Ndawa chani mwamuna yemwe Baibolo imuchemera kuti ‘Udje’ adalewa kuti ‘adakaluza’ cholowa chake adakalowolana na Rute? (Rute 4:1, 6)

Kalekale, peno mwamuna wolowola wamwalira akanati kubereka wana, pambabuka mibvunzo yanango. Mwakulinganiza: Ko nchani chidakachitika na malo yake? Ko dzina ya banja yake idakayebwewa mpaka kalekale? Chilamulo cha Mose chimbadawira mibvunzo mwaya.

Nchani chidakachitika na malo ya mwamuna peno iye wamwalira panango wagulisa ndawa ya uphawi? M’bale wake wapafupi panango wachibale munango adakagula. Kuchita vimwevi kudakachitisa kuti malo yale yapitirize kukhala ya banja mweyi.—Lev. 25:23-28; Num. 27:8-11.

Manje ko vidakatsimikizirika tani kuti dzina ya banja ya mwamuna yemwe wamwalira ipitirize kukhalapo? Vidakakwanisika ndawa yolowolana pachilamu. Ni vimwevi vidachitikira Rute. Mwamuna adakalowola nkazi wamasiye wa m’bale wake kuti abereke mwana. Mwana moyu ndiye adakatenga malo ya mwamuna womwalira ule ndipo adakapitiriza kuphatisa basa dzina ya banja yake. Mwaya yenze makonzedwe yachikondi yosamalilira nkazi wamasiye.—Deut. 25:5-7; Mat. 22:23-28.

Onani nkhani ya Naomi. Iye wenze wolowodwa na mwamuna wochemerewa kuti Elimeleki. Pomwe Elimeleki na wana wake awiri padamwalira, Naomi adasala alibe munthu womusamalira. (Rute 1:1-5) Pomwe Naomi adabwerera ku Yuda, iye adauza mpongozi wake Rute kuti akumbire Boazi kuti agule cholowa na kubwezeresa malo. Boazi wenze wachibale wa Elimeleki. (Rute 2:1, 19, 20; 3:1-4) Koma Boazi adakumbukira kuti penze mwamuna munango yemwe Baibolo imuchemera kuti ‘Udje’ yemwe wenze wachibale wapafupi maninge. Vimwevi vingatanthauza kuti iye ndiye wenze woyenerera kugula malo.—Rute 3:9, 12, 13.

Pakuyamba, ‘Udje’ wenze wokonzeka kuthandiza. (Rute 4:1-4) Podiya kuti vimwevi vidakaphatanidzapo kuphatisa basa vinthu vake vinango, iye adazindikira kuti Naomi adakaberekalini mwana yemwe adakatenga malo ya Elimeleki. Malo mwayo yadakapitiriza kukhala ya Udje, ndipo vimwevi vimbawoneka ninge wasalula bwino.

Koma Udje adachinja maganizo yake padazindikira kuti angadekana kulowolana na Rute. Iye adati: ‘Nikwaniselini kumuwombola ndawa ningadzonge cholowa changu.’ (Rute 4:5, 6) Ndawa chani iye adachinja nzeru?

Peno Udje panango mwamuna munango adakalowolana na Rute ndipo iwo nkubereka mwana, mwana muyo adakatenga malo ya Elimeleki. Koma ko vimwevi ‘vidakadzonga’ tani ‘cholowa’ cha Udje? Baibolo ilewalini chilichose, koma tingaganizireko mu njira zinango.

• Choyamba, iye adakaluza kobiri pakugula malo ya Elimeleki ndipo ntsiku inango malo mwayo yadakadzakhala ya mwana wa Rute.

• Chachiwiri, iye adakakhala na udindo wosamalira Naomi na Rute.

• Chachitatu, peno Rute adakakhala na wana anango na Udje, wana mwawo adakakhala na udindo wotenga malo ya Udje pabodzi na wana anango womwe iye wenze nawo kale.

• Chachinayi, peno Udje wenze akalibe mwana , mwana yemwe adakabereka na Rute adakakhala na udindo wotenga cholowa chake na cha Elimeleki. Peno adakati Udje wamwalira cholowa chake chidakakhala cha mwana yemwe adakachemerewalini na dzina yake koma na dzina ya Elimeleki. Udje wenzelini wokonzeka kudzonga vinthu vake na kuluza cholowa chake kuti athandize Naomi. Iye adawona kuti vingakhale bwino kuti wachibale wake yemwe ni Boazi, atenge udindo moyu. Ndipo Boazi adachitadi vimwevi ndawa iye ambafuna ‘kubwezeresa dzina ya Elimeleki na cholowa chake.’—Rute 4:10.

Vinkuwoneka kuti Udje ambafuna kuteteza maninge dzina yake na cholowa chake. Iye wenze wodzikonda maninge. Udje ambafuna kuteteza maninge dzina yake, koma vidachitika mosiyana maninge. Ntsiku zino, palibe yemwe ankudziwa kuti munthu moyu ambachemerewa kuti mbani. Iye adaluza pomwe mwayi ukulu wapadera womwe udaperekewa kwa Boazi ndipo adadzakhala mu ndandanda wa azibereki wa Mesiya Yesu Khrisitu. Nkhani mweyi inkuwonesa kuti kwa wale womwe ni odzikonda ndipo afunalini kuthandiza anango, mapeto yawo yakhala yobvesa ntsisi maninge!—Mat. 1:5; Luka 3:23, 32.