NKHANI YOPFUNZIRA 32
NYIMBO NA. 44 Pemphero la Munthu Wovutika
Yahova ankufuna kuti wanthu ose alape
“Yahova . . . Ankufunalini kuti munthu aliyese adzadzongewe, koma ankufuna kuti wanthu ose alape.”—2 PET. 3:9.
CHOLINGA
Kubvesa tanthauzo ya kulapa, ndawa chani nkodekana, na kuona momwe Yahova athandizira wanthu wa mitundu yose kuti alape.
1. Ko kulapa kutanthauza chani?
TIKACHITA chinthu choipa tichadekana kulapa. Mobverana na vomwe Baibolo ilewa, munthu akalapa ayamba kuzonda chinthu choipa chomwe wachita, achinja makhalidwe yake, asiya kuchita vomwe adachita ndipo atsimikiza kuti aleke kubwereza pomwe chinthu chimweicho.—Onani Grossario, “Arependimento.”
2. Ndawa chani tose tichadekana kupfunzira pa nkhani ya kulapa? (Nehemiya 8:9-11)
2 Wanthu ose achadekana kupfunzira va kulapa. Ndawa chani? Ndawa yakuti ntsiku iriyose tose tiphonyesa vinthu, ndise wana wa Adamu na Hava, ndawa ya vimwevi tidatengera uchimo na impfa. (Aro. 3:23; 5:12) Palibe yemwe ni womasuka pa nkhani mweyi olo wanthu okhulupirika maninge wakumbuyo ninge ntumi Paulo ambadekanambo kulimbana na maganizo yoipa. (Aro. 7:21-24) Ko vimwevi vinkutanthauza kuti tichadekana kukhala okhumudwa nthawe zose ndawa ya vophonya vathu? Neye, Yahova ni wa chifundo maninge, ndipo ankufuna kuti timbakhale okondwa nthawe zose. Ganizirani vomwe vidachitikira Ayuda mu nthawe ya Nehemiya. (Werengani Nehemiya 8:9-11.) Yahova ambafunalini kuti iwo ambakhale okhumudwa maninge ndawa ya machimo yawo yomwe adachita kumbuyo. Iye ambafuna kuti Ayuda ambamutumikire mokondwa. Yahova ambadziwa kuti yemwe walapa angakwanise kukhala wokondwa ndipomwapa, iye atipfunzisa vimwevi. Isepano tikalapa machimo yathu yose tingatsimikizire kuti Ababa wathu wachifundo adzatikhululukire.
3. Ko tipfunzire chani mu nkhani mweino?
3 Mu nkhani mweyi tipfunzire vinthu vitatu vomwe vitithandize kudziwa vizinji pa nkhani ya kulapa. Chakuyamba, ko Yahova adapfunzisa chani ntundu wa Aizirayeli? Chachiwiri, ko Yahova adachita tani kuti athandize wanthu ochimwa kuti alape? Ndipo chachitatu, ko Yesu adapfunzisa chani ateweri wake pa nkhani ya kulapa?
KO YAHOVA ADAPFUNZISA CHANI NTUNDU WA AIZIRAYELI PA NKHANI YA KULAPA?
4. Ko Yahova adapfunzisa chani Aizirayeli pa nkhani ya kulapa?
4 Pomwe Yahova adasalula ntundu wa Aizirayeli, iye adachita nawo pangano panango kuti mbverano. Yahova adawapasa malamulo yanango yomwe yadakawateteza na kuchitisa kuti Yahova ambawadalise. Ndipo iwo adabvuma kutewedza. Pakulewa va malamulo mwaya, Yahova adawatsimikizira kuti: ‘Lamulo yomwe ninkukupasani lero iyi, ni yosashupa kwa imwepo kuyitewedza. Ndipo ilirini pa malo pakuti mungaigumanelini.’ (Deut. 30:11, 16) Aizirayeli adakakhala osabvera malamulo panango kusalula kutumikira milungu yanango, Yahova adakachosa madaliso yake. Iwo adakabonera ndawa ya vimwevi. Olo nteno, vinkutanthauzalini kuti Yahova adakawasiyiratu mpakana kalekale. Iwo adakakwanisa ‘kubwerera kwa Yahova Mulungu wawo, na kubvera mawu yake.’ (Deut. 30:1-3, 17-20) M’mawu yanango tinganene kuti iwo enze na mwayi wakuti angalape. Iwo adakalapa, Yahova adakawafenderera nkuwadalisa pomwe.
5. Ko Yahova adaonesa tani kudekha kwa wanthu omwe ambamubveralini? (2 Mafumu 17:13, 14)
5 Olo kuti wenze ntundu wosaluliwa na Mulungu, Aizirayeli adamupandukira Yahova maulendo yazinji maninge. Kuingizira pa kutumikira milungu yanango, iwo adachita vinthu vizinji voipa. Ndawa ya vimwevi iwo adabonera maninge. Koma Yahova alibe kusiya kuwathandiza wanthu mwawa omwe ambachita vinthu voipa. Ndipo kwa maulendo yazinji Yahova ambatumiza aneneri kuti akawagwigwirire wanthu mwawa kuti alape nakuti ambamutumikire na ntima wose.—Werengani 2 Mafumu 17:13, 14.
6. Ko Yahova adaphatisa basa tani aneneri pakupfunzisa wanthu ubwino wa kulapa? (Onani pomwe foto.)
6 Onani nthawe zinango pomwe Yahova adaphatisa basa aneneri kuti achenjeze Aizirayeli va mabvuto yomwe yangabwere ndawa ya vophonya vawo na kuwathandiza kuti alape nkuchinja vophonya vawo. Mwakulinganiza, Mulungu adaphatisa basa Yeremiya kuti akauze Aizirayeli kuti: ‘Bwerera Izirayeli wopanduka iwe . . . Nidzakunyang’anelini mwaukali ndawa ndine wokhulupirika . . . Nidzakhalelini wokalipa mpakana kalekale. Koma ndobvumani kuti ndimwe wophonya ndawa mwapandukira Yahova Mulungu wanu.’ (Yer. 3:12, 13) Pakuphatisa basa Yoweli, Yahova adanena kuti: ‘Bwererani kwa ine na ntima wose.’ (Yow. 2:12, 13) Yahova adaphatisa pomwe basa Yesaya kukawauza kuti: ‘Dzicheneseni, chosani vochita vanu voipa pa maso pangu. Lekani kuchita voipa.’ (Yes. 1:16-19) Ndipo Ezekieli adalamuliwa na Yahova kukauza Aizirayeli kuti: ‘Ko inepano nikondwa na impfa ya munthu wochimwa? . . . Ko nifunalini kuti munthu wochimwa alape nkupitiriza kukhala na moyo? Inepano nikondwalini na impfa ya munthu aliyese, . . . Ndipomwapa, siyani kuchita voipa kuti mupitirize kukhala na moyo.’ (Ezek. 18:23, 32) Yahova, akhala wokondwa maninge akaona kuti munthu wochimwa walapa. Ndawa yakuti iye afuna kuti wanthu ose akhale na moyo mpakana kalekale. Ndipomwapa, Yahova adikhiralini kuti wanthu ochimwa achinje ndiko kuyamba kuwathandiza. Naboni tione vitsanzo vinango.
Nthawe zizinji Yahova ambaphatisa basa aneneri wake kuti athandize wanthu ochimwa kulapa (Onani ndime 6-7)
7. Pakulewa vomwe vidachitikira Hoseya na nkazi wake, ko Yahova adawapfunzisa chani wanthu wake?
7 Onani momwe Yahova adaphatisira basa chitsanzo cha vochitika chaivo, kuti apfunzise wanthu wake va kulapa. Yahova, adayankhula vomwe vidachitika na Gomeri nkazi wa mneneri Hoseya. Gomeri, adachita chigololo ndipo adamusiya Hoseya nkuyenda kukakhala na mwamuna munango. Ko chimo yake yenze ikulu maninge mwakuti venze vosakwanisika kumuthandiza? Yahova yemwe aona va muntima, adamuuza Hoseya kuti: ‘Yenda ukayambe pomwe kukonda nkazi yemwe ankukondewa na mwamuna munango yemwe ankuchita chigololo. Ukamukonde ninge momwe Yahova akondera Aizirayeli podiya kuti iwo atumikira milungu yanango.’ (Hos. 3:1; Miy. 16:2) Onani kuti nkazi wa Hoseya wenze adakachita vinthu voipa. Olo nteno, Yahova adamuuza Hoseya kuti ambadekana kumufaga kuti amukhululukire kuti iye akhale pomwe nkazi wake. a Mwanjira ibodzibodzi mweyi, Yahova wenze alibe kusiya ntundu wa Aizirayeli. Olo kuti iwo wenze ouma ntima mwakuti ambasiyalini vophonya vawo. Olo kuti ambachita vinthu voipa maninge, Yahova ambawakonda ndipo ambafuna kuwathandiza kuti alape na kuchinja vinthu pa moyo wawo. Chitsanzo mwechi, chingatichitise kukhala na mbvunzo uyu: Ko vimwevi vikutanthauza kuti Yahova ‘yemwe aona va muntima’ athandiza munthu yemwe adakachita chimo ikulu kuti alape? (Miy. 17:3) Naboni tione.
VOMWE YAHOVA ANKUCHITA KUTI ATHANDIZE WANTHU OCHIMWA KUTI ALAPE
8. Ko Yahova adachita chani pa kuthandiza Kaini kuti alape? (Genesis 4:3-7) (Onani pomwe foto.)
8 Kaini wenze mwana woyamba wa Adamu na Hava. Ninge wana wose wa Adamu na Hava, Kaini adatengerambo maganizo ya azibereki wake yofuna kuchita vinthu voipa. Baibolo inena kuti ‘vochita vake venze voipa.’ (1 Yoh. 3:12) Vimwevi vingatithandize kubvesa ndawa yake Yahova ‘alibe kukondwa na Kaini na mphaso yake pomwe iye adapereka ntsembe.’ M’malo mwakuti iye achinje maganizo yake, ‘Kaini adabvuma kuti ukali wake ukule ndipo adakhala wokalipa maninge.’ Ko Yahova adachita tani kuti amuthandize? Yahova adacheza naye Kaini. (Werengani Genesis 4:3-7.) Onani kuti Yahova mokoma ntima adamuthandiza Kaini, kuona kuti Yahova angamudalise peno iye angachite vinthu vabwino. Ndipo adamuchenjeza pomwe mabvuto yomwe angagumane nayo akapitiriza kukhala wokalipa. Chobvesa ntsisi ni chakuti Kaini alibe kubvera Yahova. Iye alibe kufuna kuthandiziwa na Mulungu. Ndipo alibe kufuna kulapa, vinkuonekeratu kuti Yahova adakwinyirira maninge na vimwevi. Manje ko vimwevi, vidachitisa kuti Yahova asiye kuthandiza wanthu kuti alape? Ne pang’ono!
Yahova adamufotokozera Kaini mabvuto yomwe yangabwere ndawa ya uchimo wake, koma mokoma ntima iye adamuonesa kuti penze chidikhiro chakuti angamudalise peno iye angachinje (Onani ndime 8)
9. Ko Yahova adachita chani pa kuthandiza Davide kuti alape?
9 Yahova, ambakonda maninge Mpfumu Davide. Mpakana adafika pakunena kuti ni ‘munthu wapamoyo pangu.’ (Mac. 13:22) Koma Davide adachita machimo yakuluyakulu. Chimo yachigololo komasoti yakupha. Mobverana na Chilamulo cha Mose, Davide ambafunika kuphewa. (Lev. 20:10; Num. 35:31) Koma olo viri teno, Yahova ambafuna kuthandiza Davide kuti alape. b Iye ndiye adatumiza mneneri Natani kuti akaone Davide. Olo kuti Davide wenze akanati kuonesa maganizo yakulapa. Natani adaphatisa pasa chitsanzo chabwino maninge kuti amufike pa moyo Davide ndipo chitsanzo mwechi chidaphata basa. Davide adazindikira kuti wenze adamuphonyera maninge Yahova. Ndipo iye adalapa. (2 Sam. 12:1-14) Davide adanemba bukhu inango ya salimo pakuonesa kuti wenze adalapa kuchokera pasi pa ntima pa vomwe adachita. (Sal. 51, mawu ya padzulu) Wanthu azinji omwe adachita machimo, afikiwa pa moyo akambawerenga salimo mweyi ndipo alapa. Ko muchabva tani mukaganizira chikondi cha Yahova chomwe adaonesa Davide pakumuthandiza kuti alape?
10. Ko mudzibva tani mukambaganizira va kudekha na kukhululuka kwa Yahova?
10 Yahova azonda chimo. Ndipo iye anyalanyazalini vophonya va wanthu. (Sal. 5:4, 5) Koma iye adziwa kuti tose isepano ndise ochimwa. Koma ndawa yakuti atikonda maninge, iye achita vose kuti atithandize kulimbana na uchimo. Nthawe zose Yahova ankuyesesa kuthandiza wanthu omwe achita machimo yoipa maninge kuti alape na kumufenderera. Ni vabwino maninge kudziwa vimwevi. Tikambaganizira kudekha na kukhululuka kwa Yahova, tikhala otsimikiza kupitiriza kukhala okhulupirika ndipo tilapa mwakankulumize tikachita chimo. Manje namboni tione vomwe Yesu adapfunzisa opfunzira wake pa nkhani ya kulapa.
VOMWE YESU ADAPFUNZISA OPFUNZIRA WAKE PA NKHANI YA KULAPA
11-12. Ko Yesu adathandiza tani opfunzira wake kubvesa momwe Yahova aliri wokhululuka? (Onani foto.)
11 Pomwe idakwana nthawe yakuti Mesiya awonekere ninge momwe tidaonera mu nkhani yapita ire, Yahova adaphatisa basa Yohani m’batizi na Yesu Mkhrisitu pa kupfunzisa wanthu ubwino wa kulapa.—Mat. 3:1, 2; 4:17.
12 Pomwe wenze pano padziko yapasi, Yesu adapfunzisa opfunzira wake momwe Ababa wake wenzere wokonzeka kukhululukira wanthu ochimwa. Ndipo Yesu adawafika pamoyo pomwe adawafotokozera chitsanzo cha mwana wolowerera. Mu fanizo mweyi, mulumbwana adasaina kuchoka pamuyi nkuyamba kuchita vinthu vizinji voipa maninge koma patsogolo pake “iye adadzilinga” ndipo adabwerera kumuyi. Ko ababa wake adamutambira tani? Yesu adalewa kuti ababa wake mwawo adamuona “iye adakali patali ndipo adachita chifundo maninge adamuthamangira nkumukumbatira ndipo adamubejali mwachikondi.” Mwana wawo moyu adakumbira ababa wake kuti akhale ninge nyabasa wawo. Koma ababa wake adanena kuti: “Mwana wangu uyu wenze adasowa koma manje wagumanika,” pamwapa ababa wake adamubvuma kuti abwerere pomwe kumuyi. (Luka 15:11-32) Pomwe Yesu wenze kudzulu akanati wabwera pano padziko yapasi, mosakaika iye adaona maulendo yazinji momwe Yahova ambaonesera chifundo, ndipo mobwerezabwereza ankukhululukira wanthu omwe alapa! Nkhani mweyi yomwe Yesu adafotokoza ni yolimbikisa maninge ndipo itionesa momwe Ababa wathu Yahova aliri wachifundo.
Fanizo ya Yesu ya mwana wolowerera, baba adathamanga nkukakumbatira mwana wake yemwe wenze adabwerera kumuyi (Onani ndime 11-12)
13-14. Ko ntumi Petulo adapfunzira chani pa nkhani ya kulapa ndipo iye adapfunzisa chani anango? (Onani pomwe foto.)
13 Ntumi Petulo adapfunzira vizinji na Yesu pa nkhani ya kulapa na kukhululuka. Petulo adaphonyesa vinthu vizinji koma Yesu nthawe zose wenze wokonzeka kukhululuka. Mwakulinganiza, Petulo adalamba Yesu maulendo yatatu pakulewa kuti ankumudziwalini. Koma patsogolo pake iye adabva chisoni maninge na vomwe wenze adachita. (Mat. 26:34, 35, 69-75) Koma pomwe adamukisiwa, Yesu adaonekera kwa Petulo pomwe wenze yekha. (Luka 24:33, 34; 1 Akor. 15:3-5) Shuwadi kuti Yesu ambadziwa kuti Petulo wenze adalapa, ndipo ambafuna kumuonesa kuti wamukhululukira.—Onani Maliko 16:7.
14 Ndawa ya kuona kukhululuka kwa Yahova na Yesu, Petulo wenze wokonzeka kupfunzisa anango va kulapa na kukhululuka. Pa nthawe ya chikondwerero cha pentekosite Petulo adakambira nkhani Ayuda azinji omwe ambakhulupiriralini Yesu. Nkuwafotokozera kuti iwo enze na mulandu wa impfa ya Mesiya. Viri teno ndawa Petulo adawaonesa chikondi ndipo adawagwigwilira kuti: “Lapani na kuchinja kuti machimo yanu yapfudziwe, nakuti nthawe zotsitsimusa zibwere kuchokera kwa Yahova.” (Mac. 3:14, 15, 17, 19) Petulo adaonesa kuti ni kulapa komwe kungalimbikise munthu kuchinja kaganizidwe kake na vochita vake. Mwanjira mweyi munthu wochimwa angayambe moyo unango unyowani wokondweresa Yahova. Petulo adaonesa pomwe kuti Yahova adzapfudze vophonya va wanthu panango kuti wosakumbukira pomwe vophonya vawo. Patsogolo pa magole yazinji Petulo adawatsimikizira kuti: ‘Yahova . . . ankukulezerani ntima ndawa afunalini kuti munthu aliyese adzadzongewe koma ankufuna kuti wanthu wose alape.’ (2 Pet. 3:9) Chimwechi nichidikhiro chabwino maninge ndawa yakuti olo wale omwe adachita machimo yakuluyakulu akhululukiriwa na Yahova!
Yesu adakhululukira mwachikondi ntumi wake yemwe adalapa (Onani ndime 13-14)
15-16. (a) Ko ntumi Paulo adapfunzira chani va kukhululuka kwa Yahova? (1 Timoteyo 1:12-15) (b) Ko tidzapfunzire chani mu nkhani inkubwera?
15 Ni wanthu ang’onong’ono omwe ambadekana kulapa na kukhululukiriwa kuposha Saulo wa ku Tarisi. Iye ambadzudza Akhrisitu mwankhanza maninge. Akhrisitu azinji ambaganiza kuti iye angachinjelini. Koma momwe Yesu ambamuonera Paulo ni mosiyana maninge na momwe Akhrisitu wale angamuonera. Yesu ambadziwa kuti Paulo angachinje nkulapa. Yesu na Yahova ambaona makhalidwe yabwino mwa Saulo. Ndawa ya vimwevi Yesu adanena kuti: “Munthu moyu ni chombo changu chosankhuliwa.” (Mac. 9:15) Mpakana Yesu adachita chodabwisa kuti athandize Saulo kulapa. (Mac. 7:58–8:3; 9:1-9, 17-20) Patsogolo pakuti wakhala Mkhrisitu, Saulo yemwe patsogolo pake adadzadziwika kuti ntumi Paulo, kwa maulendo yazinji iye adaonesa momwe wenzere wotembeja kukoma ntima na chifundo chomwe Yahova na Yesu enze adamuonesa. (Werengani 1 Timoteyo 1:12-15.) Kutembeja mouku kudachitisa Paulo kulewa kuti: “Mulungu ankukuonesa kukoma ntima kwake kukulu . . . na cholinga chakuti ulape.”—Aro. 2:4.
16 Nthawe zinango Paulo adabva nkhani yoipa maninge yomwe yenze idachitika mumpingo wa ku Korinto. Mwamuna munango wenze adachita chigololo koma iye wenze adakali mumpingo. Ko Paulo adachita chani pa nkhani mweyi? Vomwe Paulo adanembera mpingo wa ku Korinto, vitipfunzisa momwe Yahova awonesera chikondi pa kulanga ntumiki wake na momwe iye awonesera chifundo munthu wochimwa akalapa. Mu nkhani inkubwera tidzakambirane bwinobwino vomwe vidachitika mumpingo wa ku Korinto na momwe tingatewedzerere chifundo cha Yahova.
NYIMBO NA. 33 Umutulire Yehova Nkhawa Zako
a Nkhani mweyi yenze ya chilendo. Ntsiku zino Yahova achichimizalini munthu kupitiriza kukhala pa banja na munzake yemwe wachita chigololo. Yahova adauza Yesu kuti munthu yemwe ali pa banja peno munzake wachita chigololo angamalise banja peno ankufuna.—Mat. 5:32; 19:9.
