1. Ko wanthu wa Yahova wa magole yakuyamba, wenze na dongosolo iponi?

 YAHOVA nthawe zose akambapereka basa kwa wanthu wake kuti ayichite, iye adikhira kuti abayichite mwadongosolo. (1 Akor. 14:33) Mwakulinganiza, ni chifuno cha Mulungu kuti ntontholo wabwino ulalikiriwe padziko yose yapasi. (Mat. 24:14) Ndipo Yahova adapasa Yesu udindo wotsogolera basa mweyi. Ndipo Yesu ankuonesesa kuti basa mweyi inkuchitika mwadongosolo. M’magole yakuyamba mipingu yadakhazikisiwa ndipo akulu adayikhiwa kuti ambatsogolere na kunyang’anira. (Mac. 14:23) Ku Yerusalemu mu magole yakuyamba, gulu ya atumi na akulu idakhazikisiwa kuti imbasalule vochita kuti wanthu ambatewedze mumipingu. (Mac. 15:2; 16:4) Ndipo ndawa yobvera malangizo yomwe ambatambira ‘mipingu yadapitiriza kukhala yolimba m’chikhulupiriro ndipo yambakula ntsiku na ntsiku.’—Mac. 16:5.

2. Kuyambira gole ya 1919, ko Yahova wachita chani kuti apereke malangizo na chakudya chauzimu kwa wanthu wake?

² Ntsiku zino Yahova ankupitiriza kuthandiza wanthu wake kuti ambachite vinthu mwadongosolo. Kundoyambira gole ya 1919, Yesu wakhala ankuphatisa basa kagulu kang’ono ka amuna odzodzewa kuti atsogolere basa yolalikira na kupereka chakudya chauzimu kwa atumiki wake. a (Luka 12:42) Vinkuchita kuonekeratu kuti Yahova ankudalisa basa ya amuna mwawa.—Yes. 60:22; 65:13, 14.

3-4. (a) Fotokozani momwe tichaphindulira ndawa yokhala wanthu wa dongosolo. (b) Ko mu pfunziro mweyi tione chani?

³ Tidakakhala kuti tilibe dongosolo, tidakakwanisalini kuchita  basa yomwe Yesu adatipasa. (Mat. 28:19, 20) Ndolinganizani kuti tilibe kupasiwa madera yakuti timbalalikire, aliyese sembe andolalikira komwe ankufuna ndipo madera yanango sembe yankulalikiriwalini. Ko mungaganizire maphindu yanango yomwe tinayo ndawa yokhala wanthu wa dongosolo?

⁴ Pomwe Yesu wenze pano padziko yapasi, iye adathandiza ateweri wake kuti akhale wanthu wa dongosolo ndipo ankupitiriza kuchita vimwevi mpakana manjeuno. Mupfunziro mweyi tione chitsanzo chomwe Yesu adasiya na momwe gulu ya Yahova inkutewedzerera chitsanzo chake, tione pomwe momwe tingaonesere kuti tinkuthemba na kulemekeza gulu ya Yahova.

GULU YATHU ITEWEDZA CHITSANZO CHA YESU

5. Ko ni njira ibodzi iponi yomwe tingatewedzerere chitsanzo cha Yesu? (Yohane 8:28)

⁵ Yesu adapfunzira kwa Ababa wake vomwe angachite na vomwe anganene. Pakutewedzera chitsanzo cha Yesu, gulu ya Yahova iphatisa basa Baibolo pakutipfunzisa kudziwa chabwino na choipa na kuchita vinthu vomwe vingakondwerese Yahova. (Werengani Yohane 8:28; 2 Tim. 3:16, 17) Gulu ya Yahova nthawe zose itikumbusa kuti timbawerenge Baibolo na kuphatisa basa vomwe tichawerenga. Ko kuchita vimwevi kudzatithandize tani?

6. Ko ni njira ibodzi iponi yomwe tiphindulira ndawa ya kupfunzira Baibolo?

⁶ Isepano tiphindula maninge tikambapfunzira Baibolo pakuphatisa basa vofalisa vathu. Mwakulinganiza, tilinganiza vomwe Baibolo ichanena na malangizo yomwe gulu yathu yatipasa. Ndipo tikawona kuti malangizo yomwe tapasiwa yankuchokera m’Malemba, ndipo pomwe tikhulupirira maninge gulu ya Yahova.—Aro. 12:2.

7. Ko Yesu ambalalikira va ntontholo uponi ndipo gulu ya Yahova inkutewedzera tani chitsanzo chake?

⁷ Yesu ambalalikira “ntontholo wabwino wa Ufumu wa Mulungu.” (Luka 4:43, 44) Kuingizira mwapa, Yesu adanena pomwe kuti ateweri wake ambadekana kulalikira va Ufumu wa Mulungu. (Luka 9:1, 2; 10:8, 9) Ntsiku zino, tose omwe tichatewedza malangizo ya gulu ya Yahova, tilalikira va Ufumu wa Mulungu, viribe basa komwe tichakhala panango udindo womwe tinawo mu gulu ya Yahova.

8. Ko tinamwayi uponi?

⁸ Ni ulemelero ukulu maninge kwa isepano kuuza anango va Ufumu wa Mulungu, udindo moyu ni wa munthulini aliyese. Mwakulinganiza, pomwe Yesu wenze pano pa dziko yapasi iye alibe kubvuma kuti viwanda vimbayankhule va iye. (Luka 4:41) Nchibodzibodzimbo na ntsiku zino, munthu akanati kuyamba kulalikira na mpingu, iye achadekana kukhala woyenerera kuchita utumiki moyu. Ndipo isepano tichawonesa kuti tichalemekeza mwayi moyu pa kulalikira mwakhama nthawe zose momwe tingakwanisire. Ninge Yesu cholinga chathu ni kubzala mbewu ya Ufumu m’mitima ya wanthu na kuwapfunzisa chonadi.—Mat. 13:3, 23; 1 Akor. 3:6.

9. Ko gulu ya Yahova yadziwikisa tani dzina ya Mulungu?

⁹ Yesu adapfunzisa wanthu anango dzina ya Mulungu. Nthawe inango pomwe ambapemphera kwa Ababa wake, Yesu adati: “Inepano nachitisa kuti iwo adziwe dzina yanu.” (Yoh. 17:26) Pakutewedza chitsanzo cha Yesu, gulu ya Yahova ichita vose vomwe ingakwanise kuti ithandize wanthu kudziwa dzina ya Mulungu. Njira ibodzi yochitira vimwevi ni kutsumbudzulira Baibolo ya dziko inyowani ya Malemba yopatulika. Baibolo mweyi inkugumanika yantero panango mbali yake mu viyankhulo voposha 270. Mawu  ya kumapeto A4 na A5 ya Baibolo mweyi yafotokoza bwinobwino momwe dzina ya Yahova adayiikhira m’Baibolo na ndawa yake adayikha dzina mweyi. Mawu ya kumapeto A5, yomwe yagumanika m’Baibolo ya chichewa, yafotokoza vifukwa vizinji vomwe vichitisa kuti dzina ya Mulungu imbagumanike maulendo 237 mu Malemba ya Chigiriki.

10. Ko tingapfunzire chani pa vomwe nkazi wa ku Myanmar adanena?

¹⁰ Ninge Yesu, isepano tinkufuna kuthandiza wanthu azinji momwe tingakwanisire kuti adziwe dzina ya Mulungu. Nkazi munango wa magole 67 yemwe akhala ku Myanmar, padapfunzira kuti dzina ya Mulungu ni Yahova, iye adayamba kulira ndipo adanena kuti: “Umuyu ni ulendo woyamba pa moyo wangu kubva kuti dzina ya Mulungu ni Yahova. . . . Imwepo mwanipfunzisa chinthu chodekana maninge chomwe nimbadekana kuchidziwa.” Ninge momwe taonera mu chitsanzo mwechi, wanthu akapfunzira dzina ya Mulungu, vimwevi vingachinje moyo wawo.

PITIRIZANI KUONESA KUTI MUCHATHEMBA GULU YA YAHOVA

11. Ko akulu awonesa tani kuti achathemba gulu ya Yahova? (Onani pomwe foto.)

¹¹ Ko akulu angaonese tani kuti athemba gulu ya Yahova? Akatambira malangizo, akulu achayawerenga mosamala maninge ndipo ayesesa kuchita vomwe angakwanise kuti ayaphatise basa. Mwakulinganiza. Kuingizira pa malangizo yomwe angatambire ya momwe angambakambire nkhani mumpingu na momwe angapempherere mpingu, iwo atambira pomwe malangizo ya momwe angasamalilire nkhosa za Khrisitu. Ndipo akulu akambatewedza malangizo yomwe atambira kuchokera mu gulu yathu, abale adzibva kuti akondewa maninge ndipo Yahova ankuwateteza.

12. (a) Ndawa chani tichadekana kubvera wanthu omwe ankunyang’anira mumpingu? (Aheberi 13:7, 17) (b) Ndawa chani tichadekana kunyang’ana makhalidwe yabwino ya abale omwe ankunyang’anira mu gulu ya Yahova?

¹² Tikatambira malangizo kuchokera kwa akulu, tichadekana kukhala okonzeka kuyatewedza. Tikambachita vimwevi vidzakhale vosashupa kuti akulu aphate basa yawo yonyang’anira mumpingu. Baibolo ichatiuza kuti tichadekana kukhala obvera na kugonjera omwe ankunyang’anira mumpingu. (Werengani Aheberi 13:7, 17.) Koma kuchita vimwevi nthawe zinango kungakhale koshupa. Ndawa chani? Ndawa yakuti akulu mwawa omwe ankunyang’anira ni wanthu omwe alibe ungwiro. Koma tikambandonyang’anisisa vophonya vawo m’malo monyang’ana makhalidwe yawo yabwino tidzakhale tinkuthandiza m’zondi wathu. Mwanjira yanyi? Azondi wathu achafuna kuti timbakayikire kuti Yahova ankuphatisa basa gulu yake kuti atitsogolere. Isepano tikambandonyang’ana vophonya va abale omwe ankutsogolera mumpingu, tidzayambe kuyiganizira vinthu voipa gulu yathu ndipo tidzaleke kuyithemba. Ko isepano tingachite chani kuti tidziwe na kulamba mabodza yomwe azondi wathu achanena?

AYI KUBVUMA KUTI WANTHU ANANGO AKUKANGISENI KUTHEMBA GULU YA YAHOVA

13. Ko azondi wa Mulungu ayesesa tani kupsipiza mbiri ya gulu ya Yahova?

¹³ Azondi wa Mulungu achitisa vinthu vabwino va m’gulu ya Yahova kukhala ninge vinthu voipa. Mwakulinganiza, isepano tidapfunzira m’Baibolo kuti Yahova adikhira kuti atumiki wake ambakhale ochena mwakuthupi, m’makhalidwe na mwauzimu. Ndipo iye adati munthu aliyese yemwe angachite chimo ikulu achadekanalini kupitiriza kukhala mumpingu. (1 Akor. 5:11-13; 6:9, 10) Koma ndawa  yakuti isepano tibvera lamulo mweyi, azondi wanthu anena kuti tichakondalini wanthu omwe tawaweruza na omwe tisiyana nawo vochita.

14. Ko ni mbani yemwe achayambisa mabodza yonenera vinthu voipa gulu yathu?

¹⁴ Dziwani yemwe achaipisa gulu ya Yahova. Satana Dyerekezi, ndiye yemwe achafalisa mabodza yolewa va gulu yathu. Iye ndiye ‘baba wa mabodza.’ (Yoh. 8:44; Gen. 3:1-5) Ayi kumbadabwa kuti Satana ankuphatisa basa wanthu kuti ambafalise mabodza yolewa va gulu ya Yahova. Ni vimweviretu vomwe vidachitikira Yesu na Akhrisitu wakuyamba.

15. Ko akuluakulu wa vipembezo adachita chani kwa Yesu na ateweri wake?

¹⁵ Yesu mwana wa Mulungu wenze wa ungwiro ndipo adachita vodabwisa vizinji, olo nteno Satana adaphatisira basa wanthu kuti amunamizire mabodza. Mwakulinganiza, akuluakulu wa vipembedzo ambauza wanthu kuti Yesu ankuchosa viwanda “na mphanvu ya nkulu wa viwanda.” (Maliko 3:22) Pomwe Yesu ambaweruziwa, akuluakulu wa vipembedzo adamuyimba mulandu wakuti ankunyoza Mulungu ndipo adalimbikisa wanthu kuti akumbire mpfumu kuti amuphe. (Mat. 27:20) Patsogolo pake, pomwe opfunzira wa Yesu ambalalikira ntontholo wabwino, ‘Ayuda osakhulupirira adauza vinthu voipa wanthu wa makhaindi yanango’ nkuyamba kutsutsana na abale wathu. (Mac. 14:2, 19) Pa kufotokoza va lemba ya Machitidwe 14:2, Nsanja ya Olonda ya 1 Dezembro, 1998, idanena kuti: “Ndawa yosakhutirisiwa kuti olo adalamba ntontholo muyo. Ayuda otsutsa adayamba kufalisa nkhani zoipa nkumbachitisa wanthu anango kuti akhale namanganizo yoipa polewa va Akhrisitu.”

16. Ko tichadekana kukumbukira chani tikabva mabodza yolewa va gulu yathu?

 ¹⁶ Satana ankupitiriza kufalisa mabodza mpaka ntsiku zino, iye ‘ankunamiza wanthu ose.’ (Chiv. 12:9) Peno mwabva mabodza yolewa va gulu yathu na abale omwe ankutsogolera, kumbukirani momwe azondi mwawa adachitira vinthu na Yesu komasoti na atumiki wake m’magole yakuyamba. Ntsiku zino wanthu wa Mulungu anyozewa na kuyankhuliriwa vinthu voipa ninge momwe Baibolo idanenera. (Mat. 5:11, 12) Isepano tidzakhulupirirelini mabodza tikadziwa kuti ni mbani yemwe achayachitisa na kudziwa vomwe tingachite kuti tidziteteze. Ko nchani chomwe tingachite kuti tidziteteze?

17. Ko tichadekana kuchita chani kuti tipewe nkhani za bodza? (2 Timoteyo 1:13) (Onani pomwe bokosi yakuti: “ Vomwe mungachite mukabva nkhani za bodza.”)

¹⁷ Ayi kubvesera nkhani za bodza. Mtumi Paulo adapereka malangizo yobveka bwino ya vomwe tingachite tikabva nkhani za bodza. Iye adauza Timoteyo kuti ‘auze wanthu kuti aleke . . . kumbabvesera nkhani za bodza’ nakuti ‘ambapewe nkhani za bodza.’ (1 Tim. 1:3, 4; 4:7) Ni shuwadi kamwana kosadziwa vinthu vizinji kangatenge chinthu pasi nkuikha pakamwa, koma munthu nkulu yemwe achadziwa ngozi yake, angachitelini mwevi ne pang’ono. Tilamba nkhani za bodza mwezi ndawa yakuti tinkudziwa yemwe achachitisa kuti zifalisiwe. Isepano tibvesera ‘Mawu yophindulisa’ ya chonadi.—Werengani 2 Timoteyo 1:13.

18. Ko tingawonese tani kuti tichathemba gulu ya Yahova?

¹⁸ Mupfunziro mweyino tandowona njira zitatu zomwe gulu ya Yahova itewedzerera Yesu Khrisitu. Pomwe munkupfunzira Baibolo khalani tcheru kuti muone njira zinango zomwe isepano tinkutewedzerera chitsanzo cha Yesu. Thandizani anango mumpingu kuti ambalemekeze na kuthemba gulu ya Yahova na kutumikira Yahova nthawe zose mokhulupirika pa kukhala obverana na gulu yomwe iye achayiphatisa basa pa kukwanirisa chifuniro chake. (Sal. 37:28) Naboni tose tipitirize kulemekeza mwayi womwe tinawo wa kuphata basa pabodzi na gulu yachikondi na yokhulupirika ya Yahova.