1. Ko titsimikizira va chani?

 ISEPANO ndise wanthu wa Yahova. Tichadziwa kuti iye atikonda maninge ndipo afuna kuti timbakhale okondwa. (Aro. 8:35-39) Tichadziwapomwe kuti tiphindula maninge tikambaphatisa basa mpfundo za m’Baibolo. (Yes. 48:17, 18) Manje ko tichadekana kuchita chani tikagumana na mabvuto yosadikhirika pamoyo wathu?

2. Ko ni mabvuto yaponi yatingagumane nayo, ndipo tingambadzibvunze mibvunzo yaponi?

² Atumiki wose wa Yahova achalimbana na mabvuto. Mwakulinganiza, munthu munango wa m’banja mwathu angatikhumudwise panango tinkulimbana na bvuto ya matenda yakulu yomwe yankutikangisa kuchita vizinji potumikira Yahova. Vingachitike kuti mwagumana na tsoka yachilengedwe panango munkudzudziwa ndawa ya vomwe muchakhulupirira. Pakulimbana na mabvuto ninge mwaya panango tingadzibvunze kuti: ‘Ko ndawa chani vimwevi vikunichitikira? Ko inepanao nidaphonyesa chinthu? Ko vimwevi vinkuonesa kuti nilibepomwe madaliso ya Yahova?’ Panango imwepo mudabvako kale teno. Vikakhala teno, ayi kukhumudwa. Atumiki azinji okhulupirika wa Yahova adabvambo kale tene.—Sal. 22:1, 2; Hab. 1:2, 3.

3. Ko tapfunzira chani pa lemba ya Salimo 34:19?

³ Lewengani Salimo 34:19. Onani kuti lemba mweyi ya Salimo ilewa mpfundo ziwiri zodekana maninge izi: (1) Olungama agumana na mabvuto na (2) Yahova atipulumusa kumabvuto yathu. Koma ko Yahova achita tani vimwevi? Njira ibodzi niyakuti atithandiza kuona vinthu moyenera mudziko yoipa ino. Yahova  atipolomisa kuti tidzakhale okondwa tikambamutumikira. Olo viri teno, iye atiuzalini kuti moyo wathu udzakhale ulibe mabvuto. (Yes. 66:14) Yahova atilimbikisa kuti timbaganizire maninge vakutsogolo pomwe tidzakhale na moyo womwe iye ambafuna kuti tikhale nawo womwe ni moyo wokondwa na wosapera. (2 Akor. 4:16-18) Yahova atithandize kupitiriza kumutumikira, vilibe basa na mabvuto yomwe tinkugumana nayo ntsiku zino.—Malir. 3:22-24.

4. Ko tiwone chani mu nkhani ino?

⁴ Tiwone vatingapfunzire pa vitsanzo va atumiki wa Yahova okhulupirika wakalekale na wa ntsiku zino. Tiwone pomwe kuti tose isepano tingagumane na mabvuto yosadikhirika pamoyo wathu. Koma tikambathemba Yahova iye nthawe zose adzatithandize. (Sal. 55:22) Tikambakambirana vitsanzo va mu nkhani ino, dzibvunzeni kuti: ‘Ko nidakakhala ine nidakachita tani na bvuto mweyi? Ko vitsanzo mwevi valimbisa tani chikhulupiriro changu kwa Yahova? Ko ni vinthu viponi vomwe ningaviphatise basa pamoyo wangu?’

5. Ko ni mabvuto yaponi yomwe Yakobo adalimbana nayo ndawa ya Labani? (Onani foto ya pakhava.)

⁵ Atumiki okhulupirika wa Yahova wakalekale ambagumana na mabvuto yomwe iwo ambadikhiralini. Onani chitsanzo cha Yakobo. Ababa wake adamuuza kuti akasalule nkazi pa wana wa Labani, yemwe wenze wachibale wawo ndipo ambatumikirambo Yahova. Ababa wake wa Yakobo adamuuza kuti akachita vimwevo Yahova adzamudalise. (Gen. 28:1-4) Pamwapo Yakobo adabvera ababa wake. Iye adasiya dziko ya Kanani ndipo adayenda mpaka kumuyi kwa Labani yemwe wenze na wana awiri akazi womwe ni Leya na Rakele. Yakobo adakonda maninge Rakele yemwe wenze mng’ono wake wa Leya ndipo adabverana navo kuti aphate basa kwa magole 7 kwa Labani kuti amulowole. (Gen. 29:18) Koma ndivolini vidachitika. Labani adamupusisa Yakobo nkumuchitisa kuti alowolane na Leya yemwe wenze nkulu. Labani adamuuza Yakobo kuti alowolane na Rakele pakamala sondo ibodzi, koma abafunika pomwe kuti amuphatire basa kwa magole yanango 7. (Gen. 29:25-27) Labani adachitapomwe vinthu mosowa chilungamo pa mapangano yomwe adachita na Yakobo. Labani ambamujerera Yakobo kwa magole 20!—Gen. 31:41, 42.

6. Ko ni mabvuto yanango yaponi yomwe Yakobo adalimbana nayo?

⁶ Yakobo adalimbana pomwe na mabvuto yanango. Iye wenze na banja ikulu, koma wana wake sikuti nthawe zose ambabverana. Iwo adafika pakugulisa m’bale wawo chaiye Yosefe ninge kapolo. Wana wake awiri Simiyoni na Levi, adapsipiza dzina Yahova komasoti ya banja yawo. Kuthimizira pamwapo, nkazi wake wa Yakobo Rakele yemwe ambamukonda maninge adamwalira pangabereka mwana wawo wachiwiri. Ndipo ndawa ya njala ikulu yomwe idachitika mu dziko yomwe Yakobo angakhala, iye podiya kuti wenze wokalamba adakakamizika kufuluka kukakhala mu dziko ya Iguputo.—Gen. 34:30; 35:16-19; 37:28; 45:9-11, 28.

7. Ko Yahova adamuwonesa tani Yakobo kuti ambakondwa naye?

⁷ Podiya kuti venze teno, Yakobo alibe kuluza chikhulupiriro chake kwa Yahova na mapolomisi yake. Yahova adamuwoneseratu Yakobo kuti ambakondwa naye. Mwakulinganiza, podiya kuti Labani ambamunamiza Yakobo kwa maulendo yazinji, Yahova nthawe zose ambamudalisa na vinthu vakuthupi. Yakobo adatembeja maninge Yahova pomwe adagumanapomwe na mwana wake Yosefe yemwe ambaganizira kuti wenze adamwalira kwa magole  yazinji m’buyo! Chikondi champhanvu chomwe Yakobo wenze nacho kwa Yahova ndicho chidamuthandiza kuti alimbane na mabvuto yose mwaya. (Gen. 30:43; 32:9, 10; 46:28-30) Tikapitiriza kukhala pa ushamwali wolimba na Yahova, isepanombo tidzakwanise kulimbana na mabvuto yosadikhirika.

8. Ko Mpfumu Davide imbafuna kuchita chani?

⁸ Mpfumu Davide ilibe kukwanisa kuchita vose vomwe ingafuna pa kutumikira Yahova. Mwakulinganiza, iye ambafunisisa kumanga kachisi wa Mulungu wake. Iye adauza mneneri Natani chifuno chake chimwechi. Pakumudawira, Natani adalewa kuti: ‘Chitani vose vomwe ntima wanu unkufuna, pakuti Mulungu chaiye anaimwepo.’ (1 Mbiri 17:1, 2) Mawu mwaya yadamulimbikisa maninge Davide. Panango kundoyambira nthawe mweyo adayamba kuchita makonzedwe ya basa mweyi.

9. Ko Davide adachita tani padatambira ntontholo wokhumudwisa?

⁹ Koma patsogolo pake mneneri wa Yahova adabweresa ntontholo wokhumudwisa. ‘Usiku mouleretu’ Yahova adamuuza Natani kuti Davide ndiyelini wati adzamange kachisi m’malo mwake m’bodzi mwa wana wake ndiye wati adzamange. (1 Mbiri 17:3, 4, 11, 12) Ko Davide adachita tani padatambira ntontholo moyu? Iye adachinja cholinga chake. Davide adayamba kuunganidza kobiri na vinthu vophatira basa vomwe mwana wake Solomo adakadzafunikira pophata basa mweyi.—1 Mbiri 29:1-5.

10. Ko Yahova adamudalisa tani Davide?

¹⁰ Padandoti Davide wauuziwa kuti ndiyelini wati adzamange kachisi, Yahova adachita pangano naiye. Iye adamupolomisa kuti mbewu yake idzatonge mpaka kalekale. (2 Sam. 7:16) Mudziko inyowani nkati mwa magole 1000, Davide adzakondwe maninge akadzadziwa kuti Mfumu Yesu ni m’bodzi mwa mbewu yake. Nkhani mweyi itithandiza kuwona kuti podiya tilibe kuchita vose vomwe tingafuna pakutumikira Yahova, Mulungu wathu adzatisungire madaliso yomwe timbalotalini kukhala nayo.

11. Ko Akhrisitu wa mu nthawe ya atumi adadalisiwa tani podiya kuti Ufumu ulibe kubwera panthawe yomwe iwo ambadikhira? (Machitidwe 6:7)

¹¹ Munthawe ya atumi, Akhrisitu adagumana na mabvuto yomwe ambadikhiralini. Mwakulinganiza, iwo ambafuna maninge kuti Ufumu wa Mulungu ubwere, koma ambadziwalini kuti nilini pati vidzachitike vimwevi. (Mac. 1:6, 7) Manje ko iwo adachita tani? Iwo adakhala otangwanika pa basa yolalikira. Pomwe iwo angakhala otangwanika pakulalikira m’madera yose, iwo ambawona kuti Yahova akuwathandiza.—Lewengani Machitidwe 6:7.

12. Ko Akhrisitu wa mu nthawe ya atumi adachita tani pomwe ambalimbana na njala ikulu?

¹² Panthawe inango, njala ikulu ‘idagwera dziko yose.’ (Mac. 11:28) Akhrisitu wa mu nthawe mweyo adakhudziwambo na njala ikulu mweyo. Ganizirani momwe iwo adabonerera na njala mweyo. Nishuwadi kuti misolo yamabanja yenze yotangwanika maninge kuti yagumane chakudya cha mabanja yawo. Ndoganizani momwe vimwevi vidakhudzira alumbwana omwe enze na mapulano yakuti alalikire maninge. Podiya kuti vinthu venze vosiyana kwa aliyese, Akhrisitu wa mu nthawe mweyo adachinja. Iwo adapitiriza kulalikira momwe angakwanisire ndipo enze okondwa kugawana vinthu vakuthupi vomwe enze navo na abale wawo wa ku Yudeya.—Mac. 11:29, 30.

13. Ko Akhrisitu adadalisiwa tani panthawe yanjala?

¹³ Ko Akhrisitu mwawale adadalisiwa tani panthawe yanjala? Wale omwe adatambira thandizo yakuthupi adawona bwinobwino momwe Yahova angawathandizira. (Mat. 6:31-33) Ushamwali wawo na abale wawo omwe adawathandiza udakula maninge. Ndipo wale omwe adachita vopereka na omwe adathandiza munjira zinango adakhala na chimwemwe chobwera  ndawa yothandiza anango. (Mac. 20:35) Yahova adadalisa wose mwawale pakuwathandiza kuzolowera panthawe zoshupa zimwezi.

14. Ko nchani chomwe chidachitikira Baranaba na Paulo, ndipo ko adaphindula chani? (Machitidwe 14:21, 22)

¹⁴ Munthawe ya atumi, Akhrisitu ambadzudziwa nthawe zizinji ndipo vimbachitika mosadikhirika. Onani vomwe vidachitikira Baranaba na mtumi Paulo pomwe iwo ambalalikira ku Lusitara. Pakuyamba wanthu ambawatambira bwino maninge ndipo ambabvesera vomwe ambalalikira. Koma patsogolo pake, otsutsa ‘adanyengerera gulu ya wanthu’ omwe ambabvesera kuti amumenye na viminyala Paulo ndipo adamusiya pakuganiza kuti wafa. (Mac. 14:19) Olo venze teno, Baranaba na Paulo adapitiriza kulalikira ku madera yanango. Ko phindu yake yenze iponi? Iwo adagumana ‘namba ikulu ya opfunzira.’ Kuingizira pamwapo, mawu yawo na chitsanzo chawo chidalimbikisa abale wa mu nthawe mweire. (Lewengani Machitidwe 14:21, 22.) Paulo na Baranaba alibe kusiya kulalikira podiya kuti ambadzudziwa ndipo ndawa ya vimwevo azinji adaphindula. Tikaleka kusiya basa yomwe Yahova watipasa kuti tichite, nivosakaikisa kuti tidzadalisiwe.

15. Ko tingapfunzire chani pa chitsanzo cha m’bale Macmillan?

¹⁵ Ikanati kufika gole ya 1914, wanthu wa Yahova ambadikhira kuti vinthu vinango vichitike. Onani nkhani ya m’bale Macmillan. Ninge azinji wa mu nthawe mwaire, iye ambaganiza kuti atambire manjemanje mphoto yake kudzulu. Munkhani yake inango ya mu setembro 1914, iye adalewa kuti: “Vinkuwoneka kuti imweyi ni nkhani yangu yomalizira ya wose.” Koma imweyi ilibe kukhala nkhani yake yomaliza. M’bale Macmillan patsogolo pake adanemba kuti: “Anango ise timbaganiza mothamanga kuti tiyende kudzulu manjemanje. Koma timbafunika kukhala otangwanika pa basa ya Ambuya.” Ndipo m’bale Macmillan mokhulupirika adakhaladi wotangwanika pa basa mweyi. Iye adapiriza kulalikira mwakhama ndipo wenze na mwayi wolimbikisa abale azinji omwe enze ku djeri ndawa yolamba kungenerera ndale. Olo pomwe adakalamba, iye ambafika pa misonkhano mokhulupirika. Ndawa chani venze vabwino kuti m’bale Macmillan apitirize kukhala wotangwanika pa basa Yahova pomwe angadikhira mphoto yake? Padasala pang’ono kufa mu 1966, iye adanemba kuti: “Chikhulupiriro changu pano ni cholimba maninge ninge mwechenzere poyamba.” Chimwechi ni chitsanzo chabwino maninge kuti tichitewedzere tose, makamaka peno mabvuto yathu yatenga nthawe itali kuposha yomwe timbadikhira!—Aheb. 13:7.

16. Ko ni bvuto iponi yosadikhirika yomwe m’bale Herbert Jennings na nkazi wake adalimbana nayo? (Yakobo 4:14)

¹⁶ Atumiki wa Yahova azinji akulimbana na mabvuto yathanzi yosadikhirika. Mwakulinganiza, mu mbiri yake m’bale Herbert Jennings b adalewa momwe iye na nkazi wake ambakondwera kukhala m’mishonali ku Gana. Koma pakumala kwa nthawe, adagumanika na matenda yakulu ya m’maganizo. Pakulewa va mawu ya Yakobo 4:14, m’bale Jennings ambatanthauza bvuto mweyi kuti ili ninge ‘mangwana’ “yomwe tidziwalini vativichike.” (Lewengani.) Iye adanemba kuti: “Tidagumanadi na bvuto mweyi ndipo tidakonzekera kusiya Gana pabodzi na azishamwali wathu wa pamoyo, nkubwerera ku Canadá kuti tikatambire thandizo ya ku shipitali.” Yahova adathandiza m’bale Jennings na nkazi wake kuti apitirize kumutumikira mokhulupirika podiya kuti ambagumana na mabvuto yanyowani yomwe ambafunika kugwebana nayo.

17. Ko chitsanzo cha m’bale Jennings chidathandiza tani abale anango?

 ¹⁷ Maganizo yoyenera yomwe m’bale Jennings adalewa pa vomwe vidamuchitikira, yadathandiza wanthu azinji. Mulongo munango adanemba kuti: “Palibe nkhani inango yomwe idanifika pamoyo ninge mweyi. . . . Kuwerenga vakuti m’bale Jennings adafunika kusiya utumiki wake kuti akalapiwe matenda yake, kudanithandiza kuwona moyenera bvuto yangu.” M’bale munango adanemba kuti: “Pambuyo pakuti natumikira kwa magole 10 ninge nkulu, nimbafunika kusiya udindo wangu ndawa ya matenda ya m’maganizo. Maganizo yangu yofoka yenze yakulu ndipo nthawe zizinji nikambawerenga mbiri za wanthu nimbakhumudwa maninge. . . . Koma kupirira kwa m’bale Jennings kudanilimbikisa.” Vimwevi vitikumbusa kuti tikambapirira mabvuto yosadikhirika ninge mwaya, tingambalimbikise pomwe anango. Nthawe zinango vinthu pamoyo wathu vifambalini ninge momwe tichafunira, olo nteno tingakhale chitsanzo kwa anango cha chikhulupiriro na kupirira.—1 Pet. 5:9.

18. Ko imwepo mwapfunzira chani pa chitsanzo cha mulongo wa ku Nigéria ninge mwayankuwonesera mafoto?

¹⁸ Mabvuto yoshupa ninge koronaviru idakhudza abale wathu azinji. Mwakulinganiza, mulongo munango wamasiye ku Nigéria wenze alibe kobiri zogulira chakudya. Ntsiku inango machibese mwana wake nkazi adamubvunza kuti adye chani akamaliza kuphika m’punga yemwe wenze naye nkhapu. Mulongo muyo adauza mwana wake kuti tilibe pomwe kobiri ne chakudya, pamwapo iwo ambadekana kutewedzera chitsanzo cha nkazi wamasiye wa ku Zarefati yemwe adakonza chakudya chake chomaliza nkukhulupirira Yahova motsimikiza kuti amuthandize. (1 Maf. 17:8-16) Pantsiku mweire, akanati kuganizira kuti adye chani midiya, adatambira kacha ya vakudya kuchokera kwa abale awiri. Venze vakudya vokwana kuti iwo adye kwa masondo yanganani. Mulongo ule adati panthawe  mweyi adazindikira kuti Yahova ambabvesera mwatcheru pomwe iye ambalewa mwavire kwa mwana wake. Ko tinkupfunzira chani pa vimwevi? Tinkupfunzira kuti, tikambathemba Yahova mokwana, mabvuto yomwe yangabwere mosadikhirika pa moyo wathu yangatichitise kumufenderera maninge.—1 Pet. 5:6, 7.

19. Ko ni mayesero yaponi yomwe m’bale Aleksey Yershov adagumana nayo?

¹⁹ Mabvuto yanango yosadikhirika yomwe abale azinji ankukugumana nayo ntsiku zino ni kudzudziwa. Mwakulinganiza, onani vomwe vidachitikira m’bale Aleksey Yershov yemwe akhala ku Rússia. Pomwe iye adabatizika mu gole ya 1994, abale enze na ufulu mu dziko mweyi. Koma payadamala magole yanganani, vinthu vidachinja. Mu 2020, nyumba yake idasechewa ndipo wa boma adamutengera vinthu vake vizinji. Minyezi pang’ono wa boma adamufungulira mulandu wakuti ni chigananga. Ndipo kuti vinthu viipe maninge, maumboni yomwe adayaphatisa basa ni ya vidiyo yomwe munthu adachosa ambanamizira kuti anachidwi chopfunzira Baibolo kwa magole yazinji. Ganizirani momwe Aleksey adabvera ndawa yoperekewa!

20. Ko m’bale Yershov adalimbisa tani ushamwali wake na Yahova?

²⁰ Ko mayesero yomwe m’bale Yershov adagumana nayo yadakhalako na chinthu chabwino? Inde. Ushamwali wake na Yahova udakhala wolimba maninge. Iye adati: “Inepano na nkazi wangu tipemphera pabodzi pafupipafupi. Inepano nikudziwa kuti vidakakwanisikalini kupirira mayesero mwaya palibe thandizo ya Yahova. Pfunziro yanekha inithandiza kulimbana na maganizo yodziwona kuti ndine wachabechabe. Nikonda kuganizira vitsanzo va atumiki okhulupirika wakalekale. M’Baibolo muna vitsanzo vizinji vowonesa momwe kupitiriza kukhala wodekha na kuthemba Yahova kuliri kodekana maninge.”

21. Ko tapfunzira chani mu nkhani ino?

²¹ Ko tapfunzira chani mu nkhani ino? Mu dziko ino, tigumana na mabvuto yomwe timbayadikhiralini pamoyo wathu. Olo nteno, Yahova athandiza wale omwe amuthemba. Ninge mwayalewera lemba yomwe pachokera msolo wa nkhani ino yomwe ilewa kuti: ‘Mabvuto ya munthu wolungama ni yazinji, koma Yahova achamupulumusa ku mabvuto yose mwayo.’ (Sal. 34:19) Ndipomwapa, m’malo mwakuti timbandoganizira mabvuto yathu, tifunika timbaganizire maninge mphanvu yomwe Yahova anayo kuti atithandize. Tikachita teno, tidzalewembo ninge vomwe mtumi Paulo adalewa kuti: ‘Pavinthu vose nigumana mphanvu ndawa ya Iye yemwe anipasa mphanvu.’—Afil. 4:13.