1. Ko nchani chomwe Yahova adakuchitirani?

KO IMWEPO mudakhala tani Mboni ya Yahova? Chakuyamba, imwepo mudabva ‘ntontholo wabwino,’ panango mudapfunzira na azibereki, anzanu wa kubasa, wakushikola panango ndawa yolalikira muyi na muyi. (Maliko 13:10) Patsogolo pake munthu adatenga nthawe komasoti adachita khama pakukupfunzisani Baibolo. Pamungapfunzira Baibolo, mudayamba kukonda Yahova ndipo mudapfunzira kuti iye achakukondani. Yahova adakukwekweterani ku chowonadi, achakudziwani ndawa ndimwe wopfunzira wa Yesu Khrisitu, ndipo munachidikhiro cha moyo wosapera. (Yoh. 6:44) Mwachidziwikire, ndimwe wotembeja ndawa yakuti Yahova adachitisa kuti munthu akupfunziseni choonadi ndipo Iye adakubvumani kuti mukhale ntumiki Wake.

2. Ko tikambirane chani mu nkhani ino?

² Manje pakuti tadziwa chowonadi, tinamwayi wothandiza anango kuyenda munjira ya kumoyo. Tichabva bwino tikambalalikira muyi na muyi, koma vitishupa kuzindikira peno munthu achada kupfunzira Baibolo. Ko imwepo muchabvambo chibodzibodzi? Peno ni teno, mugumane mpfundo zinango zomwe zingakuthandizeni. Tikambirane vomwe vichatilimbikisa kupfunzisa wanthu. Komasoti tikambirane momwe tingapiririre mabvuto yomwe yangatichitise kuzeza kukachitisa pfunziro. Chakuyamba, naboni tikambirane momwe tingachitire kuti osati timbandolalikira chabe, koma na kupfunzisa ntontholo wabwino.

3. Ndawa chani tichalalikira?

³ Pomwe Yesu wenze padziko, adauza wopfunzira wake kuti ambabale vipaso. Chakuyamba, iye adawauza kuti yendani mukalalikire  ntontholo wabwino wa Ufumu, ndipo adawawonesa momwe angachitire vimwevi. (Mat. 10:7; Luka 8:1) Chinthu chinango chadachita, adakonzekeresa wopfunzira wake pakuwauza kuti anango angakabvume koma anango angakalambe ntontholo wa Ufumu. (Luka 9:2-5) Iye adawauza soti kuti ‘adzalalikire wanthu’ wa mitundu yose. (Mat. 24:14; Mac. 1:8) Viribe basa peno wanthu adakabvuma olo kulamba, koma Yesu adawauza kuti akalalikire wanthu va Ufumu wa Mulungu, ndipo angada kuti vimwevi vichitike.

4. Mobverana na Mateyu 28:18-20, nchani chatichadekana kuchita kuingizira pa kulalikira va Ufumu?

⁴ Ko ni chinthu chinango chiponi chomwe Yesu adalamula? Iye adawauza kuti ambakapfunzise wanthu kusunga vinthu vose vomwe adalamula. Anango achati vigadekana kuchitika na Akhrisitu oyambirira chabe, ko vimwevi ni shuwadi? Neye, Yesu adanena kuti basa mweyi idzachitiwe mpakana ntsiku zathu zino, ndipo iye adati ‘mpakana mapeto ya nthawe ino.’ (Lewengani Mateyu 28:18-20.) Yesu adanena vimwevi pomwe adawonekera kwa wanthu woposha 500. (1 Akor. 15:6) Ndipo mumasomphenya ya Yohane, Yesu adawoneseratu kuti wopfunzira wake adzathandize anango kupfunzira va Yahova.​—Chiv. 22:17.

5. Mobverana na 1 Akorinto 3:6-9, ko ni chani chomwe Paulo adalinganiza nacho basa ya kulalikira na kupfunzisa?

⁵ Ntumi Paulo adalinganiza basa yopfunzisa na kulima mbewu, powonesa kuti tichadekana kuchita vizinji kuposha kubzala mbewu basi. Iye adakumbusa Akorinto kuti: ‘Ine nidabyala, Apolo adathiriza . . . Imwepo ndimwe munda wa Mulungu, yemwe ankulimiwa.’ (Lewengani 1 Akorinto 3:6-9.) Ninge wophata basa ‘m’munda wa Mulungu’ tichadekanalini kundobyala neye koma tichadekana kuthiriza na kumbayendendeza kuti tiwone mwazikukulira mbewu. (Yoh. 4:35) Nthawe ibodzibodzi, tichadekana kukhala tichidziwa kuti ni Mulungu yemwe achakulisa mbewu.

6. Ko basa yathu yolalikira ichaphatanidzapo chani?

⁶ Tinkufaga wanthu anamitima yabwino kuti ‘adzagumane moyo wosapera.’ (Mac. 13:48) Kuti tithandize wanthu mwawa kuti akhale wopfunzira, tichadekana kuwathandiza kuti (1) abvese, (2) abvume na (3) kuphatisira basa vomwe ankupfunzira Baibolo. (Yoh. 17:3; Akol. 2:6, 7; 1 Ates. 2:13) Wose mumpingu angathandize mapfunziro ya Baibolo mwakukhala chitsanzo chabwino, kuwakonda na kuwachitisa kudzibva kuti watambiriwa akabwera kumisonkhano. (Yoh. 13:35) Kuti munthu ambachitise pfunziro ya Baibolo achadekana kugumana nthawe, kuphatisira basa mphanvu kuti athandize wopfunzira kusiya vikhulupiriro na ‘vinthu vozikika’ m’moyo mwake. (2 Akor. 10:4, 5) Vimwevi vingatenge minyezi yazinji kuti munthu awonese kuchinja pa moyo wake na kuyenerera kubatizika. Koma akachinja vichakhala bwino maninge.

7. Ko ni chani chichatilimbikisa pa basa yolalikira na kupfunzisa?

⁷ Ndawa yanyi tilalikira na kupfunzisa wathu kuti akhale wopfunzira? Chakuyamba, ndawa tichakonda Yahova. Mukambachita vose vamugakwanise kuti mubvere vomwe Yesu adalamula vomwe ni kulalikira na kupfunzisa, muchakhala mukuwonesa chikondi chanu kwa Mulungu. (1 Yoh. 5:3) Kumbukani ivi: Chikondi chanu kwa Yahova ndicho chichakuchitisani kulalikira. Ko venze voshupa kutewedza lamulo mweyi? Mwachidziwikire neye. Pomwe mudafika pa nyumba yoyamba pakulalikira, ko mwenze kalipe? Vingachitike. Koma imwepo mudadziwa kuti imweyi ni basa yomwe Yesu adakupasani kuti mumbaichite, ndipo  muchabvera lamulo mweyi. Ndipo mwachidziwikire ndawa yakuti mwadjaira kulalikira manje, mulibe mantha pa basa mweyi. Koma, ko tani pa nkhani ya kuchitisa mapfunziro ya Baibolo? Ko muchabva ukali mukambakumbuka va mapfunziro? Peno viritene, dziwani kuti Yahova angakuthandizeni mukamukumbira kuti mukhale olimba moyo. Yahova angakuthandizeni kulimbisa shungu yanu yopfunzisa.

8. Mobverana na Maliko 6:34, ko ni chani chichatichitisa kupfunzisa anango?

⁸ Chachiwiri, chikondi chathu kwa anzathu chichatichitisa kuwapfunzisa chowonadi. Nthawe inango Yesu na wopfunzira wake wenze adaneta na basa yolalikira. Iwo angada malo yomwe adakapumulako, koma chigulu cha wanthu chidawalondola. Ndawa yakuwabvera chisoni, Yesu adawapfunzisa wanthu ‘vinthu vizinji.’ (Lewengani Maliko 6:34.) Iye wenze adaphata basa maninge podiya kuti wenze woneta. Ndawa chani? Yesu adayikha pamalo yakuyamba vofuna va gulu ire osati vake. Iye adawathandiza ndawa angadekana chithandizo ndipo ambabonera ndipomwapa angadekana chidikhiro. Wanthu azinji ntsiku zino alimbo ninge iwo. Iwo alibe chidikhiro olo moyo wokondwa. Ali ninge nkhosa zilibe nyakabusa wakuzitsogolera ndipo zichadekana chithandizo. Ntumi Paulo adanena kuti wanthu watene achamudziwalini Mulungu ndipo alibe chidikhiro. (Aef. 2:12) Iwo ‘ali munjira yoyenda kukachenekewa.’ (Mat. 7:13) Tikambaganizira kuwanda kwa wanthu womwe ankufunika kudziwa Mulungu mudera yathu, chikondi na chifundo vidzachitise kuti tiwathandize. Ndipo njira yabwino yochitira vimwevi ni kumbapfunzira nawo Baibolo.

9. Mobverana na Afilipi 2:13, ko Yahova achatithandiza tani?

⁹ Mungambabve ulesi ndawa yakuti, mukudziwa kuti muchadekana nthawe izinji na mphamvu kuti mumbachitise pfunziro ya Baibolo. Peno ni teno muuzeni Yahova momwe munkubvera. Mukumbireni kuti akuthandizeni kukhala na shungu yokhala na kuchitisa pfunziro. (Lewengani Afilipi 2:13.) Ntumi Yohane ankutitsimikizira kuti Mulungu adzadawire mapemphero yathu mobverana na chifuniro Chake. (1 Yoh. 5:14, 15) Ndipomwapa mungakhale na chitsimikizo kuti Yahova adzakuthandizeni kukhala na shungu ya kuchitisa mapfunziro.

10-11. Ko ni chani chingatichitise kumbazeza kuchitisa pfunziro?

¹⁰ Tichaitengera siriyasi basa yopfunzisa podiya kuti tigumane na mabvuto, ndipo vimwevi vichatichitisa kuchita vose vatingakwanise pakupfunzisa wanthu. Naboni tikambirane yanango mwa mabvuto na momwe tingayapiririre.

¹¹ Kukanga kuchita vinthu vizinji vomwe tichada. Mwakulinganiza, wofalisa anango niwachikulire panango anamoyo wodwaladwala. Ko imwepo munkugumana na vimwevi? Peno ni teno, wonankoni chinthu chibodzi pa vinthu vizinji vatidapfunzirapo na nthenda ya COVID-19. Tidazindikira kuti tingachitise mapfunziro pa vipangizo vachizungu. Ndipomwapa kuchitisa mapfunziro muli kumuyi kwanu ni kosashupa. Komasoti pali chinthu chinango. Anango achakondwa kupfunzira Baibolo, koma nthawe yomwe abale wathu ayenda kumuyi kwawo, iwo agumanikalini. Koma, kazinji-kazinji, achagumanika machibesebese na kumaulo chaiko. Ko imwepo mungadzipereke kuti mupfunzire nawo wanthu nthawe mweyi? Yesu adapfunzisa Nikodemo usiku ndawa yenze nthawe yabwino kwa Nikodemo.​—Yoh. 3:1, 2.

12. Ko ni chani chomwe chikutsimikizira tingakwanise kukhala wopfunzisa wabwino?

 ¹² Kuganiza kuti tilibe buya yochitisa pfunziro. Panango tingambakumbuke kuti tichadekana nzeru na buya tikanati tayamba kupfunzira na munthu. Peno muchaganiza teno, wonani mpfundo zitatu zomwe zingadzakuthandizeni kutsimikiza kuti mungatsogoze pfunziro. Chakuyamba, Yahova achawona kuti imwepo ndimwe woyenerera kupfunzisa anango. (2 Akor. 3:5) Chachiwiri, Yesu yemwe adapasiwa udindo kudzulu na padziko yapasi adakutumani kuti mukapfunzise. (Mat. 28:18) Ndipo chachitatu, imwepo mungathembe anango kuti akuthandizeni. Yesu adanena kuti adapfunzisiwa na Ababa wake vomwe anganene, imwepombo nichibodzibodzi. (Yoh. 8:28; 12:49) Kuyingizira mwapa, mungabvunze wonyang’anira kagulu kanu, apainiya wa chitsanzo chabwino, olo wofalisa wakalekale kuti akuthandizeni kuyambisa na kuchitisa pfunziro. Njira ibodzi yomwe mungapfunzirire kukhala wopfunzisa wabwino ni kuyenda nawo pabodzi wofalisa pomwe iwo ankukachitisa mapfunziro ya Baibolo.

13. Ndawa chani tichadekana kuchinja vinthu vikachinja?

¹³ Kugumana njira zinyowani zolalikirira kungakhale koshupa. Njira yopfunzisira Baibolo idachinja. Bukhu yathu manje ni Kondwani na moyo mpaka kalekale! Ndipo ichada kuti timbakonzekere bwino pfunziro iliyose yomwe tikachitise, vimwevi ni vosiyana na momwe venzere kale. Tichalewenga ndime zidikikidi ndipo tichakhala na macheza na pfunziro. Pomwe tikupfunzisa, tinkuphatisira basa mavidiyo yazinji na vitsulo vofagira, ninge JW Library^®. Peno imwepo vikukushupani kuphatisira basa vitsulo mwevi, kumbirani kuti munthu akuthandizeni kuvipfunzira. Timbachinje vinthu vikachinja. Koma ni nkhanilini ya masenzeka kuti tidjaire njira zinyowani zochitira vinthu. Koma ninge Yahova achathandizira anango angakuthandizenimbo, ndipo imwepo mudzawone kuti nivosashupa kuchinja ndipo mudzakondwe kupfunzisa wanthu. Mpainiya munango adanena kuti: ‘Nivokomedza kwa wopfunzira na wopfunzisa’ kuphatisira basa njira zimwezi.’

14. Ko tichadekana kukumbukira chani peno tikuphata basa mudera yoshupa, ndipo ko lemba ya Akorinto 3:6, 7 ikutilimbikisa tani?

¹⁴ Tikambakhala mudera yomwe niyoshupa kuyambisa mapfunziro. Wanthu anango alibe chidwi na ntontholo wathu. Ko ni chani chichatithandiza kukhala na maganizo yabwino? Kumbukirani kuti vinthu vingachinje pamoyo wa wanthu mudziko ya Satana iyi, ndipo wanthu womwe wenze alibe chidwi angayambe kufuna kubva ntontholo wabwino. (Mat. 5:3) Wanthu anango omwe pakuyamba nthawe zose ambalamba kutambira mabukhu yathu, manje ankubvuma kupfunzira Baibolo. Tikudziwa soti kuti Yahova ndiye ankutsogolera basa yokolola. (Mat. 9:38) Iye achada kuti tipitirize kubzala na kuthiriza, koma Iye ndiye anaudindo wokulisa. (1 Akor. 3:6, 7) Ndipo ni volimbikisa maninge kudziwa kuti podiya tiribe pfunziro yathu-yathu manjeuno, Yahova ankudalisa khama yathu osati votsatira va basa chabe! *

15. Ko Yahova achabva tani munthu akabvuma kupfunzira Baibolo na kuphatisira basa vomwe ankupfunzira?

¹⁵ Yahova achakondwa munthu akabvuma chowonadi cha m’Baibolo na kumbauzambo anango va chowonadi icho. (Miy. 23:15, 16) Yahova achakondwa maninge akambawona  vomwe vinkuchitika ntsiku zino. Mwakulinganiza, podiya kuti kwenze nthenda ya koronaviru mu 2020, mapfunziro ya Baibolo yokwana 7.705.765 yadachitisiwa ndipo vidachitisa kuti wanthu wokwana 241.994 adzipereke kwa Yahova na kubatizika. Ndipo wopfunzira anyowani mwawa, athandizembo anango kuti akhale wopfunzira. (Luka 6:40) Mulimose mwavingakhalire, tichachitisa Yahova kukhala wokondwa tikambaphata basa yopfunzisa wanthu.

16. Ko tingakhale na cholinga chabwino chiponi?

¹⁶ Kupfunzisa wanthu ni basa ikulu, koma Yahova ankutithandiza kuti wanthu ayambe kukonda Ababa wathu wakudzulu. Ko tinacholinga cha kuyambisa na kuchitisa pfunziro ya Baibolo? Tingadzadabwe kuwona vomwe vingadzatichitikire tikayesesa kupatula nthawe yopfunzira na wanthu wachidwi. Tingakhale na chitsimikizo chakuti Yahova adzadalise khama yathu.

17. Nchani chidzachitike tikambachitisa mapfunziro ya Baibolo?

¹⁷ Tinamwayi ukulu wolalikira na kupfunzisa anango va chowonadi. Basa mweyi itichitisa kukhala wokondwa maninge. Mtumi Paulo adathandiza Atesalonika azinji kukhala wopfunzira. Adafotokoza momwe angabvera pakunena kuti: ‘Ko chidikhiro chathu panango chimwemwe chathu ni chani? Inde, mphoto yathu yomekera pamaso pa Ambuya wathu Yesu panthawe ya kukhalapo kwake ni chani? Ndimwepolini? Shuwadi, imwepo ndimwe ulemelero wathu na chimwemwe chathu.’ (1 Ates. 2:19, 20; Mac. 17:1-4) Wanthu azinji ntsiku zino achabvambo chibodzibodzi. Kwa nthawe itali mulongo Stéphanie na mwamuna wake akhala ankuthandiza wanthu azinji kupita patsogolo na kubatiziwa. Iye adati: ‘Chimwemwe chake nchosasimbika munthu akadzipereka kwa Yahova.’