NKHANI YOPFUNZIRA 4
NYIMBO NA. 30 Atate Wanga, Mulungu Wanga Ndiponso Bwenzi Langa
Yahova akukondani maninge
‘Yahova ni wachifundo.’—YAK. 5:11.
CHOLINGA
Kudziwa momwe chikondi cha Yahova chingatithandizire kumufunderera na kutithandiza kudzibva otetezeka na olimbikisika.
1. Ko munkuganiza kuti Yahova alitani?
KO MUDAGANIZIRAKO kale momwe Yahova aliri? Mukambapemphera kwa Yahova, ko muganiza kuti iye ali tani? Ni shuwadi kuti isepano tingamuwonelini Yahova, koma Baibolo imufotokoza mu njira zizinji. Iye achemerewa kuti ‘ni Dzuwa na Chotitetezera’ ndipo nthawe zinango anenawa kuti ‘ni moto wodzonga.’ (Sal. 84:11; Aheb. 12:29) Mu masomphenya yanango, mneneri Ezekieli adanena va Yahova kuti ali ninge mwala wa safiro, chitsulo chonyezimira na chitawaleza. (Ezek. 1:26-28) Momwe Yahova achanenewera m’Baibolo kungatichitise chidwi mpakana kungatichitise mantha.
2. Ndawa chani vingakhale voshupa kumufenderera Yahova?
2 Pakuti timuwonalini Yahova vingakhale voshupa kwa isepano kutsimikizira kuti atikonda. Anango adabonera maninge pa moyo ndipo aganiza kuti Yahova awakondalini. Panango iwo alibe kukhalako na baba yemwe awakonda. Yahova achabvesa momwe tibvera ndipo ankudziwa kuti ndawa chani vingakhale voshupa kwa isepano kuti timufendere. Pa kufuna kutithandiza, iye adatiwonesa m’Baibolo kuti iye ni Mulungu wachikondi.
3. Ndawa chani ni vodekana kupfunzira vizinji va chikondi cha Yahova?
3 Mawu yabwino yomwe yamudziwikisa Yahova ni chikondi. (1 Yoh. 4:8) Baibolo ichati Mulungu ni chikondi. Ndipo ni chikondi chomwe chimupasa mphanvu kuchita vose vomwe iye achachita. Chikondi cha Mulungu ni chikulu ni champhanvu mpakana chiphindulisa wale omwe amukondalini. (Mat. 5:44, 45) Mu nkhani mweyi tipfunzireko pang’ono va Yahova na chikondi chake. Tikambapfunzira vizinji va Mulungu ndipo pomwe timukonda maninge.
YAHOVA ATIKONDA MANINGE
4. Ko chikondi cha Yahova chikuchitisani kudzibva tani? (Onani pomwe foto.)
4 ‘Yahova ni wachifundo.’ (Yak. 5:11) Mu Baibolo iye alinganiziwa na mayi wachikondi. (Yes. 66:12, 13) Ganizirani va mayi yemwe asamalira bwino mwana wake, mwachikondi iye abereka mwana wake ndipo ayankhula modekha kwa mwana wake. Pomwe mwana wake ankulira panango ankubva kuwawiwa, iye achita vose vomwe angakwanise kuti amupase vose vomwe ankufunikira. Pomwe isepano tinkugumana na mabvuto tingakhale na chitsimikizo chakuti Yahova atikonda. Wamasalimo adanemba kuti: ‘Pomwe nenze na nkhawa, imwepo mudaninyamalisa.’—Sal. 94:19.
‘Ninge momwe mayi anyamalisira mwana wake inembo nidzapitirize kukunyamalisani’ (Onani ndime 4)
5. Ko chikondi chokhulupirika cha Yahova chinkutathauza chani kwa imwepo?
5 Yahova ni wokhulupirika. (Sal. 103:8) Iye atisiyalini podiya kuti taphonyesa chinthu. Ntundu wa Aizirayeli udamukhumudwisa Yahova maulendo yazinji. Olo venze teno, pomwe wanthu mwawa adalapa Yahova adawonesa chikondi chake chokhulupirika pa kuwauza kuti: ‘Ndawa yakuti imwepo ndimwe odekana maninge kwa inepano, nidakulemekezani ndipo nikukondani.’ (Yes. 43:4, 5) Chikondi cha Yahova chilibe kuchinja. Isepano nthawe zose tingamuthembe. Olo pomwe tachita chimo ikulu Yahova adzatisiyelini. Isepano tikalapa na kubwerera kwa Yahova, tidzawone kuti iye ankupitiriza kutikonda, iye adatipolomisa kuti ‘adzatikhululukire na ntima wose.’ (Yes. 55:7) Baibolo inena kuti kukhululuka kwa Yahova kuli ninge ‘nthawe zolimbikisa . . . zochokera kwa iye.’—Mac. 3:19.
6. Ko lemba ya Zekariya 2:8 itipfunzisa chani va Yahova?
6 Werengani Zekariya 2:8. Yahova atilinganiza na ka mboni ka mdiso mwake. Diso ni chinthu chodekana maninge pa thupi yathu. Ndipomwapa viri ninge Yahova ankunena kuti: ‘Yemwe ankuchitira voipa wanthu wangu, ankuchitira chinthu choipa chinthu chodekana maninge kwa inepano.’ Ndawa ya chikondi chake kwa isepano Yahova achabvesa bwino maganizo yathu ndipo ankufuna maninge kutiteteza. Isepano tikambabonera iye vimuwawa maninge. Ndawa ya vimwevi isepano tichadekana kupemphera momuthemba kuti: ‘Nisungeni ninge mboni ya mdiso mwanu.’—Sal. 17:8
7. Ko ndawa chani tichadekana kulimbisa chikhulupiriro pa chikondi cha Yahova?
7 Yahova ankufuna kuti imwepo muleke kukayikira kuti akukondani pa mwekha. Koma iye adziwa kuti ndawa ya vinthu vinango vakumbuyo imwepo mungambakayikire peno iye akukondani panango neye. Panango imwepo munkugumana na mabvuto yakulu yomwe yangayese chikhulupiriro chanu pa chikondi kwa Yahova. Manje nchani chingalimbise chikhulupiriro chanu? Ni kuganizira momwe Yahova awonesera chikondi chake kwa Yesu, odzodzewa na kwa tose isepano.
MOMWE YAHOVA ACHAWONESERA CHIKONDI CHAKE
8. Ndawa chani Yesu wenze na chitsimikizo chakuti Ababa wake ambamukonda?
8 Magole mamidyawu yazinji yomwe Yahova na Yesu adakhala ali pabodzi kudzulu ambakondana maninge. Yahova adaonesa kuti ambamukonda Yesu ninge momwe tiwerengera pa lemba ya Mateyu 17:5. Yahova adakandolewa kuti, ‘moyu nikondwa naye.’ Koma iye ambafuna kuti isepano tidziwe kuti amukonda Yesu ndipomwapa iye adanena kuti Yesu ‘moyu ni mwana wangu yemwe nimukonda.’ Yahova wenze wokondwa maninge na Yesu ndawa yakuti wenze wokonzeka kupereka moyo wake. (Aef. 1:7) Yesu ambakayikiralini kuti Ababa wake ambamukonda. Iye ambatsimikizira va chikondi cha Yahova ndipo maulendo yazinji adanena kuti Ababa wake amukonda.—Yoh. 3:35; 10:17; 17:24.
9. Ni mawu yaponi yofotokozera chikondi cha Yahova kwa odzodzewa? Fotokozani. (Aroma 5:5)
9 Yahova adawonesapomwe chikondi chake kwa odzodzewa. (Werengani Aroma 5:5.) Onani mawu yakuti ‘adakhuthulira.’ Bukhu ya marefarensiya idafotokozera mawu mwaya ninge “kamadzi komwe kankubwera kwa isepano.” Chitsanzo mwechi chinkuwonesa bwino momwe Yahova achakondera odzodzewa ndipo iwo adziwa kuti ‘Mulungu awakonda.’ (Yuda 1) Mtumi Yohane adanena momwe ambabvera pa kunena kuti: ‘Onani momwe Ababa wathu atikondera pakutichemera kuti wana wa Mulungu!’ (1 Yoh. 3:1) Manje ko Yahova andokonda odzodzewa basi? Neye, Yahova adawonesa kuti akonda tose isepano.
10. Ko nchani chomwe Yahova adachita chomwe chionesa kuti Yahova akukondani?
10 Ko nchani chomwe chititsimikizira kuti Yahova atikonda? Ni dipo—chomwe ni chinthu chikulu cha momwe adawonesera chikondi kwa wanthu ose! (Yoh. 3:16; Aro. 5:8) Yahova adapereka mwana wake wokondewa pa kubvuma kuti afere wanthu kuti machimo yathu yakhululukiriwe nakuti tikhale azishamwali wake. (1 Yoh. 4:10) Tikambaganizira vomwe Yahova na Yesu adatichitira ndipo pomwe isepano tikwanisa kubvesa momwe iwo achakondera aliyese wa isepano. (Agal. 2:20) Dipo ilibe kundoperekewa ndawa ya chilungamo cha Yahova chokha koma idaperekewa ndawa ya chikondi chake. Yahova adawonesa chikondi kwa isepano pa kupereka chinthu chodekana maninge chomwe wenze nacho, yemwe ni Yesu. Yahova adabvuma kuti mwana wake abonere mpakana kufa ndawa ya isepano.
11. Ko tinkupfunzira chani pa Yeremiya 31:3?
11 Ninge momwe tawonera, Yahova ankuchita vinthu kuti awonese chikondi chake. (Werengani Yeremiya 31:3.) Iye adatichemerera kwa iye ndawa yakuti atikonda. (Onani Deuteronomo 7:7, 8.) Palibe chomwe chingalekanise chikondi chathu kwa iye. (Aro. 8:38, 39) Ko mudzibva tani ndawa ya chikondi cha Yahova mwechi? Naboni tikambirane lemba ya salimo msolo 23. Naboni tiwone momwe Davide adabvera ndawa yachikondi komasoti momwe Yahova ambamusamalilira na momwe imwepo mungabverembo chibodzibodzi.
KO MUDZIBVA TANI NDAWA YA CHIKONDI CHA YAHOVA?
12. Ko mungaifotokoze tani lemba ya Salimo msolo 23?
12 Werengani Salimo 23:1-6. Pa Salimo 23 Davide adawonesa chikhulupiriro chake kuti Yahova ambamukonda na kumusamalira. Iye adanena momwe ushamwali wake na Yahova wenzere ndipo adanena kuti Yahova ni Busa wake. Davide ambadzibva wotetezeka pa kubvuma kuti Yahova ambamutsogolere ndipo ambamuthemba maninge. Davide ambadziwa kuti Yahova awonese chikondi chake kwa iye nthawe zose. Ndawa chani Davide wenze na chitsimikizo mwechi?
13. Ko ndawa chani Davide ambatsimikiza kuti Yahova adzamusamalire nthawe zose?
13 ‘Palibe chomwe nidzasowe.’ Davide nthawe zose ambawona momwe Yahova amusamalilira ndipo nthawe zose wenze na vinthu vodekana pa moyo wake. Kuyingiziramwapa Davide ambadziwa kuti Yahova wenze shamwali wake ndipo ambamukonda. Ndipomwapa Davide ambadziwa kuti viribe basa vinthu vomwe vichitike kutsogolo, Yahova nthawe zose adzamusamalire. Chikhulupiriro chomwe Davide wenze nacho pa chikondi cha Yahova chenze champhanvu kuposha chinthu chilichose. Ni vimweviletu vomwe vimbachitisa Davide kukhala wokondwa.—Sal. 16:11.
14. Ko Yahova atisamalira tani?
14 Yahova atisamalira mwachikondi makamaka pomwe tinkugumana na mabvuto pa moyo wathu. Claire, a yemwe watumikira pa Beteli kwa magale 20 adakhumudwa pomwe banja yake idagumana na mabvuto yazinji. Ababa wake ambadwala matenda yozizirisa viwalo yomwe yambawafokesa maninge. M’bodzi mwa azibale wake adachosewa mumpingu, banja yawo yenze ilibe kobiri ndipo nyumba yawo idadzongeka. Ko Yahova adawasamalira tani? Claire adanena kuti: “Yahova adathandiza banja yathu kuti timbakwanise kugumana vinthu vodekana pa moyo wathu. Kazinjikazinji vomwe Yahova adatipasa venze vizinji kuposha vomwe inepano nimbadikhira. Nthawe zizinji inepano nikumbukira pa nthawe yomwe Yahova ambanisamalira pabodzi na wanthu wa m’banja yangu ndipo nidzayebwelini nthawe mweyire. Ni vimwevi vomwe vinithandiza kupitiriza kutumikira Yahova mokondwa pomwe ninkugumana na mabvuto yanango pa moyo wangu.”
15. Ndawa chani Davide adadzibva wolimbikisika? (Onani pomwe foto.)
15 ‘Iye anilimbikisa.’ Nthawe zinango Davide ambakhala wokhumudwa ndawa ya mabvuto yomwe ambalimbana nayo. (Sal. 18:4-6) Olo viri teno chikondi na chisamaliro cha Yahova ndivo vomwe vimbamulimbikisa. Venze ninge Yahova ankutenga Davide kuyenda naye ku ‘nsipu wobiriwira’ na ku ‘malo yopumulira komwe ku na madzi yabwino.’ Mwanjira mweyi Davide ambabwezeresa mphanvu zake na kupitiriza kutumikira Yahova mokondwa.—Sal. 18:28-32.
Olo pa nthawe zoshupa pa moyo wa Davide, chikondi na chisamaliro cha Yahova chidamulimbikisa (Onani ndime 15)
16. Ko chikondi cha Yahova chikulimbikisani tani?
16 Isembo ntsiku zino tikwanisa kulimbana na mabvuto ndawa ya chikondi cha Yahova, ninge momwe Baibolo ichanenera kuti: ‘Ndawa ya chikondi chokhulupirika cha Yahova tilibe kudzongewa.’ (Maliro 3:22; Akol. 1:11) Onani chitsanzo cha mulongo Rachel. Iye wenze adasowa chochita pomwe mwamuna wake adasiya kutumikira Yahova na pomwe adamusiya iye pa nthawe ya matenda ya Koronaviru. Ko Yahova adamuthandiza tani? Iye adanena kuti: “Yahova adachita vose kuti nimbadzibve kuti ndine wokondewa. Azishamwali wangu ambakhala nane nthawe ikulu, ambanibweresera vakudya, amanitumizira mamensaje, malemba yolimbikisa, ambanisekerera ndipo ambanikumbusa kuti Yahova ankunisamalira. Ninkutembeja maninge Yahova ndawa yonipasa banja yake ikulu ya chikondi mweyi.”
17. Ko ndawa chani Davide ‘ambagopalini chilichose’?
17 ‘Nidzagopelini azondi wangu ndawa yakuti imwepo muli nane.’ Azondi wa Davide wenze wamphanvu maninge ndipo maulendo yazinji moyo wake wenze pa ngozi. Olo nteno iye ambadzibva wotetezeka ndawa ya chikondi cha Yahova. Iye ambadzibva kuti Yahova wenze naye nthawe zose ndipo ni vimweviletu vomwe vimbamulimbikisa. Ndipomwapa iye adayimba kuti: ‘[Yahova] mwanipulumusa ku mabvuto yangu yose.’ (Sal. 34:4) Nthawe zinango Davide ambakhala na mantha, koma iye ambakwanisa kupirira ndawa wenze na chitsimikizo chakuti Yahova ambamukonda.
18. Ko kudziwa kuti Yahova atikonda kungatithandize tani pomwe tinamantha?
18 Ko kudziwa kuti Yahova atikonda, kutipasa tani mphanvu pomwe tinkulimbana na mabvuto? Mpainiya munango dzina yake Susi adanena momwe iye na mwamuna wake adabvera pomwe mwana wawo adadzipha. Iye adati: “Chinthu choipa chikachitika pa moyo, vimwevi viwawa maninge ndipo ukhala na mantha yakuti chinthu chinango chichitikepomwe koma chikondi cha Yahova chitichitisa kukhala otetezeka.” Rachel yemwe tamutomola kale ule adanena kuti: “Ntsiku inango usiku nenze wokhumudwa maninge ndipo nenze na nkhawa komasoti mantha. Nidalira ndipo nidapemphera mokuwa kwa Yahova. Pa nthawe ibodzibodzi mweyo inepano nidabva kuti iye wanyamalisa ntima wangu ninge mayi achachitira kwa mwana wake ndipo inepano nidakwanisa kugona. Inepano nidzayebwelini nthawe mweire.” Nkulu munango dzina yake Tasos wamala magole yanayi ali ku djeri ndawa yolamba kukhala nsocha. Ko iye adawona tani kuti Yahova amukonda komasoti kumusamalira? Iye adanena kuti: “Yahova adanipasa vose vomwe nimbadekana, vimwevi vidanichitisa kuti nimbamuthembe maninge. Podiya kuti kudjeri ni malo yokhumudwisa, Yahova adanipasa chimwemwe pakuphatisa basa mzimu uchena. Vimwevi vidanithandiza kudziwa kuti nikambamukonda maninge ndipo pomwe ningawone momwe iye achanikondera. Ndipomwapa nidayamba kutumikira ninge mpainiya wokhazikika pomwe nenze ku djeri.”
KHALANI PAFUPI NA MULUNGU WACHIKONDI
19. (a) Ko kudziwa kuti Yahova atikonda kukhudza tani vomwe tichanena mu mapemphero yathu? (b) Ko ni vesi iponi ya m’Baibolo yomwe ifotokoza chikondi cha Yahova yomwe ikukomedzani maninge? (Onani bokosi yakuti: “ Malemba yomwe yatithandiza kuona chikondi cha Yahova.”)
19 Vitsanzo vose vomwe takambirana mu nkhani mweyi vionesa kuti Yahova ‘Mulungu wachikondi’ alinase! (2 Akor. 13:11) Iye aganizira aliyese payekha. Isepano tingakhale na chitsimikiziro chakuti ndise ozunguliriwa ‘na chikondi chake chokhulupirika.’ (Sal. 32:10) Tikambaganizira momwe Yahova waonesera chikondi chake kwa isepano, tidzadzibve kuti tilinaye pafupi ndipo iye adzakhale chaiye kwa isepano. Isepano tingapemphere kwa Yahova nthawe iliyose na kumuuza momwe tinkufunira chikondi chake. Ndipo tingamuuzepomwe vomwe vinkutichitisa nkhawa na kukhala nachitsimikizo chakuti iye adzatidawire ndipo ankufunisisa kutithandiza.—Sal. 145:18, 19.
20. Ko chikondi cha Yahova chitichitisa tani kuti timufenderere?
20 Ninge momwe tichafenderera kumoto nthawe ya mphepo, isepano tinkufuna kufenderera chikondi cha Yahova. Olo kuti chikondi cha Yahova nichamphanvu maninge, icho chitilimbikisa. Ndipomwapa fungulani ntima wanu kuti mowone chikondi cha Yahova pa moyo wanu. Ndipo pakuona chikondi mwechi tose isepano tidzanene kuti: ‘Inepano nikonda Yahova.’—Sal. 116:1.
KO MUNGADAWIRE TANI?
-
Ko imwepo mungachifotokoze tani chikondi cha Yahova?
-
Ndawa chani mungakhale na chitsimikizo chakuti Yahova akukondani imwepo?
-
Ko chikondi cha Yahova chikuchitisani kudzibva chani?
NYIMBO NA. 108 Chikondi Chosatha cha Mulungu
a Madzina yanango yachinjiwa.
