NKHANI YOPFUNZIRA 2
NYIMBO NA. 19 Chakudya Chamadzulo cha Ambuye
Ko mwakonzekera ntsiku yodekana maninge ya gole ino?
‘Pitirizani kuchita vimwevi pakunikumbukira.’—LUKA 22:19.
CHOLINGA
Kuona kuti ndawa chani chikumbuso ni chodekana maninge, momwe tingakonzekerere, na kuchemera anango kuti adzagumanike.
1. Ndawa chani chikumbuso ni chochitika chodekana maninge pa gole? (Luka 22:19, 20)
KWA WANTHU wa Yahova, mwambo wokumbukira impfa ya Yesu ni chinthu chodekana maninge kwa iwo. Chimwechi ni chochitika chibodzi chokha chomwe Yesu adapereka malangizo yobveka bwino kwa ateweri wake kuti ambamukumbukire. (Werengani Luka 22:19, 20.) Tikhala ofunisisa kugumanika pa chikumbuso pa vifukwa vizinji. Naboni tione vinango mwa vifukwa vimwevi.
2. Ko ni vifukwa viponi vomwe vichachitisa kuti ntsiku ya chikumbuso ikhale yodekana maninge kwa isepano?
2 Chikumbuso chitithandiza kudziwa kufunika kwa ntsembe ya dipo ya Yesu. Chitikumbusapomwe momwe tingaonesere kutembeja ntsembe ya dipo mweyi. (2 Akor. 5:14, 15) Kuingizira mwapa, pa chikumbuso tikhala na mwayi ‘wolimbikisana’ na abale na alongo. (Aro. 1:12) Gole iliyose abale azinji omwe adasiya kusonkhana achafika pa chikumbuso. Ndipo anango ndawa yotambiriwa bwino ayambapomwe kusonkhana. Anango ayamba kupfunzira Baibolo pambuyo pakuti afika pa chikumbuso. Ni vosadabwisa kuti ntsiku mweyi ni yodekana maninge kwa isepano.
3. Ko tichakhalatani obverana pa ntsiku ya chikumbuso? (Onani pomwe foto.)
3 Ganiziranipomwe momwe tichakhalira obverana padziko yose. Wa Mboni za Yahova achasonkhana dzuwa ikangena padziko yose yapasi. Tose tichabvesera nkhani yomwe iwonesa kudekana kwa dipo. Tiyimba nyimbo ziwiri, tifambisa vizindikiro va nkate na vinyu ndipo tichanena “ame” na ntima ose. Pa tsiku ibodzi mipingu yose yadzachite vimwevi. Ko munkuganizira momwe Yahova na Yesu achakhalira okondwa akationa tiri obverana padziko yose nkuwalemekeza mwa njira mweyi?
Pa ntsiku ya chikumbuso abale ose pa dziko ya pasi ni obverana (Onani ndime 3) f
4. Ko tikambirane chani mu nkhani mweyi?
4 Mu nkhani mweyi tikambirane mibvunzo aya: Ko tingakonzekerese tani ntima wathu kuti tidzaphindule pa chikumbuso? Ko tingathandize tani anango kuti adzaphindule na chochitika mwechi? Ndipo tingathandize tani wanthu omwe adasiya kusonkhana? Midawiro ya mibvunzo mwaya yatithandize kukhala okonzeka pa ntsiku yodekana maninge mweyi.
KO TINGAKONZEKERESE TANI NTIMA WANTHU KUTI TIDZAPHINDULE PA CHIKUMBUSO?
5. (a) Ndawa chani tichadekana kuganizira kufunika kwa dipo ya Yesu? (Salimo 49:7, 8) (b) Ko mwapfunzira chani pa vidiyo yakuti Ndawa Chani Yesu Adafa?
5 Njira ibodzi yodekana maninge yomwe tingakonzekeresere ntima wathu ni kuganizira kufunika kwa ntsembe ya dipo ya Yesu Khrisitu. Palibe chomwe tingachite kuti tidzipulumuse pa uchimo na impfa. (Werengani Salimo 49:7, 8; onanipomwe vidiyo yakuti Ndawa Chani Yesu Adafa?) a Yahova adatumiza Yesu kuti adzapereke moyo wake kuti atipulumuse. Yahova na Yesu adatichitira chinthu chodekana maninge. (Aro. 6:23) Tikambaganizira vomwe Yahova na Yesu adatichitira, ndipo pomwe tichamutembeja maninge ndawa ya ntsembe mweyi. Naboni tiwone vinthu vinango vomwe Yahova na Yesu adatichitira vomwe ni voshupa maninge. Koma chakuyamba, ko dipo ni chani?
6. Ko dipo inkuphatanidzapo chani?
6 Dipo ni malipiro yomwe yachaperekewa kuti tiwombole chinthu chinango. Munthu woyambirira Adamu wenze waungwiro pomwe iye adalengewa. Koma pomwe iye adachimwa pabodzi na mbewu yake, adaluza mwayi wokhala na moyo mpakana kalekale. Koma kuti abwezerese chinthu chomwe Adamu adaluza, Yesu adapereka moyo wake waungwiro pomwe wenze na moyo pano padziko yapasi. Yesu ‘alibe kuchimwako ndipo pakamwa pake alibe kunenako bodza iliyose.’ (1 Pet. 2:22) Pomwe Yesu adafa wenze waungwiro ninge momwe Adamu wenzere akanati kuchimwa. Ndipomwapa ndawa yopereka moyo wake, Yesu adapagali malipiro yabodzibodzi mwayo yomwe ni moyo waungwiro womwe Adamu adauluza.—1 Akor. 15:45; 1 Tim. 2:6.
7. Ko ni mabvuto yaponi yomwe Yesu adagumana nayo pomwe wenze pano pa dziko ya pasi?
7 Pomwe wenze pano padziko yapasi Yesu adabvera Yahova pa chilichose podiya pa nthawe yomwe kuchita vimwevi kwenze koshupa. Yesu wenze mwana waungwiro ndipo azibereki wake enze alibe ungwiro. Olo venze tene iye ambadekana kubvera azibereki wake. (Luka 2:51) Pomwe Yesu wenze mulumbwana, iye ambadekana kulamba viyeso vomwe vidakamuchitisa kuti aleke kukhala obvera kwa azibereki wake na kuleka kukhala wokhulupirika kwa Yahova. Pomwe adakula Yesu ambadekana kulamba viyeso va Satana yemwe ambafuna kuti aleke kukhala wokhulupirika kwa Yahova. (Mat. 4:1-11) Satana wenze wofunisisa kufuna kuchimwisa Yesu kuti akangire kulipira moyo wake ninge dipo.
8. Ko ni mabvuto yanango yaponi yomwe Yesu ambadekana kugumana nayo?
8 Nkati mwa utumiki wake pano pa dziko yapasi, iye adagumana na mabvuto yanango. Azondi wake ambamudzudza ndipo ambayesesa kuti amuphe. (Luka 4:28, 29; 13:31) Kuingiziramwapa iye ambadekana kulimbana na vophonya va ateweri wake. (Maliko 9:33, 34) Pomwe iye adaweruziwa kuti aphewe, Yesu adamanikiwa ndipo adanyozewa na kuchitisiwa manyazi. Pakumalizira iye adafa modzudzika na mowawa maninge. (Aheb. 12:1-3) Ndipo iye ambadekana kupirira mayesero yomaliza yekha mosatetezewa na Yahova. b—Mat. 27:46.
9. Ko muchabvatani mukambaganizira va dipo ya Yesu? (1 Petulo 1:8)
9 Shuwadi, Yesu adadzudzika maninge kuti apereke moyo wake kwa isepano. Tikambaganizira vose vomwe Yesu adatichitira, isepano tichamukonda.—Werengani 1 Petulo 1:8.
10. Ndawa chani ntsembe ya Yesu idamuwawa maninge Yahova?
10 Manje tani Yahova? Ko iye angadekana kupirira chani kuti Yesu akwanise kupereka dipo? Yahova na mwana wake Yesu akondana maninge. (Miy. 8:30) Manje ganizirani momwe venzere voshupa kwa Yahova kuona mwana wake ankugumana na viyeso voshupa pano padziko yapasi. Ni shuwadi iye adawawiwa maninge kuona mwana wake ankudzudziwa, kulambiwa, na kubonera maninge.
11. Ko nchani chomwe chingatithandize kubvesa momwe Yahova adabvera pomwe Yesu adafa?
11 Azibereki omwe adaluza mwana wawo achadziwa bwinobwino momwe vichakhalira vowawa ndawa ya kuferewa. Isepano tikhulupirira maninge kuti wakufa adzamukisiwe. Olo nteno isepano tichawawiwa maninge muntima munthu akamwalira. Vimwevi vitithandiza kudziwa momwe Yahova adabvera pomwe adaona mwana wake wokondewa ankubonera mpakana kufa. c—Mat. 3:17.
12. Ko tingachite chani chikumbuso chikanati chachitika?
12 Ko tani imwepo manjeuno kupfunzira vizinji va dipo pa pfunziro ya mwekha panango pa pfunziro yabanja? Phatisani basa Buku la Mboni za Yehova Lofufuzira Nkhani panango chofalisa chinango kuti mudziwe vizinji pa nkhani ya dipo. d Phatisanipomwe basa ndandanda yowerengera Baibolo pa nthawe ya chikumbuso yomwe ibwera pa Ndandanda ya utumiki na moyo wathu wachikhrisitu ndipo pa ntsiku ya chikumbuso ayi kuyebwa kunyang’anira vidiyo ya lemba ya ntsiku. Tose isepano tikakonzekeresa mitima yathu pa ntsiku ya chikumbuso, tidzakwanise kuthandiza wanthu anango kuti aphindule maninge na chochitika mwechi.—Ezara 7:10.
THANDIZANI ANANGO KUTI ADZAPHINDULE
13. Ko ni chithu chakuyamba chiponi chomwe tingachite kuti tithandize anango kudzagumanika pa chikumbuso?
13 Ko tingathandize tani anango kuti adzaphindule pa chikumbuso? Chinthu chakuyamba ni kuwachemerera ku chikumbuso. Kuingizira pa kuchemera wanthu omwe tingawagumane mu umboni, tinganembepomwe ndandanda ya madzina ya wanthu omwe tinkufuna kuwachemerera. Ninge azibale wathu, anzathu wa kubasa, anzathu wa ku shikola na anango. Podiya kuti mulibe mapepa yazinji yakuti muchemerere wanthu ku chikumbuso, mungawatumizire link pa foni ndipo mungadabwe kuona kuti wanthu azinji abvuma!—Mla. 11:6.
14. Ndawa chani kuchemerera munthu pa yekha ni kwabwino?
14 Kuchemerera munthu aliyese pa yekha ni kwabwino maninge. Mulongo munango adadabwa maninge pomwe mwamuna wake yemwe atumikiralini Yahova, adamuuza kuti ankufuna kuyenda ku chikumbuso. Ndawa chani iye adadabwa? Ndawa yakuti mulongo moyu wenze adamuchemerera mwamuna wake maulendo yazinji kuti abwere pa chikumbuso koma iye ambayendakolini. Manje ko nchani chomwe chidachitika ulendo uno? Mwamuna wake adanena kuti: “Nidatambira kapepa kochemerera wanthu ku chikumbuso.” Iye adatambira kapepa mwaka kuchokera kwa nkulu munango yemwe ambamudziwa. Iye adagumanika pa chikumbuso mu gole mweyire ndipo adapitiriza kugumanika pa chikumbuso.
15. Ko nchani chomwe tichadekana kuganizira tikambachemerera munthu ku chikumbutso?
15 Kumbukirani kuti wanthu omwe tawachemerera pa chikumbuso, angakhale na mibvunzo yazinji maninge makamaka peno akanati kugumanikako pa misonkhano yathu. Ndipo vingakhale bwino kuganizira mibvunzo yomwe angakhale nayo na kukonzekera momwe tingadawirire. (Akol. 4:6) Mwakulinganiza, anango angadzibvunze kuti: ‘Ko nsonkhano moyu uchachitika tani?’ ‘Ukatenge nthawe itali tani?’ ‘Ko ningavale chilichose?’ ‘Ko kukapagaliwi kobiri?’ ‘Ko iwo afambisalini puleti ya vopereka?’ Tikamuchemera munthu kuti abwere ku chikumbuso tingamubvunze kuti: “Ko munambvunzo uliwose?” Mwapo iye adzakuuzeni vomwe ankufuna kudziwa. Ndipo tingaphatisepomwe basa mavidiyo yakuti Kumbukirani Impfa ya Yesu na yakuti N’chani Chichachitika mu Nyumba za Ufumu? Kuti timuthandize munthu kubvesa momwe misonkhano yathu ichachitikira. Kuingizira mwapa msolo 28 wa bukhu yakuti Kondwani na moyo mpaka kalekale! Inampfundo zabwino zomwe tingaziphatise basa pakuthandiza munthu.
16. Ko ni mibvunzo yaponi yomwe wanthu azinji omwe agumanika pa chikumbuso angakhalenayo?
16 Pambuyo pakuti tachita chikumbuso, wanthu azinji omwe tidawachamerera panango angakhale na mibvunzo. Panango iwo angabvunze ndawa ya kuona kuti tiribe kudya nkate panango kumwa vinyu. Panango angabvunze pakuona kuti wanthu ang’onong’ono okha (peno alipo) ndiwo achita vimwevi. Iwo panango angadzibvunzepomwe kuti peno chikumbuso mwechi chichitikepomwe manjemanje. Panango iwo angafune kudziwa kuti misonkhano yose ya Wamboni za Yahova ichitika teneuyu. Podiya kuti mibvunzo yanango yadawiriwa mu nkhani ya chikumbuso, munthu angafune kudziwa vizinji. Onani nkhani ya pa jw.org ya msolo wakuti “N’chifukwa Chiyani a Mboni za Yehova Mumachita Mwambo wa Mgonero wa Ambuye Mosiyana ndi Zipembedzo Zina?” Nkhani mweyi ingatithandize kudawira mibvunzo yanango yomwe iwo angakhale nayo. Isepano tinkudekana kuchita vose vomwe tingakwanise pomwe chikalibe kuchitika, pomwe chinkuchitika na pambuyo pakuti chikumbuso chachitika. Kuti tithandize wale omwe ‘anamaganizo yabwino’ kuti aphindule na chikumbuso mwechi.—Mac. 13:48.
THANDIZANI OMWE ADAFOKA
17. Ko akulu angathandizetani wanthu omwe adafoka? (Ezekieli 34:12, 16)
17 Pa nthawe ya chikumbuso, ko akulu angathandizetani wale omwe adafoka? Onesani kuti muchawaganizira. (Werengani Ezekieli 34:12, 16.) Chikumbuso chikalibe chachitika, chitani vose vomwe mungakwanise kuti mucheze na wanthu azinji omwe adafoka. Ndipo awoneseni kuti muwakonda maninge nakuti munkufuna kuwathandiza pomwe iwo ankudekana thandizo. Achemerereni ku chikumbuso ndipo akabwera atambireni mwachikondi. Pambuyo pa chikumbuso pitirizani kuwaonesa kuti muwaganizira abale na alongo mwawa. Ndipo chitani vomwe ni vodekana pakuwathandiza kuti abwerere kwa Yahova.—1 Pet. 2:25.
18. Ko tose isepano tingathandize tani wanthu omwe adafoka? (Aroma 12:10)
18 Ko aliyese mumpingu angachitetani kuti akwanise kuthandiza wale omwe adafoka omwe akwanisa kugumanika pa chikumbuso? Tingachite vimwevi mwa kuwatambira mwachikondi, mokoma ntima na mwaulemu. (Werengani Aroma 12:10.) Ganizirani momwe viriri voshupa kuti abale na alongo mwawa ayambepomwe kusonkhana. Panango iwo angakhale na mantha kuti akatambiriwelini bwino. e Ndipomwapa ayi kunena vinthu vomwe vingawachitise manyazi panango kukhumudwa. (1 Ates. 5:11) Abale na alongo mwawa achakondambo Yahova ninge isepano. Isepano tichakhala okondwa kutumikira Yahova pabodzi na abale mwawa!—Sal. 119:176; Mac. 20:35.
19. Ko ni maphindu yaponi yomwe tichagumana tikambakumbukira impfa ya Yesu Khrisitu?
19 Ni vobveka kuti Yesu adatikumbira kuti timbakumbukire impfa yake gole iliyose. Ni shuwadi tose isepano na wanthu anango tiphindula maninge tikambachita vimwevi. (Yes. 48:17, 18) Mwakulinganiza, chikondi chathu kwa Yahova na Yesu Khrisitu chikhala cholimba maninge. Ni mwayi wathu kuonesa kutembeja vomwe Yahova na Yesu adatichitira. Tikhala obverana na abale na alongo wathu ndipo kuingizira mwapa tinamwayi wouzambo wanthu anango kuti apfunzire vizinji va dipo ya Yesu nakuti akhale na mwayi wodzatambira madaliso yomwe Yahova watipolomisa. Ndipomwapa naboni tichite vose vomwe tingakwanise kuti tikonzekere ntsiku yodekana maninge ya gole ino yomwe ni ntsiku yokumbukira impfa ya Yesu Khrisitu!
KO TINGAKONZEKERESE TANI NTIMA WATHU PA . . .
-
ntsiku ya Chikumbuso?
-
kuthandiza anango kuphindula na chochitika mwechi?
-
kuthandiza ofoka?
NYIMBO NA. 18 Tikuthokoza Chifukwa cha Dipo
a Kuti mugumane nkhani na mavidiyo yomwe yatomolewa mu nkhani mweyi, ngenani pa saiti ya jw.org ndipo nembani msolo pa kabokosi kofufudzira.
b Onani nkhani yakuti “Mibvunzo yochokera kwa olewenga” mu Ntsanja ya olonda ya Abril 2021.
c Onani bukhu yakuti Yandikirani kwa Yehova, mso. 23, ndi. 8-9.
d Onani bokosi yakuti “ Vomwe mungafufudze.”
e Onani mafoto na bokosi yakuti “ Momwe mpingu udanitambirira.” M’bale wofoka yemwe wenze na nkhawa akanati kungena mu Nyumba ya Ufumu koma iye adamalisa mantha mwaya. Iye adatambiriwa mwachikondi ndipo adakhala womasuka.
f MAWU YOFOTOKOZERA MAFOTO: Pomwe abale na alongo ankuchita chikumbuso mu dziko inango, abale na alongo ankukonzekerambo chochitika chapadera mwechi mu dziko inango.
