1. Ko Paradaiso wauzimu ni chani ndipo ni chani chomwe tichadekana kukhala otsimikiza kuchita?

 NTSIKU zino pa dziko yapasi pa na Paradaiso womwe wanthu azinji ankukhalamo mwantendere ndipo anabasa zizinji kuti achite. Wanthu omwe ali mu Paradaiso moyu ni otsimikiza kuti abulemolini, ndipo ankufunisisa kuti wanthu azinji akhalembo mu Paradaiso moyu. Ko Paradaiso moyu ni chani? Ni Paradaiso wauzimu! a

2. Ko chokomedza maninge ni chani tikambalewa va Paradaiso wauzimu?

² Ni vodabwisa kuona momwe Yahova wakonzera malo yabwino mu dziko yomwe Satana waisandusa kukhala yoipa, yachizondo na yogopsa. (1 Yoh. 5:19; Chiv. 12:12) Mulungu wathu wachikondi adziwa bwinobwino kuipa kwa kukhala mu dziko yoipa mweyi, ndawa ya vimwevi iye achatiteteza kuti tipitirize kukula mwauzimu kuti tikwanise kupitiriza kumutumikira mokondwa. Baibolo ifotokoza va Paradaiso wauzimu ninge ‘malo yothawirako’ na ‘munda wothiriziwa bwino.’ (Yes. 4:6; 58:11) Na madaliso ya Yahova, wanthu omwe ali muparadaiso wauzimu angadzibve okondwa na otetezeka podiya kuti ankukhala mu ntsiku zomalizira zino zomwe ni zoshupa maninge.—Yes. 54:14; 2 Tim. 3:1.

3. Ko ni lini pomwe mapolomisi ya pa lemba ya Yesaya 65 yadakwanirisika koyamba?

³ Yahova adaphatisa basa mneneri Yesaya kuti afotokoze momwe moyo udzakhalire mu Paradaiso wauzimu. Imwepo mungawerenge vomwe iye adanena pa lemba ya Yesaya msolo 65, ulosi moyu udakwanirisiwa koyamba mu gole ya 537 Yesu akanati wabwera, pomwe Ayuda adamasuliwa ku ukapolo ku Babulo ndipo adakwanisa kubwerera kudziko yawo yobadwira. Yahova adadalisa  wanthu wake ndipo adathandiza pomwe Ayuda kumanga pomwe thaundi ya Yerusalemu yomwe yenze idadzongewa. Ayuda adakonza Yerusalemu kukhala malo yabwino kukhala ndipo adakonza pomwe kachisi kuti yakhale malo yakulu yotumikirira Yahova ku Izirayeli.—Yes. 51:11; Zek. 8:3.

4. Ko ntsiku zino lemba ya Yesaya 65 inkukwanirisika tani?

⁴ Kukwanirisiwa kwachiwiri kwa ulosi wa Yesaya kudayamba mu gole ya 1919 Yesu wayenda kale kudzulu. Mu gole mweyi atumiki wa Yahova wa ntsiku zino adamasuliwa ku Babulo nkulu. Ni pamwapa pomwe Paradaiso wauzimu udayamba kukula ndipo mipingu yazinji yadakhazikisiwa pa dziko yose. Amuna na akazi omwe pakuyamba ambakonda vinthu vachigololo na kuchita vinthu voipa, adayamba kuwonesa makhalidwe yabwino ya Chikhrisitu na ‘kuvala umunthu unyowani omwe udalengewa na chifuniro cha Yahova.’ (Aef. 4:24) Ni shuwadi kuti madaliso yazinji yomwe Yesaya adanemba yadzakwanirisiwe bwinobwino mu dziko inyowani. Koma olo ntsiku zino wanthu omwe ali mu Paradaiso wauzimu angakhale na madaliso yazinji. Naboni tione kuti ndawa chani ni vabwino kukhala mu Paradaiso wauzimu nakuti ndawa chani tichadekanalini kubula mu Paradaiso moyu.

KO MUCHABVA TANI KUKHALA MU PARADAISO WAUZIMU?

5. Mobverana na Yesaya 65:13, ko ni madaliso yaponi yomwe tinayo ndawa yokhala mu Paradaiso wauzimu?

⁵ Wathanzi na odyesewa bwino. Ulosi wa Yesaya uwonesa kusiyana kukulu komwe kulipo pakati pa wanthu omwe ali mu Paradaiso wauzimu na wale omwe alirini mu Paradaiso moyu. (Werengani Yesaya 65:13.) Yahova achapereka vose kuposha vomwe atumiki wake ankudekana kuti apitirize kumutumikira. Iye atipasa mzimu wake uchena, Mawu yake na chakudya chizinji chauzimu kuti tikwanise ‘kudya, . . . kumwa, . . . [nakuti] tikhale okondwa.’ (Onani pomwe Chivumbulutso 22:17.) Momwe vinthu viliri pa moyo wathu ni vosiyana maninge na wanthu omwe ali kunja kwa Paradaiso wauzimu moyu. Wanthu mwawa achabonera na ‘njala . . . , nyota . . . , [komasoti] achachita manyazi.’ Iwo achadzibva kuti ankushota chinthu chinango ndawa yakuti alirini pa ushamwali na Yahova.—Amosi 8:11.

6. Ko lemba ya Yoweli 2:21-24 ifotokoza tani vinthu vinango vomwe Yahova atipasa, ndipo tingaphindule tani na vose mwevo?

⁶ Mneneri munango dzina yake Yoweli adaphatisa basa vinthu va ntsiku na ntsiku ninge tirigu, vinyu na mafuta pakufuna kuonesa kuti Yahova ni wopasa. Ndipomwapa iye achatipasa vose vomwe tichadekana mwauzimu. (Yow. 2:21-24) Yahova achachita vimwevi pakuphatisa basa mabukhu yathu, Baibolo, saiti ya jw.org ndipo achaphatisira pomwe basa misonkhano ya mpingu, ya dera na ya chigawo. Tikambaphatisira basa vinthu vose vomwe Yahova achatipasa, isepano tidzakhale na thanzi yabwino na okhuta mwauzimu.

7. Ko nchani chomwe chitithandiza kuti tikhale na ‘ntima wabwino’? (Yesaya 65:14)

⁷ Okondwa na okhutira. Wanthu wa Yahova ‘angakuwe mokondwa’ ndawa mitima yawo ni yodzadza na kukondwa ndawa ya vomwe Yahova achachita. (Werengani Yesaya 65:14.) Isepano ‘tina ntima wabwino’ ndawa ya chonadi cha m’Baibolo chomwe chitilimbikisa komasoti ndawa ya chidikhiro chathu chothembeka chochokera pa ntsembe ya dipo ya Yesu Khrisitu. Kuingizira mwapa kucheza na abale na alongo wathu va vinthu vabwino mwevi vitichitisa kuti timbakhale okondwa!—Sal. 34:8; 133:1-3.

8. Ko ni makhalidwe yawiri yaponi yomwe yachita mbali ya Paradaiso wauzimu?

⁸ Paradaiso wauzimu uchafotokozewa bwinobwino na makhalidwe yawiri aya: Chikondi na ‘kubverana’ kwa wanthu wa Yahova. Kubverana kumoku kuchawonesa momwe moyo udzakhalire mu dziko inyowani pa nthawe yomwe adzakhale okondana na obverana maninge kuposha momwe  achakhalira ntsiku zino. (Akol. 3:14) Mulongo munango adafotokoza vomwe iye adazindikira pa nthawe yoyamba pomwe adadziwa wa Mboni za Yahova. Iye adati: “Nimbadziwalini vomwe ningachite kuti nikhale wokondwa olo m’banja yangu. Pa nthawe yoyamba pomwe nidawona wanthu ankuchitirana vinthu mwachikondi ni wa Mboni za Yahova.” Munthu aliyese yemwe ankufuna kukhala wokondwa komasoti wokhutira achadekana kudziwa Paradaiso wathu wauzimu. Wanthu angalewe virivose vomwe angafune kwa wa Mboni za Yahova. Koma isepano tinkudziwa kuti tinadzina yabwino komasoti mbiri yabwino kwa Yahova na kwa abale na alongo wathu pa dziko yose.—Yes. 65:15.

9. Mobverana na lemba ya Yesaya 65:16, 17, ko nchani chomwe chidzachitikire vinthu vomwe vitichitisa kuti timbabonere?

⁹ Odekha. Pa lemba ya Yesaya 65:14 tiwerenga va wanthu wale omwe asalula kukhala kunja kwa Paradaiso wauzimu. Iwo ‘achalira ndawa ya kuwawiwa ntima ndipo achalira pomwe ndawa ya vowawa va muntima mwawo.’ Manje ko tani mabvuto yomwe yakhala yakuboneresa wanthu wa Mulungu? ‘Vinthu vimwevi manjemanje vidzayebweke ndipo vidzabisike m’maso mwa [Mulungu].’ (Werengani Yesaya 65:16, 17.) Yahova adzamalise mabvuto yathu ndipo nkuyenda kwa nthawe maganizo yoipa yomwe yachachitisa kuti timbawawiwe yadzamaliretu.

10. Ko ndawa chani muchawona kuti ni daliso kukhala pabodzi na abale na alongo? (Onani pomwe foto.)

¹⁰ Olo ntsiku zino isepano tikhala omasuka tikakhala kuti tayenda kumisonkhano yathu, misonkhano yatithandiza kuti tileke kukhala na nkhawa mu dziko yoipa iyi. Tikawonesa makhalidwe yomwe yachachita mbali ya vipatso va mzimu uchena ninge chikondi, chimwemwe, ntendere, kukoma ntima na kufatsa isepano tithandizambo kuti mu Paradaiso wauzimu mukhale wanthu ofatsa na wantendere. (Agal. 5:22, 23) Kwa tose isepano ni daliso ikulu maninge kukhala pabodzi mu gulu ya Mulungu. Omwe apitirize kukhala mu gulu ya Mulungu, manjemanjepa adzawone kukwanirisiwa kwa mapolomisi ya Mulungu ya ‘kulenga kudzulu kunyowani na dziko yapasi inyowani.’

11. Mobverana na Yesaya 65:18, 19, ko muchabva tani pakuona kuti Yahova adakonza Paradaiso wauzimu?

¹¹ Otembeja na wachimwemwe. Yesaya ankutipasa chifukwa chinango chotichitisa ‘kukhala okondwa’ m’paradaiso wauzimu. Nkhani ni yakuti Paradaiso moyu ni cholengewa cha Yahova. (Werengani Yesaya 65:18, 19.) Magulu yomwe wanthu akonza yapfunzisalini wanthu va Mulungu. Ndawa ya vimwevi ni vobveka kuti Yahova ankutiphatisa basa kuti tithandize wanthu mwawa kuchoka mumagula mwayo kuti iwo achitembo mbali ya Paradaiso wabwino maninge wauzimu moyu. Isepano tichakhala okondwa maninge  ndawa ya madaliso yomwe tichatambira ndawa ya kukhala mu chonadi ndipo tinkufuna kuuza wanthu azinji va madaliso yabwino mwaya.—Yer. 31:12.

12. Ko imwepo muchabva tani mukambawerenga mapolomisi ya pa Yesaya 65:20-24, ndipo ndawa chani?

¹² Ko tichakondwalini ndawa ya kudziwa chidikhiro chomwe tinacho ndawa ya kukhala mu Paradaiso wauzimu? Ndoganizankoni pang’ono momwe moyo udzakhalire mu dziko inyowani. Baibolo ipolomisa kuti: ‘Padzakhalelini mwana yemwe adzakhale na ntsiku zing’onong’ono panango munthu nkulu yemwe adzafikiselini magole yomwe munthu achadekana kukhala na moyo.’ ‘Isepano tidzamange nyumba nkumbakhalamo, tidzabzale miti nkudya vipaso vake, tidzaphatelini basa papezi ndawa yakuti tidzakhale odalisiwa na Yahova.’ Iye watipolomisa kutipasa moyo wa cholinga chaicho, moyo wotetezeka komasoti wokhutirisa. Tikanati tamukumbira, Yahova adzadziwe vomwe chamoyo chilichose chinkudekana ndipo ‘adzakhutirise vofuna va cha moyo chilichose.’—Yes. 65:20-24; Sal. 145:16.

13. Ko lemba ya Yesaya 65:25 ichafotokoza tani va kuchinja kwa wanthu omwe apfunzira chonadi?

¹³ Wotetezeka na kukhala mwantendere. Na thandizo ya mzimu uchena wa Yahova, wanthu azinji omwe pakuyamba wenze wanthu okonda vinthu voipa, wachinyengo na waukali adachita kuchinja kukulu pa moyo wawo. (Werengani Yesaya 65:25.) Ndawa ya khama yawo iwo adasiya makhalidwe yawo yoipa. (Aro. 12:2; Aef. 4:22-24) Ni shuwadi kuti ndawa ya uchimo isepano tipitirize kuphonyesa vinthu. Koma Yahova ankupitiriza kusalula ‘wanthu wa makhaindi yose’ omwe achamukonda komasoti kukonda anzawo ndipo phindu yake ni yakuti isepano tinantendere chaiwo komasoti ndise obverana. (Tito 2:11) Chimwechi ni chodabwisa chomwe ni Mulungu wamphanvu yekha yemwe angakwanise kuchichita.

14. Ko chitsanzo cha m’bale munango chinkuwonesa tani kuti vomwe lemba ya Yesaya 65:25 ni chaivodi?

¹⁴ Ko munthu angakwanisedi kuchinja makhalidwe yake? Onani vomwe vidachitikira mulumbwana munango, kundoyambira ana magale 20 wenze adamangiwa maulendo yazinjizinji komasoti wenze na moyo wokonda vigololo komasoti ambakondalini ntendere. Iye wenze adayikhiwa mu djeri ndawa ya kuba makaro, kutyola manyumba komasoti na vinthu vinango voipa. Iye wenze wokonzeka nthawe zose kugegedzana na munthu aliyese. Koma pomwe iye adabva chonadi cha m’Baibolo na kuyamba kugumanika pa misonkhano ya Mboni za Yahova. Iye adatsimikiza kuti wagumana chinthu chomwe chichitisa kuti moyo ukhale waphindu chomwe ni Paradaiso wauzimu. Patsogolo pakuti wabatizika, iye ambakumbukira mawu yomwe yali pa lemba ya Yesaya 65:25 momwe yadamuthandizira. Iye adasiya kukhala munthu wogopsa na wosankonda ntendere ninge mphondolo. Koma adakhala munthu wokonda ntendere.

15. Ndawa chani tichadekana kuchemera wanthu anango kuti angene mu Paradaiso wauzimu, ndipo tingachite tani vimwevi?

¹⁵ Pa lemba ya Yesaya 65:13 payamba na mawu yakuti: ‘Yahova ambuya nkulu maninge wanena kuti.’ Ndipo vesi 25 imaliza na mawu yakuti: ‘Wanena teno Yahova.’ Ndipo isepano tinkudziwa kuti mapolomisi ya Yahova nthawe zose yakwanirisika. (Yes. 55:10, 11) Panango kuti Paradaiso wauzimu ni chaiye. Yahova wabveranisa banja yomwe imutumikira kuposha gulu iliyose. Pakati pa gulu ya Yahova isepano tingadzibve otetezeka ninge kuti tili pa malo yanango mu dziko yoipa iyi. (Sal. 72:7) Ndipomwapa isepano tinkufuna kuthandiza wanthu azinji kuti akhalembo mu banja ya pa dziko yose. Isepano tingachite vimwevi pakuchita khama pa basa yopfunzisa wanthu.—Mat. 28:19, 20.

KUTHANDIZA WANTHU ANANGO KUTI ANGENEMBO MU PARADAISO WAUZIMU

16. Ko ni chani chingathandize wanthu anango kuti abwere mu Paradaiso wauzimu?

¹⁶ Aliyese wa isepano angachitembo chinthu chodekana maninge pakuthandiza wanthu  kuti akhalembo na chifuno chongena mu Paradaiso wauzimu. Isepano tichachita vimwevi tikambatewedzera Yahova. Yahova achachichimizalini munthu kuti akhale mbali ya gulu yake. M’malo mwa vimwevi iye ‘achachemera’ munthu mwachikondi. (Yoh. 6:44; Yer. 31:3) Ndipomwapa munthu akapfunzira va makhalidwe ya Yahova na umunthu wake, vikhala vosashupa kukhala pa ushamwali na Yahova. Manje ko makhalidwe yathu yabwino yangathandize tani wanthu kuti abwere mu Paradaiso wauzimu?

17. Ko tingathandize tani wanthu anango kuti abwere mu gulu ya Yahova?

¹⁷ Njira ibodzi yomwe tingathandizire wanthu kuti angenembo mu Paradaiso wauzimu ni kuchita vinthu vabwino kwa abale na alongo wathu mwachikondi komasoti mokoma ntima. Munthu akafika kakuyamba pa nyumba ya Ufumu, isepano tinkufuna kuti ambadzibve ninge wale omwe adagumanika pa misonkhano ku mpingu wakuyamba wa ku Korinto, iwo adachita chidwi nkulewa kuti: ‘Mulungu ana imwepo.’ (1 Akor. 14:24, 25; Zek. 8:23) Kuti vimwevi vichitike tichadekana kupitiriza kuphatisa basa malangizo ya ‘kukhala mwantendere na anango.’—1 Ates. 5:13.

18. Ko ni chani chomwe chingathandize wanthu kuti abwere mu gulu yathu?

¹⁸ Nthawe zose tichadekana kuona abale wanthu ninge momwe Yahova achawawonera. Tingambachite vimwevi tikambawona makhalidwe yawo yabwino osati vophonya vawo. Ndawa vophonya vawo manjemanje vidzamale. Tingamalise bvuto iliyose yomwe tinayo na abale wanthu mwachikondi, ‘pakukhala okoma ntima kwa aliyese, pa kuwonesana chifundo chikulu na kukhululukirana na ntima wose.’ (Aef. 4:32) Tikachita vimwevi, Paradaiso wauzimu udzapase chidwi wanthu wale omwe ankufunambo kuchitiriwa vimwevi. b

 PITIRIZANI KUKHALA MU PARADAISO WAUZIMU

19. (a) Mobverana na bokosi yakuti: “ Iwo adachoka ndipo adabwerera,” ko wanthu anango adanena chani pomwe adabwerera mu Paradaiso wauzimu? (b) Ko tichadekana kukhala otsimikiza kuchita chani? (Onani pomwe foto.)

¹⁹ Isepano tikhala okondwa maninge ndawa ya kuchita mbali ya Paradaiso wauzimu. Ntsiku zino Paradaiso wauzimu moyu ni wokhuza maninge kuposha kale ndipo ni wanthulini azinji omwe ankuchita mbali ya Paradaiso moyu. Mpakana kalekale tidzapitirize kutembeja ndawa ya Paradaiso wauzimu moyu womwe Yahova watikonzera. Munthu peno ankufuna kukhala wokhutira, wokondwa komasoti wotetezeka ankudekana kuchita mbali ya Paradaiso wauzimu moyu ndipo ayi kuti abulemo. Koma khalani tcheru ndawa yakuti Satana ankupitiriza kuchita vose vomwe angakwanise kuti atichose mu Paradaiso wauzimu. (1 Pet. 5:8; Chiv. 12:9) Tidzabvumelini kuti iye achite vimwevi. Naboni tipitirize kuchita vose vomwe tingakwanise kuti titeteze kukhuza, kuchena na ntendere womwe tinawo mu Paradaiso wauzimu.