NKHANI YOPFUNZIRA 38
Yesesani kukhala munthu wothembeka
‘Munthu wothembeka abisa nkhani.’—MIY. 11:13.
NYIMBO NA. 101 Tizigwira Ntchito Mogwirizana
VOMWE TIPFUNZIRE *
1. Ko munthu wothembeka ayesesa kuchita tani?
MUNTHU wothembeka ayesesa nthawe zose kumbalewa chaivo na kukwanirisa vomwe wapolomisa. (Sal. 15:4) Vikhala vosashupa kuti wanthu amuthembe munthu watene ndipo isepano tifuna maninge kuti abale na alongo wathu ambatithembe. Manje nchani chatingachite kuti iwo ambatithembe?
2. Ko tingaonese tani kuti ndise wothembeka?
2 Tingachitelini kuwachichimiza wanthu kuti ambatithembe. Viri teno ndawa vochita vathu ndivo vingachitise kuti ambatithembe panango neye. Kuthembeka kuli ninge kobiri. Ni voshupa kuti uyigumane, koma ni vosashupa kuti imale. Yahova ni wothembeka maninge. Palibe chomwe iye angachite chomwe chingatichitise kuti tileke kumuthemba, ndawa yakuti ‘vose vomwe iye achachita ni vothembeka.’ (Sal. 33:4) Ndipo iye afuna kuti isepano timbamutewedzere. (Aef. 5:1) Naboni manje tikambirane vitsanzo va atumiki wakalekale womwe adatewedzera Yahova pa nkhani yokhala wothembeka. Tione pomwe makhalidwe yashanu yomwe yangatithandize kuti tikhale wanthu wothembeka.
PFUNZIRANI PA VITSANZO VA ATUMIKI WA YAHOVA WOTHEMBEKA
3-4. Ko mneneri Danieli adaonesa tani kuti wenze wothembeka, ndipo tichadekana kudzibvunza mibvunzo yaponi?
3 Mneneri Danieli wenze chitsanzo chabwino maninge pa nkhani yokhala munthu wothembeka. Podiya kuti iye wenzembo mu gulu ya wanthu womwe enze adatengewa kuti akakhale akapolo ku Babulo, kanthawe pang’ono iye adadzadziwika kuti ni munthu wothembeka maninge. Wanthu adazindikira vimwevi panthawe yomwe adatsumbudzulira maloto ya Mpfumu Nebukadinezara mothandiziwa na Yahova. Panthawe inango, Danieli ambafunika kuuza mpfumu kuti Yahova ankukondweralini na vomwe iye ankuchita podiya kuti kuchita vimwevi kudakachitisa kuti iye akalipe. Iye ambafunikana kukhala wolimba moyo kuti akwanise kuchita vimwevi, ndawa yakuti Nebukadinezara ambadizalini kukalipa! (Dan. 2:12; 4:20-22, 25) Magole yazinji patsogolo pake, Danieli adadziwika pomwe kuti ni munthu wothembeka maninge padatsumbudzulira mawu yomwe yadanembewa pa chipupa cha nyumba ku Babulo. (Dan. 5:5, 25-29) Patsogolo pake, mpfumu Dario na omuthandizira adazindikira kuti Danieli ‘analuso yodabwisa.’ Iwo adachita kuona okha kuti Danieli wenze ‘wothembeka ndawa alibe kumugumana na chifukwa chilichose panango kuchita vinthu viribe chilungamo.’ (Dan. 6:3, 4) Olo mafumu yomwe yambatumikiralini Yahova, yadachita kuonambo kuti Danieli wenze munthu wothembeka maninge!
4 Pakuganizira chitsanzo cha Danieli, tingachite bwino kudzibvunza kuti: ‘Ko nikhala nawo tani wanthu womwe ni Mbonilini? Ko iwo aniona kuti ndine munthu yemwe akwanisa maudindo yake na wothembeka?’ Ndawa chani tingachite bwino kudzibvunza mibvunzo mwaya? Ndawa yakuti tikakhala wothembeka, tingachitise kuti Yahova atamandike.
Nehemiya adasankhula amuna wothembeka kuti aphate basa zofunika maninge (Onani ndime 5)
5. Nchani chidathandiza Hananiya kuti akhale wothembeka?
5 Mu 455 AEC padondoti Nehemiya wakonza pomwe mpanda wa Yerusalemu womwe wenze udadzongeka, adasankhula amuna othembeka kuti ambanyang’anire thaundi mweyi. Pa amuna wothembeka mwawa womwe Nehemiya adawasankhula, penze pomwe Hananiya. Baibolo ifotokoza kuti Hananiya wenze ‘munthu wothembeka ndipo ambagopa Mulungu chaiye kuposha wanthu anango.’ (Neh 7:2) Kukonda Yahova na kumugopa, kudathandiza Hananiya kuti ambaitengere siriyasi basa iliyose yomwe wapasiwa. Makhalidwe mwaya yangatithandizembo kuti tikhale wothembeka pakutumikira Yahova.
6. Ko Tukiko adaonesa tani kuti wenze shamwali wothembeka kwa Paulo?
6 Onani pomwe chitsanzo cha Tukiko, yemwe wenze munthu wothembeka maninge kwa mtumi Paulo. Paulo pewenze mu djeri ya pamuyi, angathemba Tukiko ndipo adamufotokoza kuti wenze ‘mtumiki wokhulupirika.’ (Aef. 6:21, 22) Sikuti Paulo angandomuthemba kuti akafikise makalata ku mpingu wa Efeso na ku Kolose basi, koma adamupasa pomwe udindo wakuti ambakawalimbikise. Chitsanzo cha Tukiko chikutikumbusa va amuna wokhulupirika wa ntsiku zino womwe atisamalirambo.—Akol. 4:7-9.
7. Ko munkupfunzira chani kwa akulu na atumiki wothandiza wothembeka wa mumpingu mwanu?
7 Ntsiku zino ndisembo wotembeja ndawa yakuti tina akulu na atumiki wothandiza wothembeka maninge. Ninge Danieli, Hananiya na Tukiko, iwo ayatengera siriyasi maudindo yawo. Mwakulinganiza, tikambayenda ku misonkhano ya nkati mwa sondo, tikhala otsimikiza kuti nkhani zose zidapasiwa kale wanthu wati akambe. Ndipo akulu mwawa atembeja pomwe maninge peno abale na alongo akukonzekera bwino nkhani zomwe apasiwa! Ndipo tizezalini pomwe kuchemerera mapfunziro yathu ya Baibolo kumisonkhano yathu ya kumapeto kwa sondo, pakuganiza kuti m’bale yemwe adapasiwa nkhani ya wose panango alibe kukonzekera. Ndipo tikhala pomwe wotsimikiza kuti mabukhu yophatisira basa mu utumiki yambagumanike. Abale wokhulupirika mwawa atisamalira bwino maninge ndipo tinkutembeja Yahova! Manje tingachite tani kuti isembo tikhale wanthu wothembeka?
MBASUNGANI CHINTSINTSI KUTI MUKHALE WOTHEMBEKA
8. Ndawa chani tichadekana kukhala wachikatikati tikambafuna kudziwa vomwe vinkuchitikira anango? (Miyambo 11:13)
8 Tikonda maninge abale na alongo wathu ndipo tifuna kudziwa momwe vinthu vikufambira pa moyo wawo. Koma olo nteno, timbakhale wachikatikati podziwa kuti pana vinthu vinango vomwe tifunikanalini kudziwa. Mu mpingu wachikhrisitu woyambirira, abale na alongo anango enze wa ‘khokolo nkumbangenerera mu nkhani za anango, mpakana kuyankhula vinthu vomwe ambafunikali kuyankhula.’ (1 Tim. 5:13) Isepano tifunalini kuchitako vimwevi. Koma munthu munango angatiuze nkhani nkutifotokozera kuti osati tiuze munango. Mwakulinganiza, mulongo angatifotokozere matenda yomwe ankudwala panango bvuto inango yomwe ankugumana nayo, nkutiuza kuti tisunge chintsintsi. Vikakhala teno, tingachite bwino kumusungira chintsintsi, kuti tionese kuti tinkumulemekeza. * (Lewengani Miyambo 11:13.) Naboni manje tikambirane momwe tingasungire chintsintsi pa mbali zosiyanasiyana.
9. Ko aliyese m’banja angachite tani kuti akhale wothembeka?
9 M’banja. Munthu aliyese m’banja ana udindo wosunga nkhani zinango zachintsintsi m’banja mwawo. Mwakulinganiza, nkazi wachikhrisitu angakhale na vizolowezi vomwe mwamuna wake akomedwalini navo. Manje vikakhala teno, ko mwamuna angachite bwino kumbauza wanthu anango kuti amuchitise manyazi? Peno iye amukondadi nkazi wake, angachitelini vimwevi kuchitira kuti iye angakwinyirire. (Aef. 5:33) Alumbwana na atsikana afunambo kuchitiriwa vinthu mwaulemu. Ndipo azibereki achadekana kudziwa bwino vimwevi. Iwo osati ambawachitise manyazi wana wawo, pa kumbauza wanthu anango vomwe iwo achitalini bwino. (Akol. 3:21) Wana afunika kupfunzira kusunga chintsintsi kuti osati ambaulule nkhani zomwe zingachitise kuti wanthu wa m’banja mwawo akhale wokwinyirira. (Deut. 5:16) Munthu aliyese m’banja akambayesesa kusunga chintsintsi, vithandiza kuti wose akhale obvana maninge.
10. Ko munthu angaonese tani kuti ni shamwali chaiye? (Miyambo 17:17)
10 Pakuchita vinthu na azishamwali wathu. Pamoyo wathu, nthawe zinango tingakhale na nkhani yomwe tingafune kuuzako shamwali wapamoyo. Koma nthawe zinango vikhala voshupa kuti tiuze munthu munzathu. Panango tikondalini kuuzako anzathu momwe tinkubvera ndipo vingakhale vokwinyiririsa tikazindikira kuti shamwali wathu waulula nkhani yachintsintsi yatidamuuza. Koma tikhala wokondwa maninge tikazindikira kuti munzathu ankutisungira chintsintsi! Munthu akambasunga chintsintsi, ndiye kuti ni ‘shamwali chaiye.’—Lewengani Miyambo 17:17.
Akulu osati ambaulule nkhani zachintsintsi kwa akazi wawo panango kwa wanthu anango wa m’banja mwawo (Onani ndime 11) *
11. (a) Ko akulu na akazi wawo awonesa tani kuti ni wothembeka? (b) Ko tikupfunzira chani kuchokera kwa nkulu yemwe ayesesa kusunga chintsintsi cha ku mpingu na cha nkazi wake? (Onani foto.)
11 Mu mpingu. Akulu womwe asunga chintsintsi, ali ninge ‘malo yobishalirapo chimphepo na malo yoyoserapo nvula’ kwa abale na alongo. (Yes. 32:2) Timasuka kuwafotokozera momwe tinkubvera akulu mwawa, tichimbatsimikiza kuti auzelini munthu munango. Tifunikalini kuwachichimiza akulu kuti atifotokozereko nkhani zachintsintsi zomwe adasunga. Ndipo titembeja pomwe azikazi wa akulu, ndawa yakuti anyengereralini azimuna wawo kuti awasimbire nkhani zachintsintsi za ku mpingu. Nkazi munango wa nkulu adalewa kuti: “Nitembeja maninge ndawa yakuti amuna wangu asunga chintsintsi ndipo anifotokozerakolini va wanthu womwe achitiwa maulendo ya ubusa. Niyamikira maninge ndawa yonibisira vinthu vomwe olo nichidziwa palibe chaningachite. Vimwevi vinithandiza kuti nimbamasuke na munthu aliyese wa mumpingu mwathu. Ndipo nitsimikiza pomwe kuti nikafotokozera mwamuna wangu mabvuto yomwe ninkugumana nayo, angauzelini munthu munango.” Koma tose tichadekana kumbasunga chintsintsi osati akulu okha. Ko ni makhalidwe yaponi yomwe yangatithandize kuti tikwanise kuchita vimwevi? Naboni tikambirane makhalidwe yokwana yashanu.
KHALANI NA MAKHALIDWE YOMWE YANGATHANDIZE KUTI WANTHU AMBAKUTHEMBENI
12. Ndawa chani tingalewe kuti chikondi ndicho chingachitise kuti wanthu ayambe kutithemba? Perekani chitsanzo.
12 Chikondi ni khalidwe ikulu yomwe ingachitise kuti wanthu ambatithembe. Yesu adalewa kuti malamulo yakuluyakulu maninge niyakuti timbakonde Yahova na kukonda anzathu. (Mat. 22:37-39) Tikufuna kuyesesa kukhala wanthu othembeka ndawa yakuti tikonda maninge Yahova. Ndipo ndawa yokonda maninge abale na alongo wathu, tiyesesa kuwasungira chintsintsi. Tifunalini kuchita chinthu chomwe chingachitise kuti iwo achite manyazi panango kukwinyirira.—Yoh. 15:12.
13. Ko kudzichepesa kungatithandize tani kuti tikhale wothembeka?
13 Kudzichepesa kungatithandize pomwe kuti wanthu ambatithembe. Mkhrisitu wodzichepesa afunalini kuti pakachitika nkhani, iye ambakhale woyamba kuuza wanthu. (Afil. 2:3) Iye achitisalini wanthu kuganiza kuti iye adziwa nkhani zizinji zachintsintsi zomwe angafunikelini kuuza wanthu. Kudzichepesa kungatithandize pomwe kuti tipewe kumbandouza wanthu va mumsolo mwathu pa nkhani zomwe zifotokozewakolini m’Baibolo panango m’mabukhu yathu.
14. Ko kuzindikira kungatithandize tani kuti tikhale wothembeka?
14 Kuzindikira kungamuthandize Mkhrisitu kudziwa ‘nthawe yokhala chete na nthawe yofunika kuyankhula.’ (Mla. 3:7) M’madera yanango akonda kufotokoza kuti ‘kuyankhula kuli ninge siliva, koma kukhala chete kuli ninge golide.’ M’mawu yanango, tingalewe kuti nthawe zinango vikhala bwino kukhala chete kusiyana na kuyankhula. Ndipomwapa, lemba ya Miyambo 11:12 ilewa kuti: ‘Munthu wozindikira bwino akhala chete.’ Onankoni chitsanzo chibodzi. Nkulu munango wodziwa vinthu vizinji akonda kukumbiriwa na mipingu inango kuti adzathandize pa nkhani zoshupa. Pofotokoza va iye, nkulu munango adalewa kuti: “Iye asamala maninge kuti asambaulule nkhani zachintsintsi za m’mipingu yanango.” Kuzindikira kwa nkulu muyu kuchitisa kuti akulu wa m’mipingu yanango ambamulemekeze. Iwo ni wotsimikiza kuti iye angayeselini kuuza anango nkhani zawo zachintsintsi.
15. Perekani chitsanzo choonesa kuti kukhala wachilungamo kuchitisa kuti anango ambatithembe.
15 Kukhala wachilungamo kungatithandize pomwe kuti wanthu ambatithembe. Tithemba munthu wachilungamo ndawa tidziwa kuti nthawe zose atiuza chaivo. (Aef. 4:25; Aheb. 13:18) Mwakulinganiza, tilinganize kuti imwepo munkufuna kukulisa buya yopfunzisa. Ndipomwapa, munkukumbira munthu munango kuti akubvesereni pomwe munkuyeserera nkhani yanu kuti akuuzeni pamungakonze. Ko imwepo mungafune kuti akubisireni mbali zamungafunike kukonza? Panango mungafune kuti akuuzeni chaivo? Mdawiro ni wodziwikiratu. Baibolo ilewa kuti: ‘Kutsuula munthu mosabisa mawu kuli bwino kusiyana na kumukonda koma ne kumuonesadi chikondi. Vilonda vopwetekewa na munthu wokukonda vikhala bwino.’ (Miy. 27:5, 6) Podiya kuti yambe na yambe munthu akatiuza mosabisa vikhala vowawa, mawu yake yatithandiza kwa nthawe itali.
16. Ko lemba ya Miyambo 10:19 inkuonesa tani kuti khalidwe yodzilesa ni yofunika maninge?
16 Tichadekana soti kukhala wodzilesa peno tikufuna kuti anzathu ambatithembe. Khalidwe mweyi ingatithandize kuti timbaphate pakamwa pathu tikafuna kuulula nkhani zachintsintsi. (Lewengani Miyambo 10:19.) Vingakhale voshupa maninge kuti tikhale odzilesa, peno tikuphatisa basa interneti. Tikaleka kusamala, tingaulule nkhani zachintsintsi kwa wanthu azinji. Ndipo tikandotumiza nkhani yachintsintsi pa foni, tingakwaniselini kuibweza panango kukangisa mabvuto yomwe yangabwere. Khalidwe yodzilesa ingatithandize pomwe peno wanthu otsutsa ankutichichimiza kuti tiulule nkhani zachintsintsi zomwe zingaikhe moyo wa abale na alongo wathu pangozi. Vimwevi vingachitike peno mu dziko yathu basa yathu yalambiziwa ndipo mapolisi yankutipanikiza na mibvunzo. Vikakhala tene, tingachite bwino kuphatisa basa mpfundo yakuti ‘nidzamange pakamwa pangu kuti patetezeke.’ (Sal. 39:1) Peno tinkuchita vinthu na wanthu wa m’banja mwathu, azishamwali wathu, abale na alongo panango munthu aliyese, timbayesese kukhala munthu wothembeka. Ndipo kuti tikwanise kukhala munthu wothembeka, tichadekana kukhala wodzilesa.
17. Ko tingachite tani kuti timbakhale wothembana mumpingu?
17 Tinkutembeja maninge Yahova ndawa yakuti adatibweresa mu gulu ya abale na alongo womwe ni wothembeka maninge! Tose tichadekana kuyesesa kuti timbakhale wothembeka kwa abale na alongo wathu. Peno patekha tinkuyesesa kuti tikhale wachikondi, wodzichepesa, wozindikira, wachilungamo na wodzilesa, tingathandizire maninge kuti wanthu wose mu mpingu ambathembane. Tichadekanalini kuleka kuchita vinthu vomwe vingathandize kuti wanthu anzathu ambatithembe. Naboni tose tipitirize kutewedzera Yahova Mulungu wathu, pa kukhala wanthu wothembeka nthawe zose.
NYIMBO NA. 123 Tizigonjera Mulungu Mokhulupirika
^ Peno tikufuna kuti anzathu ambatithembe, tingachite bwino kuyesesa kukhala munthu wothembeka. Munkhani ino, tikambirane kuti ndawa chani tichadekana kumbathembana ndipo tione vomwe tingachite kuti anzathu ambatithembe.
^ Tikazindikira kuti munthu munango mu mpingu wachita chimo ikulu, tingachite bwino kumulimbikisa kuti akauze akulu kuti amuthandize. Tikaona kuti iye ankuyendalini, tingachite bwino isepano kuyenda kukawauza akulu kuti tionese kuti ndise wokhulupirika kwa Yahova.
^ MAWU YOFOTOKOZERA MAFOTO: Nkulu ankufotokozeralini wanthu wa m’banja mwake nkhani zachintsintsi za kumpingu.
