1. Ndawa chani tidabwalini tikambaona kuti wanthu wa ntsiku zino athembanalini?

 WANTHU wa mudziko ya Satana ino athembanalini. Kazinjikazinji akalipisana pa kuchita va malonda, va ndale ndipo aipidwa pomwe na vochita va atsogoleri wa vipembedzo. Azinji achaona pomwe kuti ni vosakwanisika kuthemba azishamwali, mavizinyu na wanthu wa m’banja mwawo. Vimwivi vitidabwisalini ndawa Baibolo idaleweratu kuti: ‘Mu ntsiku zomalizira . . . , wanthu adzakhale . . . osakhulupirika, . . . onyoza anzawo, . . . osafuna kubverana na anzawo.’ Pamwapa Baibolo, imbathandauza kuti wanthu adzakhale na makhalidwe ninge ya Satana yemwe ni mulungu wa nthawe ino na wosathembeka.—2 Tim. 3:1-4; 2 Akor. 4:4.

2. (a) Ko ni mbani watingathembe maninge? (b) Ko anango viwashupa kuthemba mbani?

² Akhrisitu ise, tidziwa bwino kuti Yahova yekha ndiye watingathembe maninge. (Yer. 17:7, 8) Tinkutsimikizira vimwevi ndawa yakuti iye atikonda maninge ndipo ‘angasiyelini’ azishamwali wake. (Sal. 9:10) Tichadekana kuthemba pomwe Yesu Khrisitu ndawa adapereka moyo wake kuti atiwombole. (1 Pet. 3:18) Ndipo tachita kuona tekha pa moyo wathu kuti Baibolo inamalangizo yothandiza maninge. (2 Tim. 3:16, 17) Isepano tikhulupirira maninge Yahova, Yesu na Baibolo. Koma anango viwashupa kuthemba abale na alongo wawo mu mpingu. Peno imwepo vikushupanimbo, ko nchani chingakuthandizeni kuti mumbawathembe?

3. Ko ni mwayi ukulu uponi watinawo? (Maliko 10:29, 30)

³ Yahova watiikha m’banja ya atumiki wake wa padziko yose yapasi. Kwa ise, umoyu ni mwayi ukulu maninge ndawa titambira madaliso yazinji! (Lewengani Maliko 10:29, 30.) Padziko yose yapasi, pana abale na alongo womwe akondambo Yahova na kuphatisira basa mpfundo za m’Baibolo pa moyo wawo. Tingasiyane nawo chiyankhulidwe, chikhalidwe, kavalidwe koma tidzibva  kuti tili nawo pa ushamwali olo kuti kukhale kuyamba kugumana nawo. Vitikomedza maninge tikambatumikira nawo pabodzi Ababa wathu wakudzulu.—Sal. 133:1.

4. Ndawa chani tichadekana kumbabverana na abale na alongo wathu?

⁴ Ino ndiyo nthawe yofunikana kumbabverana maninge na abale na alongo wathu. Nthawe na nthawe, iwo angambatithandize pa mabvuto yomwe tinkugumana nayo. (Aro. 15:1; Agal. 6:2) Iwo angatilimbikise pomwe kuti tipitirize kutumikira Yahova na kukhala naye pa ushamwali wolimba. (1 Ates. 5:11; Aheb. 10:23-25) Ndoganizani mwavidakakhalira adakati titetezewalini na mpingu kuti tikwanise kulimbana na viyeso va Satana yemwe ndiye ankutonga dziko ino. Satana na womuthandizira, manjemanje aukire atumiki wa Mulungu. Koma pa nthawe mweyo tidzachitelini mantha ndawa abale na alongo wathu adzakhale pafupi kuti atithandize!

5. Ndawa chani nthawe zinango vingakhale voshupa kuthemba abale na alongo wathu?

⁵ Koma anango viwashupa kuthemba abale na alongo wawo, ndawa yakuti nthawe inango adauza munthu munango nkhani zawo zachintsintsi, panango kukangira kukwanirisa vomwe adapolomisa. Ndipo vingachitike pomwe kuti munthu munango wa mumpingo adawayankhula panango kuwachitira vinthu vomwe vidawakalipisa maninge. Vimwevi vikachitika vingakhale voshupa kuti timbathembe abale na alongo wathu. Manje nchani chingatithandize kuti timbawathembe?

6. Ko chikondi chingatithandize tani kuti timbathembe anzathu? (1 Akorinto 13:4-8)

⁶ Chikondi ndicho chingatithandize kuti tiyambe kuthemba anzathu. Bukhu ya Akorinto wakuyamba msolo 13 inkufotokoza momwe chikondi chingatithandizire kuti tiyambe kuthemba anzathu. (Lewengani 1 Akorinto 13:4-8.) Mwakulinganiza, vesi 4 ifotokoza kuti ‘chikondi nchodekha ndipo nchabwino mtima.’ Yahova achita nase vinthu modekha olo pa nthawe  yomwe tamuphonyera. Ndipomwapa, timbakhalembo wodekha peno abale wathu atiyankhula panango kutichitira vinthu votikalipisa. Vesi 5 inkufotokoza pomwe kuti: ‘[Chikondi] chikalipalini ndipo chisungalini vifukwa.’ Tifunalini ‘kusunga vifukwa,’ panango kumbandokhalira kuganizira vomwe abale na alongo wathu adatiphonyera. Lemba ya Mlaliki 7:9 ifotokoza kuti ‘tichadekanalini kumbathamingira kukalipa.’ Ni vabwino maninge kuphatisira basa mawu yogumanika pa Aefeso 4:26 yomwe yalewa kuti: ‘Ayi kubvuma kuti dzuwa ichome muli wokalipa!’

7. Ko mpfundo zogumanika pa Mateyu 7:1-5 zingatithandize tani kuti timbathembe anzathu?

⁷ Chinthu chinango chomwe chingatithandize kuthemba abale na alongo wathu, ni kuona makhalidwe yawo yabwino ninge momwe Yahova achachitira. Yahova awakonda maninge ndipo awasungiralini vifukwa. Isembo timbachite chibodzibodzi. (Sal. 130:3) M’malo mombandokhalira kunyang’ana vinthu voipa vomwe iwo ankuchita, tingachite bwino kumbayesesa kuona vinthu vabwino vomwe iwo ankuchita. (Lewengani Mateyu 7:1-5.) Pakuti chikondi ‘chikhulupirira vinthu vose,’ tingachite bwino kutsimikiza kuti iwo anashungu yochita vinthu vabwino. (1 Akor. 13:7) Vimwevi vinkutanthauzalini kuti Yahova afuna kuti timbandothemba wanthu palibe chifukwa chobveka, koma afuna kuti timbawathembe ndawa yakuti iwo ankuchita vinthu voonesa kuti ni wanthu wothembeka. *

8. Ko mungachitetani kuti mumbathembe maninge abale na alongo wanu?

⁸ Vitenga nthawe kuti munthu ayambe kukuthemba ninge mwaviriri na kulemekezewa. Manje mungachitetani kuti mumbathembe maninge abale na alongo wanu? Yesesani kuwadziwa bwino. Mumbacheze nawo mukabwera ku misonkhano ya mpingu na kupatula nthawe kuti mumbalalikire nawo pabodzi. Mumbachite nawo vinthu modekha ndipo wapaseni mpata woonesa kuti ni wanthu wothembeka. Pakuyamba, panango mungawauziretulini nkhani zanu zachintsintsi ndawa yakuti mukalibe kuwadziwa bwino. Koma mukayamba kukhala nawo pa ushamwali, mungamasuke manje kuwauza nkhani zanu zachintsintsi. (Luka 16:10) Manje tani peno mungaone kuti m’bale panango mulongo ni wosathembeka? Ayi kuthamingira kusiya kubverana naye, koma mbachitani vinthu vomwe vingachitise kuti iye ambakuthembeni. Ayi kubvuma kuti vomwe m’bale wanu ankuphonyesa visokoneze ushamwali wanu. Ndipomwapa naboni tikambirane vitsanzo va atumiki wokhulupirika wa Yahova womwe podiya kuti adachitiriwa vinthu voipa, adapitiriza kuthemba anzawo.

9. (a) Nchani chinkuonesa kuti Hana ambalemekeza makonzedwe ya Yahova podiya kuti wanthu wa udindo enzelini chitsanzo chabwino? (b) Ko chitsanzo cha Hana chakupfunzisani chani pa nkhani yolemekeza makonzedwe ya Yahova? (Onani foto.)

⁹ Ko imwepo mudakalipako kale ndawa ya vochita va m’bale wa maudindo? Peno nteno, muphindule maninge tikakambirana chitsanzo cha Hana. Munthawe yake, nkulu wa antsembe Eli ndiye angatsogolera Aizirayeli pa kutumikira Yahova. Koma wanthu wa m’banja ya Eli enzelini chitsanzo chabwino. Wana wake wachimuna ambachita chigololo na azikazi wa pakachisi, vomwe venze vochitisa manyazi maninge. Koma ababa wawo ambandowalekelera ne kuwalangiza mwamphanvu. Yahova alibe kumuchoseratu mwakankulumize Eli pa udindo wake ninge wantsembe. Podiya kuti venze teno, Hana alibe kunyozera makonzedwe ya Mulungu nkumbapewa kutumikira Yahova kuchihema ndawa yakuti kwenze Eli. Eli padaona kuti Hana ankupemphera ali wokwinyirira, adathamingira kuganiza kuti  waledzera. M’malo mwakuti ayambe wafufuza kuti adziwe bwinobwino, Eli adanamizira nkazi moyu yemwe wenze wokwinyirira maninge. (1 Sam. 1:12-16) Olo kuti venze teno, Hana adapolomisa kuti akandodzakhala na mwana mwamuna, adzamupereke kuti ambakatumikire pa chihema nkumbakasamaliriwa na Eli. (1 Sam. 1:11) Ko wana wa Eli pa nthawe mweyi enze adakali kuchita vinthu voipa ndipo ambafunikana kulangiwa? Inde, ndipo Yahova adachitadi vimwevi pa nthawe yake. (1 Sam. 4:17) Mulungu adadzamudalisadi Hana pakumupasa mwana mwamuna ndipo adamupasa dzina yakuti Samueli.—1 Sam. 1:17-20.

10. Ko Mpfumu Davide adapitiriza tani kuthemba wanthu anango podiya kuti anango enze adamusatukira?

¹⁰ Ko imwepo mudasatukiriwako kale na shamwali wapamoyo? Peno nteno, wonani vomwe vidachitikira Mpfumu Davide. Ahitofeli wenze mu gulu ya azishamwali womwe Davide wenze nawo. Koma mwana wa Davide Abisalomu padafuna kutengera ababa wake ufumu, Ahitofeli adathandizirambo makonzedwe mwaya. Ndoganizani mwavidamuwawira Davide padasatukiriwa na mwana wake chaiye na shamwali wake wa pamoyo! Koma vimwevi vilibe kumuchitisa Davide kuti alekeretu kumbathemba wanthu anango. Iye adapitiriza kuthemba shamwali wake munango dzina yake Husai, yemwe alibe kuthandizirako makonzedwe ya Abisalomu. Davide wenze na vifukwa vabwino vomuchitisa kuti ambathembe Husai. Husai adaonesa kuti wenzedi shamwali chaiye kwa iye, ndawa yakuti adabvuma kuikha moyo wake pa ngozi kuti athandize Davide.—2 Sam. 17:1-16.

11. Ko mtumiki wa Nabala adaonesa tani kuti angamuthemba Abigayeli?

¹¹ Ganizirani pomwe chitsanzo cha m’bodzi wa atumiki wa Nabala. Mwachifundo Davide na masocha yake adateteza azinyabasa wa muizirayeli munango dzina yake Nabala. Patsogolo pake, Davide adakumbira Nabala moyu yemwe wenze wolemera maninge kuti amupaseko chakudya changakwanise. Koma Nabala padalamba kupereka chakudya chochepa chomwe Davide adakumbira, Davide adakalipa maninge ndipo adakonza vakuti ayende kukapha amuna wose wapamuyi pa Nabala. Pamwapo mtumiki adayenderatu kukauza Abigayeli nkhani mweyi yemwe wenze nkazi wa Nabala. Mtumiki moyu adachita vimwevi ndawa yodziwa kuti Abigayeli angakwanise kupulumusa moyo wake. M’malo mwakuti andothawa, iye adakhulupirira kuti Abigayeli  akonze vinthu. Iye wenze wotsimikiza vimwevi ndawa yodziwa bwino kuti Abigayeli wenze nkazi wanzeru. Vomwe vidachitika patsogolo pake, vidaoneseratu kuti iye wenzedi na vifukwa vobveka vomuchitisa kuthemba Abigayeli. Mwakankulumize Abigayeli adayenda kukayankhula na Davide molimba moyo, nkumukumbira kuti osati achite chinthu choipa. (1 Sam. 25:2-35) Abigayeli adachita vimwevi ndawa yotsimikiza kuti Davide akamubvese.

12. Nchani chinkuonesa kuti Yesu angathemba wopfunzira wake podiya kuti iwo angaphonyesa vinthu vizinji?

¹² Yesu ambawathemba wopfunzira wake podiya kuti iwo ambaphonyesa vinthu vizinji. (Yoh. 15:15, 16) Padati Yakobo na Yohane amukumbira Yesu kuti akawapase udindo ukulu mu Ufumu, Yesu alibe kuthamingira kuganiza kuti iwo ankutumikiralini Yahova pa vifukwa vabwino nkuwachoseratu pa ndandanda ya atumi. (Maliko 10:35-40) Patsogolo pake, wopfunzira wose wa Yesu adamuthawa usiku womwe iye adamangiwa. (Mat. 26:56) Koma Yesu alibe kulekeratu kuwathemba. Iye ambadziwa bwino vomwe iwo angaphonyesa, koma olo nteno adapitiriza ‘kuwakonda mpakana mapeto.’ (Yoh. 13:1) Padati Yesu wamukisiwa, adapereka udindo ukulu maninge kwa opfunzira wake 11 wokhulupirika kuti ambatsogolere pa basa yolalikira na kupfunzisa wanthu. (Mat. 28:19, 20; Yoh. 21:15-17) Iye wenze na vifukwa vabwino vothembera wopfunzira wake mwawa wochimwa. Wose mwawa adatumikira Yahova mokhulupirika mpakana kumaliza moyo wawo wa padziko yapasi. Ndipomwapa tingalewe kuti Hana, Davide, nyabasa wa Nabala, Abigayeli na Yesu adatisiyira chitsanzo chabwino pa nkhani yothemba wanthu wochimwa.

13. Nchani chingachitise kuti vikhale voshupa kuthemba wanthu anango?

¹³ Ko imwepo mudauzako kale m’bale nkhani yachintsintsi, koma patsogolo pake iye nkuuza wanthu anango? Vimwevi vikhala vowawa maninge. Mulongo munango adauza nkulu nkhani yachintsintsi achimbatsimikiza kuti auzelini wanthu anango. Koma mangwana yake, mulongo moyu adachemerewa na nkazi wa nkulu ule nkuyamba kulimbikisiwa ndipo vimbachita kuonekeratu kuti wachita kuuziwa na mwamuna wake. Kundochokera mwapo, mulongo moyu ambathembalini pomwe akulu. Koma mulongo moyu adakumbira thandizo ndipo adachita bwino maninge. Iye adafotokozera nkulu munango nkhani mweyi ndipo adamulimbikisa kuti ayambire pomwe kuthemba akulu.

14. Nchani chidathandiza m’bale munango kuti ayambe pomwe kuthemba akulu wa mu mpingu mwake?

¹⁴ M’bale munango ambathembalini akulu awiri wa mumpingu mwake kwa nthawe itali. Koma nthawe inango iye adayamba kuganizira vomwe m’bale munango wabwino adafotokoza. M’bale muyo adati: “Dziwani kuti Satana ndiye mdani wathu, osati abale wathu.” M’bale moyu adayaganizira maninge mawu mwaya, adapemphera kwa Yahova ndipo adaona kuti vingakhale bwino kukhala nawo pa ntendere akulu mwawa.

15. Ndawa chani vitenga nthawe kuti tiyambire pomwe kuthemba munthu? Perekani chitsanzo.

¹⁵ Ko imwepo mudaluza udindo wa mu mpingu? Vimwevi vingakhale vowawa maninge. Grete na amayi wake enze Mboni zokhulupirika maninge ku Alemanha Nazista cha m’ma 1930 panthawe yomwe basa yathu yenze yolambiziwa. Grete wenze adapasiwa udindo wombanemba Ntsanja za ulonda kuti abale na alongo ambaziphatise basa. Koma abale padazindikira kuti ababa wake atsutsa maninge choonadi, adamusiisa udindo wonemba Ntsanja za ulonda ndawa yogopa kuti ababa wake angawapereke kwa adani. Koma penze pomwe bvuto inango yomwe Grete adagumana nayo. Nkati mwa nkhondo yachiwiri ya pa dziko yose, abale ambamupasalini magazini ndipo ambamuuzalini komwe achagumana kuti achite misonkhano.  Vimwevi vimbamuwawa maninge Grete! Iye adafotokoza kuti vidatenga nthawe kuti awakhululukire abale mwawa nakuti ayambire pomwe kuwathemba. Nkuyenda kwa nthawe iye adazindikira kuti Yahova adawakhululukira abale na alongo mwawa ndipo iye angadekanambo kuchita chibodzibodzi. *

16. Ndawa chani tichadekana kuyesesa kuti tipfunzire kuthemba abale na alongo wathu?

¹⁶ Peno vimwevi vidakuchitikiranimbo kale, yesesani kuti muyambire pomwe kuthemba abale wanu. Nishuwadi kuti vingatenge nthawe, koma mukachita khama mudzaphindule maninge. Mwakulinganiza, peno tidadyako kale chakudya choikha poizoni, ndiye kuti tingambasamale maninge tikafuna kudya chinthu. Koma sikuti tingalekeretu kudya vakudya ndawa yakuti tidadya vakudya voikha poizoni. Pamwapa mpfundo niyakuti, kuphonya kwa munthu m’bodzi osati kutichitise kuleka kuthemba abale na alongo wathu wose. Viri teno ndawa yakuti tose ndise wochimwa ndipo tiphonyesa vinthu. Tikayesesa kuyambira pomwe kumbathemba abale na alongo wathu, tidzakhale wokondwa maninge ndipo timbaikhire nzeru pa vomwe tingachite kuti abale na alongo mu mpingu ambathembane.

17. Ndawa chani kuthembana ni kofunika, ndipo tidzakambirane chani mu nkhani yomwe ikubwera?

¹⁷ Mudziko ya Satana ino wanthu athembanalini, koma isepano tithemba abale na alongo wathu ndawa yakuti tiwakonda ndipo iwo atikondambo. Kuthembana kumoku kungachitise kuti timbabvane maninge nakuti tidzatetezane pa mabvuto yakutsogolo. Manje tani peno mudaleka kuthemba munthu ndawa ya voipa vadakuchitirani? Yesesani kumbaona makhalidwe yake yabwino ninge momwe Yahova achachitira, mbaphatisani basa mpfundo za m’Baibolo, yesesani kumbakonda abale na alongo wanu ndipo pfunziranipo kanthu pa vitsanzo va m’Baibolo. Ndipo ni vokwanisika kuyambira pomwe kuthemba munthu yemwe adatichitira vinthu voipa kalekale. Tikachita vimwevi, tidzakondwe na azishamwali azinji ‘womwe atikonda kuposha m’bale wathu.’ (Miy. 18:24) Koma nivosakwana kundothemba chabe abale wathu, tichadekana kuchita vinthu vomwe vingachitise kuti iwombo ambatithembe. Mu nkhani yomwe ikubwera, tidzakambirane vomwe tingachite kuti abale wathu ambatithembe.