1. Ko Yesu adati chani va nthawe ya mapeto ndipo adapereka chenjezo iponi?

 NTSIKU zinganani Yesu akanati wafa, opfunzira wake anayi adamuchita mbvunzo uyu: ‘Ko vinthu vimwevi vidzachitikelini . . . ndipo chizindikiro cha mapeto ya nthawe ino chidzakhale chani?’ (Mat. 24:3) Opfunzira mwawa ambafuna kudziwa nthawe yomwe Yerusalemu adzadzongewe. Pakuwadawira, Yesu alibe kundofotokoza nthawe yomwe Yerusalemu adzadzongewe, koma adafotokoza pomwe va ‘mapeto ya nthawe yathu ino’ yomwe tinkukhala. Iye pakufotokoza va mapeto adati: ‘Kunena va ntsiku panango nthawe yake palibe ankudziwa olo angelo kudzulu panango Mwana, koma Ababa okha.’ Padafotokoza mawu mwaya Yesu adauza opfunzira wake kuti angadekana ‘kupitiriza kukhala maso’ na ‘kukhala tcheru.’—Maliko 13:32-37.

2. Ndawa chani venze vodekana maninge kwa Akhrisitu womwe angakhala mu Yerusalemu kuti akhale tcheru?

² Akhrisitu wa Chiyuda mu nthawe yoyambirira angadekana kukhala tcheru, moyo wawo ungathemba vimwevi. Yesu adauza opfunzira mwawa vinthu vomwe adzawone vowathandiza kuzindikira kuti Yerusalemu wasala pang’ono kudzongeka. Iye adati: ‘Mukadzawona magulu ya nkhondo yazungulira Yerusalemu, mudzadziwe kuti kudzongeka kwake kwafendera.’ Akhrisitu mwawa padakawona vimwevi vinkuchitika, iwo angadekana kuchita vomwe Yesu adawauza ‘nkuthawira kumapiri.’ (Luka 21:20, 21) Koma wale womwe enze tcheru na vinthu vimwevi ndiwo adakapulumuka pa kudzongewa kwa Yerusalemu.

3. Ko tipfunzire chani mu nkhani ino?

 ³ Manjemanjepa dziko yoipa iyi idzongewe. Koma kuti tidzapulumuke tichadekana kupitiriza kukhala maso na kukhala tcheru. Mu nkhani ino, tiwone momwe tingakhalire maso na vomwe vinkuchitika n’dziko na momwe tingaphatisire bwino basa nthawe yomwe yasala.

4. Ndawa chani tichadekana kuchita chidwi na vomwe vinkuchitika n’dziko na momwe vinkukwanirisira maulosi ya m’Baibolo?

⁴ Tina vifukwa vabwino votichitisa chidwi na vomwe vinkuchitika n’dziko na momwe vinkukwanirisira maulosi ya m’Baibolo. Mwakulinganiza, Yesu adafotokoza mobveka bwino vinthu vomwe vidzatithandize kuzindikira kuti dziko ya Satana iyi ili pafupi kudzongewa. (Mat. 24:3-14) Mtumi Petulo ankutilimbikisa kuti tichadekana kukhala tcheru na kukwanirisiwa kwa maulosi mwaya nakuti tipitirize kukhala na chikhulupiriro cholimba. (2 Pet. 1:19-21) Bukhu yomalizira ya m’Baibolo iyamba na mawu aya: ‘Chivumbulutso choperekewa na Yesu Khrisitu chomwe Mulungu adamupasa kuti awonese akapolo wake vinthu vomwe vichitike manjemanjepa.’ (Chiv. 1:1) Ni vabwino kuchita chidwi na vomwe vinkuchitika n’dziko na momwe vinkukwanirisira maulosi ya m’Baibolo. Koma nthawe zinango vingakhale voshupa kufotokozera anzathu vinthu vomwe vinkuchitika n’dziko iyi.

5. Ko tichadekana kupewa chani, ndipo tichadekana kuchita chani? (Onani pomwe mafoto.)

⁵ Tikambacheza na anzathu nkhani za maulosi ya m’Baibolo, timbapewe kuyankhula ninge tinkudziwiratu vinthu vose vomwe vichitike kutsogolo. Ndawa chani? Ni ndawa yakuti vomwe tingalewe vingadzonge mbverano wa mu mpingu. Mwakulinganiza, tingabve kuti mautongi yankufuna kumalisa chiwawa ndipo vimwevi vibwerese bata na ntendere. M’malo mwakuti timbayesese kuganiza kuti vimwevi vinkukwanirisa ulosi wa pa 1 Atesalonika 5:3, tingachite bwino kukhala tcheru nkumbabvera malangizo yomwe yaperekewa manjemanje. Macheza yathu yachadekana kuchokera m’mabukhu yathu, tikachita teno tithandiza kuti mpingu ‘ukhale wolimba na wobverana.’—1 Akor. 1:10; 4:6.

6. Ko tinkupfunzira chani pa vomwe tinkuwerenga pa 2 Petulo 3:11-13?

⁶ Lewengani 2 Petulo 3:11-13. Mtumi Petulo ankutithandiza momwe tingapitirizire kuona moyenera tikambakambirana maulosi ya m’Baibolo. Iye adati: ‘Tipitirize kukumbukira nthawe zose kukhalapo kwa ntsiku ya Yahova.’ Ndawa chani? Sikuti tindofuna kudziwa ‘ntsiku na nthawe’ yomwe Yahova adzabwerese Arumagedo, koma ndawa yakuti tifuna kuphatisa bwino basa nthawe yathu pa kukhala wanthu wa khalidwe ‘yochena na kuchita basa zowonesa kuti ndise odzipereka kwa Mulungu.’ (Mat. 24:36; Luka 12:40) Mu mawu yanango,tichadekana kupitiriza kukhala oganiza bwino na kukhala otsimikiza kuti vose vomwe tinkuchita pakutumikira Yahova ni ndawa ya kumukonda. Kuti tikwanise kuchita vimwevi tichadekana kukhala osamala.

7. Ko tingawonese tani kuti ndise osamala? (Luka 21:34)

⁷ Yesu adauza opfunzira wake kuti osati ambandokhale tcheru na vomwe vinkuchitika n’dziko, koma kuti ambakhale pomwe tcheru pawokha. Tinkulewa teno ndawa ya vomwe tinkugumana pa Luka 21:34. (Lewengani.) Onani vomwe Yesu adanena. Iye adati: ‘Koma samalani.’ Munthu wosamala akhala tcheru na vinthu virivose vomwe vingadzonge  ushamwali wake na Yahova ndipo ayesesa kuvipewa. Mwanjira mweyi iye apitiriza kukhala mu chikondi cha Mulungu.—Miy. 22:3; Yuda 20, 21.

8. Ko ni malangizo yaponi yomwe Paulo adapereka kwa Akhrisitu?

⁸ Mtumi Paulo adauza Akhrisitu kuti ambakhale osamala. Mwakulinganiza, iye adauza Akhrisitu wa ku Efeso kuti: ‘Samalani maninge na momwe munkufambira osati ninge wanthu alibe nzeru koma wanzeru.’ (Aef. 5:15, 16) Satana ankuyesesa kuti adzonge ushamwali wathu na Yahova. Ndipomwapa, Baibolo itilangiza ‘kupitiriza kuzindikira chifuniro cha Yahova,’ tikateno ndipo patingakwanise kudziteteza ku mayesero ya Satana.—Aef. 5:17.

9. Ko tingazindikire tani chifuniro cha Yahova?

⁹ Baibolo ileweratulini vinthu vose vomwe vingadzonge ushamwali wathu na Yahova. Nthawe zizinji tingafunike kusalula vochita pankhani zomwe Baibolo ileweratulini mwa sitiriti. Kuti tikwanise kusalula bwino vochita, tichadekana kudziwa panango kuti kuzindikira ‘chifuniro cha Yahova.’ Tingakwanise kuchita vimwevi tikambapfunzira nthawe zose na kuganizira vomwe tapfunzira m’Baibolo. Pakuti Baibolo ileweratulini ndandanda wa vinthu vose vomwe tingasalule, olo viri teno tingakwanise kufamba ‘ninge wanthu wanzeru.’ Vomwe vingatithandize kusalula bwino vochita, ni kupitiriza kuzindikira chifuniro cha Yahova na kukhala na ‘maganizo ya Khrisitu.’ (1 Akor. 2:14-16) Mabvuto yanango niyosashupa kuyazindikira, koma yanango ni yoshupa.

10. Ko ni vinthu vinango viponi vomwe tichadekana kupewa?

¹⁰ Pavinthu voipa vomwe tichadekana kupewa vinkuphatanidzapo kukopana, kumwa maninge mowa, kudya monyanya, kuyankhula mawu yoipa, kuonera volaula, vankhanza na vinango. (Sal. 101:3) Nthawe zose mdani wathu Ndyerekezi ayesayesa kuti agumane mpata wodzonga ushamwali wathu na Yahova. (1 Pet. 5:8) Tikaleka kukhala osamala, Satana angabzale muntima na m’maganizo mwathu mbewu za kaduka, kupsa ntima, udani, kugawikana, kudzikuza na umbombo. (Agal. 5:19-21) Pakuyamba maganizo mwaya tingayazindikirelini kuti ni yoipa. Koma tikaleka kusamala na kuchosa kankulumize maganizo yoipa mwaya, yangapitirize kukula ninge mbewu yoipa yomwe idzonga mbewu zinzake zomwe ziri pafupi.—Yak. 1:14, 15.

11. Ko tichadekana kupewa bvuto iponi yoshupa kuzindikira, ndipo ndawa chani?

¹¹ Chinthu chinango chomwe chingatisokoneze ni kubverana na wanthu wamakhalidwe yoipa. Linganizani kuti mukuphata basa na anzanu omwe ni wa Mbonilini za Yahova ndipo mufuna kuti nawombo akhalembo wa Mboni. Ndipomwapa, muyesesa kukhala wachifundo wokoma ntima mpakana nthawe zinango mudyera pabodzi chakudya na anzanu mwawa. Koma munkuchita vimwevo ntsiku iliyose ndipo macheza yake yakhala yolewa va kugonana. Pakuyamba imwepo munkukondwanavolini ndipo vinkukuipirani, koma nkuyenda kwa nthawe macheza yale yankukuipiranilini pomwe. Ndipo ntsiku inango munzanu wakuuzani kuti muyende kukamwa vakumwa pamwakotoka ku basa ndipo imwepo mwabvuma. Nkuyenda kwa nthawe mwayambambo kuganiza ninge munzanu ule wakubasa. Vikakhala tene ndiye kuti vitengelini nthawe kuti muyambe kuchita vinthu ninge munzanu uyo. Ni shuwadi kuti tifuna kumbakhala bwino na wanthu koma osati tiyebwe kuti tikonda kutengera vochita va wanthu omwe tikhala nawo. (1 Akor. 15:33) Tikabvera  Yesu nkukhaladi osamala, tidzapewe kubverana na wanthu womwe atewedzalini mpfundo za Yahova pamoyo wawo. (2 Akor. 6:15) Tidzakwanise kuwona ngozi na kuipewa.

12. Ko opfunzira wa Yesu angadekana kuchita chani pakudikhira mapeto ya nthawe ya Ayuda?

¹² Yesu ambadikhirani kuti opfunzira wake ambandokhala osachita kanthu pakudikhira mapeto ya nthawe ya Ayuda. Yesu adawapasa basa yakuti aphate. Iye adawalamula kuti alalikire ntontholo wabwino wa Ufumu ‘mu Yerusalemu, mu Yudeya, ku Samariya na kumalekedzero yose ya dziko yapasi.’ (Mac. 1:6-8) Imweyi yenze basa ikulu maninge! Koma pakudzipereka kuphata basa mweyi, iwo adakaphatisa bwino basa nthawe yawo.

13. Ndawa chani tichadekana kuphatisa bwino basa nthawe yathu? (Akolose 4:5)

¹³ Lewengani Akolose 4:5. Kuti tikhale osamala, tichadekana kuphatisa bwino basa nthawe yathu. ‘Vinthu vosadikhirika’ vichitikira aliyese. (Mla. 9:11) Ndipomwapa, vinthu vingachinje pamoyo wathu mu kanthawe kang’onong’ono.

14-15. Ko tingaphatise tani bwino basa nthawe yathu? (Aheberi 6:11, 12) (Onani pomwe foto.)

¹⁴ Kuti tiphatise bwino basa nthawe yathu, tichadekana kuchita chifuniro cha Yahova na  kulimbisa ushamwali wathu na iye. (Yoh. 14:21) Tichadekana kukhala ‘olimba na osagunduzika pa kukhala na vochita vizinji pa basa ya Ambuya.’ (1 Akor. 15:58) Tikachita teno, tidzadzilingelini mapeto yakadzafika peno yakhale mapeto ya moyo wathu panango ya dziko ino.—Mat. 24:13; Aro. 14:8.

¹⁵ Ntsiku zino, Yesu ankupitiriza kutsogolera opfunzira wake pa basa yolalikira ntontholo wabwino wa Ufumu padziko yose yapasi. Yesu adapolomisa opfunzira wake kuti adzakhale nawo mpaka mapeto. Ntsiku zino iye ankukwanirisa polomisi mweyi. Yesu ankupitiriza kutsogolera opfunzira wake pa basa mweyi. Pakuphatisa basa gulu ya Yahova, Yesu ankutipfunzisa mwatingaphatire bwino basa mweyi. (Mat. 28:18-20) Ise tibvera Yesu pa kulalikira na kupfunzisa wanthu ntontholo wabwino ndipo tiri tcheru pakudikhira mapeto yadziko ino. Tikambaphatisa basa malangizo yogumanika pa Aheberi 6:11, 12, chidikhiro chathu chidzakhale ‘chotsimikizika mpaka mapeto.’—Lewengani.

16. Ko tichadekana kukhala otsimikiza kuchita chani?

¹⁶ Yahova adakhazikisa kale ntsiku na nthawe yakuti adzadzonge dongosolo yoipa ya Satana. Ntsiku mweyi ikadzafika Yahova adzakwanirise vose vadapolomisa. Ni shuwadi kuti nthawe zinango tingaganize kuti mapeto yankuchedwa kufika. Koma ntsiku ya Yahova ‘inkuchedwalini!’ (Hab. 2:3) Ndipomwapa, tichadekana ‘kupitiriza kukhala maso pakudikhira Yahova Mulungu wachipulumuso chathu.’—Mika 7:7.