NKHANI YOPFUNZIRA 14
‘Ndawa ya vimwevi wose adzadziwe kuti ndimwe opfunzira wangu’
Ndawa ya vimwevi wose adzadziwe kuti ndimwe opfunzira wangu, mukambakondana.’—YOH. 13:35.
NYIMBO NA. 106 Khalani Achikondi
VOMWE TIPFUNZIRE a
Ko wanthu azinji atsimikizira chani akawona chikondi chomwe atumiki wa Yahova awonesana? (Onani ndime 1)
1. Ko wanthu azinji awona chani akafika pa misonkhano yathu koyamba? (Onani pomwe foto.)
GANIZIRANI kuti banja inango yafika pamisonkhano ya Mboni za Yahova koyamba. Banja mweyi inkudabwa ndawa ya kutambiriwa bwino komasoti chikondi chomwe yawonesewa na abale mu mpingu. Pomwe abwerera kumuyi nkazi ankuuza mwamuna wake kuti: ‘Mukudziwa alume wangu, wa Mboni za Yahova ni wosiyana maninge na wanthu anango ndipo anachikondi chapadera.’
2. Ndawa chani anango asiya kutumikira Yahova?
2 Chikondi chomwe wa Mboni za Yahova anacho ni chapadera maninge. Koma wanthu wa Mboni za Yahova mwawa alibe ungwiro. (1 Yoh. 1:8) Tikambawadziwa bwino abale na alongo mu mpingu, tikwanisa pomwe kuwona vophonya vawo. (Aro. 3:23) Vobvesa ntsisi, ni vakuti anango asiya kutumikira Yahova ndawa ya vophonya va anzawo.
3. Ko vidakakwanisika tani kuzindikira opfunzira chaiwo wa Yesu? (Yohane 13:34, 35)
3 Onani pomwe lemba pomwe pachokera msolo wa nkhani ino. (Lewengani Yohane 13:34, 35.) Nchani chichadziwikisa Akhrisitu chaiwo? Ni chikondi, osati ungwiro. Onani kuti Yesu alibe kulewa kuti: ‘Ndawa ya vimwevi imwepo mudzadziwe kuti ndimwe opfunzira wangu.’ Koma iye adati: ‘Ndawa ya vimwevi wose adzadziwe kuti ndimwe opfunzira wangu.’ Ndipomwapa, Yesu angatanthauzalini kuti opfunzira wake wokha ndiwo adzazindikire chikondi mwechi mu mpingu, koma angatanthauza kuti olo wanthu wa kunja adakawonambo chikondi chimwechi.
4. Ndawa chani anango adzibvunza va opfunzira chaiwo wa Yesu?
4 Wale omwe ni Mbonilini za Yahova panango angadzibvunze kuti: ‘Ko ni mwanjira iponi yomwe chikondi chichawonesera munthu kuti ni wophunzira wa Yesu? Ko Yesu adawonesa tani chikondi kwa opfunzira wake? Ko vingakwanisike tani kutewedzera chitsanzo cha Yesu ntsiku zino?’ Mboni za Yahova tichadekana kuganizirambo mibvunzo mwaya. Tikachita vimwevi vidzatithandize kuwonesa chikondi chaicho kwa anzathu, makamaka pomwe atiphonyera.—Aef. 5:2.
MOMWE CHIKONDI CHICHADZIWIKISIRA OPFUNZIRA WA YESU
5. Ko mawu ya Yesu ya pa Yohane 15:12, 13, yankutanthauza chani?
5 Yesu adalewa kuti opfunzira wake adzakondane mwapadera maninge. (Lewengani Yohane 15:12, 13.) Onani lamulo yomwe Yesu adawapasa. Iye adati: ‘Mumbakondane ninge momwe ine nakukonderani.’ Ko vimwevi vinkutathauza chani? Yesu adafotokozera opfunzira wake kuti angadekana kukonda maninge anzawo kuposha momwe iwo angadzikondera. Vimwevi vikutanthauza kuti iwo angadekana kukhala okonzeka kufera anango. b
6. Ko Mawu ya Mulungu yankuwonesa tani kuti chikondi nchodekana?
6 Baibolo ipfunzisa kuti chikondi nchodekana maninge. Wanthu azinji Malemba mwaya ayakonda maninge, yomwe yalewa kuti: ‘Mulungu ni chikondi.’ (1 Yoh. 4:8) ‘Konda munzako ninge momwe uchadzikondera wekha.’ (Mat. 22:39) ‘Chikondi chifuchira machimo yazinji.’ (1 Pet. 4:8) ‘Chikondi chichaperalini.’ (1 Akor. 13:8) Mavesi mwaya na yanango yawoneseratu kuti nivodekana maninge kukulisa na kuwonesa khalidwe yabwino mweyi ya chikondi.
7. Ndawa chani Satana angakwaniselini kubveranisa wanthu kuti ambawonesane chikondi chaicho?
7 Wanthu azinji adzibvunza kuti: ‘Ko chipembedzo chaicho ungachidziwe tani? Vipembedzo vose vilewa kuti vipfunzisa chaivo, koma vipfunzisa mpfundo zosiyana zolewa va Mulungu.’ Satana wachitisa kuti pakhale vipembedzo vizinji vabodza vomwe vinkusokoneza wanthu. Koma Satana angakwaniselini kubveranisa wanthu wa madziko yosiyanasiyana kuti akhale pa ubale wa padziko yose wa wanthu womwe akondana maninge. Ni Yahova yekha angachite vimwevi. Vimwevi ni vobveka ndawa yakuti chikondi chaicho chichokera kwa Yahova. Ndipo ni wale omwe adadalisiwa na mzimu wa Yahova, ndiwo angakwanise kuwonesa chikondi chaicho. (1 Yoh. 4:7) Ni vosadabwisa kuti Yesu adalewa kuti chikondi chaicho chidzadziwikise opfunzira wake chaiwo.
8-9. Ko wanthu azinji achabva tani akawona chikondi chomwe wa Mboni za Yahova achawonesa?
8 Ninge momwe Yesu adalewera, ntsiku zino wanthu azinji akwanisa kuzindikira opfunzira wa Yesu ndawa ya chikondi chomwe awonesana. Mwakulinganiza, m’bale munango dzina yake Ian akumbukira vomwe adawona pa nsonkhano wachigawo womwe kwenze kuyamba kuchitako ndipo udachitikira pafupi na pamuyi pake. Ian ambayendakale kumuko kukanyang’anira vochitika vosiyanasiyana. Iye adati: “Vinthu venze vosiyana maninge panthawe mweyi. Wa Mboni za Yahova enze waulemu, ambavala bwino ndipo wana wawo enze na makhalidwe yabwino. Kuingizira pamwapo, iwo ambawoneka kuti anantendere chaiwo ndipo ndivo vomwe nimbafunambo. Nikukumbukiralini nkhani iliyose yomwe idakambiwa, koma khalidwe yawo idakhazikika mu ntima mwangu.” c Vomwe Ian adawona pa nsonkhano moyu, vinkutsimikizira chikondi chaicho chomwe tinacho. Ndipo tikambakonda abale na alongo wathu, tiwachitira vinthu mokoma ntima na mwaulemu.
9 M’bale munango dzina yake John adadabwambo padayamba kugumanika pa misonkhano yathu. Iye adati: “Nidadabwa na mbverano wawo . . . ambawoneka ninge aphonyalini. Chikondi chawo chidanitsimikizira kuti nagumanadi chipembedzo chaicho.” d Vitsanzo mwevi na vinango vizinji, vinkuwoneseratu kuti atumiki wa Yahova ni Akhrisitu chaiwo.
10. Ko ni pa vochitika viponi vomwe vingatipase mwayi wowonesa chikondi kwa abale na alongo wathu? (Onani pomwe mawu yanyantsi.)
10 Ninge momwe tawonera mu ndime zoyambirira, palibe yemwe ni wangwiro mu mpingu. Nthawe zinango, abale na alongo wathu angayankhule panango kuchita vinthu vomwe vingatikhumudwise. e (Yak. 3:2) Vimwevi vikachitika, tingawonese chikondi chathu kwa abale na alongo wanthu momwe tingachitire vinthu panthawe mweyo. Chinthu chomwe chingatithandize kuchita vimwevi ni kupfunzira chitsanzo cha Yesu.—Yoh. 13:15.
MOMWE YESU ADAWONESERA CHIKONDI KWA OPFUNZIRA WAKE
Yesu adachita vinthu na opfunzira wake mwachikondi podiya kuti ambaphonyesa vinthu (Onani ndime 11-13)
11. Ko ni khalidwe yoipa iponi yomwe Yakobo na Yohane adawonesa? (Onani pomwe foto.)
11 Yesu ambadikhiralini kuti opfunzira wake ambachite vinthu ninge wangwiro. M’malo mwake, Yesu adawathandiza kuti akhale na maganizo yabwino nakuti akhale obvumizika kwa Yahova. Panthawe inango, opfunzira awiri womwe ni Yakobo na Yohane adakumbira amayi wawo kuti akawakumbirire kwa Yesu kuti akawapase udindo ukulu mu Ufumu. (Mat. 20:20, 21) Vomwe Yakobo na Yohane adachita vidawonesa kudzikuza nakuti ambafuna kukhala wapadzulu kuposha anango.—Miy. 16:18.
12. Ko Yakobo na Yohane ndiwo wokha adawonesa khalidwe yoipa mweyi? Fotokozani.
12 Yakobo na Yohane ndiwolini wokha adawonesa khalidwe mweyi ya kudzikuza panthawe mweyi. Onani vomwe opfunzira anango adachita padabva vimwevi. ‘Iwo adakhumudwa padabva kuti Yakobo na Yohane akumbira vimwevi.’ (Mat. 20:24) Ndoganizani nkangano ukulu womwe wenzepo pakati pa opfunzira mwawa. Panango ambagegedzana kuti: ‘Ko ndimwe mbani imwepo kuti mukakhale na udindo ukulu mu Ufumu? Imwepo ndimwelini mwekha womwe mwaphata basa mokhulupirika pabodzi na Yesu. Isembo tifuna ndipo ndise woyenerera vimwevi!’ Mulimose mwevenzere, panthawe mweyi opfunzira mwawa enze adayembwa kufunika kowonesa chikondi anango.
13. Ko Yesu adachita tani na kusowa ungwiro kwa opfunzira wake? (Mateyu 20:25-28)
13 Ko Yesu adamalisa tani nkhani mweyi? Iye alibe kukalipa. Yesu alibe kulewa kuti nisalule opfunzira anango womwe ni wanthu wabwino, odzichepesa na wachikondi. Mosiyana na vimwevi, Yesu adachezanawo opfunzira wake moleza ntima ndawa yakuti ambadziwa kuti angakwanise kuchita vinthu vabwino. (Lewengani Mateyu 20:25-28.) Kamwaka kenzelini koyamba panango komaliza kuti opfunzira mwawa akangane vakuti nkulu ni mbani. Olo nteno, Yesu ambawachitira vinthu mokoma ntima opfunzira mwawa.—Maliko 9:34; Luka 22:24.
14. Ko opfunzira wa Yesu adakula panthawe iponi?
14 Mosakayika Yesu adazindikira momwe opfunzira wake adalelewera. (Yoh. 2:24, 25) Iwo adakula panthawe yomwe atsogoleri wavipembedzo ambalimbikisa wanthu kuti munthu angalemekezeke akakhala na udindo ukulu. (Mat. 23:6) Atsogoleri wa chipembedzo cha Chiyunda ambadziwona kuti ni wofunika kuposha anango. f (Luka 18:9-12) Yesu ambadziwa kuti vimwevi vingachitikirembo opfunzira wake ndawa ya momwe ambadziwonera na momwe ambawonera anango. (Miy. 19:11) Iye ambadziwa kuti opfunzira wake ambaphonyese vinthu, koma ambawalezera ntima. Yesu ambadziwa kuti opfunzira wake anantima wabwino ndipomwapa, iye adapatula nthawe nkuwapfunzisa kuti akhale odzichepesa nakuti ambawonesane chikondi m’malo mwakuti ambadziwone kukhala wofunika kuposha anango.
MOMWE TINGATEWEDZERERE CHITSANZO CHA YESU
15. Ko tingapfunzire chani pa vomwe vidachitikira Yakobo na Yohane?
15 Tingapfunzire vizinji kuchokera kwa Yakobo na Yohane. Kukumbira udindo ukulu mu Ufumu venze vophonyeka. Koma opfunzira anango pomwe enze ophonyambo ndipo adabvuma kuti vinthu voipa viwagawanise. Yesu adachitanawo vinthu mokoma ntima na mwachikondi opfunzira wake mwawa wose okwana 12. Ko tikupfunzira chani? Chinthu chofunika maninge sikuti ni vophonya va anzathu, koma momwe tichachitira vinthu akatiphonyera. Ko chani chingatithandize kuchita vinthu moyenera? Tikakhumudwisiwa na m’bale panango mulongo, tingadzibvunze kuti: ‘Ndawa chani vomwe iye wachita vanikhumudwisa maninge? Ko vimwevi vinkuwonesa kuti inepano nichadekana kuchinja vinthu vinango? Ko m’bale panango mulongo moyu ankugumana na bvuto inango? Podiya kuti ninkudziwona kuti ninalazau pakukhumudwa, ko ningawonese chikondi nkundomukhululukira?’ Tikambachita vinthu mwachikondi na anzathu, tiwonesa kuti ndisedi opfunzira chaiwo wa Yesu.
16. Ko tingapfunzire pomwe chani na chitsanzo cha Yesu?
16 Chitsanzo cha Yesu chitithandiza pomwe kuwona kufunika kobvesesa abale na alongo wathu akatiphonyera. (Miy. 20:5) Nishuwadi kuti Yesu adziwa va mu ntima mwa munthu. Koma ise tingakwaniselini kuchita vimwevi. Tichadekana kukhala oleza ntima na vophonya va abale na alongo wathu. (Aef. 4:1, 2; 1 Pet. 3:8) Chinthu chomwe chingatithandize kuchita vimwevi, ni kuwadziwa bwino abale na alongo wathu. Naboni tiwone chitsanzo.
17. Ko kumudziwa bwino m’bale munango, kudamuthandiza tani wonyang’anira dera?
17 Wonyang’anira dera munango yemwe ankutumikira ku África Oriental, ankukumbukira m’bale munango yemwe ambawoneka ninge woshupa kubverana naye. Ko wonyang’anira dera moyu adachita chani? Iye adati: “M’malo mwakuti nimupewe, nidaganiza vakuti nimudziwe bwino m’bale moyu.” Pakuchita vimwevi, iye adazindikira kuti m’bale moyu adalelewa moshupa ndipo vimwevi vidachitisa kuti iye ambawoneke ninge ni woshupa pochita vinthu na wanthu anango. Wonyang’anira dera moyu adapitiriza kulewa kuti: “Pomwe nidabvesa momwe m’bale moyu adachinjira na momwe venzere voshupa kuti ayambe kuchita vinthu na wanthu anango, nidadabwa maninge. Ndipo tidakhala pa ushamwali wabwino maninge.” Ni shuwadi, tikambayesesa kubvesa momwe abale na alongo wathu adakulira, vikhala vosashupa kuwakonda.
18. Ko ni mibvunzo yaponi yomwe tingadzibvunze peno m’bale wathu watiphonyera? (Miyambo 26:20)
18 Nthawe zinango vingakhale bwino kucheza na m’bale yemwe watiphonyera kuti tikonze mabvuto yathu. Koma choyamba, tingachite bwino kudzibvunza kuti: ‘Ko inepano nabvesadi vinthu vose vomwe vachitika?’ (Miy. 18:13) ‘Ko iye wachitira dala vimwevi kuti anikalipise?’ (Mla. 7:20) ‘Ko inepano nidaphonyako kale vinthu volingana na mwevi?’ (Mla. 7:21, 22) ‘Inepano nikayesesa kucheza naye, ko vinthu viipe kuposha mwapa?’ (Lewengani Miyambo 26:20.) Peno tingapatule nthawe kuganizira mibvunzo mwaya, tidzawone kuti chofunika maninge ni chikondi na kuyebwa vomwe abale wathu atiphonyera.
19. Ko imwepo ndimwe wotsimikiza kuchita chani?
19 Mboni za Yahova zitsimikizira kuti ni opfunzira chaiwo wa Yesu ndawa awonesana chikondi. Aliyese payekha atsimikizira kuti ni wopfunzira chaiye wa Yesu akambawonesa chikondi chaicho kwa abale na alongo, olo kuti aphonyesa vinthu. Tikambachita vimwevi, wose adzadziwe kuti chimwechi ndicho chipembedzo chaicho ndipo adzayambe kutumikira Mulungu wathu wachikondi Yahova. Ndipomwapa, ndise otsimikiza kupitiriza kuwonesa chikondi chaicho chomwe chidziwikisa Akhrisitu chaiwo.
NYIMBO NA. 17 “Ndikufuna”
a Wanthu azinji afuna kupfunzira choonadi ndawa yowona chikondi chathu chaicho. Koma tose ndise wochimwa ndipo nthawe zinango vingakhale voshupa kuti tiwonese chikondi kwa anzathu. Ndipomwapa, tikambirane kuti ndawa chani chikondi nchofunika ndipo tiwone pomwe momwe tingatewedzerere chitsanzo cha Yesu anzathu akatiphonyera.
b Onani bukhu yakuti “Bwera Ukhale Wotsatira Wanga,” mso. 17, ndi. 10-11.
c Onani nkhani yakuti “Ndinkafuna Moyo Watanthauzo,” mu Nsanja ya Olonda ya 1 Novembro 2012, tsa. 13-14.
d Onani nkhani yakuti “Zinthu zinkaoneka ngati zikundiyendera bwino,” mu Nsanja ya Olonda ya 1 Maio 2012, tsa. 18-19.
e Munkhani ino, tinkulewalini machimo yakuluyakulu yomwe yangafunike kusamaliliwa na akulu mu mpingu, ninge yali pa lemba ya 1 Akorinto 6:9, 10.
f Nkuyenda kwa nthawe, rabbi munango adanemba kuti: “Padziko yose yapasi palibe amuna oposha 30, womwe ni olungama kuposha Abulahamu. Peno alipo okwana 30, ine na mwana wangu ndise awiri pamwawo, peno alipo 10, ine na mwana wangu ndise awiri pamwawo, peno alipo 5, ine na mwana wangu ndise awiri pamwawo, peno ni awiri, ndinepano na mwana wangu ndipo peno ni m’bodzi, ndinepano.”
