NKHANI YOPFUNZIRA 34
NYIMBO NA. 107 Tizitsanzira Chikondi cha Mulungu
Momwe akulu angaonesere chikondi na chifundo kwa munthu yemwe wachita chimo
“Mulungu ankukuwonesa kukoma ntima kwake kukulu na cholinga chakuti ulape.”—ARO. 2:4.
CHOLINGA
Kuona momwe akulu athandizira abale omwe achita chimo ikulu mumpingo.
1. Ko nchani chingachitike munthu akachita chimo ikulu?
MU NKHANI yapita, tidaona momwe ntumi Paulo adachitira vinthu na munthu munango wa ku Korinto. Munthu moule wenze alibe kulapa ndipo ambadekana kuchosewa mumpingo. Koma ninge momwe inkuonesera lemba yomwe pachokera nkhani mweino, wanthu anango omwe achita machimo yakuluyakulu angathandiziwe kuti alape. (Aro. 2:4) Ko akulu angawathandize tani kuti alape?
2-3. Ko tichadekana kuchita chani tikadziwa kuti Mkhrisitu mudzathu wachita chimo ikulu, ndipo ndawa chani?
2 Akulu akalibe kumuthandiza munthu, achadekana kudziwa bwinobwino va nkhani yake. Ko tingachite tani peno tadziwa kuti Mkhrisitu munzathu wachita chimo ikulu yomwe ingachitise kuti achosewe mumpingo? Tichadekana kumulimbikisa kuti akaulule kwa akulu kuti amuthandize.—Yes. 1:18; Mac. 20:28; 1 Pet. 5:2.
3 Manje ko tingachite tani peno munthu yemwe wachita chimo ankulamba kukaulula kwa akulu? Tichadekana kuyenda kukauza akulu kuti amuthandize. Kuchita vimwevi ni kuonesa chikondi ndawa tinkufunalini kuluza m’bale wathu. Peno iye angapitirize kuchita vinthu vophonyeka angadzonge ushamwali wake na Yahova. Iye angaipise pomwe mbiri ya mpingo. Ndipomwapa, molimba ntima tisalula kukauza akulu va nkhani mweyi ndawa ya chikondi chathu kwa Yahova na munthu muyo.—Sal. 27:14.
MOMWE AKULU ATHANDIZIRA MUNTHU YEMWE WACHITA CHIMO IKULU
4. Ko cholinga cha akulu ni chani pa kugumana na munthu yemwe wachita chimo?
4 Munthu akachita chimo ikulu mumpingo, bungwe ya akulu isalula abale atatu woyenerera omwe angatumikire ninge komiti. a Abale mwawa adekana kukhala wachifudo komasoti odzichepesa. Koma pomwe iwo ankuthandiza munthu yemwe wachita chimo kuti alape, achadekana kudziwa kuti adekanalini kuchichimiza munthu kuti achinje. (Deut. 30:19) Akulu achadekana kuzindikira kuti ni wanthu lini wose omwe abvuma kuthandiziwa ninge Mpfumu Davide. (2 Sam. 12:13) Wanthu anango omwe achita chimo angasalule kunyalanyaza mpfundo za Yahova. (Gen. 4:6-8) Ndipomwapa, cholinga cha akulu ni kuthandiza munthu yemwe wachita chimo kuti alape peno ni vokwanisika. Ko ni mpfundo ziponi za m’Baibolo zomwe zingathandize akulu pomwe ankuyenda kukagumana na munthu yemwe wachita chimo?
5. Ko akulu achadekana kuchita tani vinthu pomwe ankucheza na munthu yemwe wachita chimo? (2 Timoteyo 2:24-26) (Onani pomwe foto.)
5 Akulu aona munthu yemwe wachita chimo ninge nkhosa yodekana yomwe yasokera. (Luka 15:4, 6) Ndipomwapa, pomwe ankukagumana na munthu muyo iwo ayankhulalini mwaukali panango kumuchitira nkhanza. Iwo aonalini macheza mwaya ninge kundokwanirisa dongosolo yomwe idaikhiwa. M’malo mwavimwevi, aonesa makhalidwe yogumanika pa lemba ya 2 Timoteyo 2:24-26. (Werengani.) Akulu ankhala ofatsa odekha, komasoti okoma ntima pomwe ankuyesesa kumufika pa ntima munthu muyo.
Ninge nyakabusa wabwino, akulu achita vose vomwe angakwanise kuti athandize nkhosa yomwe yasokera (Onani ndime 5)
6. Ko akulu angakonzekerese tani mitima yawo pomwe ankukagumana na munthu yemwe wachita chimo ? (Aroma 2:4)
6 Akulu akonzekeresa mitima yawo. Iwo ayesesa kutewedzera Yahova pa vochita vawo vose pomwe ankucheza na munthu yemwe wachita chimo. Pakukumbukira mawu ya Paulo yakuti: “Mulungu ankukuwonesa kukoma ntima kwake kukulu na cholinga chakuti ulape.” (Werengani Aroma 2:4.) Akulu achadekana kukumbukira kuti iwo ni abusa pa kutsogolerewa na Khrisitu. (Yes. 11:3, 4; Mat. 18:18-20) Akanati kugumana na munthu yemwe wachita chimo, komiti idekana kukambirana va cholinga chawo chomwe ni kuthandiza munthu yemwe wachita chimo kuti alape. Iwo afufudza m’Malemba, m’mabukhu yathu ndipo apemphera kuti apasiwe nzeru. Iwo akambirana vomwe achadekana kudziwa vinthu vomwe panango vidachitisa munthu muyo kuti achite chimo.—Miy. 20:5.
7-8. Ko akulu angatewedzere tani kuleza ntima kwa Yahova pomwe ankucheza na munthu yemwe wachita chimo?
7 Akulu atewedza kudekha kwa Yahova. Iwo akumbukira momwe Yahova adachitira vinthu na wanthu ochimwa kumbuyo. Mwakulinganiza, Yahova mokoma ntima adayankhula naye Kaini pa kumuchenjeza kuipa kwa uchimo na kumupasa chidikhiro chakuti akonze vinthu. (Gen. 4:6, 7) Yahova adatsumula Mpfumu Davide pakuphatisa basa mneneri Natani yemwe adaphatisa basa chitsanzo chomwe chidakhudza ntima wa Davide. (2 Sam. 12:1-7) Iye adapitiriza ‘kutumiza’ aneneri wake ‘mobwerezabwereza’ kwa ntundu wosabvera wa Aizirayeli. (Yer. 7:24, 25) Yahova alibe kudikhira kuti wanthu wake alape ndiko kuyamba kuwathandiza koma iye ndiye andayamba pa kuwakumbira kuti alape.
8 Akulu atewedzera chitsanzo cha Yahova pakuthandiza wale omwe achita chimo ikulu. Iwo achita nawo vinthu “modekha maninge” ninge momwe inenera lemba ya 2 Timoteyo 4:2. Ndipomwapa, nkulu nthawe zose adekana kukhala wodekha kuti athandize munthu yemwe wachita chimo kuchita vinthu vabwino. Peno nkulu angachite vinthu mwaukali, vingachitise kuti munthu yemwe wachita chimo aleke kukhala na maganizo yolapa.
9-10. Ko akulu angathandize tani munthu yemwe wachita chimo kuganizira vomwe wachita?
9 Akulu ayesesa kuona vinthu vomwe vachitisa munthu kuti achite chimo. Mwakulinganiza, ko Mkhrisitu muyo adafoka pang’onopang’ono ndawa yosiya kuchita pfunziro ya payekha panango ndawa yosagumanika mu umboni? Ko iye ankupempheralini mokwana kwa Yahova? Ko adabvuma kuti maganizo yoipa yamulamulire? Ko alibe kusalula bwino azishamwali panango vosangalasa? Ko vosalula vimwevi vidakhudza tani ntima wake? Ko ankuzindikira momwe vosalula na vochita vake vidakhudzira Yahova?
10 Pakuchita mibvunzo mwanzeru akulu mokoma ntima, angamuthandize munthu muyo kuti azindikire kuphonya kwake. (Miy. 20:5) Kuingizira mwapa, akulu angaphatise basa vitsanzo pakuthandiza munthu muyo kuganizira na kuona vomwe wachita ninge momwe Natani adachitira na Davide. Panango pa ulendo wakuyamba munthu angaoneseretu kuti ankukwinyirira na vomwe wachita ndipo panango angalape.
11. Ko Yesu ambachita tani vinthu na wanthu ochimwa?
11 Akulu achita khama kuti atewedzere Yesu. Pakuthandiza Saulo wa ku Taliso, Yesu adamuchita mbvunzo wakuti: “Saulo, Saulo, ndawa chani ukunidzudza?” Mwanjira mweyi Yesu adamuthandiza kuti iye aganizire vochita vake voipa. (Mac. 9:3-6) Ndipo pakulewa va nkazi ule Yezebeli, Yesu adanena kuti: ‘Namupasa nthawe yakuti alape.’—Chiv. 2:20, 21.
12-13. Ko akulu angamupase tani nthawe munthu yemwe wachita chimo kuti alape? (Onani pomwe foto.)
12 Pakutewedzera Yesu, akulu akulumizalini kuganiza kuti munthu yemwe wachita chimo adzalapelini. Olo kuti wanthu anango angalape pa ulendo wakuyamba pomwe wagumana na akulu, anango angadekane nthawe yakuti alape. Peno nteno, akulu angakonze vakuti adzagumane naye pomwe munthu muyo. Panango pamakambisirano yakuyamba mwaya, Mkhrisitu angayambe kuganizira vomwe iye wachita na malangizo yomwe iye wapasiwa. Iye angapemphere modzichepesa kwa Yahova. (Sal. 32:5; 38:18) Mwanjira mweyi paulendo wachiwiri, iye angaonese maganizo yosiyana na yomwe adaonesa pa ulendo wakuyamba.
13 Pakufuna kuthandiza munthu yemwe wachita chimo kuti alape, akulu aonesa chifundo na kukoma ntima. Iwo adikhira ndipo apemphera kwa Yahova kuti adalise nkhama yawo nakuti Mkhrisitu yemwe wachita chimo azindikire kumphonya kwake nkulapa.—2 Tim. 2:25, 26.
Akulu angagumane na munthu yemwe wachita chimo maulendo yanganani kuti amuthandize kulapa (Onani ndime 12)
14. Ko ni mbani yemwe achadekana kutambira ulemerero munthu wochimwa akalapa, ndipo ndawa chani?
14 Munthu yemwe wachita chimo akalapa, ni chifukwa chokhalira okondwa. (Luka 15:7, 10) Ko ulemerero uyenda kwa mbani? Ko uyenda kwa akulu? Kumbukirani vomwe Paulo adanemba vokhudza wanthu omwe achita chimo. Iye adanemba kuti: “Panango Mulungu angawabvumize kulapa.” (2 Tim. 2:25) Ni Yahova osati munthu aliyese yemwe angathandize Mkhrisitu kuchinja maganizo yake na vochita vake. Paulo adafotokoza vinthu vabwino vomwe vingachitike munthu akalapa. Iye adanena kuti: “Komasoti panango nzeru zingawabwerere nkupulumuka munsampha wa Ndyerekezi.”—2Ti 2:26.
15. Ko akulu angapitirize tani kuthandiza munthu yemwe wachita chimo koma walapa?
15 Patsogolo pakuti munthu yemwe wachita chimo walapa, komiti idzakonze vakuti ambachite maulendo ya ubusa kwa munthu muyo kuti apitirize kutambira thandizo nkukwanisa kulimbana na misampha ya Satana na kukonza vinthu vophonyeka. (Aheb. 12:12, 13) Ni shuwadi kuti akulu angauzelini munthu aliyese vose womwe wophonya muyo wachita. Koma ko mpingo ungadekane kudziwisiwa va chani?
“UMBAWATSUULE PAMASO PA WOSE”
16. Mobverana na 1 Timoteyo 5:20, ko Paulo padalewa kuti “umbawatsuule pa maso pa wose,”ambalewa vambani?
16 Werengani 1 Timoteyo 5:20. Paulo adanemba mawu mwaya pakunembera nkulu munzake Timoteyo pa kufotokoza vomwe tingachite na wanthu omwe anachizolowezi “chochita machimo.” Ko iye ambatanthauza chani? Pomwe iye adanena kuti “umbawatsuule pamaso pa wose” ambatanthauzalini kuti mpingo wose uchadekana kudziwa va nkhani yose. Koma ambatanthauza wanthu wale ang’onong’ono omwe ambaidziwa chimo mweyo. Wanthu mwawa angakhale wale omwe adachitira umboni va chimo mweyo, panango wale omwe adachita kuuziwa na munthu wochimwa uyo. Akulu angawafotokozere wanthu mwawa kuti nkhani mweiyo idasamaliriwa ndipo wochimwa uyo adalapa.
17. Peno chimo ikulu yadziwika maninge mumpingo panango idzadziwike, ko nichilengezo chiponi chomwe chidzaperekewe ndipo ndawa chani?
17 Nthawe zinango ingakhale chimo yomwe yadziwika mumpingo wose panango ni nkhani yakuti idzadziwike. Vikakhala tene mpingo wose ungadziwisiwe. Ndipo nkulu angadziwise mpingo kuti m’bale panango mulongo wadzudzuliwa. Ko ndawa chani? Paulo ankudawira kuti: “Anango achite mantha,” aleke kuchitambo chimo mweiyo.
18. Ko akulu angachite tani peno mwana ng’ono wachita chimo? (Onani pomwe foto.)
18 Manje ko tani mwana wobatiziwa yemwe akanati kukwanisa magole 18 akachita chimo ikulu? Bungwe ya akulu ingasalule akulu awiri kuti akacheze na mwana muyo pabodzi na azibereki wake wachikhrisitu panango na munthu yemwe ankumusunga. Akulu angaone vomwe azibereki wachita kale pakuthandiza mwana wawo kuti alape. Peno mwana muyo anamakhalidwe yabwino ndipo azibereki wake ankumuthandiza, akulu angasalule kuti nkhani mweyo ireke kuyenda patali. Inde, ndawa yakuti Yahova adapereka udindo kwa azibereki kuti ambalangize wana wawo mwa chikondi. (Deut. 6:6, 7; Miy. 6:20; 22:6; Aef. 6:2-4) Patsogolo pake akulu adzabvunze azibereki peno ankupitiriza kupereka malangizo kwa mwana wawo. Ko tani peno mwana wobatizika ankuchita chimo koma ankulapalini? Mwapa komiti ya akulu, ingakonze vocheza na mwana muyo pabodzi na azibereki wake wachikhrisitu. b
Mwana yemwe akanati kukwanisa magole 18 akachita chimo ikulu, akulu awiri angacheze naye pabodzi na azibereki wake wachikhrisitu panango munthu yemwe ankumusunga (Onani ndime 18)
“YAHOVA NI WACHIKONDI MANINGE KOMASOTI WACHIFNDO”
19. Ko akulu achita tani khama kuti atewedzere Yahova pakuchita vinthu na wanthu omwe achita chimo?
19 Akulu omwe atumikira mu komiti, anaudindo woimira Yahova pa kuthandiza mpingo kuti ukhale wochena. (1 Akor. 5:7) Iwo afunambo kuti wale omwe achita chimo athandiziwe kuti alape peno ni vokwanisika. Kuti vimwevi vikwanisike, akulu akhala na chidikhiro. Ndawa chani? Ndawa yakuti iwo ankufuna kutewedzera Yahova yemwe ni ‘wachikondi maninge komasoti wachifundo.’ (Yak. 5:11) Onani momwe ntumi Yohani ali wachikulire adaonesera khalidwe mweyi. Iye adanemba kuti: ‘Wana wangu okondewa, ninkukunemberani vimwevi kuti muleke kuchita chimo. Koma peno munango angachite chimo tinaye nthandizi Yesu Mkhisitu yemwe ana Ababa.’—1 Yoh. 2:1.
20. Ko tidzakambirane chani mu nkhani yomaliza mu ntsanja mweino?
20 Ni vobvesa ntsisi kuti nthawe zinango Mkhrisitu angalaperini. Vikakhala teno, iye angachosewe mumpingo. Ko akulu asamalira tani nkhani zikuluzikulu ninge mwezi? Tidzakambirane va nkhani mweyi mu nkhani yomaliza mu ntsanja mweyino.
NYIMBO NA. 103 Abusa Ndi Mphatso
