1-2. Ko pantsiku ya ubatizo muchawona chiyani, ndipo mufunika kuganizira chani?

 KO IMWEPO mudawonako kale gulu ya wanthu odzipereka ankubatizika pa nsonkhano wadera panango wachigawo? Imwepo mudabva ankudawira na mawu yawo motsimikiza pa mibvunzo yawiri akanati kubatizika. Mudawona azibale na azishamwali wawo ankukondwa maninge. Ndipo pomwe iwo ankuvuuka m’madzi azibale wawo ankumenya m’manja na kumwetulira. yufghNdipo sondo iliyose, wanthu azinji ankudzipereka na kubatizika kukhala wa Mboni za Yahova.

² Peno imwepo munkuganiza vakuti mubatizike, dziwani kuti ndimwe munthu wodekana maninge kwa Yahova mudziko ya m’dima iyi ndipo ‘mukufagafaga Yahova.’ (Sal. 14:1, 2) Peno ndimwe wa chilumbwana panango wachikulire, dziwani kuti nkhani mweyi yakonzerewa imwepo ndipo peno mudabatizika kale nkhani mweyi ikunthandizeni kuti mupitirize kutumikira Yahova mpakana kalekale. Tikambirane vifukwa vitatu vomwe vitichitisa kutumikira Yahova.

3. Ndawa chani atumiki wa Mulungu akonda choonadi na chilungamo? (Salimo 119:128, 163)

³ Yahova adauza wanthu wake kuti ‘ambakonde choonadi.’ (Zek. 8:19) Ndipo Yesu adalimbikisa opfunzira wake kuti ambakonde chilungamo. (Mat. 5:6) Vimwevi vinkutanthauza kuti tichadekana kumbakonda vinthu vabwino na vachilungamo. Ko imwepo mukonda choonadi na chilungamo? Tinashuwa kuti mukonda. Muzonda mabodza na vinthu vose voipa. (Lewengani Salimo 119:128, 163.) Munthu yemwe akonda kunama, atewedzera Satana yemwe ndiye ankutonga dziko ino. (Yoh. 8:44; 12:31) Cholinga chibodzi cha Satana, ni kupsipiza dzina ya Yahova.  Kundoyambira pomwe adapanduka m’munda wa Edeni, Satana wakhala ankumwaza mabodza yolewa Mulungu. Iye achitisa wanthu kuganiza kuti Yahova ni Wolamulira woipa, wodzikuza ndipo amana wanthu wake vinthu vabwino. (Gen. 3:1, 4, 5) Mabodza yomwe Satana wakhala ankufalisa, yasokoneza wanthu azinji. Peno wanthu ‘akondalini chilungamo,’ Satana awachitisa kuti ambakonde vinthu virivose vopia.—Aro. 1:25-31.

4. Ko Yahova adachita chani pakuwonesa kuti ni ‘Mulungu wachilungamo’? (Onani pomwe foto.)

⁴ Yahova ni ‘Mulungu wa choonadi,’ ndipomwapa iye awapfunzisa choonadi wose womwe achamukonda. (Sal. 31:5) Akambachita vimwevi, iye awathandiza kuti osati ambanamiziwe na mabodza ya Satana. Yahova apfunzisa pomwe atumiki wake kuti ambachite vinthu mwachilungamo. Vimwevi vithandiza atumiki wa Yahova kukhala na ntendere na kudzibva kuti akondewa. (Miy. 13:5, 6) Ko imwepo mukambapfunzira Baibolo pamwekha mukwanisa kuwona na kutsimikizira kuti Yahova akukondanidi? Imwepo mudziwa kuti Yahova achita vinthu munjira yakuti aphindulise wanthu wose kuphatanidzapo imwepo. (Sal. 77:13) Ndipomwapa mufuna kuchita vinthu vachilungamo vomwe Mulungu ankutiuza. (Mat. 6:33) Imwepo mufuna kuikhira kumbuyo choonadi na kuwonesa kuti vose vomwe Satana adalewa ni mabodza yonamizira Mulungu. Ko imwepo mungachite tani vimwevi?

5. Ko imwepo mungawonese tani kuti mukonda choonadi na chilungamo?

⁵ Mwamuchachitira vinthu vingawoneseretu kwa wose kuti imwepo ‘mutsutsa mabodza ya Satana ndipo muikhira kumbuyo choonadi. Mungawonese kuti mufuna kutongewa na Yahova na kuchita vinthu vomwe ni vabwino.’ Manje ko imwepo mungachite tani vimwevo? Mungachite vimwevo mwa kupereka pemphero kwa Yahova nkumupolomisa kuti muchada kumutumikira mpaka kalekale na kuwonesa kwa wose pakubatizika. Kukonda choonadi na chilungamo ndiko kungakuthandizeni kuti mubatizike.

6. Ko pa Salimo 45:4 tigumanapo chifukwa chiponi chotichitisa kukonda Yesu Khrisitu?

⁶ Ndawa chani imwepo mukonda Yesu Khrisitu? Pa Salimo 45:4 tigumanapo vifukwa vabwino votichitisa kumukonda Yesu. (Lewengani.) Yesu akonda choonadi ndipo ni wodzichepesa na wachilungamo. Ni vodziwikiratu kuti imwembo mukonda Yesu. Iye adaikhira kumbuyo choonadi na chilungamo. (Yoh. 18:37) Ko Yesu adawonesa tani kuti ni wodzichepesa?

7. Ko imwepo nchani chakukomedzani mukaganizira kudzichepesa kwa Yesu?

⁷ Yesu adapereka chitsanzo chotithandiza kukhala odzichepesa. Iye nthawe zose ambapereka ulemelero wose kwa Ababa wake osati kwa iye. (Maliko 10:17, 18; Yoh. 5:19) Ko imwepo mukubva tani mukaganizira chitsanzo cha Yesu chodzichepesa? Vimwevi vichitisa kuti mumbamukonde na kumutewedzera. Manje ndawa chani Yesu ni wodzichepesa? Ni ndawa yakuti Yahova ni wodzichepesa ndipo Yesu awakonda Ababa wake na kutewedzera chitsanzo chawo. (Sal. 18:35; Aheb. 1:3) Vimwevi vidzakuthandizeni kukonda Yesu na Ababa wake na kutewedzera chitsanzo chawo.

8. Ndawa chani tikonda Yesu ninge Mpfumu yathu?

⁸ Isepano timukonda Yesu ndawa yakuti iye ni Mpfumu yabwino. Yahova ndiye adapfunzisa Yesu na kumuikha kuti akhale Mpfumu. (Yes. 50:4, 5) Yesu adadzimana vinthu vizinji pakuwonesa kuti atikonda. (Yoh. 13:1) Tichadekana kukonda Yesu ninge Mpfumu yathu. Iye adafotokoza kuti wanthu omwe amukonda awawona kuti ni azishamwali wake chaiwo ndipo azishamwali wake mwawa, awonesa kuti amukonda pa kubvera na kutewedza malamulo yake. (Yoh. 14:15; 15:14, 15) Nimwayi ukulu maninge kukhala pa ushamwali na Mwana wa Mulungu!

9. Ko ubatizo wathu ulingana tani na wa Yesu?

⁹ Ibodzi mwa malamulo ya Yesu ni yakuti opfunzira wake achadekana kubatizika. (Mat. 28:19, 20) Ndipo iye chaiye adapereka chitsanzo. Ni shuwadi kuti ubatizo wa Yesu ni wosiyana na wa opfunzira wake munjira zinango. (Onani bokosi yakuti, “ Momwe ubatizo wa Yesu na wa ateweri wake uchasiyanirana.”) Olo viri teno, maubatizo yose mwaya yawiri yanachinthu chibodzi cholingana. Pomwe Yesu adabatizika, adawonesa kuti ankufuna kuchita chifuniro cha Ababa wake. (Aheb. 10:7) Chibodzibodzimbo, isepano pakubatizika tiwonesa kwa wose kuti tapereka moyo wathu kwa Yahova. Kundoyambira panthawe mweyi tiwona kuti chinthu chodekana maninge pa moyo wathu ni kuchita chifuniro cha Mulungu, osati chathu. Tikachita teno, tiwonesa kuti tinkutewedza chitsanzo cha Yesu.

10. Nchani chomwe chingakulimbikiseni kuti mubatiziwe?

¹⁰ Ganizirani vomwe munkudziwa, imwepo munkudziwa kuti Yesu ni Mwana wobadwa yekha wa Mulungu ndipo adasaluliwa kuti adzatonge ninge Mpfumu padziko yose yapasi. Imwepo muwona pomwe kuti Yesu atewedza ndendende kudzichepesa kwa Ababa wake. Ndipo mudapfunzira kuti Yesu adadyesa womwe enze na njala, adalimbikisa ofoka mpakana adapolesa odwala. (Mat. 14:14-21) Imwepo munkukwanisa kuwona momwe Yesu ankutsogolerera mu mpingu ntsiku zino. (Mat. 23:10) Ndipo munkudziwa kuti ninge Mpfumu ya Ufumu wa Mulungu iye adzachite vizinji kutsogolo. Manje mukaganizira vose mwevi, ko imwepo mungawonese tani kuti mukonda Yesu? Mungawonese kuti mumukonda pakutewedzera chitsanzo chake. (Yoh. 14:21) Ndipo chinthu choyamba chomwe imwepo mungachite ni kudzipereka kwa Yahova na kubatizika.

11. Ko ni chifukwa chibodzi chiponi chodekana chotichitisa kubatizika, ndipo ndawa chani?

¹¹ Ko ni chifukwa chibodzi chiponi chomwe chitichitisa kuti tibatizike? Yesu adapereka mdawiro pomwe adalewa va lamulo ikulu ya Mulungu yomwe adapereka. Iye adati: ‘Umbakonde Yahova na ntima wako wose, na moyo wako wose, maganizo yako yose na mphanvu zako zose.’ (Maliko 12:30) Ko imwepo muwona kuti mukonda Yahova mwanjira mweyi?

12. Ndawa chani imwepo mukonda Yahova? (Onani pomwe foto.)

¹² Pali vifukwa vizinji votichitisa kukonda Yahova. Mwakulinganiza, imwepo mudapfunzira kuti iye ‘ni Ntsantsa ya moyo’ nakuti ‘mphaso  iliyose yabwino na yangwiro ichokera kwa Mulungu.’ (Sal. 36:9; Yak. 1:17) Ndipo Yahova yemwe ni wopasa na wachikondi, adakupasani vose vodekana pamoyo wanu.

13. Ndawa chani ntsembe ya Yesu ni mphaso yofunika maninge?

¹³ Ntsembe ya Yasu ni mphaso yapadera yomwe Yahova adatipasa. Ndipo tinavifukwa vobveka volewera vimwevi. Mwakulinganiza, ko imwepo mudaganiza kale momwe Yesu na Yahova alili obverana? Yesu adati: ‘Ababa anikonda’ ndipo ‘inembo niwakonda.’ (Yoh. 10:17; 14:31) Yahova na Yesu adakhala magole yazinji ali pabodzi ndipomwapa iwo abverana maninge. (Miy. 8:22, 23, 30) Manje ndoganizani momwe vidamuwawira Yahova padabvuma kuti Mwana wake adzudzike mpakana kuphewa. Yahova adabvuma kuti Mwana wake adzudzike mpakana kuphewa kuti tidzagumane moyo wosapera. Vose vimwevi vinkuwoneseratu kuti Yahova akonda wanthu wose kuphatanidzapo imwepo. (Yoh. 3:16; Agal. 2:20) Pakuti Yahova adatiwombola, tinachifukwa chobveka chomukondera.

14. Ko ni cholinga chiponi chodekana maninge pamoyo wanu?

¹⁴ Pamungapfunzira va Yahova, mudayamba kumukonda maninge. Ndipo ni vodziwikiratu kuti imwepo mufuna kupitiriza kukhala naye pa ushamwali mpaka kalekale. Vimwevi ni vokwanisika ndipo Yahova achada kuti imwepo mupitirize kukondweresa ntima wake. (Miy. 23:15,  16) Mungachite vimwevo osati na mawu yanu yokha, koma na vochita vanu. Ndipomwapa vomwe muchachita pamoyo wanu viwoneseratu kuti mumukonda Yahova. (1 Yoh. 5:3) Chimwichi ni cholinga chibodzi chodekana pamoyo wanu.

15. Ko imwepo mungawonese tani kuti mukonda Yahova?

¹⁵ Ko imwepo mungawonese tani kuti mukonda Yahova? Choyamba, chitani pemphero yapadera kwa Yahova yakumupolomisa kuti mudzamutumikire. (Sal. 40:8) Ndipo kwanirisani vomwe mudamupolomisa mwakubatizika pagulu. Ninge mwatawonera munkhani ino, ubatizo ni wodekana maninge pamoyo wathu. Ndipo mungakhale na chiyambi cha moyo unyowani pakuchita chifuniro cha Yahova, osati chanu. (Aro. 14:8; 1 Pet. 4:1, 2) Chimwechi chingawoneke ninge kuti ni cholinga chikulu maninge. Ndipo ni cholingadi chikulu. Koma cholinga chimwechi chifungula njira ya moyo wabwino maninge kuposha uliwose. Ndawa chani viri teno?

16. Mobverana na Salimo 41:12, ko Yahova adzadalise tani wanthu womwe adzipereka kwa iye?

¹⁶ Yahova ni Mulungu yemwe apereka mosaumira ndipo palibe angalingane naye. Yahova atichitira vizinji maninge kuposha vomwe isepano timuchitira pakumutumikira. (Maliko 10:29, 30) Iye adzakupaseni moyo wabwino maninge kuposha moyo womwe ulipo podiya mudziko ino yomwe yasala pang’ono kumala. Kumuku ni kuyamba basi. Moyo womwe mudzakhale nawo pambuyo pakuti mwabatizika, ni wabwino maninge ndipo vidzakuthandizeni kuti mutumikire Ababa wanu Yahova mpakana kalekale. Ushamwali wanu na Yahova udzapitirize kukula ndipo imwepo mudzakhale na moyo wosapera pabodzi na iye mpakana kalekale.—Lewengani Salimo 41:12.

17. Ko imwepo mungamupase chani Yahova chomwe iye alibe?

¹⁷ Imwepo mukadzipereka kwa Yahova na kubatizika, mukhala na mwayi womupasa chinthu chodeka maninge. Vinthu vose vabwino na kukondwa kwamwakhala nako, ni mphaso zochokera kwa Yahova. Mochinjana, imwepo mungamupase Yahova Mulengi wa kudzulu na dziko yapasi chinthu chomwe iye alibe. Chinthu chimwechi ni kukhala wokhulupirika kwa iye na kumutumikira na moyo wose. (Yobu 1:8; 41:11;  Miy. 27:11) Imwiyi ni njira ibodzi yophatisira basa bwino moyo wanu. Mosakaikira, chikondi chomwe munacho kwa Yahova, ni chifukwa chibodzi chokuchitisani kuti mubatizike.

18. Ko ni mibvunzo yaponi yomwe imwepo mungadzibvunze?

¹⁸ Ko imwepo munkufuna kubatizika? Ndimwepo mwekha mungakwanise kudawira mbvunzo moyu. Koma nthawe zinango ni vabwino kudzibvunza kuti, ‘ndawa chani nichadekana kudikhira?’ (Mac. 8:36) Ganizirani vinthu vitatu vatapfunzira munkhani ino. Choyamba, ni kukonda choonadi na chilungamo. Ndawa yakuti mukufuna kubatizika na kukhala mu dziko yomwe wanthu wose ayankhula choonadi na chilungamo. Chachiwiri, imwepo mukonda Yesu Khrisitu. Ndipo dzibvunzeni kuti, ‘ko nifuna kuti Mwana wa Mulungu akhale Mpfumu yangu na kutewedzera chitsanzo chake?’ Chachitatu, kuposha vose mukonda Yahova. Dzibvunzeni kuti, ‘ko nifuna kukondweresa ntima wa Yahova na kumutumikira?’ Peno mdawiro wanu pa mibvunzo yose mwaya ni wakuti inde, ndawa chani munkubatizikalini? Munkudikhira chani?—Mac. 16:33.

19. Ndawa chani imwepo muchadekanalini kugopa kubatizika? Fotokozani. (Yohane 4:34)

¹⁹ Peno imwepo mugopa kubatizika, ganizirani chitsanzo chomwe Yesu adafotokoza. (Lewengani Yohane 4:34.) Yesu adalinganiza kuchita chifuniro cha Yahova na chakudya. Ndawa chani? Ni ndawa yakuti chakudya ni chofunika kwaisepano. Ndipo Yesu angadziwa kuti chilichose chomwe angatikumbire kuchita, ni chabwino kwa ise. Yahova afunalini kuti timbachite vinthu vomwe vingatidzonge. Manje ko ubatizo nikuchitambo chifuniro cha Mulungu? Inde. (Mac. 2:38) Ndipomwapa, mungakhale wotsimikiza kuti ubatizo ni chinthu chabwino maninge kwaimwepo. Imwepo mungagopelini kudya chakudya chabwino chomwe chilipo. Manje ndawa chani munkugopa kubatizika?

20. Ko tidzapfunzire chani mu nkhani inkubwera?

²⁰ Ndawa chani munkudikhira? Azinji adawira mbvunzo moyu kuti: “Nikanati kukonzeka.” Kudzipereka na kubatizika ni chinthu chodekana maninge pamoyo wanu chomwe mungasalule. Ndipomwapa, mungafunike kuganiza mosamala maninge ndipo vingatenge nthawe komasoti khama kuti mufike pakubatizika. Peno imwepo munkufuna kubatizika, ko mungakonzekere tani vimwevi? Tidzawone mdawiro wa mbvunzo moyu mu nkhani inkubwera.