1-2. Peno imwepo mukanati kukonzeka kuti mubatizike, ndawa chani muchadekanalini kukhumudwa? (Onani foto ya pakhava.)

 PENO imwepo munkuganiza vakuti mubatizike, viribwino. Ndipo chimwechi ni chinthu chabwino maninge. Ko munkuwona kuti imwepo ndimwe wokonzeka kuti mubatizike? Peno munkudawira kuti inde ndipo akulu abverana navo, chitani vimwevi mwakankulumize. Mungakhale wotsimikiza kuti mukachita vimwevo mudzakhale na moyo wokondwa pakutumikira Yahova.

² Manje tani peno akulu akuuzani kuti muchadekana kuchinja vinthu vinango mukanati kubatizika? Panango imwepo mwekha mwazindikira ko mungachite chani kuti muchinje? Vikakhala teno, ayi kukhumudwa. Imwepo mungachinje mpakana kufika pakubatizika, viribe basa kuti muna magole yangasi.

3. Ko munthu wa ku Itiyopiya adamubvunza chani Filipo, ndipo vimwevi vinkutipasa mbvunzo uponi? (Machitidwe 8:36, 38)

³ Lewengani Machitidwe 8:36, 38. Munthu munango wophata basa m’boma ya Itiyopiya adabvunza mlaliki Filipo kuti: ‘Ko n’chani chikunikangisa kubatizika?’ Mwamuna moyu wa ku Itiyopiya ambafunadi kubatizika, koma ko manje iye wenze wokonzekadi kubatizika?

4. Ko munthu wa ku Itiyopiya adawonesa tani kuti wenze wotsimikiza kupfunzira vizinji?

⁴ Munthu wa ku Itiyopiya ‘wenze adayenda ku Yerusalemu kukatumikira Mulungu.’ (Mac. 8:27) Vimwevi vinkuwoneseratu kuti iye wenze adabvuma chipembedzo cha Ayuda. Ndawa yopfunzira Malemba ya Chiheberi iye wenze adapfunzira vinthu vizinji va Yahova. Koma iye ambafuna kupfunzira vizinji basi. Nishuwadi kuti pomwe  Filipo adagumana na mwamuna moyu mu msewu, iye angawerenga mpukutu wa mneneri Yesaya wolewa va Ulosi. (Mac. 8:28) Maulosi mwaya yenze choonadi cha m’Baibolo. Ndipomwapa, mwamuna moyu wa ku Itiyopiya ambandofunalini kudziwa vinthu voyambirira va m’Malemba, koma ambafuna kupfunzira vizinji.

5. Ndawa chani munthu wa ku Itiyopiya moyu adaphatisa basa vomwe angapfunzira?

⁵ Mwamuna moyu wa ku Itiyopiya wenze na udindo wolemekezeka maninge kwa Mpfumukazi ya ku Itiyopiya, iye ‘wenze wonyang’anira chuma chake chose.’ (Mac. 8:27) Ndipomwapa, mwamuna moyu wenze wotangwanika maninge na maudindo yazinji. Koma olo nteno, iye ambapatula nthawe yake kuti atumikire Yahova. Iye ambafuna kuchita vizinji osati kundopfunzira choonadi basi, koma ambafuna kuphatisa basa vomwe angapfunzira. Iye adachita ulendo utali maninge wochoka ku Itiyopiya kuyenda ku Yerusalemu kuti akatumikire Yahova ku kachisi. Umoyu wenzelini ulendo ung’ono ndipo vimwevi vinkuwoneseratu kuti adadzonga vinthu vizinji pa ulendo moyu. Koma mwamuna moyu ambafuna maninge kutumikira Yahova ndipo wenze alibe basa na vinthu vomwe wadzonga.

6-7. Ko chikondi chomwe munthu wa ku Itiyopiya wenze nacho chidathimizirika tani?

⁶ Filipo adamupfunzisa mpfundo za choonadi munthu moyu wa ku Itiyopiya, kuphatanidzapo kuti Mesiya wenze mbani. (Mac. 8:34, 35) Mwamuna moyu adakhala wokondwa maninge pakudziwa va ntsembe ya Yesu nakuti vikutanthauza chani kwa iye. Ko manje iye adachita chani padapfunzira vinthu vimwevi? Mwamuna moyu wenze wolemekezeka maninge mu chipembedzo cha Chiyuda ndipo adakandopitiriza kukhala teno. Koma m’malo mwake, chikondi chake kwa Yahova na Yesu chidakula maninge. Iye wenze wotsimikiza kuchinja maninge moyo wake nkubatizika kukhala wopfunzira wa Yesu Khrisitu. Filipo adazindikira kuti mwamuna moyu wa ku Itiyopiya wenze wokonzeka ndipo adamubatiza.

⁷ Imwembo mungakwanise kubatizika, mukatewedzera mwamuna wa ku Itiyopiya. Mungakhalembo wotsimikiza ninge momwe mwamuna moyu wenzere wotsimikiza pakudzibvunza kuti, ‘ko nchani chinkunikangisa kuti nibatizike?’ Tiwone vomwe imwepo mungachite pa vomwe mwamuna moyu wa ku Itiyopiya adachita. Vomwe ni kupitiriza kupfunzira, kuphatisa basa vomwe munkupfunzira na kupitiriza kuingizira chikondi chanu kwa Yahova.

8. Ko lemba ya Yohane 17:3, ilewa kuti isepano tichadekana kuchita chani?

⁸ Lewengani Yohane 17:3. Ko mawu mwaya ya Yesu yakuthandizani kufuna kupfunzira Baibolo? Vimwevi ndivo vidachitikira azinji ise. Koma ko mawu mwaya yachatilimbikisambo kuti timbapitirize kupfunzira? Inde. Isepano tidzasiyelini ‘kupfunzira na kudziwa . . . va Mulungu m’bodzi chaiye.’ (Mla. 3:11) Isepano tipitirize kupfunzira  va Yahova mpakana kalekale. Tikambapitiriza kupfunzira va iye, tikhala naye paushamwali wolimba maninge.—Sal. 73:28.

9. Pomwe tapfunzira mpfundo zoyambirira za m’Baibolo, ko tichadekana kuchita chani?

⁹ Nishuwadi kuti tikayamba kupfunzira va Yahova, tiyamba kupfunzira mpfundo zoyambirira za m’Baibolo. Nkalata mweyi yoyenda kwa Aheberi, mtumi Paulo adalewa kuti mpfundo zoyambirira mwizi zili ninge ‘chakudya.’ Iye ambatanthauzalini kuti vinthu vimwevi vilibe basa, m’malo mwake iye adawonesa kuti vili ninge ‘nkaka’ womwe mwana ayamwa. (Aheb. 5:12; 6:1) Ndipomwapa, iye adauza Akhrisitu kuti ambapfunzire vinthu vizinji va m’Mawu ya Mulungu, osati mpfundo zoyambirira chabe. Nishuwadi kuti imwepo mukonda kupfunzira mpfundo zoyambirira za m’Baibolo. Koma ko imwepo ndimwe wokonzeka kupitiriza kuchita vizinji na kupfunzira va Yahova pakuchita chifuniro chake?

10. Ndawa chani anango awona kuti ni voshupa kupfunzira?

¹⁰ Kwa azinji ise, kupfunzira ninkhani ikulu maninge. Manje tani kwa imwepo? Ko imwepo venze vosashupa kupfunzira vinthu ndipo mungakonda kupfunzira? Ko panango penze vinthu vinango vokushupani ndipo munkuganiza kuti manjeuno mungakwaniselini kuvipfunzira? Azinji aganiza tene. Koma Yahova angakuthandizeni. Iye ni wangwiro ndipo ni Mpfunzisi wabwino maninge kuposha aliyese.

11. Ko Yahova awonesa tani kuti ni ‘Mpfunzisi Nkulu’?

¹¹ Yahova chaiye adalewa kuti: ‘Iye ni Mpfunzisi wanu Nkulu.’ (Yes. 30:20, 21) Iye ni Mpfunzisi wodekha, wokoma ntima na wobvesesa. Iye awona vabwino mwa opfunzira wake. (Sal. 130:3) Iye adikhiralini kuti tichite vomwe tingakwaniselini. Kumbukirani kuti iye ndiye adakonza ulupi wanu womwe ni mphaso yodabwisa. (Sal. 139:14) Mwachibadwa tose tinachifuno chopfunzira vinthu vizinji vinyowani. Mulengi wathu afuna kuti tipitirize kupfunzira mpaka kalekale ndipo afuna kuti timbakondwe maninge. Ndipomwapa, kuyambira manjeuno ni vanzeru kuti ‘tipitirize kupfunzira’ choonadi cha m’Baibolo. (1 Pet. 2:2) Sankhulani volinga vinango vomwe munkufuna kuvikwanirisa ndipo mbawerengani Baibolo ntsiku iliyose. (Yos. 1:8) Nathandizo ya Yahova, imwepo mudzayambe kukonda maninge kuwerenga Baibolo, mabukhu yathu na kuganizira vomwe mwawerenga.

12. Ndawa chani ni vodekana kupfunzira va moyo na utumiki wa Yesu?

¹² Ntsiku zose mumbapatule nthawe yoganizira moyo na utumuki wa Yesu. Peno tinkufuna kutumikira Yahova munjira yobvumizika, tichadekana kutewedzera chitsanzo cha Yesu makamaka nthawe zoshupa zino. (1 Pet. 2:21) Yesu adachita vinthu mwachilungamo pakuuza opfunzira wake kuti adzagumane na mabvuto. (Luka 14:27, 28) Olo viri teno, iye wenze wotsimikiza kuti opfunzira wake adzapitirize kukhala okhulupirika kwa Yahova ninge iye. (Yoh. 16:33) Pfunzirani mokwana va moyo wa Yesu na kusalula mpfundo zinango zomwe mungakonde kuzitewedza ntsiku na ntsiku.

13. Ko tichadekana kumukumbira chani Yahova, ndipo ndawa chani?

¹³ Nishuwadi kuti kudziwa vinthu ni kodekana, koma ni voselini. Kudziwa vinthu kungakuthandizeni kupfunzira vizinji va Yahova na kukulisa chikondi chathu kwa iye. (1 Akor. 8:1-3) Pomwe munkupfunzira va Yahova, mukumbireni kuti akuthandizeni kuti mulimbise chikhulupiriro. (Luka 17:5) Iye nthawe zose adawira mapemphero mwaya. Peno imwepo munachikhulupiriro cholimba kuchokera pa vomwe munkupfunzira va Yahova, mungakwanise kuphatisa basa vomwe munkupfunzira.—Yak. 2:26.

14. Ko mtumi Petulo adawonesa tani kuti ni vodekana maninge kuphatisa basa vomwe tinkupfunzira? (Onani pomwe foto.)

¹⁴ Pakuphatisa basa chitsanzo cha Nowa, mtumi Petulo adawonesa kuti ni vodekana maninge kupitiriza kuphatisa basa vomwe tinkupfunzira.  Yahova adauza Nowa kuti abwerese chigumula kudzonga wanthu oipa womwe enzepo panthawe mwaire. Kundodziwa chabe kuti adzabwerese chigumula kwenze kosakwana kuti Nowa na banja yake apulumuke. Molingana na vimwevi, ni vopasa chidwi kuwona kuti Petulo adaphatisa basa mawu yakuti, ‘pomwe chingalawa chingamangiwa,’ kutanthauza nthawe yomwe chigumula chikanati kuchitika. (1 Pet. 3:20) Vimwevi vinkuwonesa kuti Nowa na banja yake adachita mobverana na vomwe Mulungu adawauza nkumanga chingalawa. (Aheb. 11:7) Petulo ambalinganiza vomwe Nowa adachita na ubatizo. Iye adati: ‘Molingana na chingalawa, ubatizo unkupulumusambo imwepo.’ (1 Pet. 3:21) Manjeuno tingalinganize kuyesesa komwe imwepo munkuchita kuti mukonzekere kubatizika na kuyesesa komwe Nowa na banja yake adachita kwa magole yazinji kuti amange chingalawa. Ko imwepo muchadekana kuyesesa kuchita chani kuti mubatizike?

15. Ko imwepo mungawonese tani kuti mwalapadi?

¹⁵ Chinthu choyamba chomwe tichadekana kuchita, ni kulapa machimo yathu kuchokera pasi pa moyo. (Mac. 2:37, 38) Tikwanisa kuchinja vinthu voipa nkuchita vabwino peno talapadi. Ko imwepo mwasiya vinthu vomwe vimukondweresalini Yahova, ninge khalidwe ya chigololo, kupepa na kuphatisa basa mawu yoipa? (1 Akor. 6:9, 10; 2 Akor. 7:1; Aef. 4:29) Peno imwepo mukanati kusiya makhalidwe yoipa mwaya, ayi kufoka pitirizani kuyesayesa. Yankhulani na munthu yemwe ankukupfunzisani Baibolo panango kumbirani akulu mu mpingu kuti akuthandizeni. Peno imwepo ndimwe wachilumbwana ndipo munkukhala pabodzi na azibereki wanu, akumbireni kuti akuthandizeni kusiya vizolowezi vilivose voipa vomwe vinkukukangisani kuti mubatizike.

16. Ko ndandanda yabwino yochitira vinthu vauzimu iphatanidzapo chani?

¹⁶ Chinthu chinango chodekana maninge, ni kukhala na ndandanda yabwino yochitira vinthu vauzimu. Vimwevi vikuphatanidzapo kugumanika pa misonkhano na kupereka ndemanga. (Aheb. 10:24, 25) Peno mwayambambo kulalikira, mbachitani vimwevo nthawe zose. Mukapitiriza kuphata basa mweyi, mudzayambe kuikonda maninge. (2 Tim. 4:5) Peno imwepo ndimwe mulumbwana ndipo mukhala pabodzi na azibereki wanu, dzibvunzeni kuti: ‘Ko nthawe zose nindodikhira kuti azibereki wangu ambanikumbuse kuti niyende ku misonkhano na mu umboni? Panango inepano nichita vimwivo nekha?’ Peno muchita vimwevo, muwonesa kuti mukhulupirira na  kukonda Yahova ndipo mutembeja vinthu vose vomwe Yahova wakuchitirani. Ninge momwe Baibolo ichanenera imwepo muchita vinthu vowonesa kuti ‘mudadzipereka kwa Mulungu,’ mu mawu yanango tingalewe kuti mukhala ninge munkupereka mphaso kwa Yahova. (2 Pet. 3:11; Aheb. 13:15) Vose vomwe muchapereka kwa Yahova na moyo wanu wose na kufuna kwanu kose, ni chinthu chomwe chikondweresa Yahova. (Linganizani na 2 Akorinto 9:7.) Isepano tikhala okondwa maninge tikapereka vomwe tingakwanise kwa Yahova.

17-18. Ko ni chinthu chodekana chiponi chomwe chidzakuthandizeni kuti mufikane pakubatizika, ndipo ndawa chani? (Miyambo 3:3-6)

¹⁷ Pakukonzekera kuti mubatizike, mugumane na mabvuto yanango. Wanthu anango angakunyozeni ndawa ya vomwe muchakhulupirira ndipo anango adzakuzondeni. (2 Tim. 3:12) Kuingizira pamwapa, vingachitike kuti imwepo mwachita pomwe chizolowezi choipa chomwe mwakhala munkulimbana nacho panango mungakhumudwe nkuwona kuti mukwaniselini pomwe volinga vemwenze navo. Pavochitika vimwevi, ko n’chani chomwe chingakuthandizeni kuti muleke kufoka? Chinthu chodekana maninge, ni chikondi chanu kwa Yahova.

¹⁸ Chikondi chomwe munacho kwa Yahova, ni chinthu chapadera maninge. (Lewengani Miyambo 3:3-6.) Mukambakondadi Yahova, adzakuthandizeni kupitiriza kumutumikira podiya mugumane na mabvuto yotani. Maulendo yazinji Baibolo ifotokoza chikondi chomwe Yahova ali nacho kwa atumiki wake. Vimwevi vikutanthauza kuti Yahova adzasiyelini kukonda atumiki wake. (Sal. 100:5) Kumbukirani kuti imwepo mudalengewa mu chifaniziro cha Mulungu. (Gen. 1:26) Manje imwepo mungawonese tani chikondi chaicho?

19. Ko imwepo mungawonese tani kuti mutembeja pa vose vomwe Yahova wakuchitirani? (Agalatiya 2:20)

¹⁹ Chinthu choyamba kuti tiwonese chikondi chaicho, ni kukhala wotembeja. (1 Ates. 5:18) Ntsiku iliyose dzibvunzeni kuti: ‘Ko Yahova awonesa tani kuti anikonda?’ Mukambapemphera kwa Yahova, tomolani sitiriti vinthu vinango vomwe iye wakuchitirani. Yahova akukondani ndipo iye akuchitirani vinthu vapadera maninge imwepo. Yesani kuona vinthu vimwevi ninge momwe mtumi Paulo adachitira. (Lewengani Agalatiya 2:20.) Dzibvunzeni kuti: ‘Ko niwonesa Yahova kuti nimukondambo?’ Chikondi chomwe munacho kwa Yahova ndicho chidzakuthandizeni kupirira mayesero na mabvuto yamungagumane nayo. Chikondi chimwechi ndicho chidzakuthandizeni kupitiriza kutewedza ndandanda yanu yochitira  vinthu vauzimu na kuwonesa Yahova kuti mumukonda ntsiku zose.

20. Ko kudzipereka kwa Yahova kuphatanidzapo chani, ndipo ko kuchita vimwevi nikodekana?

²⁰ Nkuyenda kwanthawe, chikondi chomwe munacho kwa Yahova chidzakuchitiseni kuti mupereke pemphero yapadera kwa iye. M’pemphero mweyi imwepo mudzadzipereke kwa Yahova. Ninge mtumiki wodzipereka wa Yahova, imwepo munachidikhiro chapadera maninge cha kumutumikira mpaka kalekale. Pakudzipereka kwa Yahova imwepo mumupolomisa kuti mumbamutumukire pa nthawe yabwino olo pa nthawe yoshupa. Kudzipereka ni polomisi yomwe imwepo muichita kabodzi pamoyo wanu wose. Nishuwadi kuti chimwechi ni chinthu chodekana maninge chomwe mudzasankhule pamoyo wanu. Manje ganizirani kuti pa vinthu vose vomwe mudasankhula pamoyo wanu, kupereka moyo wanu kwa Yahova ndicho chodekana maninge kuposha vose. (Sal. 50:14) Satana adzayesese kufokesa chikondi chanu kwa Yahova. Ndipo Satana afuna kuti musiye kukhala wokhulupirika kwa Yahova. Koma ayi kubvuma vimwevi! (Yobu 27:5) Peno imwepo mukondadi Yahova na moyo wose, mudzakwanise kukwanirisa polomisi yanu yamudachita pakudzipereka ndipo mudzakhale paushamwali wolimba na Ababa wanu wakudzulu Yahova.

21. Ndawa chani ubatizo ni mapetolini koma chiyambi?

²¹ Pambuyo pakuti mwadzipereka kwa Yahova, chezani na akulu wa mu mpingu mwanu kuti mukwanise kuchita volinga vinango. Koma nthawe zose mumbakumbukire kuti ubatizo ni mapetolini ya vinthu, koma ni chiyambi. Kundoyambira nthawe mweyi imwepo mudzayambe kutumikira Yahova mpaka kalekale. Ndipomwapa, limbisani chikondi chanu kwa Yahova ndipo dziikhireni cholinga kuti chikondi chanu chipitirize kukula nthawe zose. Mukachita vimwevi vidzakuthandizeni kuti mubatizike ndipo idzakhale ntsiku yapadera pamoyo wanu. Koma mumbakumbukire kuti chimwechi ni chiyambi chabe, tinkudikhira kuti chikondi chomwe imwepo munacho kwa Yahova na Mwana wake chipitirize kukula mpaka kalekale!