NKHANI YOPFUNZIRA 20
NYIMBO NA. 67 “Lalikira Mawu”
Bvumani kuti chikondi chikulimbikiseni kupitiriza kulalikira!
“Ntontholo wabwino ufunika kuyamba walalikiriwa kwa wanthu wa makhaindi yose.”—MALIKO 13:10.
CHOLINGA
Kuona momwe chikondi chichatilimbikisira kulalikira mwakhama.
1. Ko tidapfunzira chani pa nsonkhano wa pagole wa 2023?
PA NSONKHANO wa pagole wa 2023, a isepano tidathandiziwa kubvesa kuchinja kunango kwabwino maninge. Ndipo tidatambira virengezo vokomedza maninge volewa va basa yathu yolalikira. Mwakulinganiza, tidapfunzira kuti wanthu anango panango angadzayambe kutumikira Yahova patsogolo pakuti aona kudzongewa kwa Babulo Nkulu. Ndipo tidauziwa pomwe kuti kuyambira mu Novembro 2023, ofalisa adzaperekelini pomwe maola yomwe agumana mu umboni. Ko ndawa ya kuchinja kumoku ntsiku zino tinkuona kuti basa yathu yolalikira ni yosafunika maninge? Kunena shuwa, neye!
2. Ko ndawa chani basa yolalikira ikhala yofunika ntsiku iliyose? (Maliko 13:10)
2 Ntsiku iliyose utumiki wathu ukhala wofunika maninge. Ko ndawa chani? Ndawa yakuti nthawe inkumala. Onani vomwe Yesu adanena pakulewa va basa yolalikira mu ntsiku zomalizira. (Werengani Maliko 13:10.) Pa lemba ya Mateyu, Yesu adalewa kuti ntontholo wabwino udzalalikiriwe pa dziko yose komwe ku na wanthu “mapeto” yakanati kufika. (Mat. 24:14) Mawu yakuti mapeto, yankutanthauza kumala kwa dziko ya Satana iyi. Yahova adaikha “ntsiku na nthawe” yomwe adzachite vimwevi. (Mat. 24:36; 25:13; Mac. 1:7) Isepano tiri pafupi maninge na mapeto ya thawe ino. (Aro. 13:11) Pomwe tinkudikhira kufika kwa ntsiku mweyi, tichadekana kupitiriza kulalikira.
3. Ko nchani chomwe chitilimbikisa kuti timbalalikire?
3 Tikambaganizira va kulalikira, tichadekana kudzibvunza mbvunzo munango wodekana maninge wakuti: Ndawa chani tichalalikira ntontholo wabwino? Mwachigwato, tinganene kuti tilalikira ndawa ya chikondi. Tilalikira ndawa yakukonda ntontholo wabwino, komasoti ndawa ya kukonda Yahova na dzina yake. Manje naboni tikambirane mpfundo iliyose payokha.
TILALIKIRA NDAWA YOKONDA NTONTHOLO WABWINO
4. Ko tichachita chani tikabva nkhani yokomedza?
4 Ko imwepo munkukumbukira pa nthawe yomalizira yomwe mudabva nkhani yokomedza? Kubadwa kwa mwana wa m’banja mwanu panango pomwe mudagumana basa yomwe mumbaifaga maninge. Mosakayika imwepo mudakondwa maninge ndipo mudafuna kuuzambo anango va nkhani mweyo ninge azishamwali wanu komasoti azibale wanu. Ko vinthu ninge vimwevi vidachitika pomwe mudabva ntontholo wabwino maninge kuposha uliwose womwe ni thontholo wabwino wa Ufumu wa Mulungu?
5. Ko mudabva tani pomwe mudandoyamba kupfunzira va ntontholo wabwino wa Mulungu? (Onani pomwe mafoto.)
5 Kumbukirani ntsiku yomwe mudayamba kupfunzira Baibolo. Mudapfunzira kuti Ababa wanu wa kudzulu akukondani maninge. Ndipo ankufuna kuti muchite mbali ya banja yake yomwe imutumikira. Kuingizira pamwapa, mudapfunzira pomwe kuti iye adzamalise mabvuto yose. Chinthu chinango chomwe mudapfunzira ni chakuti mudzaone pomwe wanthu omwe adamwalira akadzamukisiwa mu dziko inyowani. Vimwevi ni vinango mwa vinthu vomwe mudapfunzira. (Maliko 10:29, 30; Yoh. 5:28, 29; Aro. 8:38, 39; Chiv. 21:3, 4) Mudakondwa maninge pomwe mudapfunzira chonadi mwechi. (Luka 24:32) Imwepo mudakonda kupfunzira vinthu vose vimwevi ndipo mudafunisisa kuyamba kuyankhula va nkhani mweyi kwa wanthu anango!—Onani pomwe Yeremiya 20:9.
Pomwe tidapfunzira chonadi tinkufuna kuuza munthu aliyese vomwe tidapfunzira! (Onani ndime 5)
6. Ko mwapfunzira chani pa chitsanzo cha Ernest na Rose?
6 Onani vomwe vidachitikira m’bale munango dzina yake Ernest. b Pomwe iye wenze na magole 10 ababa wake adamwalira. Iye adanena kuti: “Nimbadzibvunza kuti: ‘Ko ababa wangu wayenda kudzulu? Ko ntsiku inango nidzawaone pomwe ababa?’ Nimbakhumbira kuona wana anango ana azibaba wawo.” Ernest nthawe zose ambayenda kumanda ndipo ambagwada pafupi na nthumbira ya ababa wake nkumbapemphera kuti: “Mulungu, pulizi, ninkufuna kudziwa kuti ababa ali kuponi.” Pomwe wenze na magole 17, adabvuma pomwe wamboni adamukumbira kuti ayambe kupfunzira naye Baibolo. Koma adadabwa pomwe adapfunzira kuti wanthu wakufa adziwalini chilichose na pomwe adadziwa kuti Baibolo ilewa kuti wanthu omwe adamwalira adzamukisiwe. (Mla. 9:5, 10; Mac. 24:15) Pakumalizira, iye adagumana midawiro yomwe ambafuna maninge kuyadziwa. Iye adakondwa maninge na chonadi cha m’Baibolo chomwe ambapfunzira. Ndipo nkazi wake Rose, adayambambo kupfunzira ndipo adabvambo chikondi chimwechi cha ntontholo wa Ufumu. Ose awiri adabatizika mu gole ya 1978. Pamwapo iwo adayamba kuuza azibale wawo, azishamwali na wanthu anango va ntontholo wabwino womwe adapfunzira. Ernest na Rose adathandiza wanthu oposha 70 kupfunzira chonadi.
7. Ko nchani chichachitika chonadi chikatifika pa moyo? (Luka 6:45)
7 Isepano tikambakonda chonadi cha m’Baibolo, tidzakwaniselini kuleka kuuza wanthu anango vomwe tidapfunzira. (Werengani Luka 6:45.) Tidzabve ninge ateweri wa Yesu omwe adanena kuti: ‘Tingalekelini kuyankhula va vinthu vomwe tidaviona na kuvibva.’ (Mac. 4:20) Tikonda maninge chonadi ndipo tinkufuna kuuza wanthu azinji va ntontholo moyu momwe tingakwanisire.
TILALIKIRA NDAWA YOKONDA WANTHU
8. Ko nchani chomwe chitilimbikisa kulalikira wanthu anango va ntontholo wabwino? (Onani bokosi yakuti: “ Kondani wanthu mwa kuwapfunzisa.”) (Onai pomwe foto.)
8 Ninge Yahova na Yesu, isepano tikonda wanthu. (Miy. 8:31; Yoh. 3:16) Tichachita chifundo kuchokera pasi pa ntima na wanthu omwe ‘amudziwalini Mulungu’ na omwe ‘alibe chidikhiro.’ (Aef. 2:12) Ndawa ya mabvuto yawo wanthu mwawa, adzibva ninge ali mu chitsime chonoka maninge. Koma tinachingwe chomwe tingakwanise kuwapfuwa nacho nkuwabulisa kunja, chomwe ni ntontholo wabwino wa Ufumu. Ndipo chifundo chomwe tinacho kwa wanthu mwawa, chitilimbikisa kuti tiwalalikire va ntontholo wabwino. Wanthu akabva va ntontholo wabwino, viwathandiza kuti akhale na chidikhiro chakutsogolo, nkukhala okondwa manjeuno na kudzakhala ‘na moyo chaiye’ kutsogolo mu dziko inyowani.—1 Tim. 6:19.
Chikondi na chifundo chomwe tinacho kwa wanthu, chitilimbikisa kuti tichite khama kuwauza va ntontholo wabwino (Onani ndime 8)
9. Ko ni chenjezo iponi yomwe tipereka pa vomwe vidzachitike kutsogolo? (Ezekieli 33:7, 8)
9 Chifundo chomwe tinacho kwa wanthu mwawa, chitilimbikisa kuti tiwachenjeze kuti mapeto ya dziko iyi yali pafupi. (Werengani Ezekieli 33:7, 8.) Isepano tichita chifundo na wanthu ose, kuphatanidza pomwe azibale wathu omwe atumikiralini Yahova. Azinji akhala opanikizika na basa za ntsiku na ntsiku ndipo ne ankudziwalini vomwe vinkubwera pa “chisautso chikulu chomwe chikanati chachitikako kundochokera pachiyambi cha dziko mpakana lero, ndipo chidzachitikelini pomwe.” (Mat. 24:21) Isepano tinkufuna kuti wanthu adziwe vomwe vidzachitike pa nthawe ya chiweruzo mwechi. Pomwe vipembedzo vabodza vidzadzongewe na dziko ya Satana iyi yomwe idzadzongeweretu pa Arumagedo. (Chiv. 16:14, 16; 17:16, 17; 19:11, 19, 20) Tichapemphera kuti wanthu azinji abve chonadi ndipo asalule kutumikira Yahova pabodzi na isepano. Manje ko tingalewe chani va wanthu anango pabodzi na azibale wathu omwe ankufunalini kutibvera manjeuno?
10. Ko ndawa chani tichadekana kuwachenjeza wanthu mwakankulumize?
10 Ninge momwe tidaonera mu nkhani yapita ire, vingachitike kuti wanthu anango omwe adzaone kudzongewa kwa Babulo Nkulu, adzayambe kukhulupirira Yahova nkudzapulumuka. Peno nteno nivabwino maninge kuti manjeuno kuposha kale tiwachenjeze wanthu mwawa vomwe vidzachitike. Ganizirani ivi. Wanthu adzakwanise kukumbukira vinthu vomwe tinkuwauza manjeuno. (Onani pomwe Ezekieli 33:33.) Panango iwo angadzakumbukire va chenjezo yomwe tinkuwapasa ndipo vingadzawathandize kuti ayambe kutumikira Yahova pabodzi na isepano pomwe mapeto yakanati kufikiratu. Ninge wonyang’anira djeri yemwe ambanyang’anira Filipo, yemwe adayamba kukhulupirira va ntontholo wabwino patsogolo pakuti pachitika ‘chinthu chodabwisa maninge,’ panango omwe ankufunalini kutibvera ntsiku zino angadzachinje maganizo yawo akadzaona kudzongewa kwa Babulo Nkulu komwe kudzachitike mosadikhirika.—Mac. 16:25-34.
TICHALALIKIRA NDAWA YOKONDA YAHOVA NA DZINA YAKE
11. Ko tingamupase tani Yahova ulemelero, ulemu na mphanvu? (Chivumbulutso 4:11) (Onani pomwe mafoto.)
11 Chinthu chikulu chomwe chitichitisa kulalikira ntontholo wabwino, ni ndawa yakuti tikonda Yahova na dzina yake yochena. Ulaliki ni njira ibodzi yomwe ionesa kuti tilemekeza Yahova yemwe tichamukonda. (Werengani Chivumbulutso 4:11.) Isepano titsimikiza na ntima wose kuti: Yahova ni wodekana kutambira ulemelero, mphanvu na ulemu kwa ose omwe ni okhulupirika kwa iye. Tipereka ulemu na ulemelero kwa Yahova, tikambaonesa wanthu anango umboni wosatsutsika wakuti iye ndiye ‘adalenga vinthu vose.’ Tilipo ndawa yakuti iye adatipasa moyo. Tichamupasa Yahova mphanvu zathu, tikambaphatisa basa nthawe yathu, mphanvu yathu na vinthu vomwe tinavo kuti timbakwanise kuphata basa yolalikira mweyi mobverana na momwe vinthu viliri pa moyo wathu. (Mat. 6:33; Luka 13:24; Akol. 3:23) Mwachigwato, tinganene kuti tikonda kuyankhula va Mulungu yemwe timukonda. Ndipo tinkufuna kuuza wanthu anango momwe Yahova aliri.
Isepano tichamupasa Yahova vose vomwe tingakwanise tikambaphatisa basa nthawe yathu, mphanvu na vose vomwe tinavo kuti tikwanise kuphata basa yolalikira (Onani ndime 11)
12. Ko tichenesa tani dzina ya Yahova tikambalalikira?
12 Chikondi chathu kwa Yahova chitilimbikisa kuti timbafune kuchenesa dzina yake. (Mat. 6:9) Vimwevi vinkutanthauza kuti tinkufunika kuuza wanthu kuti vomwe Satana adanena pakulewa Yahova nibodza. (Gen. 3:1-5; Yobu 2:4; Yoh. 8:44) Tikambalalikira, tinkufuna kuuza wanthu ose omwe ni okonzeka kutibvera, momwe Yahova aliri. Tinkufuna kuti wanthu ose adziwe kuti khalidwe ikulu ya Yahova ni chikondi. Nakuti momwe iye achatongera ni mwachilungamo ndipo manjemanjepa adzamalise mabvuto nkubweresa ntendere nkuchitisa wanthu ose kukhala okondwa. (Sal. 37:10, 11, 29; 1 Yoh. 4:8) Tikambayankhula va chonadi cholewa va Yahova, tikhala kuti tinkuchenesa dzina yake. Tikhala pomwe okondwa ndawa yodziwa kuti tinkuchita vomwe tichadekana kuchita ninge Mboni za Yahova. Ko ndawa chani?
13. Ko ndawa chani kuchemerewa Mboni za Yahova ni ulemelero ukulu maninge kwa isepano? (Yesaya 43:10-12)
13 Yahova adatisankhula kuti tikhale ‘mboni zake.’ (Werengani Yesaya 43:10-12.) Magole ya kumbuyo uku kalata inango yochokera ku Bungwe Yotonga, idanena kuti: “Ulemelero womwe munthu angakhale nawo ni kuchemerewa kuti Mboni ya Yahova.” c Ko ndawa chani tinkunena vimwevi? Ganizirani chitsanzo ichi. Muchikhala kuti imwepo munkufuna kusalula munthu kuti akakhale mboni yanu ku tiribunali, imwepo mungasalule munthu yemwe muchamuthemba, wambiri yabwino komasoti yemwe achadziwika kuti angapereke umboni chaiwo. Nivimweviletu vomwe Yahova adachita. Pomwe adatisalula ninge Mboni zake, adaonesa kuti atidziwa bwinobwino ndipo adatithemba kuti isepano tikwanise kuuza anango kuti iye ni Mulungu chaiye. Ni ulemelero ukulu maninge kukhala Mboni za Yahova. Ndawa ya vimwevi, tinkudekana kuphatisa basa mwayi uliose kuuza wanthu anango va Yahova na kutsimikizira kuti vinthu vose voipa vomwe wanthu achayankhula kunena iye ni bodza. Tikambachita vimwevi, tionesa wanthu ose kuti ndise Mboni za Yahova!—Sal. 83:18; Aro. 10:13-15.
NABONI TIPITIRIZE KULALIKIRA MPAKANA MAPETO
14. Ko ni vinthu viponi vokomedza vomwe tinkudikhira?
14 Tikandoganiza vomwe vidzachitike kutsogolo tikhala okondwa maninge. Na daliso ya Yahova, tinkudikhira kuti wanthu azinji abvume ntontholo wabwino pomwe chisautso chikulu chikanati kuyamba. Tinkudziwa pomwe kuti podiya pa nthawe ya chisautso chikulu, yomwe idzakhale nthawe yoshupa maninge kwa wanthu ose, panango wanthu anango angadzasalule kuchoka ku dziko ya Satana iyi nkubverananase pa kutumikira Yahova!—Mac. 13:48.
15-16. Ko tichadekana kulalikira mpakana lini?
15 Pomwe tinkudikhira vimwevi, tinabasa ikulu maninge yakuti tichite. Tinamwayi wophata nawo basa yomwe idzachitikelini pomwe, yomwe ni kulalikira va ntontholo wabwino wa Ufumu wa Mulungu pa dziko yose yapasi. Pa nthawe ibodzibodzi mweyi isepano tichadekana kupitiriza kuchenjeza wanthu, ndawa yakuti iwo ankufunika kudziwa kuti mapeto ya dziko ya Satana iyi yali pafupi maninge. Nthawe ya chiweruzo ikadzafika, adzakumbukire kuti ntontholo womwe timbalalikira wenze wochokera kwa Yahova.—Ezek. 38:23.
16 Manje, ko nchani chomwe tose tichadekana kuchita? Tichadekana kupitiriza kulalikira ndawa ya chikondi, kukonda ntontholo wabwino, kukonda wanthu ndipo kuposha vose ndawa ya kukonda Yahova na dzina yake yochena. Tichadekana kupitiriza kulalikira mwakhama ntontholo moyu mwakankulumize maninge kufikira pomwe Yahova adzanene kuti “ndimo!”
NYIMBO NA. 54 “Njira Ndi Iyi”
a Nsonkhano wa pagole udachitika pa 7 Outubro, 2023, pa malo ya nsonkhano ya Mboni za Yahova ku Newburgh ku Nova York, Estados Unidos. Pologalama ya nsonkhano moyu mbali yakuyamba idaonesewa pa JW Broadcasting ya Novembro 2023 mbali yachiwiri idaonesewa mu Broadcasting ya Janeiro 2024.
b Onani nkhani yakuti: “Baibulo Limasintha Anthu—Ndinapeza Mayankho Ogwira Mtima a Mafunso Anga,” mu Nsanja ya Olonda ya 1 Fevereiro 2015.
