PENO imwepo mudazungirako kale kantsuwa kang’ono ka ku Sangir Besar ku Indonésia magole yapita kumbuyo aya. Mosakayika mudaona alogo wathu atatu m’mbali mwa nyanza. Iwo ni odziwika pa nyanza mweyi ndawa ya basa yawo yothandiza wanthu kubvesa Baibolo. koma pa nthawe mwaire iwo ambachita vinthu vosiyana maninge.

Iwo ambangena m’madzi kukatenga minyala yakulu yakulu yolemera nkuyabulisa mphepete mwa nyanza. Yanango mwa minyala mwaya yenze yakulu yakulu ninge bola. Iwo Ambakhala pa mpando wa matabwa, ndipo ambayaphwanya pakuphatisa basa sando kuti yakhale yang’onoyang’ono ninge dzayi ya nkhuku. Iwo akamaliza kuphwanya minyala mwaya, ambayanyamula pakuphatisa basa balde ndipo ambachita kukwira ntsikada pakuyenda nayo kumuyi kwawo. Pakumalizira iwo ambaikha minyala mwaya m’masakha yakulu yakulu kuti yadzatakuliwe na makaro ndipo yambaphatisiwa basa pakukonza nsewu.

M’bodzi mwa alongo mwawa wenze Hulda. Iye ambakhala na nthawe ikulu yophatira basa mweyi. Ndipo kobiri zomwe ambagumana ambaphatisa basa pakusamalira banja yake komasoti wenze na cholinga chinango m’maganizo mwake chomwe ni kugula foni ya thabuleti kuti ambakwanise kungena pa JW Library^®. Hulda ambadziwa kuti mavidiyo na vose vomwe vigumanika pa Library vingamuthandize pa basa yolalikira na pa pfunziro ya payekha.

Hulda ambaphata basa kwa maola yawiri ntsiku iliyose. Iye adachita vimwevi kwa mwezi na hafu kuti akwanise kuphwanya minyala yokwana kuti adzadze karo. Pakumalizira iye adakhala na kobiri yokwana yogulira thabuleti.

Hulda adati: “Ni shuwadi kuti nimbakhala woneta maninge na kuwawiwa ndawa yophwanya minyala, koma inepano nidayebwa vose vimwevi pomwe nidayamba kuphatisa basa thabuleti ndipo idanithandiza kukhala na maphindu yabwino mu umboni na kukonzekera bwino misonkhano.” Iye adafotokozapomwe kuti thabuleti idanithandizapomwe pa nthawe ya Koronaviru pomwe misonkhano yose ya mpingu yambachitikira pa foni. Ndise wokondwa kuti Hulda adakwanirisa cholinga chake.