1-2. (a) Ni mabvuto yaponi yolingana na yathu yomwe Ayuda adalimbana nayo pomwe adabwerera ku Yerusalemu? (b) Fotokozani mabvuto yanango yomwe Ayuda enze nayo. (Onani bokosi yakuti: “ Ntsiku za Hagai, Zekariya na Ezara.”)

 KO IMWEPO nthawe zinango mudera nkhawa va kutsogolo? Vingachitike kuti mulilini pa basa ndipo munkuganizira momwe mungasamalilire banja yanu. Panango munkudera nkhawa va chitetezo cha banja yanu, nkhani zandale, kudzudziwa na kutsutsiwa mu umboni. Ko imwepo munkulimbana na yanango mwa mabvuto mwaya? Peno nteno vingakhale bwino kuona momwe Yahova adathandizira Aizirayeli pomwe ambagumana na mabvuto ninge mwaya.

² Ayuda omwe enze adakhala kwa moyo wawo wose ku Babulo, iwo ambadekana chikhulupiriro cholimba kuti asiye dziko yomwe enze adayizolowera ya Babulo nkuyenda kudziko yomwe iwo ambaidziwalini. Pomwe adandofika, iwo adayamba kulimbana na mabvuto yandale, kusowa kobiri na kutsutsiwa. Vimwevi vimbachitisa kuti anango awone kuti nivoshupa kuphata basa yomanga kachisi. Ndipomwapa cha ma 520 Yesu akanati kubwera, Yahova adatumiza aneneri awiri kuti akalimbikise wanthu wake kubwezeresa khama yomwe enze nayo pa kutumikira Yahova. Omwe ni Hagai na Zekariya. (Hag. 1:1; Zek. 1:1) Ninge momwe tiwonere, basa ya aneneri mwawa idaphindula maninge. Payadapita magole 50, Ayuda omwe enze adabwerera ku Yerusalemu ambadekanapomwe kulimbikisiwa. Wonemba chilamulo munango dzina yake Ezara, adachoka ku Babulo nkuyenda ku Yerusalemu kuti akalimbikise wanthu wa Mulungu kuti ayikhe kutumikira Yahova pa malo yoyamba.—Ezara 7:1, 6.

3. Ko munkhani mweyino tidawire mibvunzo yaponi? (Miyambo 22:19)

³ Maulosi ya Hagai na Zekariya, yadathandiza wanthu wa Mulungu kuti apitirize kuthemba Yahova panthawe yoshupa. Maulosi  mwaya yangatilimbikise kuona kuti Yahova angatithandizembo, viribe basa mabvuto yomwe tingagumane nayo pa moyo wathu. (Werengani Miyambo 22:19.) Pomwe tinkukambirana va ntontholo wa Hagai na Zekariya, na kuona chitsanzo cha Ezara, ganizirani mibvunzo aya: Ko Ayuda adakhudziwa tani na mabvuto yose mwayale? Ndawa chani tichadekana kuyikha chifuniro cha Yahova pamalo yoyamba tikambagumana na mabvuto pa moyo wathu? Ndipo tingamuthembe tani Yahova pa nthawe zoshupa?

4-5. Ko nchani chomwe chenze chidakhumudwisa Ayuda kuti aleke kumanga kachisi?

⁴ Pomwe Ayuda adafika ku Yerusalemu, iwo enze na basa ikulu yakuti achite. Ndipomwapa nkanthawe kang’onong’ono iwo adakonza guwa yantsembe ya Yahova, ndipo adayambiratu kumanga kachisi. (Ezara 3:1-3, 10) Koma khama yomwe iwo enze nayo poyamba idayamba kuchepa. Venze teno ndawa yakuti kuyingizira pa kumanga kachisi iwo ambafunikapomwe kumanga nyumba zawo, kusamalira mitengo yawo na kudyesa mabanja yawo. (Ezara 2:68, 70) Ndipo kuti timalizise iwo ambalimbanapomwe na mabvuto ya kutsutsiwa na adani wawo omwe ambafunalini kuti kachisi amangiwe.—Ezara 4:1-5.

⁵ Kuyingizira pa vose vimwevi, Ayuda ambalimbanapomwe na mabvuto yandale na kusowa kobiri. Dera yomwe iwo ambakhala yenze mbali ya utongi wa Perisiya. Pomwe mpfumu Koresi ya ku Perisiya idamwalira mu 530 Yesu akanati kubwera, mpfumu yachiwiri Cambyses ambafuna kudzonga Iguputo. Pomwe ambayenda ku Iguputo, masocha yake yadakumbira vakudya, madzi na malo yokhala, ndipo vimwevi vidandoyingizira mabvuto kwa Ayuda. Mpfumu Dariyo idayamba kutonga. Koma penze mabvuto yazinji ninge kupanduka na kuleka kubverana mu ufumu muyo. Vose vimwevi vimbandochitisa kuti Ayuda azinji ambadere nkhawa momwe angasamalilire mabanja yawo. Ndawa ya mabvuto yose mwaya, anango ambaganiza kuti yenzelini nthawe yabwino kuti ayambe kumanga kachisi wa Yahova.—Hag. 1:2.

6. Mobverana na Zekariya 4:6, 7, ko ni mabvuto yaponi yomwe Ayuda adalimbananayo ndipo Zekariya adawalimbikisa tani?

⁶ Werengani Zekariya 4:6, 7. Kuingizira pa kusowa kobiri na kusabvana pa nkhani za ndale, Ayuda ambatsutsiwapomwe. Mu gole ya 522 azondi wawo adakwanisa kuchitisa kuti ufumu wa Perisiya uletse basa yomanga kachisi. Koma Zekariya adawatsimikizira Ayuda pakuwauza kuti Yahova adzaphatise basa mphanvu zake pakuwathandiza podiya kuti ankugumana na mabvuto yazinji. Koma mu gole ya 520 Mpfumu Dariyo idabvumiza kuti basa yokonza kachisi ipitirize. Ndipo iye adaperekambo kobiri zothandizira basa mweyi. Adalamulapomwe kuti maboma yanango yomwe enze nayo pafupi yathandizirembo.—Ezara 6:1, 6-10.

7. Ko ni madaliso yaponi yomwe Ayuda adatambira pakuikha basa ya Yahova pa malo yoyamba?

 ⁷ Pakuphatisa basa Hagai na Zekariya, Yahova adapolomisa wanthu wake kuti adzawathandize akayikha basa yomanga kachisi pa malo yoyamba. (Hag. 1:8, 13, 14; Zek. 1:3, 16) Ayuda adalimbikisiwa maninge na vomwe aneneri mwawa adanena. Ndipo adayambapomwe kumanga kachisi mu gole ya 520. Iwo adamaliza kumanga kachisi moyu akanati kumala magole 5. Iwo adatambira madaliso na thandizo ya Yahova mwa kuthupi na mwauzimu, ndawa yakuti adayikha basa ya Yahova pa malo yoyamba m’malo mwakuti ambandoganizire va mabvuto yawo. Ndawa ya vimwevi iwo adakwanisa kutumikira Yahova mokondwa.—Ezara 6:14-16, 22.

8. Ko mawu ya pa lemba ya Hagai 2:4 yatithandiza tani kuchita khama pa basa ya Mulungu? (Onani pomwe mawu ya mnyantsi.)

⁸ Pomwe chisautso chikulu chinkufendera, kuposhakale isepano tichadekana kubvera lamulo  ya kulalikira va ntontholo wabwino. (Maliko 13:10) Koma isepano vingakhale votishupa kuikha utumiki wathu pa malo yoyamba peno tinkugumana na bvuto ya kusowa kobiri panango kutsutsiwa mu umboni. Manje ko ni chani chomwe chingatithandize kuikha basa ya Yahova pa malo yoyamba? Isepano tichadekana kuthemba kuti ‘Yahova wa makamu’ b ali kumbali yathu. Iye adzapitirize kutithandiza tikaikha Ufumu wa Mulungu pa malo yoyamba. Ndipomwapa tichadekanalini kuchita mantha na chilichose.—Werengani Hagai 2:4.

9-10. Ko banja inango idaona tani kuti vomwe Yesu adanena pa lemba ya Mateyu 6:33 ni chaivo?

⁹ Onani chitsanzo cha Oleg na Irina, c banja yomwe itumikira ninge apainiya. Iwo adafuluka nkuyenda ku dera inango kuti akathandize mpingu munango. Patsogolo pake iwo adachosewa basa ndawa yakuti vinthu venze vidashupa pa nkhani ya kobiri mu dziko yawo. Iwo alibe kukwanisa kugumana basa kwa gole ibodzi. Koma nthawe zose ambawona kuti Yahova ankuwathandiza mwa chikondi. Ndipo nthawe zinango iwo ambatambira thandizo ya abale. Ko iwo angakwanisatani kulimbana na mabvuto mwaya? Oleg, yemwe pakuyamba wenze wokhumudwa adanena kuti: “Kukhala wotangwanika pa basa yolalikira, kudatithandiza kukhala wotangwanika na vinthu vomwe ni vodekana pa moyo.” Pomwe iye na nkazi wake ambapitiriza kufaga basa, iwo ambatangwanika na basa yolalikira.

¹⁰ Ntsiku inango pomwe iwo ambabwerera mu umboni, iwo adawona kuti shamwali wawo munango wenze adafamba nsenga ukulu maninge wamakilometro 160, kuti akwanise kuwasiyirako vakudya. Oleg adanena kuti: “Ntsiku mweyire isepano tidawonapomwe kuti Yahova na abale, atisamalira maninge ndipo atikonda. Tinkutsimikizira kuti Yahova asiyalini atumiki wake podiya pa nthawe yomwe mabvuto yawo yankuwoneka ninge yangamalelini.”—Mat. 6:33.

11. Tikambachita khama pakuchita chifuniro cha Mulungu, ko tidzatsimikize kuchita chani?

 ¹¹ Yahova ankufuna kuti timbatangwanike na basa yomwe idzapulumuse wathu, yomwe ni yolalikira. Ninge momwe tawonera mu  ndime 7, Hagai adalimbikisa wanthu wa Yahova kuti aleke kumbaganizira va magole yose yomwe enze adasiya kumanga kachisi. Ndipo adawauza kuti ayambepomwe kumanga kachisi moyu mwakhama. Iwo adakachita vimwevi, Yahova wenze adawapolomisa kuti ‘adzawadalise.’ (Hag. 2:18, 19) Isepanombo tingatsimikize kuti Yahova adzadalise khama yathu tikapitiriza kuikha pa malo yoyamba basa yomwe iye adatipasa.

12. Ndawa chani Ezara na Ayuda omwe adayenda nawo ku Yerusalemu ambadekana chikhulupiriro?

¹² Mu gole ya 468 , Ezara adatsogolera gulu yachiwiri ya Ayuda kuchoka ku Babulo kuyenda ku Yerusalemu. Ezara pabodzi na Ayuda omwe enze nawo, ambadekana chikhulupiriro kuti achite ulendo moyu. Iwo ambadekana kufamba munjira zoshupa na zogopsa alitakule ouro na siliva yemwe wenze adatumiziwa kuti akaphatisire basa pakumanga kachisi. Manje venze vosashupa kuti iwo aberewe. (Ezara 7:12-16; 8:31) Ndipo iwo ambadziwapomwe kuti ku Yerusalemu chaiko kwenze kosatetezeka. Kwenze kulibe wanthu azinji omwe ambakhalako. Malo yokhala, mpanda na vitseko vimbafunika kulimbisiwa. Ko tinkupfunzira chani kwa Ezara pa nkhani yothemba Yahova?

13. Ko Ezara adalimbisa tani chikhulupiriro chake kwa Yahova? (Onani pomwe mawu ya mnyantsi.)

¹³ Ezara adaona momwe Yahova achasamalilira wanthu wake pa nthawe yoshupa. M’magole yoyamba mu 484 vinkuoneka kuti Ezara ambakhala ku Babulo pomwe Mpfumu Ahasiwero idalamula kuti Ayuda ose omwe enze mu ufumu wose wa Perisiya aphewe. (Esitere 3:7, 13-15) Ezara kuphatanidzapo Ayuda ose ‘wa dera yose mweire’ moyo wawo wenze pangozi. Pomwe iwo adadziwa vomwe vimbafuna kuchitika, adayamba kulira, kuleka kudya na kukumbira kwa Yahova kuti awathandize. (Esitere 4:3) Ganizirani momwe Ezara na Ayuda anango adabvera pomwe nkhani mweyi idachinja pomwe wale omwe wenze adakonza chiwembu kuti aphe Ayuda adaphewa. (Esitere 9:1, 2) Vinthu vose vimwevi vidandothandiza Ezara pa mabvuto yose yomwe yambadzabwera kutsogolo. Ndipo vidachitisapomwe kuti iye akhale na chitsimikizo chakuti Yahova angateteze wanthu wake. d

14. Ko nchani chomwe mulongo munango adapfunzira padaona momwe Yahova adamusamalilira pa nthawe yoshupa?

¹⁴ Isepano tikaona momwe Yahova atisamalilira mu nthawe zoshupa, chikhulupiriro chathu chilimba maninge. Onani chitsanzo cha Anastasia, emwe akhala ku Europa Oriental. Iye adachoka basa ndawa yakuti anzake ambamuchichimiza kuti angenerere mu ndale. Iye adanena kuti: “Kamwaka kenze koyamba pa moyo wangu kuti nikhale niribe kobiri. Inepano nidasiya nkhani mweyi manja mwa Yahova, ndipo nidaona momwe iye adanisamalilira mwa chikondi. Ntsiku inango nikadzakhala kuti nililinipomwe pa basa, nidzakhalelini na mantha. Peno Ababa wangu wakudzulu ankunisamalira manjeuno, mosakayikira iye adzapitirize kunisamalira kutsogolo.”

15. Nchani chomwe chidathandiza Ezara kuthemba Yahova? (Ezara 7:27, 28)

¹⁵ Ezara adaona Yahova ankumuthandiza pa moyo wake. Pomwe Ezara ambaganizira va nthawe zomwe Yahova wenze adamuthandiza m’mbuyo, iye ambakhala na chitsimikizo chakuti Yahova adzamusamalire. Onani mawu aya, ‘djanja ya Yahova Mulungu wangu yenze pa ine.’ (Werengani Ezara 7:27, 28.) Ezara adafotokoza  vinthu volingana na vimwevi maulendo 6 mu bukhu yomwe adauziriwa kuti ainembe.—Ezara 7:6, 9; 8:18, 22, 31.

16. Ni pa vochitika viponi pomwe isepano tingakwanise kuona thandizo ya Yahova pa moyo wathu? (Onani pomwe foto.)

¹⁶ Yahova adzatithandize pomwe tinkulimbana na bvuto. Mwakulinganiza, kubasa tikakumbira abwana wathu kuti atibvume kukagumanika pa nsonkhano wachigawo panango kuti atichinjire nthawe yathu yophatira basa, kuti timbakwanise kugumanika pa misonkhano, isepano tikonza njira yowona momwe djanja ya Yahova inkutithandizira pa moyo wathu. Ndipo phindu yake ingakhale ikulu maninge kuposha yomwe timbadikhira. Patsogolo pake chikhulupiriro chathu kwa Yahova chikhala cholimba maninge.

17. Ko Ezara adaonesa tani kudzichepesa pomwe ambalimbana na mabvuto? (Onani foto ya pakhava.)

¹⁷ Ezara wenze wodzichepesa ndipo adapemphera kwa Yahova kukumbira kuti amuthandize. Nthawe zose pomwe iye ambakhala na nkhawa na vinthu vomwe ambafuna kuchita, modzichepesa ambakumbira thandizo kwa Yahova. (Ezara 8:21-23; 9:3-5) Aizirayeli anango adaona momwe Ezara ambathembera Yahova. Ndipo adayamba kumuthandiza na kutewedza chikhulupiriro chake. (Ezara 10:1-4) Pomwe tinankhawa na vosowa va pa moyo wathu, na momwe tingasamalilire banja yathu, isepano tichadekana kupemphera kwa Yahova na kumuthemba.

18. Nchani chomwe chingatithandize kuingizira chikhulupiriro chathu kwa Yahova?

¹⁸ Tikakhala odzichepesa na kunyang’ana thandizo kwa Yahova nkubvuma kuti abale wathu atithandize, chikhulupiriro chathu chidzakhale cholimba maninge. Erika, yemwe anawana atatu, adapitiriza kuthemba Yahova kuti adzamusamalire olo pomwe adzagumane na mabvuto. Kanthawe pang’ono iye adaluza mwana wake yemwe wenze akanati kubadwa na mwamuna wake yemwe ambamukonda maninge. Pakuganizira vose vimwevi vomwe vidachitika, iye adanena kuti: “Tingadziwiretulini vose vomwe Yahova angachite kuti atisamalire. Thandizo ingabwere mu njira yosadikhirika. Yahova adadawira maninge mapemphero yangu pa vinthu vomwe azishamwali wangu ambayankhula na vomwe adanichitira. Nikambakhala womasuka na azinzangu, vikhala vosashupa kuti iwo anithandize.”

19-20. Ko tapfunzira chani kwa Ayuda omwe alibe kukwanisa kubwerera ku Yerusalemu?

¹⁹ Isepano tingapfunzirembo chinthu chodekana maninge kwa Ayuda omwe alibe kukwanisa  kubwerera ku Yerusalemu. Anango wa iwo alibe kukwanisa kubwerera ku Yerusalemu ndawa yakuti wenze okalamba, odwala ndipo anango enze na maudindo m’banja. Olo venze teno, iwo adathandiza na vinthu vawo vakuthupi kwa wale omwe ambabwerera ku Yerusalemu. (Ezara 1:5, 6) Vinkuoneka kuti payadapita magole 19 kuchokera pomwe gulu yomba ya Ayuda idafika ku Yerusalemu, wanthu omwe enze adasalira ku Babulo, ambatumiza vopereka vawo ku Yerusalemu.—Zek. 6:10.

²⁰ Podiya pomwe tinkukwanisalini kuchita vose vomwe tinkufuna kwa Yahova, isepano tingatsimikizire kuti iye awona khama yathu yomwe tinkuchita. Ndipo vimwevi vikondweresa ntima wake. Ndawa chani tinkunena vimwevi? Ndawa mu nthawe ya Zekariya, Yahova adakumbira kuti mneneri wake akonze chisoti pakuphatisira basa ouro na siliva vomwe Ayuda omwe enze ku Babulo adatumiza ku Yerusalemu. (Zek. 6:11) ‘Chisoti cha ulemelero’ mwechi, chenze ninge ‘chikumbuso’ pa vopereka vomwe iwo ambachita mosaumira. (Zek. 6:14) Ni chibodzibodzimbo isepano tingakhale na chitsimikizo chakuti Yahova adzayebwelini khama yomwe tichachita yakumutumikira panthawe yoshupa.—Aheb. 6:10.

21. Ko nchani chomwe chidzatithandize kupitiriza kuganizira vakutsogolo?

²¹ Mosakaika isepano tipitirize kulimbana na mabvuto ntsiku zomalizira zino. Ndipo vinthu vipitirize kuipiraipira. (2 Tim. 3:1, 13) Koma tichadekanalini kubvuma kuti nkhawa zisokoneze chikhulupiriro chathu. Kumbukirani mawu yomwe Yahova adauza wanthu wake mu nthawe ya Hagai kuti: ‘Inepano nilinamwe . . . Ayi kukhala na nkhawa.’ (Hag. 2:4, 5) Isepanombo tichadekanalini kukayikira kuti Yahova adzakhale kumbali yathu tikapitiriza kuchita vomwe tingakwanise pakumutumikira. Tikaphatisa basa vinthu vomwe tapfunzira kwa Hagai na Zekariya, na kutewedzera chitsanzo cha Ezara, tidzapitirize kuthemba Yahova viribe basa mabvuto yomwe tidzagumane nayo kutsogolo.