NKHANI YOPFUNZIRA 23
NYIMBO NA. 28 Tikhale pa Ubwenzi ndi Yehova
Yahova ankutichemera kuti tikhale alendo wake
‘Tenti yangu idzakhale pakati pawo, ndipo inepano nidzakhale Mulungu wawo.’—EZEK 37:27.
CHOLINGA
Kuingizira ntima wotembeja pakuchemera komwe Yahova ankuchita kuti tikhale alendo mu tenti yake na momwe iye akutisamalirira ninge Wotitambira.
1-2. Ko ni kuchemera kuponi komwe Yahova ankukuchita kwa atumiki wake okhulupirika?
MUNTHU achikubvunzani kuti, Yahova ni mbani kwa imwepo, ko mungamudawire tani? Panango mungamudawire kuti ‘Yahova ni Baba wangu, Mulungu wangu na Shamwali wangu.’ Komasoti panamawu na madzina yanango yomwe imwepo mungamuchemere nayo Yahova. Koma ko mudaganizakokale kuti Yahova angakhale Wotambira alendo?
2 Pakulewa va ushamwali na Yahova, Davide adalinganiza Yahova na munthu wotambira alendo, atumiki wa Yahova ninge alendo. Davide adabvunza kuti: ‘Yahova, mbani angakhale mulendo mu tenti yanu? Ndipo mbani angakhale muphiri yanu yopatulika?’ (Sal. 15:1) Mawu youziriwa mwaya, yankutithandiza kudziwa kuti tingakhale alendo mu tenti ya Yahova panango kuti tingakwanise kukhala azishamwali wake. Ko imwepo munkuonalini kuti ni mwayi ukulu maninge kuchemerewa na Yahova?
YAHOVA ANKUCHEMERA ALENDO WAKE
3. Ko mulendo wakuyamba wa Yahova ni mbani ndipo enze pa ushamwali wakhaindi yanyi?
3 Akanati kulenga chirichose, Yahova wenze yekha. Patsogolo pake adalenga mwana wake woyamba. Ko mwaona momwe Yahova aliri Wotambira alendo? Pamwapa viri ninge Yahova adachemera mulendo wake woyamba mu tenti yake. Iye adakhala wokondwa maninge ndawa yochita vimwevi. Baibolo inena kuti kumulenga mwana wake chenze ‘chinthu chokomedza maninge’ ndipo mwana wake nthawe zose ambakhala ‘wokondwa maninge pamaso pake.’—Miy. 8:30.
4. Ko ni mbani pomwe omwe adadzakhala alendo mu tenti ya Yahova?
4 Chachiwiri, Yahova adalenga angelo omwe ni alendo wake pomwe. Angelo achemerewa kuti ‘wana wa Mulungu’ ndipo afotokozewa m’Baibolo kuti ni okondwa maninge ndawa yokhala pabodzi na Yahova. (Yobu 38:7; Dan. 7:10) Kwa magole yazinji, alendo wa Yahova enze mwawale basi omwe anawo kudzulu. Koma patsogolo pake adaingizira tenti yake kuti aingizire pomwe wanthu padziko yapasi ninge alendo wake. Anango mwa alendo mwawa enze Inoki, Nowa, Abulahamu na Yobu. Baibolo inena kuti iwo enze azishamwali wa Mulungu ndawa yakuti adabvera na kufamba ‘na Mulungu chaiye.’—Gen. 5:24; 6:9; Yobu 29:4; Yes. 41:8.
5. Ko tingapfunzire chani pa ulosi wa pa Ezekieli 37:26, 27?
5 Kwa magole yazinji, Yahova wakhala ankuchemera azishamwali wake kuti akhale alendo wake. (Werengani Ezekieli 37:26, 27.) Mwakulinganiza, mu ulosi wa Ezekieli tipfunzira kuti Yahova ankufuna kuti atumiki wake akhale pa ushamwali wolimba na iye. Yahova ankupolomisa kuchita ‘nawo mbverano wa ntendere.’ Ulosi moyu ufotokoza va nthawe yomwe atumiki odzodzewa wa Yahova omwe anachidikhiro chodzayenda kudzulu na wale omwe anachidikhiro chodzakhala padziko yapasi, adzakhale pabodzi mu tenti yake ninge nkhosa za ‘khola ibodzi.’ (Yoh. 10:16) Ulosi moyu unkukwanirisiwa ntsiku zino.
YAHOVA ATISAMALIRA KULIKOSE KOMWE TINGAKHALE
6. Ko munthu angakhale tani mulendo mu tenti ya Yahova ndipo tenti mweyi iri kuponi?
6 Kalekale, tenti yenze malo yomwe munthu ambakwanisa kupumula na kukhala wotetezeka nthawe ya mvula na dzuwa. Mulendo akakhala mu tenti ambakhalalini na nkhawa ndawa yodziwa kuti ni wotetezeka. Tikadzipereka kwa Yahova tikhala alendo mu tenti yake yophimphirisa. (Sal. 61:4) Mu tenti mweyi, isepano tinachakudya chokwana chauzimu kuti tipitirize kukhala azishamwali wa Yahova pabodzi na anango omwe ni alendo mu tenti yake. Viribe basa komwe tichakhala, tose tingakhale alendo mu tenti ya Yahova. Vingachitike kuti mudayendako kale kudziko inango, mwakulinganiza kuyenda ku nsonkhano wapadera nkudziwana na wanthu anango omwe ni okondwa ndawa yokhala mu tenti ya Yahova. Tenti ya Yahova iri kulikose komwe ku na atumiki wake.—Chiv. 21:3.
7. Ndawa chani tingalewe kuti atumiki okhulupirika omwe adamwalira adakali alendo mu tenti ya Yahova? (Onani pomwe foto.)
7 Manje tani va atumiki wa Yahova omwe adamwalira? Ko tingalewe kuti adakali alendo mu tenti ya Yahova? Inde! Ndawa chani tingadawire tene? Ndawa m’maganizo mwa Yahova wanthu mwawa adakali na moyo. Yesu adanena kuti: “Koma vakuti wakufa amukisiwa olo Mose adafotokoza mu nkhani ya chitsamba cha minga, pomwe adanena kuti Yahova ni ‘Mulungu wa Abulahamu, Mulungu wa Isaki na Mulungu wa Yakobo.’ Iye ni Mulungu wa wanthu wamoyo, osati wa akufa, ndawa kwa iye ose mwawa ni wamoyo.”—Luka 20:37, 38.
Podiya wanthu okhulupirika omwe adamwalira angaonewe pomwe kuti ni alendo mu tenti ya Yahova (Onani ndime 7)
MAPHINDU YOMWE TINAYO NA VOMWE TICHADEKANA KUCHITA
8. Ko ni maphindu yaponi yomwe alendo wa Yahova anayo?
8 Ninge momwe tenti chaiyo iliri malo yotetezeka na malo yothawirako dzuwa na mvula, nayombo tenti ya Yahova iteteza alendo wake ku ngozi iriyose yauzimu ndipo itipasa chidikhiro chakutsogolo. Tikakhala pafupi na Yahova, Satana angachitelini chinthu chomwe chingatidzonge mpakana kalekale. (Sal. 31:23; 1 Yoh. 3:8) Ndipo mudziko inyowani, Yahova adzapitirize kuteteza azishamwali wake okhulupirika osati chabe ku ngozi yauzimu komasoti ku impfa.—Chiv. 21:4.
9. Ko Yahova adikhira kuti alendo wake akhale na makhalidwe yaponi?
9 Shuwadi, ni chinthu chabwino na cholemekezeka kukhala alendo mu tenti ya Yahova na kukhala naye pa ushamwali wolimba maninge womwe udzakhalepo mpakana kalekale. Ninge alendo, ko tichadekana kukhala na makhalidwe yaponi? Peno mwachemerewa kuti muyende kumuyi kwa munthu munango, muchadekana kudziwa vomwe munikachiro muyi ankufuna. Mwakulinganiza, munichiro muyi angafune kuti muchose ntsapato mukanati mwangena m’nyumba ndipo imwepo mudzachite vimwevo. Mwanjira ibodzibodzi, isembo tichadekana kudziwa vomwe Yahova ankufuna kwa wale omwe ankufuna kupitiriza kukhala alendo mu tenti yake. Chikondi chathu kwa Yahova chitithandiza kuchita vose vomwe tingakwanise kuti “timbamukondwerese pa chirichose.” (Akol. 1:10) Yahova ni shamwali wathu, koma tichadekana kukumbukira pomwe kuti ni Mulungu wathu na Ababa wathu, ndipomwapa iye achadekana kulemekezewa. (Sal. 25:14) Pakuganizira vimwevi tichadekana kumugopa Yahova na kukumbukira kuti iye ni mbani. Kuganiza teneuyu kudzatithandize kuti tileke kuchita chirichose chomwe chingamukhumudwise. Mosakaika tinkufuna ‘kufamba modzichepesa’ na Mulungu wathu.—Mika 6:8.
YAHOVA WENZEBE TSANKHO NA AIZIRAYELI
10-11. Ko momwe Yahova adachitira vinthu na Aizirayeli muchipululu cha Sinai vinkuonesa tani kuti iye alibe tsankho?
10 Yahova alibe tsankho pakusamalira alendo wake. (Aro. 2:11) Tingabvese bwino kuti Yahova alibe tsankho tikaona momwe adachitira vinthu na Aizirayeli pomwe iwo enze muchipululu cha Sinai.
11 Patsogolo pakuti awachosa ku ukapolo ku Iguputo, Yahova adasalula antsembe kuti ambatumikire pa chihema. Alevi adasaluliwa nkupasiwa udindo wakuti ambaphate basa zinango pa malo yochena. Ko wale omwe ambatumikira pa chihema na wale omwe ambakhala nacho pafupi ambatambira thandizo yapadera kwa Yahova? Neye. Kwa Yahova wanthu ose ni olingana, iye alibe tsankho.
12. Pakuchita vinthu na Aizirayeli, ko Yahova adaonesa tani kuti wanthu ose ni olingana? (Ekisodo 40:38) (Onani pomwe foto.)
12 Venze viribe basa kuti tenti ikhale pafupi panango kutali na chihema. Mwakulinganiza, Yahova adakonza vakuti ntundu wose wa Aizirayeli umbakwanise kuona ntambo wodabwisa na chipilala chamoto chomwe chimbakhala padzulu pa chihema. (Werengani Ekisodo 40:38.) Ntambo ukanyamuka kuyenda mbali inango, podiya wale omwe ambakhala patali na chihema, ambakwanisa kuona ndipo ambakwanisa kulongedza katundu na matenti yawo nkuyenda pabodzi na anzawo. (Num. 9:15-23) Kuingizira mwapa ose angakwanisa kubva kulira kwa malipenga yawiri ya siliva yomwe yambapereka chenjezo kuti wanthu ose achoke munsasa. (Num. 10:2) Panango tinganene kuti, kukhala pafupi na chihema vimbatanthauzalini kuti munthu ali pa ushamwali wolimba na Yahova kuposha wale omwe enze patali na chihema. Kusiyana na vimwevi ntundu wose moule yemwe wenze wodzipereka kwa Yahova umbakwanisa kukhala alendo wake na kutambira malangizo yake na chitetezo chake. Nchibodzibodzimbo ntsiku zino, viribe basa komwe tichakhala, tose tingakwanise kuona chikondi na chitetezo cha Yahova.
Chihema chomwe chimbakhala pakati pansasa, chimbatsimikizira kuti Yahova alibe tsankho (Onani ndime 12)
YAHOVA ALIBE TSANKHO NTSIKU ZINO
13. Ko ntsiku zino Yahova aonesa tani kuti alibe tsankho?
13 Atumiki anango wa Mulungu ntsiku zino akhala pafupi na Bungwe Yotonga panango ofesi ya nthambi inango ya Mboni za Yahova. Ndipo anango atumikira malo mwaya. Ndawa ya vimwevi angambaphate nawo basa zizinji zomwe zichitika m’malo mwaya na kukhala pabodzi na omwe ankunyang’anira mu gulu ya Yahova. Ndipo anango atumikira ninge onyang’anira dera panango mautumiki yanango ya nthawe zose. Peno virilini tene kwa imwepo, tsimikizirani kuti Mulungu wathu Yahova achakonda alendo wake ose kuphatanidza imwepo. Ndipo iye adzakupaseni vose vomwe munkufuna. (1 Pet. 5:7) Aliyese yemwe achita mbali mu gulu ya Yahova achatambira chakudya chauzimu, malangizo na chitetezo chomwe ankudekana.
14. Fotokozani chitsanzo chinango chomwe chionesa kuti Yahova alibe tsankho ntsiku zino?
14 Chitsanzo chinango chomwe chinkuonesa kuti Yahova alibe tsankho ndipo ni Wotambira alendo wabwino ni vomwe ankuchita kuti Baibolo igumanike kwa wanthu ose pa dziko yapasi. Malemba yopatulika pakuyamba yadanembewa mu viyankhulo vitatu basi, vomwe ni: Chiheberi, Chiaramu na Chigiriki. Ko vinkuonesa kuti wale omwe akwanisa kuwerenga mu viyankhulo vimwevi ali pa ushamwali wolimba maninge na Yahova kusiyana na wanthu omwe adziwalini viyankhulo mwevi? Neye, ntenolini.—Mat. 11:25.
15. Ko ni vinthu viponi vomwe vionesa kuti Yahova alibe tsankho? (Onani pomwe foto.)
15 Kuti tikhale pa ushamwali na Yahova vithembalini kukhala opfunza maninge panango kukhala waluso na chiyankhulo. Yahova achabvuma kukhala pa ushamwali na wanthu ose osati wale okha omwe adapfunza maninge. Mawu youziriwa na Yahova yomwe ni Baibolo, yadatsumbudzuliriwa muviyankhulo vizinji. Mwanjira mweyi, wanthu ose wapadziko yapasi angaone ubwino wakubvera vomwe ichapfunzisa nkukwanisa kukhala azishamwali wake.—2 Tim. 3:16, 17.
Ndawa chani kutsumbudzuliriwa kwa Baibolo muviyankhulo vizinji ni chitsimikizo chakuti kwa Yahova wanthu ose ni olingana? (Onani ndime 15)
PITIRIZANI KUKHALA ‘OBVUMIZIKA’ KWA YAHOVA
16. Mobverana na Machitidwe 10:34, 35, ko tichadekana kuchita chani kuti tipitirize kukhala alendo mu tenti ya Yahova?
16 Ni mwayi ukulu maninge kuchemerewa na Yahova kuti tikhale alendo mu tenti yake yophimphirisa. Iye ni Wotambira alendo wokoma ntima, wachikondi na wochereza maninge kuposha momwe tinkuganizira. Kuingizira mwapa, kwa iye wanthu ose ni olingana. Iye ankuchemera ose viribe basa komwe achakhala, momwe adalerelewa, mapfunziro yomwe anayo, ntundu, khaindi, fuko, nsinkhu olo akhale mwamuna panango nkazi. Koma wale omwe ankupitiriza kubvera Yahova angaonewe ninge alendo wake.—Werengani Machitidwe 10:34, 35.
17. Ko nkuponi komwe tingagumane mpfundo zolewa va kukhala alendo mu tenti ya Yahova?
17 Pa lemba ya Salimo 15:1, Davide adabvunza kuti: ‘Yahova, mbani angakhale m’lendo mu tenti yanu? Ndipo mbani angakhale mu phiri yanu yopatulika?’ Yahova adaphatisa basa iye Davide kuti adawire mibvunzo mwaya. Mu nkhani yomwe inkubwera tidzaone mpfundo zomwe tingaziphatise basa kuti tipitirize kukhala alendo mu tenti ya Yahova.
NYIMBO NA. 32 Khalani Okhulupirika kwa Yehova
