Pa 1 Akorinto 15:8, Paulo adati: ‘Pakumalizira pake, adawonekera kwa ine nili ninge kacheche wobadwa ntsiku zikalibe kukwana.’ Kalekale, timbafotokoza kuti pamwapa Paulo ambalewa va masomphenya yomwe adachita kuwona yekha Yesu ali mu ulemerero kudzulu. Timbalewa kuti adatsimikiziriwa kuti akandodzati wafa, adzamukisiwiretu na thupi yauzimu. Koma padakapita nthawe itali maninge kuti wodzozewa ayambe kumukisiwa nkuyenda kudzulu. Ndipomwapa, pataipfunzira bwino nkhani imweyi tawona kuti tichadekana kuchinja kabvekesedwe.

Ni shuwadi kuti pamwapa Paulo ambalewa va momwe iye adachinjira. Koma ko Paulo ambatanthauza chani padati iye wenze ninge ‘kacheche wobadwa ntsiku zikalibe kukwana’? Panavizinji vomwe ambatanthauza.

Kuchinja kwake kudachitika mwakankulumize ndipo adabva nako kuwawa. Nthawe zose vichitika mwadzidzidzi kuti kacheche abadwe ntsiku zikalibe kukwana. Panthawe yomwe Saulo (yemwe patsogolo pake adayamba kudziwika kuti Paulo) angayenda ku Damasiko kuti akadzudze Akhrisitu, ambadziwalini kuti angawone masomphenya yowonesa Yesu yemwe adamukisiwa. Kuchinja kwa Paulo kudachitika mwadzidzidzi ndipo kudadabwisa wanthu azinji kuphatanidzapo Akhrisitu omwe enze adathawira ku Damasiko. Koma kuchinja kumoku adabva nako kuwawa ndawa yakuti wenze adafungiwa maso yake kwakanthawe.—Mac. 9:1-9, 17-19.

Iye adachinja ‘panthawe yophonyeka.’ Mawu Yachigiriki yomwe adayatsumbudzulira kuti ‘kacheche wobadwa ntsiku zikalibe kukwana’ yangatanthauze pomwe kuti ‘mwana yemwe wabadwa panthawe yophonyeka.’ Baibolo yakuti The Jerusalem Bible pakufotokoza nkhani mwiyi ilewa kuti: ‘Venze ninge iye ankulewa kuti nidabadwa panthawe yomwe wanthu azinji ambadikhiralini.’ Panthawe yomwe Paulo adachinja, nkuti Yesu wabwerera kale kudzulu. Paulo wenze wosiyana maninge na wanthu wadatomola m’mavesi yapadzulu ndawa yakuti iye alibe kumuwonako Yesu ankuyenda kudzulu. (1 Akor. 15:4-8) Koma masomphenya yadawona yadamupasa mwayi woonako Yesu womukisiwa podiya vimbawoneka kuti vidamuchitikira ‘panthawe yophonyeka.’

Adawonesa kuti ni wodzichepesa podzifotokoza mwanjira mweyi. Wanthu anango wopfunzira Baibolo adati pamwapa Paulo ambadziderera. Peno ndimo mwangadziwoneradi Paulo, ndiye kuti ambawona kuti ni wosayenerera kuchita utumiki wadapasiwa. Panango vimwivi ndivo vidachitisa kuti nthawe inango alewe kuti: ‘Ndine mng’ono maninge pa atumi wose ndipo ndinelini woyenerera kuchemerewa mtumi, ndawa nidadzudza mpingu wa Mulungu. Koma ndawa ya kukoma mtima kukulu kwa Mulungu, nili ninge mwaniliri umu.’—1 Akor. 15:9, 10.

Vinkuwoneka kuti pakufotokoza mawu mwaya, Paulo ambalewa va momwe Yesu adawonekera kwa iye mwadzidzidzi na kuchinja kwake komwe kudachitika mwakankulumize. Iye ambawona pomwe kuti ni wosayenerera kuwonesewa masomphenya mwaya. Vilibe basa kuti Paulo adalewa mawu mwaya ndawa ya chani, koma chomwe tinkudziwa nchakuti iye adatsimikizira kuti Yesu adamukisiwadi. Ni vosachita kubvunza kuti Paulo ambaphatisa basa nkhani ya kumukisiwa kwa Yesu pofuna kutsimikizira wanthu kuti wakufa adzamukisiwedi.—Mac. 22:6-11; 26:13-18.