1. Ko abale anango adzibva tani akambalalikira kwa wanthu anango? (Onani pomwe foto.)

 NINGE wanthu wa Mulungu, isepano tilalikira wanthu anango ndawa tichakonda maninge Ababa wathu wakudzulu ndipo tinkufuna kuthandiza wanthu anango kuti amudziwe Yahova. Ofalisa azinji akonda maninge basa yolalikira koma anango viwashupa kuti ambakhale okondwa pakulalikira. Ndawa chani? Ndawa yakuti anango ni wamanyazi ndipo anango adzithembalini. Anango achadzibvalini bwino kuyenda kumuyi kwa munthu yemwe alibe kuwachemera. Anango akhala na mantha yakuti angabveserewelini ndipo anango adapfunzisiwa kuti aleke kumbakangana na wanthu. Podiya kuti akonda maninge Yahova, abale na alongo mwawa aganiza kuti ni voshupa kufenderera wanthu wa dziko inango kuti awauze va ntontholo wabwino. Olo viri teno iwo adziwa kudekana kwa basa yolalikira ndipo achachita khama kuyenda mu umboni. Vimwevi vikondweresa maninge Yahova!

2. Peno imwepo vikushupani kukhala okondwa pakulalikira, ko ndawa chani muchadekanalini kukhumudwa?

² Ko nthawe zinango imwepo vikushupani kukhala okondwa mukambalalikira? Peno nteno, ayi kukhumudwa. Vimwevi vinkuoneseratu kuti imwepo ndimwe odzichepesa ndipo munkufunalini kudziwonesa panango kukangana na wanthu. Kuingizira mwapa palibe yemwe akhala wokondwa peno alibe kutambiriwa bwino makamaka peno ankufuna kuchitira anango vinthu vabwino. Koma tsimikizirani kuti Ababa wanu wakudzuku adziwa bwino mabvuto yomwe  munkugumana nayo ndipo adzakupaseni thandizo yomwe munkudekana. (Yes. 41:13) Mu pfunziro mweino tione vinthu vokwana vishanu vomwe vingatithandize kulimbana na maganizo mwaya na vomwe tingachite kuti timbakondwe pa kulalikira.

BVUMANI KUTI MAWU YA MULUNGU YAKULIMBISENI

3. Ko nchani chomwe chidathandiza Yeremiya kuti ambalalikire kwa wanthu anango?

³ Olo m’mbuyo umu Mawu ya Mulungu yakhala yankulimbikisa atumiki wake pomwe ambafunika kuphata basa yoshupa maninge. Onani chitsanzo cha mneneri Yeremiya. Iye wenze na nkhawa pomwe Yahova adamupasa udindo wakuti ambalalikire. Yeremiya adanena kuti: ‘Inepano nidziwalini kuyankhula, ndawa yakuti ndine mwana.’ (Yer. 1:6) Ko ni chani chomwe chidathandiza Yeremiya kuti akhale wolimba ntima pa kulalikira? Vomwe Yahova adamuuza vidamulimbikisa. Iye adati: ‘Koma muntima mwangu mawu yake yakhala ninge moto wogaka, womwe wafungiririwa mumafupa yangu ndipo nidaneta ndawa ya kudziletsa kuti nileke kuyankhula.’ (Yer. 20:8, 9) Podiya kuti dera yomwe Yeremiya adauziwa kuti ambalalikire yenze yoshupa, ntontholo womwe iye adautambira kuti aulalikire udamupasa mphanvu zomwe ambadekana kuti akwanise kuphata basa mweyi.

4. Ko nchani chomwe chichachitika tikambawerenga Baibolo na kuganizira? (Akolose 1:9, 10)

⁴ Ntsiku zino Akhrisitu nawombo atambira mphanvu zomwe achadekana pakuphatisa basa Baibolo. Pomwe mtumi Paulo adanembera kalata mpingu wa Akolose, iye adauza abale kuti, akambapfunzira vizinji va chifuniro cha Yahova vidzawathandize kuti ‘akhale na khalidwe yobverana na vomwe Yahova achafuna’ na kubereka vipatso pa ‘basa iliyose yabwino.’ (Werengani Akolose 1:9, 10.) Basa yabwino mweyi ikuphatanidzapo basa yolalikira. Manje tikambawerenga Baibolo na kuganizira vomwe tichawerenga, chikhulupiriro chathu kwa Yahova chidzakhale cholimba maninge ndipo tidzayambe kubvesa kudekana kwa basa yolalikira va Ufumu wa Mulungu kwa wanthu anango.

5. Ko tingaphindule tani mokwana na kuwerenga Baibolo na pfunziro ya Baibolo?

⁵ Kuti mumbaphindule maninge na Mawu ya Mulungu, mumbakhale na nthawe yokwana kuti mumbawerenge, kupfunzira na kuganizira. Ayi kumbachita vinthu mwakankulumize pa nthawe yomwe munkupfunzira. Peno imwepo munkuwerenga nkhani inango yomwe munkuyibvesalini, ayi kundoyisiya. M’malo mwavimwevi phatisani basa Índice das Publicações da Torre de Vigia panango Buku Lofufuzira Nkhani la Mboni za Yehova kuti mugumane mpfundo  zomwe zingakuthandizeni kubvesa vesi mweyo. Mukambapatula nthawe yakuti mumbapfunzire modekha, imwepo mudzalimbise chikhulupiriro chanu chakuti vomwe Baibolo ichanena ni chaivodi. (1 Ates. 5:21) Mukatsimikizira vomwe mwapfunzira mudzakhale okondwa kuuza anango.

MUMBAKONZEKERE

6. Ndawa chani tichadekana kukonzekera bwinobwino pakuyenda kukalalikira?

⁶ Mukakonzekera bwinobwino mukanati kuyenda kukalalikira, vidzakhale vosashupa kuyamba kucheza na wanthu. Yesu adakonzekeresa opfunzira wake akanati kuwatumiza kukalalikira. (Luka 10:1-11) Ndipo iwo adaphatisa basa vose vomwe Yesu adawapfunzisa, ndawa ya vimwevi iwo adakhala okondwa maninge ndawa ya vose vomwe iwo adakwanisa kuchita.—Luka 10:17.

7. Ko tingakonzekere tani pakuyenda kukalalikira? (Onani pomwe foto.)

⁷ Ko tingakonzekere tani kuyenda kukalalikira? Tichadekana kuganizira vomwe tikanene na kuyeserera kuyankhula mwa mawu yathuyathu. Komasoti ni vabwino kuganizira nkhani ziwiri panango zitatu zomwe wanthu wa m’dera yathu achatsutsa nkuona momwe tingadawirire nkhani iliyose. Tikachita vimwevi, pomwe tidzakhale tinkuyankhula na munthu tidzakwanise kukhala omasuka, kusekerera komasoti na kumuwonesa kuti tinkukondwa naye.

8. Ko ni mwanjira iponi momwe Akhrisitu aliri ninge mbiya za dothi zomwe Paulo adanena?

⁸ Mtumi Paulo adauza abale kuti: ‘Tinachuma mwechi mu mbiya za dothi.’ (2 Akor. 4:7) Ko chuma mwechi ni chani? Ni basa yolalikira va Ufumu wa Mulungu yomwe ichapulumusa wanthu. (2 Akor. 4:1) Ko mbiya za dothi ni chani? Mwezi zinkuyimira atumiki wa Yahova omwe achalalikira ntontholo wabwino kwa anango. Munthawe ya mtumi Paulo, wanthu wa bizi ambaphatisa basa mbiya za dothi pa kutakula na kusunga vinthu vodekana maninge ninge vinyu, chakudya na kobiri. Molingana na vimwevi, Yahova watipasa ntontholo wapadzulu maninge yemwe ni ntotholo wabwino. Na thandizo ya Yahova tingakhale na mphanvu zokwana kuti tipitirize kulalikira ntontholo wabwino molimba ntima.

MUMBAPEMPHERE KUTI MUKHALE OLIMBA NTIMA

9. Ko tingamalise tani mantha yogopa wanthu panango kugopa kuti wanthu angabveserelini ntontholo wathu? (Onani pomwe foto.)

⁹ Nthawe zinango tingakhale na mantha yogopa wanthu panango mantha yakuti wanthu alambe ntontholo wathu. Ko tingakwanise tani kulimbana na bvuto mweyi? Onani pemphero ya  atumi pomwe iwo adalamuliwa kuti aleke kulalikira. M’malo mwakuti abvume kuti mantha yawagonjese, iwo adakumbira Yahova kuti awathandize kupitiriza ‘kulalikira va Mawu yake molimba ntima.’ Ndipo Yahova adadawira mwakankulumize pemphero mweyi. (Mac. 4:18, 29, 31) Peno mantha yogopa wanthu yankukuchitisani kukhala na mantha mu umboni, pempherani kukumbira thandizo kwa Yahova. Mukumbireni Yahova kuti chikondi chomwe munacho kwa wanthu chikhale chikulu kuposha mantha yogopa wanthu.

10. Ko Yahova atithandiza tani kuti tikhale Mboni zake? (Yesaya 43:10-12)

¹⁰ Yahova adatisalula kuti tikhale Mboni zake ndipo iye adatipolomisa kuti adzatithandize kukhala olimba ntima. (Werengani Yesaya 43:10-12.) Naboni tione njira zinayi zomwe achatithandizira pa nkhani mweyi. Njira yakuyamba, Yesu akhala nase nthawe zose pomwe tinkulalikira ntontholo wabwino. (Mat. 28:18-20) Yachiwiri, Yahova adapasa udindo angelo kuti atithandize pa basa mweyi. (Chiv. 14:6) Yachitatu, Yahova achatipasa mzimu uchena womwe utithandiza kuti timbakumbukire vinthu vomwe tichapfunzira. (Yoh. 14:25, 26) Yachinayi, isepano tithandiziwa na abale na alongo pa kulalikira. Na thandizo ya Yahova komasoti abale na alongo, isepano tinavose vomwe tinkudekana kuti tikhale olimba ntima nakuti tipitirize kulalikira.

KHALANI NA MAGANIZO YABWINO KOMASOTI OKONZEKA KUCHINJA

11. Ko tingachite tani kuti timbagumane wanthu azinji tikakhala mu umboni? (Onani pomwe foto.)

¹¹ Ko mukwinyirira mukagumana na wanthu pang’ono mu umboni panango neye kuwagumana? Peno nteno dzibvunzeni kuti: ‘Ko wanthu wa m’gawo yangu manjeuno agumanika kuponi?’ (Mac. 16:13) ‘Ko iwo ankuphata basa panango ali kubazali?’ Peno viri teno, ko ningagumane wanthu azinji pakulalikira mu nsewu? M’bale munango dzina yake Joshua adanena kuti: “Nidagumana nthawe yabwino yolalikira nikakhala kuti nili kubazali na malo yogumanika wanthu azinji.” Iye pabodzi na nkazi wake Bridget, agumana wanthu azinji kumaulo akakhala kuti ankucheza na pa sondo masikati.—Aef. 5:15, 16.

12. Ko tingachite tani kuti tidziwe vinthu vomwe munthu achakhulupirira?

¹² Mukazindikira kuti munthu ankuchitalini chidwi na vomwe munkuyankhula, yesesani kudziwa vomwe iye achakhulupirira na vomwe vinkumudesa nkhawa. Joshua na Bridget aphatisa basa mbvunzo womwe ubwera pakapepa kuti ayambise  macheza. Mwakulinganiza, pakuphatisa basa kapepa kakuti Ko Baibolo ni mawu ya Mulungu? Iwo achanena kuti: “Wanthu anango achaganiza kuti Baibolo ni bukhu ya Mulungu koma anango achakayikira vimwevi. Ko imwepo munkuganiza tani?” Nthawe zizinji vimwevi viyambisa macheza yabwino.

13. Ndawa chani tichedekana kuona basa yolalikira kuti inkufamba bwino podiya kuti wanthu ankubveseralini? (Miyambo 27:11)

¹³ Phindu ya utumiki wathu ithembalini wanthu kuti atibvesere panango neye. Ndawa chani? Ndawa yakuti tinkuchita vomwe Yahova na mwana wake Yesu ankufuna kuti tichite pa kulalikira ntontholo wabwino mokwana. (Mac. 10:42) Olo kuti tilibe kugumana wanthu kuti ticheze nawo panango wanthu nkulamba kubvesera ntontholo wathu, tingakhale okondwa ndawa yakuti tinkudziwa kuti tinkukondweresa Ababa wathu wakudzulu.—Werengani Miyambo 27:11.

14. Ndawa chani tikhala okondwa maninge pomwe m’bale wagumana munthu wachidwi mu umboni?

¹⁴ Isepano tikhala okondwa maninge pomwe m’bale wagumana munthu wachidwi mu umboni. Ntsanja ya ulonda inango idalinganiza basa yolalikira na kunyang’ana mwana yemwe watayika. Wanthu azinji adzipereka kunyang’ana mwana muyo m’malo yosiyanasiyana. Patsogolo pake mwana muyo akagumanika ose akhala okondwa osati munthu m’bodzi yekha yemwe wamugumana. Mwanjira ibodzibodzi, abale ose mumpingu athandiza pa basa mweyi yolalikira gawo yose ndipo ose akhala okondwa maninge pomwe munthu m’bodzi wayamba kugumanika pa misonkhano.

MBAKONDANI YAHOVA NA WANTHU ANANGO

15. Ko kuphatisa basa lemba ya Mateyu 22:37-39 kungatithandize tani kuyingizira khama yathu mu umboni? (Onani pomwe foto .)

¹⁵ Isepano tingaingizire khama yathu ya kulalikira, pa kuganizira momwe tichakondera Yahova na wanthu anango. (Werengani Mateyu 22:37-39.) Ndoganizani momwe Yahova achakhalira wokondwa akambationa tinkuphata basa yolalikira na momwe wanthu achakhalira okondwa akayamba kupfunzira Baibolo. Ganizirani va chipulumuso ndipo dikhirani wale omwe achabvesera mwachidwi ntontholo wathu.—Yoh. 6:40; 1 Tim. 4:16.

16. Ko tingakhale tani okondwa pa basa yathu yolalikira podiya kuti tingakwaniselini kuchoka pa muyi? Perekani chitsanzo.

¹⁶ Manje ko tani peno ndawa ya chifukwa chinango mungakwaniselini kuchoka pa muyi? Peno viri teneuyu kwa imwepo, ganizirani vomwe mungachite kuti muonese chikondi chanu kwa  Yahova na wanthu anango. Pa nthawe ya matenda ya Koronaviru, Samuel na Dania ambadekanalini kuchoka pa muyi. Pa nthawe yoshupa yose mweyi iwo ambalalikira pakuphatisa basa foni, kunemba makalata na kuchitisa mapfunziro pakuphatisa basa Zoom. Samuel ambatambira pomwe thandizo ya mankhwala ya matenda ya khansa. Pomwe iye ambayenda kushipitali, ambaphatisa basa mwayi moyu kulalikira momwe angakwanisire. Iye adati: “Mabvuto yangatichitise kuti tikhale ofoka m’maganizo, mwakuthupi na mwauzimu. Ndipomwapa tichadekana kugumana chimwemwe pomwe tinkutumikira Yahova.” Nkati mwa vochitika vose vimwevi Dania adagwa ndipo adamala minyezi yatatu ali gone pa m’beda. Patsogolo pake iye ambadekana kufambira pa kanjinga kofambira wanthu opunduka kwa minyezi 6. Iye adati: “Nidayesesa kuchita vomwe ningakwanise mobverana na momwe vinthu venzere pa moyo wangu. Nimbalalikira kwa Mafulumero na kwa wanthu omwe ambabwera kudzaniwona ndipo nidakwanisa kucheza na m’mayi munango pa foni yemwe ambanithandiza kuti nitambire thandizo yabwino kushipitali.” Ndawa ya momwe vinthu venzere pa moyo wawo, Samuel na Dania alibe kukwanisa kuchita vizinji ninge kale. Koma adayesesa kuchita vomwe angakwanise ndipo adakhala okondwa maninge na maphindu yomwe adagumana.

17. Ko imwepo mungaphindule tani na mpfundo zomwe takambirana mu pfunziro mweino?

¹⁷ Yesani kuphatisa basa vinthu vishanu vomwe takambirana mu nkhani mweino. Mpfundo iliyose ili ninge chinthu chokomesa muliwo. Tikayikha vinthu vose, muliwo ukhala wokoma maninge. Ndipomwapa tikambaphatisa basa mpfundo zose zishanu zomwe takambirana mu pfunziro ino isepano tidzakhale okonzeka kulimbana na maganizo yophonyeka ya kudziona kuti tilibe basa ndipo tidzakhale okondwa maninge pa kulalikira.