Yahova afuna maninge kuti wanthu awiri womwe alowolana ambakhale wokondwa na wobverana maninge. (Mat. 19:4-6) Peno imwepo munkufuna kungena m’banja, ko mungamugumane tani munthu wolowolana naye? Pakuti Yahova ni Mulengi wathu, iye ndiye ankudziwa bwino vatingachite kuti tidzakhale na banja yokondwa. Ndipomwapa imwepo mukaphatisa basa malangizo yake, mudzakhaledi wokondwa. Wonankoni mpfundo zinango zothandiza.

Mpfundo yoyamba yomwe tinkufunika kuibvesa ni yakuti: ‘Mtima ni wonyenga ndipo ungachite chilichose choipa.’ (Yer. 17:9) Peno wanthu awiri ankufuna kulowolana ndipo acheza nthawe na nthawe pa intaneti, chikondi chawo chingakule kankulumize. Vimwivi vingachitise kuti akange kusankhula mwanzeru. Peno wanthu angatengane ndawa ya momwe ankubvera, angakhumudwe patsogolo pake. (Miy. 28:26) Ndipomwapa ni bwinolini kuti wanthu awiri ayambe kukondana maninge akanati kudziwana bwinobwino.

Lemba ya Miyambo 22:3 inena kuti: ‘Wochenjera ni ule yemwe achati akawona tsoka abishala, koma wanthu wosadziwa vinthu andoyendambouko ndipo agumana na mabvuto.’ Ko ni ngozi yanyi ingakhalepo peno munthu wolowolana naye tinkumufagira pa intaneti? Wanthu anango adadziwana na munthu pa intaneti nkuyamba kucheza naye nkupangana vakuti alowolane, koma patsogolo pake adazindikira kuti adawabisa vinthu vinango nkuwauza visali ivo. Ndipo wanthu anango adzibisa nkuchita vinthu mwachinyengo kuti andobera wanthu kobiri. Ndipo nthawe zinango wanthu wateneuyu anamizira kuti ni wa Mboni.

Wonani pomwe ngozi inango. Mawebusaiti yanango yachita masamu nkuwona kuti ni wanthu aponi womwe angalowolane. Koma palibe umboni wowonesa kuti vithandizadi. Ni nzerulini kuthemba pologalama za pa kompiyuta zokonzewa na wanthu pakufuna kudziwa kuti ni munthu mponi angakhale woyenerera kulowolana naye. Mapologalama ya pa kompiyuta yangatithandizelini ninge mwazingatithandizire mpfundo za m’Baibolo.​—Miy. 1:7; 3:5-7.

Mpfundo yomwe tichagumana pa Miyambo 14:15 ichati: ‘Munthu yemwe achadziwalini vinthu achandokhulupirira vilivose, koma wochenjera achaganizira momwe ankufambira.’ Tikanati kutsimikizira munthu yemwe tichada kumanga naye banja, chakuyamba tichadekana kumudziwa bwino.  Koma kumudziwira pa intaneti kungakhale koshupa maninge. Podiya kuti imwepo muchatumizirana mafoto panango muchamala nthawe itali munkutumizirana mensaje, ko mungalewe kuti muchamudziwa bwino munthu moyu? Wanthu anango womwe ambawona kuti amugumana munthu wakuti amange naye banja pakuphatisa basa intaneti adadzilinga pomwe adakawonana naye maso na maso.

Wa Masalimo adati: ‘Nikhalalini pasi pabodzi na munthu wachinyengo, ndipo nichabveranalini na wanthu wobisa umunthu wawo.’ (Sal. 26:4) Wanthu azinji achawona kuti nkuphonyalini kumbaikha mafoto yabodza pa intaneti akakhala pa chibwenzi na chakulinga chakuti afuniwe. Iwo angabise umunthu wawo panango kusadziwonesera bwino-bwino pa intaneti. Pomwe wanthu anango angadziwonesere ninge wa Mboni za Yahova, ninge Akhrisitu wobatizika. Ko ni munthu wauzimu? Ko ali pa ushamwali wakulimba na Yahova? Ko achalemekezewa mu mpingu wawo? Ko angakhale chitsanzo choipa panango ‘shamwali woipa?’ (1 Akor. 15:33; 2 Tim. 2:20, 21) Ko ni womasuka mwa malemba kuti angalowodwe panango kulowola? Imwepo muchadekana kudziwa vose mwevi, koma peno vinkushupa kugumana midawiro ya mibvunzo mwaya, kumbirani m’bale panango mulongo kuti akuthandizeni. (Miy. 15:22) Nishuwadi kuti ntumiki wokhulupirika wa Yahova angafunelini ‘kudzimanga mudjoko’ na wosakhulupirira.​—2 Akor. 6:14; 1 Akor. 7:39.

Pakuti tawona ngozi yobwera ndawa yofaga wolowolana naye pa intaneti, tingachite bwino kuwona njira zatingadziwire bwino munthu yemwe tinkufuna kulowolana naye. Ko mungamugumane tani munthu wabwino kulowolana naye? Vikakhala kuti kuchita misonkhano pabodzi kunkulambiziwalini, Mboni za Yahova zichawona kuti kuchitira pabodzi misonkhano ya mpingu, yadera, yachigawo na misonkhano yanango ni njira yabwino yodziwirana.

Peno vinkukwanisikalini kusonkhana pabodzi panango ndawa ya matenda ya koronaviru, tichaphatisa basa vipangizo vachizungu pakuchita misonkhano ya mpingu kuti tidziwane bwino na m’bale panango mulongo yemwe tinkumufuna. M’misonkhano mwaya mungawone momwe iye achachitira vinthu vauzimu. (1 Tim. 6:11, 12) Imwepo mungacheze naye misonkhano ikamala. Peno munkucheza naye pakagulu pomwe pana Mboni zokhazokha, mungazindikire kuti iye achitatani vinthu na anzake, ndipo mungakwanise kudziwa umunthu wake. (1 Pet. 3:4) Nkuyenda kwa nthawe, mungadziwe peno imwepo munavolinga volingana nakuti peno vingakhale bwino kulowolana naye.

Munthu akambafaga munzake kuti alowolone naye pakuphatisa basa mpfundo za m’Baibolo, adzakhale na banja yabwino ninge mwichanenera lemba ya Miyambo kuti: ‘Ko munthu wagumana nkazi [panango mwamuna] wabwino? Ndiye kuti wagumana chinthu chabwino ndipo Yahova akondwa naye.’​—Miy. 18:22.