NKHANI YOPFUNZIRA 49
Ko Yahova adawira mapemphero yangu?
‘Imwepo mudzanichemere na kubwera kwa ine m’pemphero ndipo ine nidzakubvesereni.’—YER. 29:12.
NYIMBO NA. 41 Mulungu Invani Pemphero Langa
VOMWE TIPFUNZIRE a
1-2. Ko ndawa chani nthawe zinango tingaganize kuti Yahova ankubveseralini mapemphero yathu?
‘KONDWANI mwa Yahova ndipo iye adzakupaseni vofuna va ntima wanu.’ (Sal. 37:4) Ni polomisi yabwino maninge, nteno lini? Manje ko tingadikhire kuti Yahova adzatipase vose vomwe isepano tichamukumbira? Ndawa chani tinkubvunza tene? Ganizirani vochitika ivi: Mulongo wosalowodwa ankupemphera kwa Yahova kuti ayende ku shikola ya Akhristu wolalikira va Ufumu koma pankupita magole yazinji iye ankuchemerewalini. M’bale wachilumbwana ankukumbira Yahova kuti amupolese matenda yake kuti iye akwanise kuchita vizinji pakutumikira Yahova mu mpingu. Koma podiya ankukumbira ankuchiralini. Azibereki ankupemphera kuti mwana wawo apitirize kutumikira Yahova, patsogolo pake mwana wawo ankusalula kusiya kutumikira Yahova.
2 Panango imwepo mudapempherakokale kukumbira thandizo koma mulibe kupasiwa vomwe mudakumbira. Ndawa ya vimwevi mungayambe kuganiza kuti Yahova adawira mapemphero ya anango osati yanu. Panango mungaganizepomwe kuti mudaphonyesa chinthu. Mulongo munango dzina yake Janice b ambadzibvambo tene. Iye na mwamuna wake ambapemphera na cholinga chakuti akatumikire pa Beteli. Iye adanena kuti: “Inepano nimbatsimikizira kuti tichemerewe manjemanje kukatumukira pa Beteli.” Koma nthawe idapita ndipo minyezi yadasanduka magole banja mweyi ilibe kuchemerewa. Janice adanena kuti: “Inepano nidasokonezeka ndipo nidakhumudwa, nimbaganiza kuti panango mwanjira inango nidamukhumudwisa Yahova. Inepano nenze nidayipempherera maninge nkhani mweyi, ndawa chani iye alibe kudawira pemphero yangu?”
3. Ko tione chani mu nkhani mweyino?
3 Nthawe zinango tingadzibvunze peno Yahova ankubva mapemphero yathu. Olo atumiki wa Yahova wakalekale ambaderambo nkhawa vimwevi. (Yobu 30:20; Sal. 22:2; Hab. 1:2) Nchani chomwe chingakutsimikizireni kuti Yahova achabva mapemphero yanu? (Sal. 65:2) Pakufuna kukuthandizani kudawira mbvunzo moyu naboni tiwone mibvunzo yatatu aya: (1) Ko tingadikhire chani kwa Yahova? (2) Ko Yahova adikhira chani kwa isepano? (3) Ko ndawa chani nthawe zinango tingadekane kuchinja vinthu vomwe tichakumbira?
KO TINGADIKHIRE CHANI KWA YAHOVA?
4. Mobverana na Yeremiya 29:12, ko Yahova ankupolomisa kuchita chani?
4 Yahova adapolomisa kuti adzabvesere mapemphero yathu. (Werengani Yeremiya 29:12.) Mulungu wathu achakonda atumiki wake okhulupirika ndipomwapa adzanyalanyazelini mapemphero yawo. (Sal. 10:17; 37:28) Vimwevi vinkutanthauzalini kuti iye adzatipase vose vomwe tichamukumbira. Vinthu vinango vomwe tichamukumbira tidzatambire mu dziko inyowani.
5. Ko Yahova achaganizira chani pa kubvesera mapemphero yathu? Fotokozani.
5 Yahova aganizira momwe mapemphero yathu yachalinganilana na cholinga chake. (Yes. 55:8, 9) Cholinga mwechi chinkuphatanidzapo kudzadza dziko yapasi na wanthu obverana na okondwa otongewa na Ufumu wa Mulungu. Koma Satana adanena kuti wanthu angakhale wokondwa akambadzitonga wokha. (Gen. 3:1-5) Kuti awonese kuti vomwe adanena Satana ni vabodza, Yahova wabvuma kuti mautongi ya wanthu yakhalepo manjeuno. Koma mautongi ya wanthu mwaya ndiyo yankuchitisa mabvuto yakulu yomwe tinkulimbana nayo ntsiku zino. (Mla. 8:9) Isepano tinkudziwa kuti Yahova amaliselini mabvuto yose manjeuno, ndawa yakuti iye akachita vimwevi manjeuno, wanthu angayambe kuganiza kuti maboma ya wanthu yangakwanise kumalisa mabvuto.
6. Ndawa chani tichadekana kutsimikiza kuti nthawe zose vomwe Yahova achachita ni va chikondi na va chilungamo?
6 Yahova angadawire mapemphero yolingana munjira yosiyana. Mwakulinganiza, pomwe Mpfumu Hezekiya ambadwala maninge iye adapemphera kwa Yahova kuti amuchirise, ndipo Yahova adachita vimwevo. (2 Maf. 20:1-6) Koma pa nthawe inango pomwe mtumi Paulo adakumbira Yahova kuti amuchosere ‘munga nthupi’ mwake panango bvuto ya thanzi, Yahova alibe kuchita vimwevi. (2 Akor. 12:7-9) Onanipomwe vomwe vidachitikira mtumi Yakobo na Petulo. Mpfumu Herode imbafuna kupha atumi awiri mwawa. Koma mpingu udapempherera mtumi Petulo komasoti mtumi Yakobo, Yakobo adaphewa koma mtumi Petulo adapulumusiwa modabwisa na mngelo. (Mac. 12:1-11) Panango tingadzibvunze kuti, ‘ndawa chani Yahova adapulumusa Petulo osapulumusambo Yakobo?’ Baibolo ichanenalini. c Koma chinthu chomwe tichadekana kudziwa ni chakuti Yahova ni ‘Mulungulini yemwe alibe chilungamo.’ (Deut. 32:4) Ndipo tinkudziwa kuti Yahova ambakonda maninge Petulo komasoti Yakobo. (Chiv. 21:14) Nthawe zinango Yahova angadawire mapemphero yathu munjira yomwe timbayidikhiralini. Koma tikayikalini kuti nthawe zose Yahova ni wachikondi na wachilungamo. Ndawa ya vimwevi tidzibvunzalini njira yomwe Yahova achadawirira mapemphero yathu.—Yobu 33:13.
7. Ko tichadekanalini kuchita chani, ndipo ndawa chani?
7 Isepano tichadekanalini kulinganiza mabvuto yomwe tinayo na mabvuto ya wanthu anango. Mwakulinganiza, panango tingakumbire kuti Yahova atithandize pa mabvuto yathu, koma pemphero yathu osadawiriwa. Patsogolo pake tingawone munthu yemwe adachita pemphero ninge yathu, ndipo vomwe vinkuchitika pa moyo wake vinkuwonesa kuti pemphero yake yadawiriwa. Mulongo munango dzina yake Anna vimwevi vidamuchitikira. Iye adapempherera mwamuna wake Matthew kuti achire ku matenda ya khansa, nthawe ibodzibodzi mweyo alongo awiri wachikulire ambalimbanambo na bvuto mweyi. Mulongo Anna adapempherera maninge alongo mwawa komasoti mwamuna wake Matthew. Alongo mwawa adachira koma mwamuna wake adamwalira. Pakuyamba Anna ambadzibvunza kuti peno alongo awiri mwawa achira ndiye kuti Yahova awathandiza. Peno Yahova wachita vimwevi, ndawa chani alibe kuchitambo chibodzibodzi na mwamuna wangu? Shuwadi kuti tingafotokozelini kuti ndawa chani alongo awiri mwaya adachira. Koma chomwe tinkudziwa ni chakuti Yahova ananjira yomalisira mabvuto yathu. Iye ni wofunisisa maninge kumukisa azishamwali wake omwe adamwalira.—Yobu 14:15.
8. (a) Mobverana na Yesaya 43:2, ko Yahova achatithandiza tani? (b) Ko mapemphero yachatithandiza tani tikambalimbana na mabvuto? (Onani vidiyo yakuti Pemphero ichatithandiza kugwebana na mabvuto.)
8 Nthawe zose Yahova adzakhale kumbali yathu. Ninge Baba wathu wachikondi, Yahova akondwalini kuona tinkubonera. (Yes. 63:9) Olo nteno, iye angalambizelini kuti mabvuto yakulu yabwere pa moyo wathu yomwe tingayalinganize na kamadzi panango masimbe ya moto. (Werengani Yesaya 43:2.) Koma iye ankutipolomisa kuti nthawe zose adzatithandize ‘kulimbana’ na mabvuto mwaya, ndipo adzalekelerelini kuti tibonere na mabvuto mwaya mpakana kalekale. Kuyingizira mwapa, Yahova adzatipase mphanvu ya mzimu uchena yomwe idzatithandize kuti tileke kufoka. (Luka 11:13; Afil. 4:13) Ndawa ya vimwevi tingakhale otsimikiza kuti nthawe zose tidzakhale na vinthu votithandiza kupirira na kupitiriza kukhala okhulupirika kwa Yahova. d
KO YAHOVA ADIKHIRA CHANI KWA ISEPANO?
9. Mobverana na Yakobo 1:6, 7, ndawa chani tichadekana kuthemba Yahova kuti adzatithandize?
9 Yahova adikhira kuti timbamuthembe. (Aheb. 11:6) Nthawe zinango mabvuto yathu yangawoneke ninge ni yoshupa maninge kuyapirira mpakana tingafike pakukayikira kuti Yahova angatithandize. Koma Baibolo ichanena kuti mphanvu za Yahova zingatichitise kuti ‘tipakire mpanda.’ (Sal. 18:29) Manje m’malo mwakuti tiyambe kukayikira kuti Yahova angatithandizedi, tichadekana kupemphera mwachikhulupiriro na kukhala otsimikiza kuti iye adzadawire mapemphero yathu.—Werengani Yakobo 1:6, 7.
10. Perekani chitsanzo cha momwe tingachitire vinthu mobverana na mapemphero yathu.
10 Yahova achadikhira kuti timbachite vinthu mobverana na mapemphero yathu. Mwakulinganiza, m’bale angakumbire Yahova kuti amuthandize kukumbira feriya kwa bwana wake kuti akagumanike pa nsonkhano wachigawo. Ko Yahova angadawire tani pemphero mweyi? Iye angathandize m’bale moyu kuti akhale wolimba ntima nkuyenda kukayankhula na bwana wake. Koma m’bale achadekana kuchita mbali yake yomwe ni kuyenda kwa bwana wake kuti akakumbire. Panango iye angadekane kuchita vimwevi kwa maulendo yazinji ndipo panango angadekane kukumbira munzake kuti asinthane nthawe yongenera mu basa. Ndipo peno ni vokwanisika iye achadekana kubvuma kuti bwana wake adzamugwate kobiri pa feriya yomwe iye wachosa.
11. Ko ndawa chani tichadekana kupemphera mobwerezabwereza va mabvuto yathu?
11 Yahova achadikhira kuti timbapempherere vomwe ni vodekana kwa isepano. (1 Ates. 5:17) Yesu adabvekesa mpfundo yakuti mapemphero yathu yanango yangadawiriwelini mwakankulumize. (Luka 11:9) Ndipomwapa ayi kufoka kupemphera! Mbachitani vimwevi na ntima wose komasoti mobwerezabwereza (Luka 18:1-7) Tikapitiriza kupempherera chinthu, isepano timuwonesa Yahova kuti chinthu chomwe tinkumukumbira ni chodekana maninge kwa isepano, osati chinthu chomwe tindochifuna chomwe chingadizelini kumala. Kuyingizira mwapa tichaonesa kuti tinachikhulupiriro kuti iye angatithandize.
KO NDAWA CHANI NTHAWE ZINANGO TINGADEKANE KUCHINJA VINTHU VOMWE TICHAKUMBIRA?
12. (a) Ko ni mbvunzo uponi womwe tingadzibvunze wobverana na vomwe tinkukumbira? (b) Ko tingawonese tani kuti tilemekeza Yahova m’mapemphero yathu? (Onani bokosi yakuti “ Ko vomwe nichakumbira viwonesa kuti nilemekeza Yahova?”)
12 Peno chinthu chomwe takumbira kwa Yahova chilibe kuchitika, tingadzibvunze mibvunzo yatatu aya: Wakuyamba, ‘ko inepano ninkukumbiradi chinthu chabwino?’ Nthawe zizinji tiganiza kuti tinkudziwa vinthu vabwino, koma nthawe zinango vinthu vomwe tingawone kuti ni vabwino kwa isepano, nkuyenda kwa nthawe vingakhale vosafunika. Peno tinkupemphera kuti timalise bvuto inango panango pangakhale njira yabwino maninge yomalisira bvuto mweyo. Ndipo vinthu vinango vomwe tingakumbire kwa Yahova panango vingakhale vosabverana na chifuniro chake. (1 Yoh. 5:14) Mwakulinganiza, ganizirani va azibereki omwe tawatomola kale mu ndime zoyambirira. Iwo adakumbira Yahova kuti mwana wawo apitirize kukonda Yahova. Vinkuoneka kuti kukumbira vimwevi ni kosaphonyeka koma Yahova akakamizalini munthu kumutumikira. Iye ankufuna kuti tose isepano kuphatanidzapo wana wathu asalule kumutumikira. (Deut. 10:12, 13; 30:19, 20) Manje m’malo mwakuti akumbire Yahova kuti mwana wawo apitirize kutumikira Yahova, azibereki angamukumbire kuti ambawafike pa moyo wana wawo na kuwalimbikisa kuti ambakonde Yahova na kukhala shamwali wawo.—Miy. 22:6; Aef. 6:4.
13. Mobverana na Aheberi 4:16, ni pa nthawe iponi pomwe Yahova adzatithandize? Fotokozani.
13 Mbvunzo wachiwiri womwe mungadzibvunze ni wakuti, ‘ko ni nthawe yabwino kuti Yahova anipase vomwe ninkukumbira?’ Panango mungaganize kuti ninkudekana m’dawiro pa vomwe ninkukumbira mwakankulumize. Koma chaivo ni vakuti Yahova achadziwa nthawe chaiyo yomwe angatithandize. (Werengani Aheberi 4:16.) Pomwe mapemphero yathu yankudawiriwalini tingayambe kuganiza kuti, m’dawiro wa Yahova ni wakuti ‘neye.’ Koma vingachitikedi kuti m’dawiro wake ni wakuti ‘osati manjemanje.’ Mwakulinganiza ganizirani va mulumbwana ule yemwe ambapemphera kuti apole matenda yake. Peno Yahova adakachita chodabwisa nkumupolesa matenda yake, Satana adakaganiza kuti iye ankutumikira Yahova ndawa yakuti wapolesewa. (Yobu 1:9-11; 2:4) Kuyingizira pa mwapa, Yahova atitsimikizira kuti wanthu ose adzapolesewe matenda yawo. (Yes. 33:24; Chiv. 21:3, 4) Pomwe tinkudikhira nthawe mweyi, tichadekanalini kupolesewa modabwisa. Ndipomwapa m’bale moyu adakakumbira Yahova kuti amupase mphanvu na ntendere wa muntima kuti akwanise kupirira mabvuto yake na kupitiriza kutumikira Yahova mokhulupirika.—Sal. 29:11.
14. Ko mwapfunzira chani pa chitsanzo cha Janice?
14 Ko imwepo munkukumbukira va Janice yemwe ambapemphera kuti akatumikire pa Beteli? Padapita magole 5 kuti iye akwanise kubvesa momwe Yahova adadawirila mapemphero yake. Iye adanena kuti: “Magole yose mwaya Yahova adanipfunzisa na kunithandiza kuti nikhale Nkhrisitu wabwino. Inepano nimbadekana kupitiriza kumuthemba Yahova. Nimbafunika kuchitapomwe khama pa pfunziro yangu ya panekha. Kuyingizira pamwapa nimbafunika kupfunzira kuti chimwemwe changu chinkuthembalini pa malo yomwe ninkutumikirira Yahova.” Patsogolo pake Janice na mwamuna wake adachemerewa kuti akatumikire ninge wonyang’anira dera. Poganizira vose vimwevi, Janice adamaliza na kunena kuti: “Inde, Yahova adadawiradi mapemphero yangu, koma osati mu njira yomwe inepano nimbadikhira. Padapita ka nthawe kuti inepano nifike pakubvesa kuti m’dawiro wa Yahova ni mphaso yabwino maninge kwa inepano. Nitembeja maninge kukhala na mwayi wakuona chikondi na ubwino wa Yahova.”
Peno imwepo munkuganiza kuti Yahova ankudawiralini mapemphero yanu, tani kukumbira vinthu vinango (Onani ndime 15) f
15. Ndawa chani nthawe zinango ni vodekana kuchinja pa vomwe tichakumbira? (Onani pomwe mafoto.)
15 Mbvunzo wachitatu ungakhale wakuti ‘ko pali chinthu chinango chomwe ningakumbire?’ Kazinji kazinji tingadekane kuneneratu mwa sitiriti vomwe tinkufuna mu mapemphero yathu. Koma nthawe zinango tingafunike kukhala wachikatikati kuti tidziwe vomwe Yahova ankufuna. Onani chitsanzo cha mulongo ule yemwe ambapempherera kuti ayende ku shikola ya Akhrisitu olalikira va Ufumu. Iye ambafuna kuyenda ku shikola mweyi ndawa yakuti ambafuna kukathandiza ku dera komwe kunkudekana thandizo. Koma pomwe ambapitiriza kupemphera kuti achemerewe ku shikola mweyi iye adakakumbira Yahova kuti amuthandize kuwona njira inango yomwe angayingizirire utumiki wake. (Mac. 16:9, 10) Ndipo patsogolo pake iye angachite vinthu mobverana na vomwe ankukumbira pakubvunza wonyang’anira dera peno pali mpingu pafupi pomwe pankudekana apainiya azinji panango anganembere kalata ku ofesi ya nthambi kubvunza peno pali dera inango yomwe inkudekana ofalisa azinji. e
16. Ko tingatsimikizire va chani?
16 Ninge momwe isepano tawonera, tingakhale otsimikiza kuti Yahova adzadawire mapemphero yathu munjira ya chikondi komasoti mwachilungamo. (Sal. 4:3; Yes. 30:18) Nthawe zinango vingachitike kuti tingatambire m’dawiro womwe timbawudikhiralini. Koma Yahova adzanyalanyazelini mapemphero yathu. Iye atikonda maninge ndipo adzatisiyelini. (Sal. 9:10) Ndipomwapa pitirizani ‘kumuthemba nthawe zose’ na kumuuza vose va muntima mwanu m’pemphero.—Sal. 62:8.
NYIMBO NA. 43 Pemphero Loyamikira Mulungu
a Pfunziro mweyi itifotokozere chifukwa chomwe isepano tichadekana kutsimikizira kuti nthawe zose Yahova adzadawire mapemphero yathu munjira ya chikondi komasoti yachilungamo.
b Madzina yanango yachinjiwa.
c Onani nkhani yakuti “Ko imwepo mutsimikiza kuti Yahova achita vinthu mwachilungamo?” mu Ntsanja ya ulonda ya Fevereiro 2022 tsa. 3-6.
d Kuti mudziwe momwe Yahova atithandizira kulimbana na mabvuto yoshupa. Nyang’anirani vidiyo yakuti Pemphero ichatithandiza kugwebana na mabvuto pa saiti ya jw.org.
e Kuti tidziwe vomwe tingachite kuti tikatumikire ku dera ya nthambi inango onani bukhu yakuti Gulu Lochita Chifuniro cha Yehova, msolo 10, tsa. 6-9.
f MAWU YOFOTOKOZERA FOTO: Alongo awiri ankupemphera kwa Yahova akalibe kusayina mafomu ya kuyenda ku shikola ya Akhrisitu olalikira va Ufumu ndipo patsogolo pake m’bodzi ankuchemerewa koma munango neye. M’malo mwakuti akhale wokhumudwa mulongo yemwe alibe kuchemerewa, iye ankupemphera kwa Yahova kuti amuthandize kuwona njira zinango zomwe angamutumikirire. Iye ankunembera kalata ku ofesi ya nthambi ya kudzipreka kuti akatumikire ku gawo yosowa.
