Mibvunzo yochokera kwa owerenga
Pa lemba ya 2 Atesalonika 3:14 panena kuti “muikheni chizindikiro.” Ko nimbani yemwe achadekana kuchita vimwevi? Ko ni akulu panango aliyese mumpingo?
Ntumi Paulo, adanembera Akhrisitu wa ku Tesalonika kuti: “Koma peno munango ankubveralini mawu yathu yomwe yali mukalata mweyi, muikheni chizindikiro.” (2 Ates. 3:14) Pakuyamba timbanena kuti yamwaya ni malangizo yoyenda kwa akulu. Peno munthu angapitirize kunyalanyaza mpfundo za m’Baibolo pomwe wathandiziwa mobwerezabweraza, akulu panango angakambe nkhani mumpingo kuti mpingo udziwe va nkhani mweyo. Vikakhala teno, wofalisa aliyese angachitelini vinthu pabodzi na munthu mouyo kupatulapo pa misonkhano panango mu umboni.
Koma pankufunika kuchinja. Manje tabvesa kuti malangizo ya Paulo mwaya yankutanthauza chosalula chomwe Mkhrisitu aliyese angasalule mobverana na momwe vinthu viliri. Ndipomwapa, palibe chifukwa chakuti akulu akambe nkhani yoyikha chizindikiro munthu. Ko ndawa chani tachinja tene? Onani vifukwa vomwe vidachitisa Paulo kunena vimwevi.
Paulo adanena kuti wanthu anango wa mumpingo moule ambachita “vinthu vosokonezeka.” Paulo wenze adawapasa malangizo yanango yochokera m’Baibolo. Koma ambafunalini kuyatewedza. Pa ulendo unango pomwe adawazungira adawapasa lamulo inango yakuti: “Peno munthu akufunalini kuphata basa, ayi kuti adye.” Koma anango ambalamba kuphata basa kuti adzisamalire olo kuti kwa iwo venze vokwanisika kuchita vimwevi. Kuingizira pamwapa, iwo ambangenerera nkhani za anango. Ko Akhrisitu ambadekana kuchita nawo tani wanthu wosalongosoka mwawa?—2 Ates. 3:6, 10-12.
Paulo adanena kuti: “Muikheni chizindikiro.” Mawu mwaya mu Chingiriki yatanthauza pomwe kuzindikira munthu mouyo nkumupewa kuti tileke kutengera makhalidwe yake. Paulo adapereka malangizo mwaya ku mpingo wose, osati kwa akulu okha. (2 Ates. 1:1; 3:6) Ndipomwapa, Mkhrisitu aliyese akaona m’bale panango mulongo ankuchita vinthu vosokonezeka, angasalule kuleka kubverana naye panango kuleka kuchita naye vinthu pabodzi.
Ko vimwevi vinkutanthauza kuti munthu mouyo achadekana kuonewa ninge munthu yemwe wachosewa mumpingo? Neye, ndawa yakuti Paulo adanena pomwe kuti: “Pitirizani kumulangiza ninge m’bale.” Ndipomwapa, Mkhrisitu aliyese angachite naye vinthu munthu mouyo kumisonkhano panango mu umboni. Koma angasalule kuleka kuchita naye vinthu pabodzi pa mafesta panango pa vosangalasa vinango. Ndawa chani? Paulo adanena kuti: “Kuti achite manyazi.” Tikawaikha chizindikiro wanthu mwawa panango iwo angachite manyazi na vomwe ankuchita nkuchinja vochita vawo.—2 Ates. 3:14, 15.
Ko Akhrisitu angadziwe tani kuti achadekana kuikha chizindikiro munthu? Chakuyamba, tichadekana kutsimikizira kuti vochita va munthu mouyo ni “vosalongosoka.” Ninge momwe Paulo adanenera, iye ambanenalini wanthu omwe tisiyana nawo chikumbuntima panango vosangalasa. Ndipo ambanenalini pomwe va wanthu omwe wandotikhumudwisa. Koma Paulo ambanena va wanthu omwe asalula kusabvera malangizo ya Yahova mwadala.
Ntsiku zino, tikazindikira m’bale panango mulongo yemwe ankuonesa mzimu a wosabvera ndipo ankupitiriza kunyalanyaza malamulo ya Mulungu, tidzasalule tekha kusachita vinthu pabodzi na munthu mouyo pa mafesta panango pa vosangalasa vinango. Ndawa yakuti chimwechi ni chosalula cha aliyese payekha, tichadekanalini kuuza munthu munango va nkhani mweyi kupatulako azibale wathu. Koma tingapitirize kuchita naye vinthu munthu mouyo pa misonkhano panango mu umboni. Iye akachinja khalidwe yake na vochita vake, tingayambe pomwe kuchita naye vinthu vose bwinobwino.
a Mwakulinganiza, Mkhrisitu angalambe kuphata basa kuti adzisamalire olo kuti iye angakwanise kuchita vimwevo. Panango kukhala pa chibwenzi na munthu yemwe atumikiralini Yahova. Panango ankunena vinthu voipa vokhudza malangizo yomwe titambira mumpingo. Atsutsa chipfunziso chinango cha m’Baibolo panango ni wa khokolo. (1 Akor. 7:39; 2 Akor. 6:14; 2 Ates. 3:11, 12; 1 Tim. 5:13) Wale omwe apitiriza kuchita vinthu vimwevi ni “wosalongosoka.”
