NKHANI YOPFUNZIRA 35
NYIMBO NA. 123 Tizigonjera Mulungu Mokhulupirika
Momwe akulu angathandizire wanthu omwe achosewa mumpingo
“Kudzulu kudzakhale chimwemwe chikulu ndawa ya munthu m’bodzi wochimwa yemwe walapa kuposha cha wanthu 99 wolungama omwe ankufunikalini kulapa.”—LUKA 15:7.
CHOLINGA
Kuona kuti ndawa chani wanthu anango achadekana kuchosewa mumpingo na momwe akulu angawathandizire wanthu mwawa kulapa kuti akhale pomwe obvumizika kwa Yahova.
1-2. (a) Ko Yahova awaona tani wanthu omwe achita machimo koma ankulapalini? (b) Ko Yahova adikhira chani kwa wanthu omwe achita machimo?
YAHOVA ni Mulungu lini wolekerera machimo. (Sal. 5:4-6) Iye ankufuna kuti timbalemekeze mpfundo zake zolungama zomwe adatipasa m’Baibolo. Shuwadi, Yahova adikhiralini ungwiro kwa wanthu ochimwa. (Sal. 130:3, 4) Pa nthawe imbodzimbodzi mweyo iye alekeleralini ‘wanthu woipa omwe atenga kukoma ntima kukulu kwa Mulungu wathu nkukhala chifukwa chochitira vinthu voipa’. (Yuda 4) Baibolo ifotokoza va ‘kudzongewa kwa wanthu woipa’ pa nkhondo ya Armagedo. —2 Pet. 3:7; Chiv. 16:16.
2 Olo nteno, Yahova ankufunalini kuti munthu aliyese adzadzongewe ninge momwe tidafotokozera mu nkhani zapita mu ntsanja mweino. Baibolo itsimikizira kuti ‘iye ankufuna kuti wanthu ose alape.’ (2 Pet. 3:9) Akulu wachikhrisitu, atewedzera Yahova pa kuyesesa modekha kuthandiza wanthu omwe wachita chimo kuchinja vochita vawo na kukhala pomwe obvumizika kwa Yahova. Koma ni wanthu lini ose omwe achita chimo koma nkulapa. (Yes. 6:9) Anango apitiriza kuchita vinthu voipa olo kuti akulu wayesesa mobwerezabwereza kuwathandiza kuti alape. Ko nchani chomwe chingachitike vikakhala tene?
“MUCHOSENI MUNTHU WOIPA MUYO PAKATI PANU”
3. (a) Munthu akachita chimo koma ne kulapa, ko Baibolo inena kuti pachadekana kuchita chani? (b) Pa vochitika mwevi, ndawa chani tinganene kuti munthu muyo wadzichosa yekha mumpingo?
3 Peno munthu yemwe wachita chimo ankulapalini, palibe njira inango yomwe akulu angachite koma kutewedza malangizo yogumanika pa lemba ya 1 Akorinto 5:13 yomwe inena kuti: “Muchoseni munthu woipa muyo pakati panu.” Mwanjira inango, tinganene kuti munthu muyo wasalula yekha vimwevi ndipo iye ankukolola vomwe adabzala. (Agal. 6:7) Ko ndawa chani tingalewe tene? Ndawa yakuti iye alibe kubvera pomwe akulu wayesesa mobwerezabwereza kumuthandiza kuti alape. (2 Maf. 17:12-15) Vochita vake vawonesa kuti iye ankufunalini kutewedza mpfundo za Yahova.—Deut. 30:19, 20.
4. Ko ndawa chani paperekewa chilengezo munthu akachosewa mumpingo?
4 Munthu yemwe wachita chimo koma ankulapalini akachosewa mumpingo, akulu apereka chilengezo mumpingo chodziwisa kuti munthu muyo ni wa Mbonilini pomwe za Yahova. Cholinga cha chilengezo mwechi nkuchitisalini manyazi munthu yemwe wachita chimo, koma chiperekewa na cholinga chakuti abale na alongo atewedze malangizo ya m’Baibolo yakuti “muleke kubverana” na munthu moyu.” “Ndipo olo kudya naye munthu watene mufunikalini.” (1 Akor. 5:9-11) Malangizo mwaya yaperekewa na cholinga chabwino. Ntumi Paulo adanemba kuti: “Vofufumisa ving’onon’gono vifufumisa ufa wose wokanyakanya.” (1 Akor. 5:6) Wanthu omwe ankuchita machimo koma ankulapalini, angafokese wale omwe ankuyesesa kutewedza mpfundo zolungama za Yahova.—Miy. 13:20; 1 Akor. 15:33.
5. Ko tifunika kukhala na maganizo yaponi munthu akachosewa mumpingo, ndipo ndawa chani?
5 Manje, ko tingachite tani vinthu na munthu yemwe wachosewa mumpingo? Olo kuti tibverana naye lini koma tichadekana kumuwona ninge nkhosa yosokera, osati ninge munthu yemwe angachinjelini. Nkhosa yomwe yasokera ingakwanise kubwerera pomwe bwinobwino kumuyi. Kumbukirani kuti nkhosa yosokera mweyi idadzipereka kwa Yahova koma chobvesa ntsisi nchakuti ankukwanirisalini polomisi yake ndipo vimwevi vinkuyikha moyo wake pangozi. (Ezek. 18:31) Ndipomwapa, pomwe Yahova adakapitiriza kuleza ntima, pa na chidikhiro chakuti angabwerere. Ko akulu angawonese tani chidikhiro mwechi kwa wale omwe adachosewa mumpingo?
MOMWE AKULU ATHANDIZIRA WALE OMWE ACHOSEWA MUMPINGO
6. Ko akulu adzachite chani pofuna kuthandiza munthu yemwe wachosewa mumpingo?
6 Ko munthu yemwe wachosewa mumpingo asiyiwiratu yekhayekha kuti afage njira yobwelerera kwa Yahova? Nteno lini. Pa kumufotokozera munthu yemwe wachita chimo koma ankulapalini kuti achosewe mumpingo, komiti ya akulu imuwuza vomwe iye achadekana kuchita kuti abwerere mumpingo. Kuyingizira mwapa, akulu achita pomwe vinthu vizinji maninge. Kazinjikazinji iwo amuwuza munthu yemwe wachosewa kuti ankufuna kunzagumana naye pomwe pakapita minyezi yang’onog’ono na cholinga chakuti adzaone peno wachinja maganizo yake. Peno munthu wochosewa wabvuma kugumana pomwe na akulu, pa ulendo muyo akulu angamuthandize mokoma ntima kuti iye alape na kubwerera. Olo kuti iye alibe kuchinja maganizo pa ulendo moyu, akulu achadekana kumuwuza kuti adzagumane naye pomwe kutsogolo.
7. Ko akulu atewedza tani kukoma ntima kwa Yahova munthu akachosewa mumpingo? (Yeremiya 3:12)
7 Akulu achita khama kuti atewedze chikondi cha Yahova pa kuthandiza munthu yemwe wachosewa mumpingo. Mwakulinganiza, Yahova ambadikhiralini kuti Aizirayeli akasiya kumubvera awonese kuti alapa nkuyamba bwino kuwathandiza. Iye ambayamba kuwathandiza kuti alape olo kuti iwo akalibe kuwonesa maganizo yakuti ankufuna kulapa. Ninge momwe idafotokozera nkhani yachiwiri ya mu ntsanja mweino, Yahova adawonesa chikondi chake pa kuwuza mneneri Hoseya kuti abwererane pomwe na nkazi wake yemwe ambakhala na mwamuna munango. (Hos. 3:1; Mal. 3:7) Pa kutewedzera Yahova, akulu wachikhrisitu ankufuna kuti wanthu omwe achosewa mumpingo abwerere ndipo achitisalini kuti vimwevi vikange.—Werengani Yeremiya 3:12.
8. Ko fanizo ya mwana wolowerera itithandiza tani kubvesa bwino chifundo cha Yahova? (Luka 15:7)
8 Kumbukirani va fanizo ya Yesu ya mwana wolowerera. Ninge momwe tidaonera mu nkhani yachiwiri mu ntsanja mweino, baba ule pomwe adamuona mwana wake ali patali “adamuthamangira n’kumukumbatira ndipo adamubejali mwachikondi.” (Luka 15:20) Onani kuti baba ule alibe kudikhira kuti mwana wake amukumbire kuti amukhululukire. M’malo mwavimwevi, iye ndiye adayamba kuonesa chikondi ninge momwe angachitire baba aliyese. Akulu achita khama kuti awonesembo makhalidwe ninge mwaya kwa wanthu omwe asokera. Iwo ankufuna kuti nkhosa zosokera mwezi “zibwerere kumuyi.” (Luka 15:22-24, 32) Kukhala chimwemwe kudzulu munthu wochimwa akabwerera, ndipo pakhala pomwe chimwemwe pa dziko yapasi.—Werengani Luka 15:7.
9. Ko Yahova agwigwirira tani mwachikondi wanthu omwe achita chimo?
9 Na vomwe tapfunzira, vinkuonekeratu kuti Yahova alekereralini wale omwe achita machimo koma ne kulapa. Koma olo viri teno, iye awasiyiratulini wanthu woipa, ankufuna kuti iwo abwerere. Maganizo ya Yahova kwa wanthu wale omwe achita chimo koma walapa, ya wonesewa pa Hoseya 14:4 pomwe panena kuti: ‘Nidzamalise kusakhulupirika kwawo nidzawakonde mwakufuna mwangu ndawa ukali wangu wamala.’ Chimwechi ni chirimbikiso kwa akulu kuti athandize munthu yemwe waonesa chizindikiro chirichose cha kulapa, ndipo nivolimbikisa pomwe maninge kwa wale omwe asiya Yahova kuti abwerere mwakankulumize.
10-11. Ko akulu ayesesa tani kuthandiza wale omwe adachosewa kalekale mumpingo?
10 Manje ko tani wanthu omwe adachosewa kalekale mumpingo, panango magole yazinji kumbuyo? Panango wanthu mwawa angakhale kuti ankuchitalini pomwe vinthu vomwe vidawachitisa kuti achosewe. Ndipo pa vochitika vinango panango iwo angakumbukirelini pomwe vomwe vidawachitisa kuti achosewe. Mulimose momwe vingakhalire akulu ayesesa kuti awafagefage na kuwazungira wanthu mwawa. Pa ulendo moyu akulu angapemphere nawo pabodzi panango kuwagwigwirira kuti abwerere mumpingo. Kazinjikazinji peno munthu adachosewa mumpingo kalekale mosakayika uzimu wake ni wofoka maninge. Ndipomwapa, peno iye ankufuna kubwerera mumpingo akulu angakodze vakuti iye ambachitisiwe pfunziro ya Baibolo olo kuti iye akalibe kumwezeresewa. Pa vochitika virivose ni akulu okha angasalule munthu yemwe angapfunzire na wanthu mwawo.
11 Pa kutewedza chikondi cha Yahova, akulu ni odzipereka kuthandiza wanthu kuzindikira kuti msuwo udakali wofungula kuti iwo abwerere kwa Yahova. Munthu wachita chimo akasiya vochita vake nkulapa iye angabwezeresewe mwakankulumize.—2 Akor. 2:6-8.
12. (a) Ko ni pa vochitika viponi pomwe akulu ankufunika kusamala manige? (b) Ndawa chani tichadekanalini kuganiza kuti wanthu anango angakhululukiriwelini na Yahova? (Onani mawu ya m’nyantsi.)
12 Pa vochitika vinango, akulu achadekana kukhala tcheru akanati kubwezeresa munthu. Mwakulinganiza, peno munthu adachosewa ndawa yopoderera mwana, ndawa ya mpatuko panango adachosewa ndawa yakuti adachita vinthu vachinyengo kuti amalise banja, akulu achadekana kutsimikiza kuti munthu mouyo walapadi chaivo. (Mal. 2:14; 2 Tim. 3:6) Akulu achadekana kuteteza nkhosa koma nthawe ibodzibodzi mweyo tichadekana kubvesa kuti Yahova adzabvume munthu aliyese yemwe adachita chimo koma waonesa kulapa nkusiya vinthu voipa. Ndipomwapa, olo kuti akulu achadekana kukhala tcheru na wale adachita vinthu vachinyengo kwa anango, achadekanalini kufika pakunena kuti wanthu anango omwe adachita chimo angayenelerelini chifundo cha Yahova. a—1 Pet. 2:10.
VOMWE MPINGO UNGACHITE
13. Ko tichita tani vinthu na munthu yemwe wadzudzuliwa? (b) Ko tichita tani vinthu na wanthu omwe achosewa mumpingo
13 Ninge momwe tidaonera mu nkhani yapitayire, pakaperekewa chilengezo chakuti munthu wadzudzuliwa tingapitirize kubverana naye tinkudziwa kuti iye walapa ndipo wasiya kuchita vinthu voipa. (1 Tim. 5:20) Iye adakali mbali ya mpingo ndipo ankufunika thandizo yomwe ibwera ndawa yobverana na anango komasoti kusonkhana pabodzi. (Aheb. 10:24, 25) Koma ni vosiyana maninge na munthu yemwe wachosewa mumpingo. Tisiya “kubverana” naye “olo kudya naye munthu watene.—1 Akor. 5:11.
14. Ko Akhrisitu angaphatise tani basa chikumbuntima chawo chopfunzisiwa Baibolo pa kuchita vinthu na wanthu omwe achosewa mumpingo? (Onani pomwe foto.)
14 Ko vomwe tapfunzira vinkutanthauza kuti tidzapeweretu munthu yemwe wachosewa mumpingo? Neye, ntenolini. Ni shuwadi kuti tidzabverane nayelini koma tingamuchemerere munthu yemwe wachosewa mumpingo yemwe ni m’bale wathu panango wenze shamweli wathu kuti abwere ku misonkhano ya mpingo. Manje ko tani iye akabwera? Kalekale timbamonisalini wanthu watene koma manje, Mkhrisitu aliyese achadekana kuphatisa basa chikumbuntima chake chopfunzisiwa Baibolo. Anango angasalule kumonisa panango kutambira wanthu ochosewa akabwera ku misonkhano. Koma tichadekanalini kucheza nawo nthawe itali panango kubverananawo wanthu mwawa.
Mkrisitu aliyese angasalule kuchemerera munthu yemwe adachosewa mumpingo kuti abwere kumisonkhano panango kumumonisa akabwera ku misonkhano (Onani ndime 14)
15. Ko ni machimo yaponi yafotokozewa pa lemba ya 2 Yohani 9-11? (Onani pomwe bokosi yakuti “ Ko Paulo na Yohani ambanena va chimo ibodzibodzi?”)
15 Anango angabvunze kuti: Ko Baibolo inenalini kuti munthu akamonisa munthu watene ankugawana naye machimo yeke? (Werengani 2 Yohani 9-11.) Nkhani mweyi iwonesa kuti malangizo mwaya yankutanthauza va wanthu wa mpatuko na anango omwe alimbikisa kuchita makhalidwe yoipa. (Chiv. 2:20) Peno munthu munango ankulimbikisa vipfunziso va mpatuko panango vinthu vinango voipa, akulu angamuzungirelini munthu watene. Ni shuwadi kuti panachidikhiro chakuti munthu muyo angalape koma mpakana mwevi kuchitika, isepano tichadekanalini kumonisa munthu wateno panango kumuchemerera kumisonkhano yathu ya mpingo.
KUTEWEDZA KUKOMA NTIMA NA CHIFUNDO CHA YAHOVA
16-17. (a) Ko Yahova ankufuna kuti wanthu omwe achita machimo achite chani? (Ezekieli 18:32) (b) Ko akulu angaphate tani basa na Yahova kuti athandize munthu yemwe wachita chimo?
16 Ko tapfunzira chani pa nkhani zone 5 za mu ntsanja ino? Yahova afunalini kuti aliyese adzadzongewe! (Werengani Ezekieli 18:32.) Iye ankufuna kuti wanthu ochita machimo achinje nkubverana naye. (2 Akor. 5:20) Ndipomwapa, kuchoka kalekale Yahova wakhala ankuthandiza mobwerezabwereza wanthu wake kuti alape na kubwerera kwa iye. Akulu wa mumpingo anamwayi wophata basa na Yahova pakuthandiza wanthu omwe wachita machimo kuti alape. Aro. 2:4; 1 Akor. 3:9.
17 Ganizirani chimwemwe chomwe chikhala kudzulu munthu wochimwa akalapa. Nthawe zose Ababa wathu Yahava akondwa maninge pomwe nkhosa yosokera yabwerera mumpingo. Chikondi chathu kwa Yahova chipitiriza kukula pomwe tinkuganizira va kukoma ntima komasoti chifundo cha Yahova.—Luka 1:78.
NYIMBO NA. 111 Tili Ndi Zifukwa Zambiri Zokhalira Osangalala
a Baibolo inena kuti wanthu anango angakhululukiriwelini. Mawu mwaya yatanthauza wanthu omwe asalula kupitiriza kutsutsana na Yahova. Ni Yahova na Yesu okha angaweruze kuti munthu adzakhululukiriwelini mpakana kalekale.—Maliko 3:29; Aheb. 10:26, 27.
