Mibvunzo yochokera kwa owerenga
Ko mawu yakuti ‘mudzawasunge’ yomwe yagumanika pa lemba ya Salimo 12:7, yankutanthauza ‘obonera’ omwe agumanika pa (vesi 5) panango ‘mawu ya Yahova’ ya pa (vesi 6)?
Mavesi ya pa lemba mweyi yakulewa va wanthu.
Pa Salimo 12:1-4, tiwerenga kuti ‘okhulupirika wamala pakati pa wanthu.’ Manje naboni tione Salimo 12:5-7 yomwe ni mavesi yaphatanidziwa pa mbvunzo moyu.
‘‘Ndawa yakuti obonera ankujererewa,
Ndawa ya kulira kwa wanthu osauka,
Nidzaimirire kuti niwathandize,’ wanena teno Yahova.
‘Nidzawapulumuse kwa wanthu omwe ankuwanyoza.’
Mawu ya Yahova ni yochena;
Yali ninge Siliva wokonzewa bwino mu forno ya dothi wowotchewa maulendo 7.
Imwepo Yahova mudzawanyang’anire;
Imwepo mudzawanyang’anire aliyese payekha ku m’badwo moyu mpakana kalekale.’
Vesi 5 inkulewa vomwe Mulungu adzachite kwa wanthu obonera. Iye adzawapulumuse.
Vesi 6 inkuingizira kuti ‘mawu ya Yahova ni yochena,’ ‘ninge Siliva wokonzewa bwino.’ Vimwevi ni vinthu vomwe Akhrisitu avikhulupirira maninge.—Sal. 18:30; 119:140.
Manje ganizirani va Salimo 12:7: ‘Imwepo Yahova mudzawanyang’anire iwo; imwepo mudzawateteze iwo aliyese payekha ku m’badwo moyu mpakana kalekale.’ Ko mawu mwaya yakuti ‘iwo’ ambalewa va mbani?
Ndawa vesi 7 inkuyamba na ‘mawu ya Yahova,’ anango angaganize kuti “iwo” ankulewa va mawu ya Mulungu. Ndipo tinkudziwa kuti Yahova wakhala ankuteteza Baibolo kwa wanthu otsutsa omwe ambafuna kuidzonga.—Yes. 40:8; 1 Pet. 1:25.
Ni shuwadi, vomwe vanenewa pa vesi 5 nchaivo. Yahova wakhala ankuthandiza ndipo apitirize kuthandiza ‘obonera’ na omwe ‘ankujererewa.’—Yobu 36:15; Sal. 6:4; 31:1, 2; 54:7; 145:20.
Ko mawu yakuti ‘iwo’ ya mu vesi 7 yankutanthauza chani?
Nkhani ya pa Salimo mweyi inkuonesa kuti mawu yakuti ‘iwo’ yankutanthauza wanthu.
Kumayambiriro kwa lemba ya Salimo 12:1 Davide ankulewa va ‘atumiki wa Yahova okhulupirika’ omwe adanamiziwa na wanthu oipa. Patsogolo pake tigumana mawu yomwe yanena kuti adzaimirire na kudzonga wanthu omwe ayankhula vinthu voipa. Ndipo Salimo mweyi inkutitsimikizira kuti Yahova adzathandize atumiki wake ndawa yakuti mawu yake ni yochena.
Koma vesi 7 inena kuti Yahova adzawasamalire na kuwateteza ‘iwo,’ kutanthauza wanthu omwe ankuboneresewa na wanthu oipa.
Mawu yakuti ‘iwo’ yadaphatisiwa basa mu Baibolo yothembeka yachiheberi. Baibolo yachigiriki ya Septuagint idaphatisa basa mawu yakuti ‘ise’ kawiri mu vesi ya 7, pakulewa va wanthu okhulupirika omwe ankubonera na kujererewa. Pakumalizira vesi 7 inena kuti ‘aliyese’ wokhulupirika adzatetezewe ‘kumbadwo uyu’ kwa wanthu omwe achalimbikisa vinthu voipa. (Sal. 12:7, 8) Baibolo ya malemba ya Chiheberi mu chiyankhulo cha Chiaramu Vesi 7 inena kuti: “Imwepo AMBUYA, mudzateteze olungama, mudzawasamalire ku mbadwo woipa uyu mpakana kalekale. Wanthu oipa akundofambafamba ndipo palibe ankuwaletsa. Wanthu oipa andokhalira kuyenda kulikose kumbachita ninge abulula omwe ayamwa magazi ya wanthu.” Ndipomwapa lemba ya Salimo 12:7 inkulewalini va mawu ya Mulungu.
Koma inkupereka chidikhiro kwa ‘wanthu okhulupirika’ chakuti Mulungu adzakonze vinthu.
