1. Ndawa chani tipereka ndemanga pamisonkhano?

 NDAWA chani tigumanika pa misonkhano? Cholinga chathu ni kulemekeza Yahova. (Sal. 26:12; 111:1) Cholinga chinango ni chakuti timbalimbikisane makamaka ntsiku zoshupa zomwe tinkukhala zino. (1 Ates. 5:11) Tikando imisa djanja kupereka ndemanga tikhala kuti tinkuonesa vinthu viwiri vimwevi.

2. Ko ni mipata yaponi yomwe tinayo yomwe tingaperekere ndemanga pa misonkhano?

² Sondo iliyose ise tikhala na mwayi wopereka ndemanga pamisonkhano. Mwakulinganiza kumapeto kwa sondo tikhala soti na mwayi wogumanika pa pfunziro ya Ntsanja ya ulonda, pakati pa sondo tingapereke ndemanga mu Mpfundo zothandiza, mu Pfunziro ya Baibolo ya Mpingu na mbali zinango.

3. Ko ni bvuto iponi yomwe tingagumane nayo ndipo lemba ya Aheberi 10:24, 25 ingatilimbikise tani?

³ Tose isepano tifuna maninge kulemekeza Yahova na kulimbikisa azibale wathu. Koma kuti tiyankhe panango tingagumane na mabvuto. Panango tingakhale na nkhawa pakuyankha panango tingafune kuti timbalatiwe kawirikawiri koma tinkulatiwalini ninge momwe tinkufunira. Ko tingalimbane tani na bvuto mweyi? Tingagumane mdawiro pa kalata yomwe Paulo adanembera Aheberi, pakulewa va kufunika kwa kusonkhana Paulo adati ambafunika ‘kuganizirana kuti alimbikisane.’ (Lewengani Aheberi 10:24, 25.) Manje tikabvesa kuti mbale munango angalimbikisiwe pa ndemanga yochepa yomwe isepano tingapereke, tidzibva omasuka kuti tiperekere ndemanga. Olo kuti alibe kutilata ninge momwe isepano timbafunira tikhala  okondwa ndawa abale anango agumanambo mpata wopereka ndemanga.—1 Pet. 3:8

4. Ko ni vinthu vitatu viponi vomwe tichadekana kuganizira mu nkhani ino?

⁴ Mu pfunziro ino tione momwe tingalimbikisire anango. Chakuyamba tione momwe tingalimbikisire anango mu mpingu ung’ono omwe una wanthu ang’onong’ono omwe angaperekere ndemanga. Patsogolo pake tionepomwe momwe tingalimbikisire anango mu mpingu ukulu omwe una wanthu azinji omwe aimisa djanja kuti apereke ndemanga. Pakumalizira tione momwe mpfundo zokondweresa na ndemanga zathu zingakhalire zolimbikisa kwa abale wathu mu mpingu.

5. Ko tingalimbikisane tani peno mpingu ni ung’ono?

⁵ Mu mpingu ung’ono panango kagulu mukhala mulibe wanthu azinji omwe angaimise djanja kuperekera ndemanga. Nthawe zinango wochitisa pfunziro angafunike kudikhira pang’ono kuti munthu aimise djanja, mwanjira mweyi vingaonese kuti misonkhano yamalelini ndipo vimwevi vingatiwawe maninge. Ko imwepo mungachite tani? Mbaimisani djanja kawirikawiri, kuchita vimwevi vingachitise kuti anango aimisembo djanja.

6-7. Nchani chamungachite kuti mumbaleke kukhala okhumudwa mukambapereka ndemanga?

⁶ Peno imwepo mukhala okhumudwa mukambayankha, dziwani kuti wanthu azinji abvambo teno. Ko mungachite tani kuti muleke kukhala okhumudwa mukambapereka ndemanga nkumbakwanisa kulimbikisa anango?

⁷ Imwepo mukabwerezere mpfundo zinango zomwe zidachoka kale mu Ntsanja ya ulonda. b Mwakulinganiza, ibodzi mwa iyo ni ya kuti mumbakonzekere bwino. (Miy. 21:5) Mukakhala kuti mwavidziwa vati mukapfunzire ku misonkhano vingakhale vosashupa kuyankha. Chinthu chinango ni kupereka mdawiro wachigwato. (Miy. 15:23; 17:27) Imwepo mudzakhalelini okhumudwa mukambapereka ndemanga zachigwato. Chinangosoti abale achabvesa bwino ndemanga yachigwato kusiyana na kupereka ndemanga zitalizitali. Kupereka ndemanga zachigwato mu mawu yanuyanu vionesa kuti ndimwe okonzekera ndipo mwaibvesa bwino nkhani mweyo.

8. Ko Yahova achaona tani khama yathu yochokera pasi pa moyo?

⁸ Manje tani peno mudayesera kale njira zimwezi koma mukhala okhumudwa mukambapereka ndemanga? Imwepo mungakhale otsimikiza kuti Yahova achakhala otembeja pa khama yanu yomwe imwepo muonesa. (Luka 21:1-4) Kuchita vinthu vomwe vamungakwanise vitanthauzalini kuchita vinthu vire vomwe mungavikwaniselini. (Afil. 4:5) Ndipomwapa, khalani na cholinga chomwe imwepo mungachikwanirise ndipo mukumbireni Yahova kuti ambakuchitiseni kukhala odekha, chinango chomwe mungachite mumbapereke midawiro yachigwato.

9. Ko ni bvuto iponi ichakhalapo ukakhala kuti uli mu mpingu ukulu?

⁹ Vinthu vingakhale vosiyana mukakhala kuti muli mu mpingu yomwe muna ofalisa azinji. Vingachitike kuti abale azinji aimisa manja kuti adawire ndipo kazinjikazinji wochitisa ntsanja ya ulonda ne kukulatani imwepo. Mwakulinganiza, mulongo munango dzina yake Danielle nthawe zose ambakomedzewa kudawira pa misonkhano. c Kwa iye  kupereka ndemanga ni njira ibodzi yowonesa kuti ankutumikira Yahova ni njira ibodzi yolimbikisira anango komasoti ni njira yolimbikisira chikhulupiriro chake pa vomwe Baibolo ichapfunzisa. Koma pomwe iye adafulukira mu mpingu womwe wenze na ofalisa azinji, iye ambalatiwalini kawirikawiri kuti apereke ndemanga. Nthawe zinango ambanangiwalini mpakana misonkhano kumala. Iye adati: “Vimbanikalipisa maninge vimbakhala ninge naluza udindo wangu ndipo ukakhala kuti wachita masiku wochitisa ne kukulata uyamba kukumbuka kuti akuchitira dala.”

10. Ko tingachite chani kuti timbakhale na mwayi wopereka ndemanga pa misonkhano?

¹⁰ Ko imwepo mudabva kale ninge mwadabvera Danielle? Peno nteno panango imwepo mungafunelini kumbapereka ndemanga pa misonkhano, koma mundofuna kutetekera basi. Koma ayi kuleka kuchita khama kuperekera ndemanga. Nchani chomwe imwepo mungachite? Imwepo mungakonzekere ndemanga zizinji pa nsonkhano uliose. Peno alibe kukunangani kumayambiriro kwa pfunziro imwepo mudzakwanise kupereka pomwe ndemanga zinango. Mukambakonzekera pfunziro ya ntsanja ya ulonda ganizirani momwe ndime iliyose iliri yobverana na msolo wa pfunziro. Mwanjira mweyi imwepo mudzakwanise kupereka ndemanga zabwino mu pfunziro yose. Komasoti imwepo mungakonzekere kuti mukapereke ndemanga mu ndime zile zomwe zinampfundo zomwe ni zoshupa, zomwe kazinjikazinji nizoshupa kuzifotokoza. (1 Akor. 2:10) Ndawa chani? Ndawa yakuti angakhale wanthu adikidiki omwe angaimise manja pa ndime mwezi. Manje tani peno imwepo mwayesera kuphatisira basa mpfundo zose mwezi? Koma ko mukukwanisalini kuyankha olo kuti mwayesera kuchita vimwevi maulendo yazinji? Imwepo mungakumbire wochitisa misonkhano ikanati yayamba muchimuuza ndime zomwe mukufuna kuti mukaperekere ndemanga.

11. Ko lemba ya Afilipi 2:4 ikutilimbikisa kuchita chani?

¹¹ Lewengani Afilipi 2:4. Mtumi Paulo adalimbikisa Akhrisitu kuti ambaikhe vofuna va anango pa malo yoyamba. Ko tingaiphatisire tani basa mpfundo mweyi pa nthawi ya misonkhano? Timbakumbukire kuti anango afunambo kuperekera ndemanga ninge momwe isepano tinkufunira.

12. Ko ni njira inango iponi yomwe tingalimbikisire abale wanthu pa misonkhano? (Onani pomwe foto.)

 ¹² Mukakhala kuti imwepo munkucheza na azishamwali, ko imwepo muchandokhala muchiyankhula nthawe zose osawasiya kuti ayankhulembo? Mwachidziwikire neye, imwepo mufuna kuti iwo ambayankhulembo. Nchibodzibodzimbo ku misonkhano isepano tifuna kuti abale azinji ambadawilembo. Ndipo kunena shuwa, ibodzi mwanjira yomwe tingalimbikisire abale wanthu, ni kuwapasambo mwayi kuti iwo afotokoze chikhulipiriro chomwe anacho mwa kupereka ndemanga. (1 Akor. 10:24) Naboni tione momwe isepano tingachitire vimwevi.

13. Nchani chomwe tingachite kuti wanthu azinji akhale na mwayi wopereka ndemanga?

¹³ Njira yoyambirira yomwe tingachite ni, kupereka ndemanga zachigwato, tikachita teno anangombo angakhale na mwayi wopereka ndemanga. Akulu na ofalisa omwe anamagole yazinji ali mu choonadi, angapereke chitsanzo pa nkhani mweyi. Podiya kuti mukufuna kupereka ndemanga zachigwato yesesani kuti osati mudawire vose vomwe viri mundime. Imwepo mukakhala kuti mwadawira mpfundo zose zomwe zili mu ndime vichitisa kuti vikhale vidikidiki vomwe wathu anango adawire. Mwakulinganiza, mu ndime ino mpfundo ziwiri zaperekewa kale, mpfundo zake ni kupereka ndemanga zachigwato na kuyesesa kusadawira vinthu vose. Ndipomwapa, peno imwepo ndimwe woyambirira kupereka ndemanga mu ndime, ko tani mu ndime mweyo kundolewako chinthu chibodzi basi?

14. Nchani chomwe chingatithandize kudziwa kuti ni maulendo yangasi tingaimise djanja? (Onani pomwe foto.)

¹⁴ Ganizirani kuti ni maulendo yangasi yomwe imwepo mungapereke ndemanga. Mukakhala kuti mukuimisa djanja maulendo yazinji vimwevi vichitisa kuti wochitisa awone kuti mukumuchichimiza kuti mudawire, podiya kuti anango akalibe mwayi wakudawila.  Vimwevi vingachitise kuti anango afoke kumbayimisambo manja—Mla. 3:7.

15. (a) Ko timbachite tani vinthu peno wochitisa alibe kutilata? (b) Ko wochitisa angaonese tani kuti ankuganizira wose? (Onani bokosi yakuti “ Peno imwepo ndimwe wochitisa pfunziro.”)

¹⁵ Pakakhala kuti abale azinji aimisa djanja pa pfunziro vingachitike kuti tingakwaniselini kudawira ninge momwe isepano timbafunira. Nthawe zinango wochitisa angakwaniserini kutilata olo kabodzi chayiko, vimwevi vingakhale vokwinyiririsa maninge. Ayi kuti timbamuyikhile chakukhosi ndawa yakuti alibe kutilata.—Mla. 7:9.

16. Ko tingalimbikise tani omwe apereka ndemanga?

¹⁶ Mukakhala kuti mulibe kukwanisa kupereka ndemanga maulendo yomwe imwepo mumbafuna, tani kutetekera bwinobwino ndemanga za abale anango? Misonkhano yakamala nkuyenda kukawatembeja ndawa ya vimwevi. Vingachitike kuti abale angakhale olimbikisiwa kuposha ndemanga zomwe imwepo mudakapereka. (Miy. 10:21) Ninjira ibodzi yomwe tingalimbikisirane.

17. (a) Ko azibereki angathandize tani wana wawo kuti ambapereke ndemanga zabwino zobverana na nsinkhu wawo? (b) Mobverana na vidiyo, ni vinthu vinayi viponi vomwe tichadekana kunganizira tikambakonzekera ndemanga? (Onani pomwe mawu ya mnyantsi.)

¹⁷ Ko ni njira zinango ziponi zomwe tingalimbikisirane pa misonkhano? Peno imwepo muna wana athandizeni kuti akapereke ndemanga zobverana na nsinkhu wawo. (Mat. 21:16) Kazinjikazinji nkhani za siriyasi ninge mabvuto ya m’banja, nkhani za vigololo zipfunziriwa  pa pfunziro. Olo kuti viri teno mwachidziwikire pangakhale ndime zinango zomwe wana wanu angakwanise kudawira. Komasoti thandizani wana wanu kuti ni maulendolini yose yanganangiwe akaimisa djanja. Mwanjira mweyi akakhala kuti wochitisa pfunziro walata munthu munango m’malo mwa iye, adzakalipelini.—1 Tim. 6:18. d

18. Ko tingakhale tani wosamala kuti wanthu osati ambandoganizira va ise tikambaperekera ndemanga? (Miyambo 27:2)

¹⁸ Tose ise tingakonzekere ndemanga zolimbikisa zomwe zichalemekeza Yahova komasoti zolimbikisa abale wathu. (Miy. 25:11) Nthawe zinango tingaperekere ndemanga pophatisira basa vomwe vidatichitikira pa moyo wathu, koma tifunika kukhala osamala kuti osati timbandoyankhula vaise tekha basi. (Lewengani Miyambo 27:2; 2 Akor. 10:18) M’malo mwake, ndemanga zathu zifunika zimbalewe va Yahova, mawu yake komasoti wanthu wake wose. (Chiv. 4:11) Nivobveka vikakhala kuti mbvunzo womwe uli mu ndime ukukumbira kuti tipereke mdawiro wathu tingachite vimwevi. Chitsanzo chiri mu ndime inkubwera iyi.

19. (a) Ko nchani chichachitika tikakhala kuti tinkuganizira anango pa misonkhano? (Aroma 1:11, 12) (b) Ndawa chani imwepo mukomedzewa kupereka ndemanga pa misonkhano?

¹⁹ Ni shuwadi kuti palibe malamulo yomwe tingaperekere ndemanga, koma tose isepano tingayesese kulimbikisa abale wathu tikambapareka ndemanga. Njira ibodzi yochitira vimwevi ni kuyesesa kumbapereka ndemanga pafupipafupi. Njira inango ni kukhala wokondwa na mwayi womwe tinawo pakupereka ndemanga komasoti kukhala wokondwera akakhala kuti anango ankuperekambo ndemanga. Tikaikha vofuna va anango kutsogolo pa misonkhano, vichitisa kuti ‘tilimbikisane maninge.’—Lewengani Aroma 1:11, 12.