NKHANI YOPFUNZIRA 31
NYIMBO NA. 12 Yehova Mulungu Wamkulu
Vomwe Yahova adachita kuti apulumuse wanthu ochimwa
“Mulungu adakonda maninge dziko mwakuti adapereka Mwana wake wobadwa yekha.”—YOH. 3:16.
CHOLINGA
Kuona momwe Yahova nthawe zose achitira vinthu kuti atithandize kulimbana na uchimo na kuona momwe chifundo chake chitithandizira kukhala na chidikhiro cha moyo wosapera womwe ulibe uchimo.
1-2. (a) Ko chimo nchani, ndipo nchani chomwe tingachite kuti tiwine pa kulimbana na uchimo? (Onani pomwe“mawu yofotokozera.”) (b) Ko mu nkhani mweino na nkhani zomwe zinkubwera tidzapfunzire chani? (Onani pomwe mawu yakuti “Okondewa owerenga.”)
KO MUNGAKONDE kudziwa kukula kwa chikondi cha Yahova kwa imwepo? Njira ibodzi yomwe mungadziwire vimwevi ni kupfunzira vomwe Yahova adachita na vomwe ankupitiriza kuchita kuti akupulumuseni imwepo ku uchimo na impfa. Uchimo a ni mzondi woipa maninge ndipo ni mzondi yemwe isepano patekha tingakwaniselini kumuwina. Munthu aliyese ni wochimwa. Isepano tichimwa ntsiku zose ndipo impfa ibwera ndawa ya uchimo. (Aro. 5:12) Koma sikuti vose vidaluzika. Na thandizo ya Yahova, isepano tingakwanise kuwina mzondi woipa moyu. Shuwadi, Yahova ankupolomisa kuti adzatimasule ku uchimo na impfa!
2 Kwa magole 6000, Yahova wakhala ankuthandiza wanthu kulimbana na uchimo. Ndawa chani iye achita vimwevi? Ndawa yakuti atikonda. Kundoyambira pa nthawe yomwe adatilenga, Yahova wakhala ankutionesa chikondi. Iye wachita vinthu vizinji maninge kuti atithandize kuwina pakulimbana na uchimo kuti tikwanise kukhala naye pa ushamwali. Yahova adziwa kuti uchimo ubweresa impfa ndipo iye afunalini kuti isepano tife. Yahova afuna kuti tikhale na moyo mpakana kalekale. (Aro. 6:23) Iye afuna kuti imwepombo mukhale na moyo mpakana kalekale. Mu pfunziro mweino tione midawiro ya mibvunzo yatatu aya: (1) Ko ni chidikhiro chiponi chomwe Yahova wachipereka kwa wanthu ochimwa? (2) Ko wanthu ochimwa kalekale adachita chani kuti akondwerese Yahova? (3) Ko Yesu adachita chani kuti apulumuse wanthu ku uchimo na impfa?
KO NI CHIDIKHIRO CHIPONI CHOMWE YAHOVA WACHIPEREKA KWA WANTHU OCHIMWA?
3. Ko banja yoyamba idachimwa tani?
3 Pomwe Yahova adalenga mwamuna na nkazi woyamba, iye ambafuna kuti iwo ambakhale okondwa. Yahova adawapasa malo yokhuza maninge kuti ambakhale. Adawapasa pomwe mphaso ya ukwati komasoti basa yokomedza maninge. Iwo enze na mwayi wodzadza dziko yapasi na wana wawo, nkuchitisa dziko yose kukhala Paradaiso ninge momwe wenzere munda wa Edeni. Yahova adandolambiza Adamu na Hava chinthu chibodzi basi ndipo chenze chinthu chosashupa. Iye adawaonesa pomwe chikondi chake pa kuwauza vomwe vidzachitike akasalula kusabvera lamulo mweire. Kusabvera lamulo mweyi idakakhala chimo ndipo idakabweresa impfa. Koma tinkudziwa vomwe vidachitika. Mngelo woipa yemwe akondalini Yahova ne wanthu adangenererambo nkhani mweyi ndipo adachitisa kuti Adamu na Hava aleke kubvera Yahova. Banja yoyamba mweyi idabvera mngelo woipa moyu. M’malo mwakuti athembe Ababa wawo wachikondi, iwo adachimwa ndipo isepano tinkudziwa vomwe vidachitika. Kundochokera ntsiku mweire, Adamu na Hava adayamba kubonera kwa moyo wawo wose. Iwo adakalamba ndipo pakumalizira pake adafa. Ninge momwe Yahova adanenera iwo adabwerera kupfumbi.—Gen. 1:28, 29; 2:8, 9, 16-18; 3:1-6, 17-19, 24; 5:5.
4. Ndawa chani Yahova azonda uchimo ndipo ndawa chani atithandiza kuti tilimbane nawo? (Aroma 8:20, 21)
4 Imweyi ni nkhani yobvesa ntsisi. Koma Yahova adachitisa kuti nkhani mweyi inembewe m’Baibolo kuti itipfunzise chinthu chodekana maninge. Nkhani mweyi itithandiza kuona momwe Yahova azondera uchimo. Uchimo utisiyanisa na ababa wathu Yahova ndipo ubweresa impfa. (Yes. 59:2) Ndipomwapa, mngelo woipa moyu yemwe adachitisa Adamu na Hava kuchimwa, akonda uchimo ndipo ankupitiriza kusokeresa wanthu ntsiku zino. Pomwe Adamu na Hava adachimwa, Satana adaganiza kuti wasokoneza cholinga cha Yahova kwa wanthu. Koma iye ambadziwalini kuti Yahova ni wachifundo. Yahova adakachinjalini cholinga chake kwa wana wa Adamu na Hava. Iye akonda wanthu, ndipomwapa pomwe Adamu na Hava adachimwa, Yahova adaperekeratu chidikhiro kwa wana wawo ose. (Werengani Aroma 8:20, 21.) Yahova ambadziwa kuti wana anango wa Adamu na Hava adzasalule kumukonda na kumubvera. Ndipomwapa, adakonza njira yakuti awapulumuse ku uchimo na kuwapasa mwayi wakuti akhale naye pa ushamwali wolimba maninge. Ko nchani chomwe Yahova adachita kuti vimwevi vikwanisike?
5. Ko ni lini pomwe Yahova adapereka chidikhiro kwa wanthu ochimwa? (Genesis 3:15)
5 Werengani Genesis 3:15. Chidikhiro chakuyamba chidaonekera pomwe Yahova adatsumula Satana na kumuuza vomwe vidzamuchitikire. Yahova adalosera kuti kudzabwere ‘mbadwa’ yomwe idzaphatisiwe basa pakupulumusa wanthu. Mbewu mweyi idzadzonge Satana na kukonza vinthu vose vomwe vidadzongeka m’munda wa Edeni. (1 Yoh. 3:8) Koma kuti vimwevi vichitike mbadwa mweyi imbafunika kubonera. Satana ambadzadzonga mbewu mweyi panango kuchitisa kuti ife. Mosakaika vimwevi vimbadzachitisa kuti Yahova abonere maninge muntima. Koma iye wenze wokonzeka kubonera ndawa ni njira mweyi yomwe imbadzachitisa kuti wanthu azinji apulumuke ku uchimo na impfa!
KO WANTHU OCHIMWA KALEKALE ADACHITA CHANI KUTI AKONDWERESE YAHOVA?
6. Ko amuna anango okhulupirika ninge Abele na Nowa adachita chani kuti akhale azishamwali wa Yahova?
6 Magole yazinji patsogolo pake, Yahova adaulula pang’onopang’ono vomwe wanthu ochimwa angachite kuti akhale azishamwali wake. Mwakulinganiza, Abele, mwana wachiwiri wa Adamu na Hava wenze woyamba kuonesa chikhulupiriro kwa Yahova kundochokera pomwe vinthu vidasokonezeka m’munda wa Edeni. Abele ambakonda Yahova ndipo ambafuna kumukondweresa, iye ambafuna kuti akhale shamwali wake. Ndawa ya vimwevi iye ambafuna kupereka mphaso kwa Yahova. Abele wenze nyakabusa. Ndipomwapa, iye adatenga nkhosa zake zinango nkupereka ntsembe kwa Yahova. Ko Yahova adaviona tani vimwevi? Iye ‘adakondwera na Abele komasoti ntsembe yake.’ (Gen. 4:4) Yahova adakondwa pomwe na ntsembe zomwe zimbaperekewa na wanthu omwe ambamukonda na kumuthemba ninge Nowa. (Gen. 8:20, 21) Pakutambira ntsembe mwezi, Yahova adaonesa kuti wanthu ochimwa angakwanise kumukondweresa na kukhala naye pa ushamwali. b
7. Ko tinkupfunzira chani pa vomwe Yahova adakumbira Abulahamu kuti achite?
7 Magole patsogolo pake, Yahova adakumbira Abulahamu, mwamuna yemwe wenze na chikhulupiriro cholimba kuti achite chinthu choshupa maninge chomwe ni kupereka mwana wake Isaki ninge ntsembe. Mosakaika chimwechi chenze chinthu choshupa maninge chomwe Abulahamu adakumbiriwa kuti achite pa moyo wake wose. Vinkuoneka kuti palibe pomwe chinthu chinango chomwe Yahova adakumbira Abulahamu chomwe chenze choshupa maninge kuposha chimwechi. Olo nteno Abulahamu adatsimikiza kubvera Yahova. Pomwe Abulahamu adakhala pang’ono kupereka mwana wake ninge ntsembe, Yahova adamulambiza. Chinthu chimwechi chomwe Yahova adakumbira Abulahamu kuti achite chinkutipfunzisa chonadi chodekana maninge. Yahova wenze wokonzeka kupereka ntsembe mwana wake yemwe iye ambamukonda maninge. Vimwevi vionesa momwe Yahova akondera wanthu.—Gen. 22:1-18.
8. Ko ntsembe zomwe Aizirayeli ambapereka zimbaimira chani? (Levitiko 4:27-29; 17:11)
8 Magole yazinji patsogolo pake, Yahova adapereka lamulo kwa ntundu wa Aizirayeli kuti ambapereke ntsembe za nyama zomwe zidakathandiza kuti machimo yawo yambakhululukiriwe. (Werengani Levitiko 4:27-29; 17:11.) Ntsembe mwezire zimbaimira ntsembe yodekana maninge, ntsembe yomwe imbadzapumulusa wanthu ose ku uchimo. Yahova adauzira aneneri azinji kuti anembe va mbadwa yopolomisiwa. Iwo adafotokoza kuti mbadwa mweyi adzakhale mwana wodekana maninge wa Yahova yemwe ambadzadekana kubonera na kufa. Mbadwa mweyi imbadzaperekewa ntsembe ninge nkhosa. (Yes. 53:1-12) Ndoganizani, Yahova ambadzapereka mwana wake yemwe ambamukonda maninge ninge ntsembe kuti amasule wanthu kuphatanidzapo imwepo ku uchimo na impfa!
KO YESU ADACHITA CHANI KUTI AMASULE WANTHU KU UCHIMO?
9. Ko Yohani m’batizi adanena chani va Yesu? (Aheberi 9:22; 10:1-4, 12)
9 Mu gole ya 29 Yesu akalibe wayamba utumiki wake, Yohani m’batizi adaona Yesu m’Nazareti ndipo adanena kuti: “Onani mwana wa nkhosa wa Mulungu yemwe ankuchosa uchimo wa dziko!” (Yoh. 1:29) Mawu mwaya yankuoneseratu kuti Yesu yenze mbadwa yomwe Yahova adapolomisa. Yesu wenze kudzapereka moyo wake ninge ntsembe kuti amasule wanthu. Pa chochitika chimwechi, polomisi yomwe Yahova wenze adapolomisa yakuti adzapulumuse wanthu ku uchimo idaonekera bwinobwino.—Werengani Aheberi 9:22; 10:1-4, 12.
10. Ko Yesu adaonesa tani kuti “adabwera kudzachemera” wanthu ochimwa?
10 Yesu ambaona mwapadera maninge wanthu omwe ambashupika ndawa ya uchimo ndipo iye ambawachemera kuti akhale ateweri wake. Yesu ambadziwa kuti chinthu chikulu maninge chomwe chichitisa kuti wanthu ambabonere ni uchimo. Ndipomwapa, iye ambachita khama maninge kuti athandize amuna na akazi omwe ambabonera ndawa ya machimo yomwe enze adachita. Nthawe zinango iye adafotokoza vimwevi pakuphatisa basa fanizo. Iye adanena kuti: “Wanthu wodwala ndiwo afunika mfulumero, osati wanthu olimba.” Ndipo iye adamaliza na kunena kuti: “Inepano nilibe kubwera kudzachemera wanthu wolungama, koma wochimwa.” (Mat. 9:12, 13) Ndipo ni vimweviretu vomwe Yesu adachita. Iye adaonesa chifundo ndipo adakhululukira machimo ya nkazi yemwe adapukuta mapazi yake na misozi yake. (Luka 7:37-50) Iye adapfunzisa chonadi chodekana maninge nkazi wachisamariya podiya ambadziwa kuti nkazi moyu ankukhala na mwamuna yemwe wenze alibe kulowolana naye. (Yoh. 4:7, 17-19, 25, 26) Ndipo Mulungu adapasa mphanvu Yesu kuti amalise impfa yomwe ibwera ndawa ya uchimo. Ko iye adachita tani vimwevi? Yesu adachita vimwevi pakumukisa amuna, akazi komasoti wana.—Mat. 11:5.
11. Ndawa chani wanthu ochimwa ambakhala omasuka na Yesu?
11 Ni vobveka kuti olo wanthu omwe ambachita machimo yakuluyakulu ambakhala womasuka na Yesu. Yesu wenze wachifundo na wanthu mwawa ndipo ambabvesa momwe ankubvera. Ndawa ya vimwevi palibe yemwe ambachita mantha kucheza naye. (Luka 15:1, 2) Yesu ambadalisa na kutembeja wanthu omwe ambaonesa chikhulupiriro kwa iye. (Luka 19:1-10) Mwanjira mweyi, Yesu adaonesa bwinobwino momwe Mulungu aliri wachifundo. (Yoh. 14:9) Vinthu vomwe Yesu ambanena na kuchita vimbaonesa kuti Ababa wake wachifundo akonda wanthu ndipo ankufuna kuthandiza munthu aliyese kuti awine pomwe ankulimbana na uchimo. Kuingizira mwapa, Yesu adathandiza wanthu ochimwa kuti achinje vinthu na kuyamba kumutewera.—Luka 5:27, 28.
12. Ko Yesu adapfunzisa chani va impfa yake?
12 Yesu ambadziwa kuti apereke moyo wake ninge ntsembe, mwakuti maulendo yanganani iye adauza ateweri wake kuti adzaperekewe na kukhomererewa pa muti. (Mat. 17:22; 20:18, 19) Iye ambadziwa kuti ntsembe mweyi ndiyo yomwe idzachose uchimo m’dziko ninge momwe Yohani na aneneri anango adanenera. Yesu adanena pomwe kuti impfa yake idzachitise kuti “wanthu azinji” abwere kwa iye. (Yoh. 12:32) Vimwevi vinkutanthauza kuti yemwe adakakhala na chikhulupiriro kwa Yesu na kukhala nteweri wake adakakondweresa Yahova. Yemwe adakachita vimwevi pakumalizira “adakamasuliwa ku uchimo.” (Aro. 6:14, 18, 22; Yoh. 8:32) Ndipomwapa, Yesu wenze wotsimikiza ntima kupirira impfa yowawa mweyi.—Yoh. 10:17, 18.
13. Ko Yesu adafa tani ndipo impfa yake itipfunzisa chani va Yahova? (Onani pomwe foto.)
13 Yesu adaperekewa na m’bodzi mwa azishamwali wake omwe ambawakonda maninge ndipo patsogolo pake azondi wake adamumanga, adamunyoza ndipo adamunenera vinthu vomwe iye alibe kuvichita. Iye adaweruziwa kuti aphewe, adabonera ndipo pakumalizira masocha yadamukhomerera pa muti wodzudzikirapo. Mosakaika vose vimwevi vidamuwawa maninge Yesu. Koma penze munango yemwe ambawawiwa maninge. Yahova Mulungu. Yahova ambadekana kudziletsa maninge kuti aleke kuphatisa basa mphanvu zake zomwe zilibe malire pakufuna kumalisa mabvuto ya mwana wake. Ndawa chani? Ko nchani chomwe chidamuchitisa Yahova kuti abvume kuti mwana wake abonere komasoti kufa? M’dawiro wake ni mawu yabodzi basi, chikondi. Yesu adanena kuti: “Mulungu adakonda maninge dziko mwakuti adapereka Mwana wake wobadwa yekha, kuti aliyese womukhulupirira ayi kuti adzongewe koma akhale na moyo wosapera.”—Yoh. 3:16.
Ni voshupa kubvesa momwe Yahova adabvera pomwe adabvuma kuti mwana wake afe. Koma iye adachita vimwevi kuti atipulumuse ku uchimo na impfa (Onani ndime 13)
14. Ko ntsembe ya Yesu ikutsimikizirani chani?
14 Ntsembe ya Yesu, ni chitsimikizo chikulu maninge cha chikondi cha Yahova kwa mbadwa za Adamu na Hava. Ntsembe mweyi iwonesa kuti Yahova akukondani maninge imwepo. Yahova adapereka chinthu chabwino maninge mpakana adafika pakubva ululu ukulu maninge kuti akupulumuseni ku uchimo na impfa. (1 Yoh. 4:9, 10) Shuwadi, Yahova ankufuna kuthandiza aliyese wa isepano kulimbana na uchimo mpakana kuwina!
15. Ko tichadekana kuchita chani kuti machimo yathu yakhululukiriwe?
15 Mphaso mweyi ya Mulungu, yomwe ni ntsembe ya mwana wake wokondewa ichitisa kuti atikhululukire machimo yathu. Koma kuti tikhululukiriwe tichadekana kuchita chinthu chinango. Yohani m’batizi ndipo patsogolo pake Yesu chaiye adanena vomwe tichadekana kuchita. Iwo adanena kuti: “Lapani ndawa Ufumu wa kudzulu wafendera.” (Mat. 3:1, 2; 4:17) Pamwapa chinthu chikulu maninge chomwe chingatithandize kuti tilimbane na uchimo nakuti tikhale azishamwali wa Ababa wathu wa chikondi ni kulapa. Manje, ko kulapa kutanthauza chani? Ndipo kulapa kumoku kungatithandize tani kuti tilimbane na uchimo? Pfunziro inkubwera idzadawire mibvunzo mwaya.
NYIMBO NA. 18 Tikuthokoza Chifukwa cha Dipo
a MAWU YOFOTOKOZERA: M’Baibolo mawu yakuti “chimo” yangatanthauze kuchita vinthu voipa, kusachita vinthu vobverana na maganizo ya Yahova pa nkhani ya chabwino na choipa. Koma mawu yakuti “chimo” yangatanthauze pomwe uchimo womwe tidatengera kwa Adamu. Isepano tikufa ndawa ya uchimo moyu womwe tidatengera.
