NKHANI YOPFUNZIRA 25
NYIMBO NA. 7 Yehova Ndiye Mphamvu Zathu
Ayi kuyebwa kuti Yahova ‘ni Mulungu wa moyo’
‘Yahova ni wamoyo’—SAL. 18:46.
CHOLINGA
Kuona ubwino wokumbukira kuti Yahova yemwe tichamutumikira ni ‘Mulungu wamoyo.’
1. Ko nchani chomwe chithandiza atumiki wa Yahova kupitiriza kumutumikira podiya agumana na mabvuto yazinji?
“NTHAWE yapadera na yoshupa.” Nteneuyu momwe Baibolo ifotokozera va ntsiku zomwe tinkukhala zino. (2 Tim. 3:1) Kuingizira pa mabvuto yomwe tose tinkugumana nayo mu dziko ya Satana iyi, atumiki wa Yahova alimbana pomwe na chidzudzo. Koma ko nchani chomwe chichatithandiza kutumikira Yahova podiya kuti tinkulimbana na mabvuto yazinji? Chinthu chibodzi chomwe chitithandiza ni kudziwa kuti Yahova ni ‘Mulungu wamoyo.’—Yer. 10:10; 2 Tim. 1:12.
2. Ko tidziwa chani polewa va Mulungu wamoyo vomwe vitilimbikisa maninge?
2 Yahova ni munthu chaiye, iye atithandiza tikakhala pa mabvuto ndipo nthawe zose agumana njira yotithandizira. (2 Mbiri 16:9; Sal. 23:4) Tikambakumbukira kuti Yahova atidera nkhawa nakuti nthawe zose afuna kutithandiza, tikhala na mphanvu yopilirira bvuto iriyose yomwe ingabwere. Naboni tione kuti vimwevi ni chaivodi pa vomwe vidachitikira Mpfumu Davide na atumiki anango wa Yahova.
3. Ko Davide ambatanthauza chani pomwe adalewa kuti ‘Yahova ni wamoyo’?
3 Davide ambamudziwa bwino Yahova ndipo ambamuthemba. Pomwe ambathawa azondi wake kuphatanidzapo Mpfumu Sauli, Davide adapemphera kwa Yahova kukumbira thandizo. (Sal. 18:6) Pomwe Yahova adadawira pemphero ya Davide pakumuthandiza, Davide adalewa kuti: ‘Yahova ni wamoyo.’ (Sal. 18:46) Ko Davide ambafuna kutanthauza chani na mawu mwaya? Bukhu inango ya marefarensia idanena kuti “pamwapa Davide ambafotokoza va chikhulupiriro chake, kuti Yahova ni Mulungu m’bodzi chaiye nakuti nthawe zose achathandiza atumiki wake.” Inde, Davide ambadziwa kuti Yahova alitcheru na vomwe vimbamuchitikira nakuti ni wokonzeka kumuthandiza. Ni vimwevi vomwe vidathandiza Davide kupitiriza kumutumikira na kumutamanda Yahova.—Sal. 18:28, 29, 49.
4. Ndawa chani ni vodekana kukhala na chitsimikizo chakuti Yahova ni Mulungu wamoyo?
4 Kukhala na chitsimikizo chakuti Yahova ni Mulungu wamoyo ndiko komwe kudzatithandize kumutumikira mwakhama ndipo vidzatipase mphanvu kuti tipirire chiyeso chirichose nakuti tipitirize kuchita vomwe tingakwanise pakumutumikira. Kuingizira mwapa ndiko komwe kudzatithandize kuti timufenderere maninge Mulungu wathu.
MULUNGU WAMOYO ADZAKULIMBISENI
5. Nchani chomwe chingalimbise chikhulupiriro chathu tikambagumana na mabvuto? (Afilipi 4:13)
5 Tingakwanise kulimbana na bvuto iriyose ikhale ikulu panango ing’ono tikambakumbukira kuti Yahova ni Mulungu wamoyo nakuti nthawe zose ni wokonzeka kutithandiza. Chaivo ni vakuti kwa Yahova palibe bvuto yomwe aiona kuti ni ikulu ndawa yakuti ni Mulungu wa mphanvu zose ndipo angatipase mphanvu zomwe tinkudekana. (Werengani Afilipi 4:13.) Ndipomwapa, tingakwanise kupirira bvuto iriyose na chikhulupiriro. Tikambaona Yahova ankutithandiza pa vinthu ving’onoving’ono, chikhulupiriro chathu chikhala cholimba maninge chakuti iye adzatithandize pa mabvuto yakuluyakulu.
6. Nchani chomwe chidachitikira Davide pomwe wenze mulumbwana chomwe chidamuthandiza kuthemba maninge Yahova?
6 Onani vochitika viwiri vomwe vidaingizira chikhulupiriro cha Davide kwa Yahova. Pomwe wenze mulumbwana ankuwetera nkhosa, pa nthawe ziwiri zosiyana chimbalangondo na mphondolo vidaphata nkhosa za ababa wake. Pa nthawe ziwiri mwezi Davide adavirondola ndipo adapulumusa wana wa nkhosa. Koma Davide alibe kuganiza kuti adakwanisa kuchita mwevire ndawa ya mphanvu zake. Iye ambadziwa kuti ni Yahova yemwe wamuthandiza kukhala wolimba ntima na mphanvu kuti akwanise kuchita vimwevi. (1 Sam. 17:34-37) Davide alibe kuyebwa vochitika viwiri mwevi. Akambaganizira vomwe vidachitika, chikhulupiriro chake kwa Yahova chimbakhala cholimba maninge pakudziwa kuti Mulungu wamoyo adzamuthandize pa nthawe iriyose yomwe ankudekana thandizo.
7. Ko Davide ambathemba mbani ndipo vidamuthandiza tani pomwe ambamenyana na Goliyati?
7 Patsogolo pake, pomwe Davide wenze adakali mulumbwana adayenda kunsasa komwe kwenze masocha ya Aizirayeli. Iye adaona kuti masocha yenze na mantha na Goliyati yemwe ‘ambanyoza masocha ya Aizirayeli.’ (1 Sam. 17:10, 11) Masocha yadakhala na mantha ndawa yakuti ambandonyang’anisisa nsinkhu wa Goliyati na kuwagopsa komwe iye ambachita. (1 Sam. 17:24, 25) Koma Davide ambaona vinthu mosiyana. Davide ambadziwa kuti Goliyati ankundonyozalini masocha ya Aizirayeli yokha, koma ‘ankunyoza masocha ya Mulungu wamoyo.’ (1 Sam. 17:26) Davide adathemba Yahova. Iye ambadziwa kuti Mulungu yemwe adamuthandiza pomwe wenze nyakabusa, achite pomwe chibodzibodzi pa chochitika chimwechi. Iye ambakayikiralini kuti Yahova amuthandize. Ndipomwapa adakwanisa kumenyana na Goliyati ndipo ninge momwe tinkudziwira Davide adawina!—1 Sam. 17:45-51.
8. Nchani chomwe chingalimbise chikhulupiriro chathu chakuti Yahova nthawe zose adzatithandize pa nthawe zoshupa? (Onani pomwe foto.)
8 Isepanombo tingakwanise kupirira bvuto iriyose tikambakumbukira kuti Mulungu wamoyo nthawe zose ni wokonzeka kutithandiza. (Sal. 118:6) Tikambakumbukira vomwe iye adachita kumbuyo, tikwanisa kulimbisa chikhulupiriro chathu kwa Yahova. Manje werengani nkhani za m’Baibolo zomwe zifotokoza momwe Yahova adathandizira atumiki wake. (Yes. 37:17, 33-37) Kuingizira mwapa tingawerenge pomwe nkhani za abale na alongo pa saiti yathu ya jw.org. Nkhani mwezi zionesa bwinobwino momwe Yahova ankuthandizira atumiki wake ntsiku zino. Mungakumbukire pomwe nthawe zomwe Yahova adakuthandizani. Nthawe zinango vingakhalelini vinthu vodabwisa ninge kulimbana na chimbalangondo panango mphondolo. Koma chaivo ni vakuti Yahova nthawe zose ni wokonzeka kukuthandizani pa moyo wanu. Iye ndiye adakuchemerani kuti mukhale shamwali wake. (Yoh. 6:44) Ndipo ndawa ya thandizo yake, imwepo munkupitiriza kukhala wokhulupirika kwa Yahova. Manje tani kupemphera kwa Yahova kuti akuthandizeni kukumbukira nthawe zomwe iye adadawira mapemphero yanu na pomwe adakhala kusaidi yanu pa nthawe yomwe mungagumana na mabvuto. Kuchita vimwevi kudzakuthandizeni kuti mukhale na chitsimikizo chakuti nthawe zose mungambathembe thandizo ya Yahova.
Momwe tingachitire vinthu tikagumana na mabvuto vikhudza Yahova (Onani ndime 8-9)
9. Ko tichadekana kukumbukira va chani tikambagumana na mabvuto? (Miyambo 27:11)
9 Kuona Yahova kuti ni Mulungu wamoyo, kutithandiza pomwe kuti timbaone mabvuto yathu moyenera. Mwanjira yanyi? Tikambagumana na mabvuto tichadekana kukumbukira vinthu vodekana. Satana adalewa kuti tikambagumana na mabvuto tingasiye kutumikira Yahova. Manje momwe tichachitira vinthu tikagumana na mabvuto vimukhudza Yahova. (Yobu 1:10, 11; werengani Miyambo 27:11.) Tikapitiriza kukhala okhulupirika kwa Yahova pomwe tinkugumana na mabvuto, tidzaonese chikondi chathu kwa iye na kuonesa kuti Satana ni wabodza. Manje ko imwepo munkudzudziwa na boma, kusowa kobiri, wanthu akubveseranilini mu umboni panango bvuto inango? Peno nteno, kumbukirani kuti mabvuto yomwe munkugumana nayo ni mwayi munango womwe mungakondweresere Yahova. Koma ayi kuyebwa kuti Yahova adzabvumelini kuti mugumane na mabvuto yomwe mungakwaniselini kuyapirira. (1 Akor. 10:13) Iye adzakupaseni mphanvu kuti mukwanise kupirira.
MULUNGU WAMOYO ADZAKUDALISENI IMWEPO
10. Ko Mulungu wamoyo ankupolomisa chani kwa wale omwe ni okhulupirika kwa iye?
10 Yahova nthawe zose adalisa wanthu okhulupirika. (Aheb. 11:6) Iye atipasa ntendere na moyo wokhutirisa manjeuno ndipo kutsogolo adzatipase moyo wosapera. Tikhulupirira Yahova na ntima wose kuti adzatidalise ndawa ana mphanvu yochitira vimwevi. Ndawa ya vimwevi tichadekana kuchita vose vomwe tingakwanise kuti timutumikire ninge momwe atumiki wake wakumbuyo adachitira. Ni vimweviretu vomwe Timoteyo adachita.—Aheb. 6:10-12.
11. Ndawa chani Timoteyo adachita vomwe angakwanise pakulimbikisa mpingu? (1 Timoteyo 4:10)
11 Werengani 1 Timoteyo 4:10. Timoteyo ambakhulupirira maninge Mulungu wamoyo. Ndipomwapa adachita vomwe angakwanise kuti atumikire Yahova na abale. Ko iye adachita tani vimwevi? Ntumi Paulo adamulimbikisa kuti akhale pfunzisi wabwino mumpingu na mu umboni. Ntumi Paulo adauuza pomwe Timoteyo kuti ambapereke chitsanzo chabwino kwa alumbwana komasoti kwa achikulire. Ndipo Timoteyo adatambira mautumiki yanango yoshupa yomwe yambaphatanidza kupereka malangizo ya mphanvu koma yachikondi kwa wanthu oyenera. (1 Tim. 4:11-16; 2 Tim. 4:1-5) Nthawe zinango anango ambakwanisalini kuona basa zomwe Timoteyo ambachita panango kumutembeja. Koma iye ambadziwa kuti munthu wodekana maninge ambaona basa zose zomwe iye ambachita nakuti adzamudalise.—Aro. 2:6, 7.
12. Ndawa chani akulu achita vomwe angakwanise mumpingu? (Onani pomwe foto.)
12 Ntsiku zino, akulu nawombo angakhale na chitsimikizo chakuti Yahova aona vose vomwe iwo achita ndipo adzawadalise ndawa ya vimwevi. Kuingizira pa kupfunzisa, kuchita maulendo yaubusa na kulalikira, azinji achathandiza pa basa zomanga na kupereka thandizo pakachitika ngozi. Anango ali m’gulu yolimbikisa atenda kushipitali, anango ayankhulana na mafulumero. Akulu omwe adzipereka pa basa mwezi, iwo adziwa kuti mpingu ni wa Yahova osati wamunthu. Ndipomwapa achita vomwe angakwanise ndipo atsimikizira kuti Yahova adzawadalise ndawa ya vomwe ankuchita.—Akol. 3:23, 24.
Mulungu wamoyo adzakudaliseni pa vose vomwe muchachita mumpingu (Onani ndime 12-13)
13. Ko Yahova achabva tani akambaona khama yathu pakumutumikira?
13 Ni wanthulini ose omwe angatumikire ninge akulu. Koma tose tingamuchitire vinthu vinango Yahova. Mulungu wathu Yahova achakhala wokondwa tikambachita vose vomwe tingakwanise kuti timutumikire. Iye achaona vopereka vathu vothandiza pa basa yapadziko yose podiya vichikhala ving’onong’ono. Iye akhala pomwe wokondwa maninge tikambayesesa kuchita khama kuti timalise manyazi nkuyankha pamisonkhano. Ndipo ntima wake ukhala wokondwa maninge akaona kuti takwanisa kumalisa ukali nkukhululukira m’bale wathu. Olo muchiganiza kuti munkuchitalini vizinji kwa Yahova ninge momwe munkufunira, tsimikizirani kuti atembeja vose vomwe muchachita pakumutumikira. Iye akukondani maninge ndawa ya vimwevi ndipo adzakudaliseni.—Luka 21:1-4.
PITIRIZANI KUKHALA PAFUPI NA MULUNGU WA MOYO
14. Ko kukhala pa ushamwali wolimba na Yahova kungatithandize tani kukhala okhulupirika? (Onani pomwe foto.)
14 Vidzakhale vosashupa kupitiriza kukhala okhulupirika kwa Yahova akakhala chaiye kwa isepano. Ni vimwevi vomwe vidachitika na Yosefe. Iye adalamba kuchita chigololo ndawa ambadziwa kuti kuchita vimwevi vingakhumudwise maninge Yahova. (Gen. 39:9) Peno tinkufuna kuti Yahova akhale chaiye kwa isepano tichadekana kupatula nthawe yocheza naye na kupfunzira Mawu yake. Mwanjira mweyi, ushamwali wathu na iye udzakule ntsiku iriyose. Ninge Yosefe, tikakhala pa ushamwali wolimba na Yahova tidzachitelini chinthu chomwe chingamukhumudwise.—Yak. 4:8.
Kupitiriza kufenderera Mulungu wamoyo, kudzatithandize kukhala wokhulupirika (Onani ndime 14-15)
15. Ko tinkupfunzira chani pa vomwe vidachitikira Aizirayeli muchipululu? (Aheberi 3:12)
15 Wanthu omwe ayebwa kuti Yahova ni chaiye, ali pangozi yakuti nthawe iriyose angamusiye. Onani vomwe vidachitikira Aizirayeli pomwe enze muchipululu. Iwo ambadziwa kuti Yahova alipo, koma ambakaikira peno iye angawasamaliredi. Ndawa ya vimwevi iwo adabvunza kuti: ‘Yahova ali nase panango neye?’ (Eks. 17:2, 7) Ndipo vomwe vidachitika ni vakuti adamusatukira Yahova. Isepano tinkufanambolini kuchita vinthu ninge Aizirayeli, nkukhala osabvera Yahova.—Werengani Aheberi 3:12.
16. Ko chikhulupiriro chathu chingayesewe tani?
16 Ni voshupa maninge kupitiriza kukhala pafupi na Yahova mu nthawe yomwe tiri ino. Mpakana nthawe zinango anango alewa kuti Mulungu kulibe ndipo nthawe zinango vioneka kuti wanthu omwe atumikiralini Yahova ana moyo wabwino. Tikambaona vimwevi vinkuchitika chikhulupiriro chathu chingayesewe. Ni shuwadi kuti tingafikelini mpakana kulamba Yahova. Koma tingayambe kukaikira kuti iye adzatithandizedi. Wonemba Salimo 73 vidamuchitikirambo vimwevi. Wanthu omwe ambakhala naye pafupi ambanyalanyaza malamulo ya Mulungu ndipo ambachita vinthu momwe ambafunira, vimwevi vidamuchitisa kuti ayambe kukaikira kuti peno kutumikira Yahova kunaphindu.—Sal. 73:11-13.
17. Ko nchani chomwe chingatithandize kukhala pafupi na Yahova?
17 Ko nchani chomwe chidathandiza wonemba Salimo kuchinja maganizo yake? Iye adaganizira vomwe vidakachitikira wale omwe adasiya Yahova. (Sal. 73:18, 19, 27) Adaganizira pomwe maphindu yose yomwe yalipo ndawa yotumikira Yahova. (Sal. 73:24) Isepanombo tingakumbukire va madaliso yose yomwe Yahova watipasa. Yesani kuganizira momwe moyo wanu udakakhalira sembe munkutumikiralini Yahova. Kukumbukira vinthu vimwevi kudzatithandize kupitiriza kukhala okhulupirika kwa iye. Ninge wonemba Salimo, tidzanenembo kuti: ‘Koma kwa ine kumufenderera Mulungu ni chinthu chabwino.’—Sal. 73:28.
18. Ndawa chani tichadekanalini kukhala na mantha na vinthu vomwe vidzachitike kutsogolo?
18 Tingakwanise kulimbana na bvuto iriyose yomwe ingabwere mu ntsiku zomalizira zino, ndawa yakuti ndise akapolo wa “Mulungu chaiye wamoyo.” (1 Ates. 1:9) Yahova ni munthu chaiye ndipo nthawe zose ni wokonzeka kuti atithandize. Iye adakhala kumbali ya atumiki wake wakumbuyo ndipo adzachite vibodzibodzi na isepano ntsiku zino. Manjemanjepa tidzalimbane na chisautso chikulu. Koma tidzakhalelini tekha, Yahova adzakhale kumbali yathu. (Yes. 41:10) Manje tose ‘tingakhale olimba ntima nkulewa kuti: ‘Yahova ni nthandizi wangu, nidzachitelini mantha.’’—Aheb. 13:5, 6.
NYIMBO NA. 3 Ndinu Mphamvu Zathu, Chiyembekezo Chathu Komanso Timakudalirani
