Iwo adawonesewa chikondi na abale na alongo
YOMARA na azibale wake awiri womwe ni Marcelo na Hiver akhala ku Guatemala. Yomara adayamba kupfunzira Baibolo na wa Mboni za Yahova, patsogolo pake azibale wake adayambambo kupfunzira Baibolo. Koma penze bvuto inango. Wose atatu enze osaona ndipo ambadziwalini kuwerenga chiyankhulo cha braille chomwe ni chiseweredwe cha wanthu osaona. Ndipomwapa, m’bale yemwe ambawapfunzisa ambawawerengera ndime na mavesi ya m’Baibolo ya msolo uliwose.
Kuti ayende ku misonkhano yenze bvuto inango. Wokha ambakwanisalini kufamba msenga wa 40 minutu kuti afike pa Nyumba ya Ufumu yomwe yenze pafupi. Koma abale ambawathandiza kuti ambakwanise kuyenda ku misonkhano nthawe zose. Padayamba kukamba nkhani zawo za mushikola mu Nyumba ya Ufumu, abale ambawathandiza kuti ambakwanise kukumbukira vomwe akonzekera kukakamba.
Mu Maio 2019, misonkhano yadayamba kuchitikira m’muyi mwawo. Panthawe mweyo banja inango yomwe imbachita upainiya wokhazikika yenze idafulukira kumuko. Iwo adakhala na cholinga chakuti athandize abale atatu mwawa kunemba na kuwerenga braille, koma banja mweyi imbadziwalini chi braille. Ndipomwapa, iwo adayenda kukafagafaga ndipo adapfunzira njira zangaphatise basa kuti apfunzisire abale mwawa.
Marcelo ankupereka ndemanga ku misonkhano
M’minyezi pang’ono wose atatu adakwanisa kumbawerenga mu chi braille munjira yosashupa ndipo vidawathandiza kulimbisa ushamwali wawo na Yahova. a Manjeuno, Yomara, Marcelo na Hiver ankutumikira ninge apainiya wokhazikika. Marcelo ankutumikira ninge ntumiki wothandiza. Iwo ni wodzipereka pa basa zauzimu sondo iliyose. Khama yawo ni yolimbikisa maninge.
Abale atatu osaona mwawa ankutembeja maninge pa vomwe abale na alongo ankuwachitira. Yomara adati: “Kundochokera panthawe yomwe tidadziwana na Mboni za Yahova, takhala tikuona kuti wanthu mwawa awonesadi chikondi chaicho.” Marcelo adathimizira kuti: “Ise tina azishamwali wabwino maninge mu mpingu ndipo tinganene kuti tilimbo m’banja ya padziko yose ya bale na alongo womwe abvana maninge.” Yomara na azibale wake ankufunisisa kuti ifike nthawe yomwe dziko yose idzakhale paradaiso.—Sal. 37:10, 11; Yes. 35:5.
a Kabulosha kakuti Aprenda a Ler Braille kadakonzewa kuti kathandize wanthu osaona panango womwe anabvuto ya maso kupfunzira kuwerenga na kunemba chi braille.
