MU CHIYANKHULO choyamba mawu yakuti ‘ngolo’ yomwe yadatsumbudzuliriwa mu Baibulo la Dziko Latsopano yangatanthauze ngolo iliyose. (Mac. 8:28, 29, 38) Koma vinkuwoneka kuti mwamuna wa ku Itiyopiya moyu wenze adapakira ngolo ikulu kuposha ya nkhondo panango ngolo yothamanga maninge. Onani vifukwa vinango vomwe vinkutsimikizira vimwevi.

Mu Itiyopiya moyu wenze mwamuna wa udindo yemwe adachita ulendo utali maninge. Iye wenze ‘munthu yemwe wenze na ulamuliro pa Kandake mpfumu ikazi ya ku Itiyopiya na onyang’anira chuma chake chose.’ (Mac. 8:27) Itiyopiya wakale ankuphatanidzapo dziko ya Sudão na mbali ya ku sul ya Iguputo. Podiya kuti governadoli moyu alibe kupakira ngolo ibodzi pa ulendo moyu, vinkuoneka kuti iye wenze na chola choyenda nacho pa ulendo utali maninge. Ngolo zakuyamba zomwe ambaphatisa basa Yesu akanati wabwera, zenze na maviri yanayi. ‘Ngolo ninge mwezo, zimbakwanisa kutakula katundu wolemera maninge nkufamba bwinobwino ndipo ndawa yakuti zimbafamba bwinobwino, munthu ambakwanisa kuingizirapomwe nsenga womwe ankufuna’ mobverana na momwe bukhu ya Machitidwe ichanenera—An Exegetical Commentary.

Pomwe Governadoli moyu ambawerenga, Filipo adamufenderera. Nkhani mweyi ichanena kuti: ‘Filipo adathamanga m’mbali mwa ngolo pomwe adabva governadoli ankuwerenga mokuwa bukhu ya mneneri Yesaya.’ (Mac. 8:30) Ngolo mwezi zilibe kukonzewa kuti zimbathamange maninge. Kufamba pang’onopang’ono moku, ndiko kumbathandiza kuti governadoli ule akwanise kuwerenga komasoti kuti Filipo akwanise kuiphata ngolo mwaire na minyendo.

Governadoli moyu ‘adakumbira Filipo kuti apakirembo mu ngolo mweire.’ (Mac. 8:31) Mu ngolo zothamanga maninge, wanthu ambakhala imilire. Koma ngolo ikulu yofambira mwaire, yenze na mbuto ikulu yakuti governadoli na Filipo adakakwanisa kukhala pansi.

Mobverana na bukhu youziriwa ya Machitidwe msolo wa 8 na maumboni yomwe yalipo m’mabukhu yathu ya manjemanje, yankuwonesa governadoli wa ku Itiyopiya ali pakire ngolo ikulu kuposha ya nkhondo panango yothamanga.