NKHANI YOPFUNZIRA 39
Pomwe munthu yemwe muchamukonda wasiya Yahova
‘Iwo kawirikawiri . . . ambamukalipisa.’—SAL. 78:40.
NYIMBO NA. 102 “Muthandize Ofookawo”
VOMWE TIPFUNZIRE *
1. Ko munthu angabve tani peno wa m’banja mwawo wachosewa?
KO MUNTHU yemwe muchamukonda adachosewa mumpingu? Mulongo munango dzina yake Hilda adati: ‘Mwamuna wangu padamwalira takhala m’banja kwa magole 41 vidaniwawa maninge, ndipo nimbawona kuti palibe chinthu chowawa kuposha kuferewa. * Koma mwana wangu padachosewa mumpingu nkusiya nkazi na wana, vidaniwawiratu maninge ndipo venze vosapiririka.’
Yahova ankudziwa momwe vichakhalira vowawa peno munthu yemwe muchamukonda wasiya kumutumikira (Onani ndime 2-3) *
2-3. Mobverana na Salimo 78:40, 41, ko Yahova achabva tani atumiki wake akasiya kumutumikira?
2 Ndoganizani momwe vidamuwawira Yahova padawona kuti wana wake angelo ankumupandukira m’banja mwake! (Yuda 6) Ndipo ganizani mwavidamuwawira soti padawona Aizirayeli wopanduka ankumukalipisa kawirikawiri. (Lewengani Salimo 78:40, 41.) Khalani wotsimikiza kuti Baba wathu wachikondi vimuwawambo peno munthu wasiya kumutumikira. Iye achabvesa momwe vinkukuwawirani ndipo adzakulimbikiseni na kukuthandizani mwachifundo.
3 Munkhani ino, tikambirane vomwe tingachite kuti titambire chithandizo cha Yahova peno munthu wa m’banja yathu wachosewa. Tikambirane soti momwe tingathandizire anango mumpingu womwe agumanambo na bvuto mweyi. Koma chakuyamba, naboni tiwone maganizo yomwe tichadekana kupewa vimwevi vikatichitikira.
PEWANI KUDZIIMBA MULANDU
4. Ko azibereki azinji achabva tani mwana wawo akasiya Yahova?
4 Mwana wapamoyo akasiya kutumikira Yahova, ni vachilendolini azibereki kumbawona kuti pali vadakachita kuti iye apitirize kutumikira Yahova. Pomwe mwana wake adasiya Yahova, m’bale Luke adati: ‘Nimbandokhalira kudziimba mulandu. Mpakana nimbalotera vinthu voipa pankhani mweyi. Nthawe zinango nimbalira ndipo nimbabva mtima kuwawa.’ Mulongo Elizabeth yemwe mwana wake adachosewambo ambadzibvunza kuti: ‘Nchani chinidaphonyesa ninge mayi? Nimbadzibva kuti nilibe kumupfunzisa bwino choonadi mwana wangu.’
5. Peno munthu wasiya Yahova, ko bvuto ni ya mbani?
5 Timbakumbukire kuti Yahova adapasa munthu aliyese ufulu wosankha. Kuthandauza kuti tingasalule kumubvera panango neye. Wana anango alibe azibereki wachitsanzo chabwino, koma adasalula kutumikira Yahova na kukhala wokhulupirika kwa iye. Wana anango adapfunzisiwa mwakhama na azibereki wawo kukonda Yahova, koma patsogolo pake adasiya kumutumikira. Ndipomwapa aliyese achadekana kusankhula yekha kutumikira Yahova. (Yos. 24:15) Peno imwepo ndimwe wokwinyirira ndawa yakuti mwana wanu adasiya kutumikira Yahova, ayi kumbawona kuti imwepo ndimwe munabvuto.
6. Ko mwana angabve tani peno ababa panango amayi aleka kutumikira Mulungu?
6 Nthawe zinango, mayi panango baba angasiye kutumikira Yahova ndipo panango angafike pakusiya soti banja yake. (Sal. 27:10) Vimwevi vingakhale vowawa maninge kwa mwana yemwe ambawona kuti iwo ni chitsanzo chabwino. Esther yemwe ababa wake adachosewa adati: ‘Nimbandokhalira kulira ndawa yakuti viribe kuwachitikira mwangozi, koma adachita kufuna kusiya kutumikira Yahova. Nichawakonda ababa wangu, koma iwo padachosewa nenze na nkhawa kuti viwafambire tani. Ndipo nkhawa yangu imbafika ponyanya.’
7. Ko Yahova achabva tani akawona wana womwe amayi panango ababa wawo adachosewa?
7 Alumbwana, peno amayi panango ababa wanu adachosewa mumpingu, dziwani kuti vinkutiwawa maninge. Khalani wotsimikiza kuti Yahova ankudziwambo momwe vinkukuwawirani. Iye achakukondani ndipo achatembeja kukhulupirika kwanu. Ndipo isepano abale na alongo wanu tikukondanimbo. Kumbukirani pomwe kuti imwepo ndimwelini mwachitisa kuti asalule kuchoka. Ninge mwatafotokozera kumayambiriro, Yahova adapereka ufulu wosalula kwa munthu aliyese. Ndipo munthu yemwe adadzipereka nkubatizika achadekana ‘kutakula katundu wake.’—Agal. 6:5.
8. Ko wanthu wokhulupirika wa m’banja angambachite chani podikhira kuti wochosewa adzabwerere kwa Yahova? (Onani pomwe bokosi yakuti: “ Bwererani kwa Yahova.”)
8 Munthu yemwe muchakonda akasiya kutumikira Yahova, mumbadikhire kuti ntsiku inango adzabwerere kwa iye. Koma ko pakali pano mungachite chani podikhira kuti adzabwerere kwa Yahova? Mbachitani vose vamungakwanise kuti mulimbise chikhulupiriro chanu. Mukambachita vimwevi, mudzapereke chitsanzo chabwino kwa anango wa m’banja mwanu ndipo panango vingathandize pomwe wochosewa. Mudzagumane pomwe mphanvu zokuthandizani kupirira mukayamba kukwinyirira. Naboni manje tikambirane vinthu vomwe vingakuthandizeni.
VOMWE MUNGACHITE KUTI MUPITIRIZE KUKHALA NA CHIKHULUPIRIRO CHOLIMBA
9. Ni vinthu viponi vamungachite kuti mupitirize kukhala na chikhulupiriro cholimba? (Onani bokosi yakuti: “ Malemba yolimbikisa peno munthu wapamoyo wasiya Yahova.”)
9 Chitani vose vamungakwanise kuti mulimbise chikhulupiriro chanu. Vimwivi ni vofunika kuti mudzilimbise na kulimbisambo anango wa m’banja. Ko mungachite tani vimwivi? Kuti mukhale wolimba, mbalewengani Mawu ya Mulungu na kuyaganizira ndipo mbagumanikani pamisonkhano. Joanna yemwe ababa na mulongosi wake adasiya choonadi adati: ‘Mtima wangu udakhala pasi ndawa yopfunzira moyo wa wanthu wa m’Baibolo ninge Abigayeli, Esitere, Yobu, Yosefe na Yesu. Chitsanzo chawo chidanithandiza kumbaganiza bwino nikakhala wokwinyirira. Nimbalimbikisika pomwe nikabvesera nyimbo zathu.’
10. Ko lemba ya Salimo 32:6-8 inkuwonesa kuti tingapirire tani tikakhala wokwinyirira?
10 Mufotokozereni Yahova nkhawa zanu zose. Mukakhala wokwinyirira, ayi kusiya kupemphera kwa Yahova. Mukumbireni Mulungu wathu wachikondi kuti akuthandizeni kuiwona bwino nkhani mweyo nakuti ‘akupaseni nzeru na kukulangizani munjira yati mufambemo.’ (Lewengani Salimo 32:6-8.) Koma nthawe zinango vingakhale voshupa kufotokozera Yahova momwe tinkubvera. Koma Yahova achabvesa bwinobwino ululu wa mumtima mwanu. Iye akukondani maninge ndipo ankukulimbikisani kuti mumbamuuze vose va mumtima mwanu.—Eks. 34:6; Sal. 62:7, 8.
11. Mobverana na Aheberi 12:11, ndawa chani tichadekana kuwona kuti chilango cha Yahova ni chabwino? (Onani pomwe bokosi yakuti: “ Kuchosa munthu ni chilango chachikondi chochokera kwa Yahova.”)
11 Mumbabverane na vomwe akulu asankha. Kuchosa munthu ni makonzedwe yomwe Yahova adakhazikisa. Chilango chake ni chophindulisa aliyese, kuphatanidzapo yemwe wachosewa. (Lewengani Aheberi 12:11.) Peno munthu wachosewa, anango mumpingu angambalewe kuti akulu alibe kuchita bwino. Koma dziwani kuti wanthu watene alewakolini voipa vomwe munthu wochosewa adachita. Isepano tingakwaniselini kudziwa nkhani yose. Ndipomwapa ni vanzeru kukhulupirira kuti akulu omwe adaweruza nkhani, adafufuza Malemba mwakhama kuti aweruze ‘m’malo mwa Yahova.’—2 Mbiri 19:6.
12. Ko anango adaphindula tani ndawa ya kuthandizira chilango chochokera kwa Yahova?
12 Mukambachita vinthu mobverana na vomwe akulu asankha pakuchosa munthu yemwe muchamukonda, ndiye kuti munkumuthandiza kuti adzabwerere kwa Yahova. Elizabeth watafotokoza kumayambiriro adati: ‘Venze voshupa kuti timbamupewe mwana wathu wachimuna nkulu. Koma padabwerera kwa Yahova, iye adafotokoza kuti adachita bwino kumuchosa. Patsogolo pake adafotokoza kuti adapfunzirapo kanthu.’ Mark yemwe ni mwamuna wake adati: ‘Nkuyenda kwa nthawe, mwana wangu adaniuza kuti adakhala na shungu yobwerera ndawa yakuti isepano timbatewedza malangizo. Ndine wotembeja maninge Yahova ndawa yakuti adatithandiza kukhala wobvera.’
13. Ko nchani chingakuthandizeni mukakhala na vinthu vomwe vinkukuwawani m’moyo mwanu?
13 Fotokozerankoni azishamwali womwe angakubveseni. Mumbabverane na Akhrisitu wolimba womwe angakuthandizeni kuwona bwino vinthu. (Miy. 12:25; 17:17) Joanna watafotokoza kumayambiriro adati: ‘Nimbadzibva kuti nili nekhanekha. Koma kufotokozera azishamwali wangu kudanithandiza kuti nipirire.’ Ko manje mungachitetani peno anango mumpingu ankulewa vinthu vokukalipisani?
14. Ndawa chani tichadekana ‘kupitiriza kulolerana na kukhululukirana na moyo wose’?
14 Khalani wodekha na abale na alongo wanu. Tingadikhirelini kuti munthu angachite vinthu vose mosaphonyesa. (Yak. 3:2) Tose ndise wochimwa, ndipomwapa ni vosadabwisa kuwona anzathu ankutiphonyera, panango mosazindikira kutiyankhula mawu yokalipisa. Kumbukirani malangizo ya Paulo yakuti: ‘Pitirizani kulolerana na kukhululukirana na moyo wose peno munthu anachifukwa chodandaulira va munzake.’ (Akol. 3:13) Mulongo munango yemwe mwamuna wake wenze adachosewa adati: ‘Yahova adanithandiza kukhululukira abale womwe ambachita ninge ankunilimbikisa, koma ambamalizira kunikalipisa.’ Ko abale na alongo mumpingu angachite chani kuti athandize wanthu wokhulupirika wa m’banja ya munthu wochosewa?
MPINGU UNGATHANDIZE
15. Ko tingachite tani kuti tithandize mabanja yomwe munzawo wachosewa manjemanje?
15 Wanthu wokhulupirika wa m’banja ya munthu wochosewa akabwera kumisonkhano, mbawatambirani na manja yawiri. Mulongo munango dzina yake Miriam adati vimbamushupa kuyenda kumisonkhano m’bale wake padachosewa. Iye adati: ‘Nenze na nkhawa kuti wanthu ambalewe chani. Koma kumisonkhano ndiko kwenze abale na alongo womwe ambawawiwambo na vomwe vidanichitikira. Ndipo iwo ambalewakolini voipa vokhuza m’bale wangu. Kunithandiza kwawo kudachitisa kuti nisambadzibve kuti nili nekha pa vuto yangu.’ Mulongo munango adati: ‘Mwana wathu mwamuna padachosewa, azishamwali wathu adatilimbikisa maninge. Anango ambalewa kuti tinkudziwalini kuti tikulimbikiseni tani. Iwo ambalira nane pabodzi ndipo ambaninembera makalata yolimbikisa. Vomwe adachita vidanilimbikisa maninge.’
16. Ko mpingu ungapitirize tani kuthandiza wanthu wa m’banja ya munthu wochosewa?
16 Pitirizani kuthandiza wanthu wa m’banja ya munthu wochosewa. Ino ndiyo nthawe yakuti muwawonese chikondi na kuwalimbikisa. (Aheb. 10:24, 25) Nthawe zinango, wanthu wa m’banja ya munthu wochosewa achawona kuti anango mumpingu aleka kuyankhula nawo kawikawiri, kumbachita ninge kuti iwo adachosewambo. Tinkufunalini kuti iwo afike pakudzibva teneuyu. Makamaka wana womwe azibereki wawo adasiya Yahova achadekana kulimbikisiwa maninge. Maria yemwe mwamuna wake wenze adachosewa nkusiya banja yake adati: ‘Azishamwali wangu anango ambanizungira, kuniphikira chakudya na kuchita nane pfunziro ya banja. Iwo ambawawiwambo ndipo ambalira nane pabodzi. Iwo ambaniikhira kumbuyo wanthu akambaninamizira vinthu viribe umboni. Iwo adanilimbikisa maninge.’—Aro. 12:13, 15.
Abale na alongo mumpingu angawonese chikondi mwa kuthandiza wanthu wa m’banja ya munthu wochosewa (Onani ndime 17) *
17. Ko akulu angathandize tani mwachifundo wanthu wa m’banja ya munthu wochosewa?
17 Akulu, phatisani basa mpata uliwose kuti mulimbikise wanthu wokhulupirika wa m’banja ya munthu wochosewa. Imwepo munaudindo wapadera wolimbikisa wale womwe munzawo yemwe angamukonda adasiya Yahova. (1 Ates. 5:14) Kuti muwalimbikise, mbachezani nawo misonkhano ikanati yayamba na pomwe yamala. Mbawazungirani kumamiyi kwawo ndipo mumbapemphere nawo pabodzi. Mumbalalikire nawo pabodzi ndipo nthawe na nthawe mbawachemerani kuti mudzachitire pabodzi pfunziro ya banja. Akulu achadekana kukhala wachifundo na wachikondi ninge Yahova ndipo ambakhale tcheru kuti awone momwe angathandizire.—1 Ates. 2:7, 8.
AYI KULUZA CHIDIKHIRO NDIPO PITIRIZANI KUTHEMBA YAHOVA
18. Mobverana na 2 Petulo 3:9, ko Mulungu anashungu yakuti wanthu womwe adasiya kumutumikira achite chani?
18 Yahova ‘ankufunalini kuti aliyese adzachenekewe, koma ankufuna kuti wanthu wose alape.’ (Lewengani 2 Petulo 3:9.) Podiya kuti munthu achite chimo ikulu, moyo wake upitiriza kukhala wantengo wapatali kwa Mulungu. Kumbukirani kuti Yahova adapereka moyo wa Mwana wake womwe ni wa ntengo wapatali kwa munthu aliyese. Yahova ankuyesesa mwachikondi kuthandiza wanthu womwe adamusiya kuti abwerere kwa iye. Iye ankudikhira kuti iwo abwerere, ninge momwe tinkuwonera mu fanizo ya Yesu ya mwana wolowerera. (Luka 15:11-32) Azinji womwe enze adasiya choonadi, adabwerera kwa Ababa wawo wachikondi wakudzulu. Ndipo mpingu udawatambira wanthu mwawa na manja yawiri. Elizabeth watafotokoza kumayambiriro, adafotokoza momwe adakhalira wokondwa mwana wake padabwezeresewa. Iye adati: ‘Ninkutembeja maninge wanthu womwe adatilimbikisa kuti tileke kuluza chidikhiro.’
19. Ndawa chani tichadekana kupitiriza kuthemba Yahova?
19 Nthawe zose tichadekana kuthemba Yahova. Iye angatipaselini malangizo yomwe yangatiikhe pabvuto. Iye ni Baba wachifundo ndipo achakonda maninge wanthu womwe ankumukonda na kumutumikira. Khalani wotsimikiza kuti Yahova adzakusiyenilini panthawe ya mabvuto. (Aheb. 13:5, 6) Mark watafotokoza kumayambiriro adati: ‘Yahova alibe kutisiya. Iye akhalalini kutali peno tinkugumana na mabvuto.’ Yahova adzapitirize kukupasani ‘mphanvu kuposha yobadwa nayo.’ (2 Akor. 4:7) Inde, imwepo mungakwanise kupitiriza kukhala wokhulupirika na wodikhira peno munthu yemwe muchamukonda wasiya Yahova.
NYIMBO NA. 44 Pemphero la Munthu Wovutika
^ ndi. 5 Vikhala vowawa maninge munthu yemwe tichamukonda akasiya Yahova. Nkhani ino inkufotokoza momwe Mulungu achabvera vimwivi vikachitika. Tikambirane vinthu vomwe wachibale wa munthu wochosewa angachite kuti apitirize kukhala wolimba mwauzimu. Nkhani ino inkufotokoza pomwe momwe mpingu wose ungalimbikisire wanthu wokhulupirika wa m’banja mumo.
^ ndi. 1 Madzina yanango munkhani ino yachinjiwa.
