizalini kuti pa vomwe Yahova achatipasa, achawonesa chikondi kwa ise? Tichamukonda Yahova ndawa yakuti iye ni wabwino na wopasa.
14 Pakutewedzera Ababa wawo wakudzulu, abale na alongo azinji achawonesa khalidwe ya kupasa. Mwakulinganiza, mu 2013, chivomezi cha Super Tufão Haiyan chidadzonga ku Filipinas. Abale na alongo wathu azinji adaluza manyumba na vinthu vawo. Koma banja yawo yauzimu yochokera padziko yose yapasi idawathandiza mobverana. Azinji adapereka kobiri ndipo anango adadzipereka nkukonza zodzongeka. Vimwevi vidachitisa kuti pakonzewe na kumangiwa nyumba zoposha 750 gole ikalibe yamala. Munthawe ya nthenda ya koronaviru, Mboni za Yahova zidaphata basa modzipereka pothandiza abale na alongo wawo. Tikambathandiza banja yathu yauzimu mwakankulumize tichakhala tinkuwonesa chikondi kwa iwo.
15-16. Mobverana na Luka 6:36, ko ninjira yodekana iponi yomwe tingatewedzerere Ababa wathu wakudzulu?
15 Yahova ni wachifundo na wokhululuka. (Lewengani Luka 6:36.) Nthawe zose tichawona chifundo cha Ababa wathu wakudzulu. (Sal. 103:10-14) Wopfunzira wa Yesu wenze alibe ungwiro, koma podiya venze tene Yesu ambawakomera mtima na kuwakhululukira. Mpakana iye adabvuma kupereka moyo wake kuti machimo yathu yakhululukiriwe. (1 Yoh. 2:1, 2) Chifundo na kukhululuka kwa Yahova na Yesu vitifendeza kwa iwo.
16 Chikondi chathu na banja yathu yauzimu chichakhala cholimba tikakhala kuti ‘tinkukhululukirana na moyo wose.’ (Aef. 4:32) Kunena shuwa, kukhululukira ni koshupa nthawe zinango, koma tichadekana kuchita khama. Mulongo munango adafotokoza kuti nkhani ya mu Nsanja ya Olonda yakuti “Muzikhululukirana Ndi Mtima wonse” idamuthandiza kuchinja. * Iye adanemba kuti: ‘Kupfunzira msolo moyu kudanithandiza kuti nimbakwanise kukhululukira anango. Pfunziro mweyi idafotokoza kuti ukamukhululukira munthu, vichathandauzalini kuti unkubverana na chophonya chake panango kuchepesa nkhani. Koma kukhululuka kuchathandauza kuvisiya, nkuleka kukhala na chakumoyo na kupitiriza kukhala na ntendere wamuntima.’ Tikambakhululukira na moyo wose abale na alongo wathu, tichakhala tinkuwonesa chikondi kwa iwo ndipo tichatewedzera Ababa wathu, Yahova.
KHALANI WOTEMBEJA POKHALA MU BANJA YA YAHOVA
Wana na akuluakulu angawonese chikondi kwa abale na alongo wawo (Onani ndime 17) *
17. Mobverana na Mateyu 5:16, ko tingalemekeze tani Ababa wathu wakudzulu?
17 Ni mwayi ukulu kukhala m’banja yachikondi ya padziko yose yapasi. Tichada kuti azinji abwere m’banja mweyi nakuti titumikire pabodzi Mulungu wathu. Ndipomwapa tichadekana kukhala wosamala pakuleka kubvuma kuchita chilichose chomwe chingachitise kuti wanthu wa Mulungu panango Yahova agumaniriwe chifukwa. Tiyesese kuchita virivose vomwe vingachitise kuti wanthu akhale na chidwi na ntontholo wathu.—Lewengani Mateyu 5:16.
18. Ko nchani chingatithandize kulalikira podiya kuti tinamantha?
18 Nthawe zinango, wanthu angambatinyoze panango kutidzudza ndawa ya kubvera Ababa wathu wakudzulu. Ko tingachite tani peno tinamantha kuuza wanthu vomwe tichakhulupirira? Tichadekana kudziwa kuti Yahova na Yesu ali kusaidi yathu. Yesu adauza wopfunzira wake kuti osati ambakhale na nkhawa na vomwe angakayankhule panango kunena. Ndawa chani? Yesu adawatsimikizira kuti: ‘Vomwe mukanene mukapasiwe panthawe mweyo. Pakuti oyankhula mudzakhalelini imwepo, koma mzimu wa Ababa wanu udzayankhule pophatisira basa imwepo.’—Mat. 10:9, 20.
19. Perekani chitsanzo cha munthu yemwe adalalikira molimba moyo.
19 Ganizirani chitsanzo cha Robert. Pomwe angapfunzira Baibolo ndipo wenze akalibe kudziwa vizinji, adachemerewa ku tiribunali ya ku África do Sul kuti akafotokoze ndawa yake walamba kuyenda kunkhondo. Iye mwamantha adafotokozera wa ku tiribunali kuti alilini kumbali ya dziko ndawa ya chikondi chake kwa abale na alongo wachikhrisitu. Iye ambatembeja ndawa yakuti ali mubanja yauzimu. Woweruza adamubvunza kuti: ‘Azibale wako mwawa ni mbani?’ Robert mwakankulumize adadawiriratu pakukumbukira lemba yenze mumsolo. Imweyi yenze lemba ya Mateyu 12:50 yomwe ichati: ‘Pakuti aliyese wochita chifuniro cha Ababa wangu wakudzulu, muyo ndiye m’bale wangu, mulongosi wangu, na amayi wangu.’ Podiya kuti Robert ambadziwalini vizinji ndawa yakuti wenze wopfunzira Baibolo wanyowani, mzimu wa Yahova udamuthandiza kudawira mibvunzo yazinji yomwe ambadikhiralini kuti angabvunziwe. Yahova adakondwa naye Robert. Yahova angakondwembo nase tikambamukumbira kuti tikhale wolimba moyo pakulalikira panthawe yoshupa.
20. Ko tichadekana kukhala wotsimikiza kuchita chani? (Yohane 17:11, 15)
20 Naboni tose timbatembeje ndawa ya mwayi watinawo wokhala m’banja yauzimu na yachikondi. Tina Ababa wabwino maninge komasoti abale na alongo azinji wodzipereka. Osati timbawone ninge palibe chingasokoneze vimwevi. Ndawa Satana na viwanda vake ankuyesesa kutichitisa kukaikira kuti Yahova achatikonda na kusokoneza mgwirizano wokondwesa womwe tinaye. Koma podiya viri teno, Yesu adatipempherera pakukumbira Ababa wathu kuti atinyang’anire nakuti achitise kuti banja yathu ikhale yobverana. (Lewengani Yohane 17:11, 15.) Yahova ankudawira pemphero mweyi. Ninge Yesu, palibe angatichitise kukaikira kuti Yahova achatikonda nakuti ankutithandiza. Naboni tikhale wotsimikiza kupitiriza kukhala pafupi na banja yathu yauzimu.
NYIMBO NA. 99 Khamu la Abale
^ ndi. 5 Tichakondwa ndawa ya mwayi ukulu wokhala m’banja yachikondi ya abale na alongo. Tose tichada kuti chikondi chomwe tinacho kuti chipitirize kulimba. Ko tingachite tani vimwevi? Mwa kutewedzera momwe Ababa wathu wakudzulu achachitira nase vinthu na kutewedzera chikondi cha Yesu na cha abale na alongo wathu.
^ ndi. 57 MAWU YOFOTOKOZERA MAFOTO: Yahova adatumiza mngelo kuti akalimbikise Yesu m’munda wa Getsemane.
^ ndi. 59 MAWU YOFOTOKOZERA MAFOTO: Panthawe ya nthenda ya koronaviru, azinji adaphata basa modzipereka pakugawa vakudya.
^ ndi. 61 MAWU YOFOTOKOZERA MAFOTO: Mayi ankuthandiza mwana wake yemwe ankutumiza kalata kuti ikalimbikise m’bale kudjeri.
