Ko munkudziwa?
Ko ndawa chani wanthu omwe wenzelini Aizirayeli ambatumikirambo ninge masocha mu Ufumu wa Davide?
PAKATI pa masocha ya Davide penze na masocha yanango yomwe yenzelini Aizirayeli. Vinkuoneka kuti pagulu ya masocha mwaya penze Zeleki, wa ntundu wa Amoni, Uriya Muhiti na Itima wa ku Mowabu. a (1 Mbiri 11:39, 41, 46) Ndipo masocha yanango ya Davide yenze ‘Akereti, Apeleti na Agate.’ (2 Sam. 15:18) Vinkuoneka kuti wanthu ambakumbuka kuti Akereti na Apeleti enze pa ubale na Afilisiti. (Ezek. 25:16) Ndipo vinkuoneka pomwe kuti Agate adachokera ku Gate mu thaundi ya Afilisiti.—Yos. 13:2, 3; 1 Sam. 6:17, 18.
Ko ndawa chani Davide adabvuma kuti amuna mwawa akhale masocha yake? Ndawa yakuti iye ambadziwa kuti amuna mwawa enze okhulupirika kwa iye na kwa Yahova. Mwakulinganiza, pakulewa va Akereti na Apeleti Dicionário inango idalewa kuti: ‘Iwo adapitiriza kukhala okhulupirika kwa Davide olo pa nthawe yomwe vinthu venze vidafika poshupa mu utongi wake.’ Ko iwo adaonesa tani kuti enze okhulupirika? Pomwe ‘masocha yose’ yadamusiya Davide pomwe ambalondola ‘munthu munango dzina yake Sheba,’ Akereti na Apeleti adakhala okhulupirika kwa Davide ndipo adamuthandiza kumalisa kusatuka komwe Sheba wenze adachita. (2 Sam. 20:1, 2, 7) Pa nthawe inango Adoniya yemwe wenze mwana wa Davide, ambafuna kudziyikha kukhala mpfumu m’malo mwa Solomo. Koma Akereti na Apeleti adathandiza kuti Solomo akhale mpfumu ndawa ndiye wenze adasaluliwa na Yahova.—1 Maf. 1:24-27, 38, 39.
Munthu munango yemwe adakhala wokhulupirika kwa Davide wenze Itai wa ku Gate. Itai pabodzi na masocha yake 600 adathandiza Mpfumu Davide pomwe Abisalomu mwana wa Davide wenze adasatukira mpfumu achichitisa kuti wanthu asatukembo. Pakuyamba, Davide wenze adamuuza Itai kuti ayi kuti amenyembo nkhondo ndawa yakuti wenzelini mu Izirayeli. Koma Itai adalewa kuti: ‘Ninkulumbira pa na Yahova Mulungu wa moyo, na pa imwepo mpfumu yangu kuti kulikose komwe imwepo muyende, inepano nidzayendembo ndipo ndine wokonzeka kufa namwe pabodzi!’—2 Sam. 15:6, 18-21.
Itai wenze wokhulupirika kwa Davide yemwe Yahova wenze adamusalula kuti akhale mpfumu
Olo kuti Akereti, Apeleti na Agate enzelini Aizirayeli, iwo ambadziwa kuti Yahova ni Mulungu chaiye ndipo ambadziwa pomwe kuti Davide wenze adasaluliwadi na Yahova. Shuwadi, Davide ambakondwa maninge kukhala na amuna okhulupirika mwawa!
a Lamulo ya pa Deuteronomo 23:3-6 imbaletsa kuti Aamoni na Amowabu angene mu mpingu wa Aizirayeli nakuti akhaliretu Aizirayeli. Koma imbaletsalini kuti ambasokhane na kukhala pabodzi na wanthu wa Mulungu. Onani Estudo Perspicaz das Escrituras, Volume 1, tsa. 95.
